Koloniko Tasoo 12:1-40
-
Wanaa toolu masale Deeve leŋ nda (1-40)
12 Teleŋ Deeve wa Sɔɔ po Kisi wo viŋi viŋiŋndo wo, mi puaa kua ndu kɔɔli Sikila. Nduyɛ, a wa o puaa chɔuwaa kpaayaa bɛnduaa mala ndu le chɔuwo wa tɛɛŋ.
2 Chiɔulaŋ la wa nda o laba, nduyɛ ndaa chaa faandalaŋ a chiŋuaŋ wuuwo a ba kɛndɔɔ vɛlɛ a ba miallo. Wanayaŋ Sɔɔ woŋ nda wa ni, fulaa o kaale Bɛŋjamiŋ ndeŋ choo.
3 Ahiɛɛsa wa nda bolleŋ ni, nduyɛ Chowaasi wa ndu ikɛi ni. Nda ŋiɔɔŋ kpou, Siɛmaa wa finya nda ni, wana waa Kibiya. Puaa haa bɛɛ wa loŋ, Chisiɛɛ a Pilɛti puaa Asimavɛti wa, Bɛluaka, Chehu, Anatɔti,
4 a Isimaya Kibiɔnaitiinɔɔ. Kuubanɔ kpaaya bɛndoo pila o wa o ŋwaŋ 30 wa tɛɛŋ ni, nduyɛ ndu wa nda bolleŋ ni. Puaa haa bɛɛ wa loŋ. Nda cho ni, Chɛluimaya, Chahasiɛɛ, Chohinaŋ, Chosabadi wana waa Kɛdɛlua,
5 Ɛlusai, Chɛluimɔti, Bialaya, Siɛmaluiya, Siɛfatiaa wana waa Haluifi,
6 Ɛlikana, Isiaaya, Asaluɛ, Choyisɛɛ, Chasiɔbiam fulaa o yuŋgu Kolua wo niŋ,
7 vɛlɛ a Chowɛɛla, Sɛbadaya po Chɛloham ndo, wana waa Kidɔɔ.
8 Mi puaa chɔuwa apum o yuŋgu Kaadi wo choo kua naa Deeve chua naa o wa o viaŋnaŋ o pollo niŋnda. Puaa chɔuwaa kpaayaa bɛnduaa pila nda wa ni, a sɔla pɛɛkoo le chɔuwo wa. A wa a bɛɛndiaŋ teleŋ o teleŋ a boola chɔula bɛndulaŋ vɛlɛ a baltaŋ o laba. Hɔlaa ndaa wa maa hɔlaa kpɔkuŋ,* nduyɛ ndaa keleŋa mɛɛ mɛɛ puuwɔɔ keleŋa nuaa o pemboŋ choo yɛ.
9 Esɔ wa nda bolleŋ ni, o diiŋ ndɔɔ Obadaya, o yaa ndɔɔ Ɛliaabi,
10 o hiɔɔloo Misimana, o ŋuɛɛnoo Chɛluimaya,
11 o ŋɔmpum ndo Atai, o ŋɔmmɛu wo Iliɛɛ,
12 o ŋɔmaa wo Chohinaŋ, o ŋɔmahiɔɔloo Ɛlisabadi,
13 o tɔ wo Chɛluimaya, o tɔ a pilɔɔ Makibanai.
14 Puaa fula o yuŋgu Kaadi wo niŋnda cho haa ni, nduyɛ nda wa puaa chɔuwa bolleŋ ni. Wana taaniŋndo nda tɛɛŋ ndoo tiuba mbo sɔŋga a puaa chɔuwa 100. Nduyɛ wana kpaaya bɛndoo nda tɛɛŋ ndoo tiuba mbo sɔŋga a puaa chɔuwa 1,000.
15 Puaa haa ndaa taŋ pioo Chɔɔdaŋ ni o paŋgii tasei niŋ, a teleŋ mɛŋndaŋ ma wa ma piaa cha mi ma hel o kɔŋgɔlaŋ ndo. Nduyɛ wanaa wa o lɛŋnde dɛŋgbɛleŋ niŋnda kpou, ma tuau nda okoŋ ma nyaanuŋ ba paaleŋ le chaŋ ndo a ba le del lo.
16 Mi puaa apum fulaa o yuŋgu Bɛŋjamiŋ ndo choo a o yuŋgu Chuda wo choo bɛɛ kua naa Deeve wa o viaŋnaŋ nda.
17 Okoŋ mi Deeve kua nda lachi, mbo dimul nda aa: “Te a yiyaŋ kɛndɔɔ nya hiŋ ni nduyɛ mi la nɔ yeemɛi le ya malaa, mɛɛ ŋ choŋnuŋ diompilɛ. Kɛ te le ya malɔɔ yaamɔɔwaa niaa o ba nya hiŋ ni mi che bɛɛ I tosa suɛi wɔɔŋ kɛ kɛ le, maa Mɛlɛka finyaa naa mamaa chɔ ndi mbo kelu yamɛi.”
18 Okoŋ, mi nyina Mɛlɛkaa tual Amasai choo,* o wa puaa chɔuwa 30 bolleŋ ndo. Mbo dimi aa:
“Num Deeve, le num naŋ cho ni. Nduyɛ num po Chɛɛse wo, ŋ cho latulu a num.
Maa wa o kɔl nyulu niŋ, nduyɛ mi wana cho num malaa wo wa o kɔl nyulu niŋ fɔ.Kanifuule, Mɛlɛka numndo cho num malaa ni.”
Okoŋ mi Deeve chɛl nda, mbo siiŋguu nda waŋ banaa puaa nduaa chɔuwa tɛɛŋ.
19 Teleŋ Deeve kuɛ latulu nda Filitiaŋnda le Sɔɔ Chɔulabaa wo, mi puaa a tiŋ fulaa o kaale Manaasɛ leŋ choo mal Sɔɔ, ma hiaunuŋ Deeve kɔɔli. Kɛ o mala lɛ Filitiaŋnda le, kanifuule mɛɛ waŋ banaa Filitiaŋnda suukaŋ ndapila tɛɛŋ, ma dimi aa: “O cho naa lakɔ malɔɔ, mbo hiounuŋ masanɔ ndɔɔ Sɔɔ kɔɔli, okoŋ ma kili naa bolle.” Le hei, ma miŋgi ndu.
20 Mɛɛ Deeve kuɛ Sikila, puaa ndaa hiounuŋ ndu kɔɔli fulaa o kaale Manaasɛ leŋ choo wa cho haa ni: Adinaa, Chosabadi, Chɛdiya, Maikɛɛ, Chosabadi, Ɛlihu, a Silɛtai. Nduyɛ puaa haa o kɛ kɛ wa waŋnda 1,000 bolleŋ o kaale Manaasɛ leŋ niŋ.
21 Le mɛɛ nda wa puaa kɔl simulaa nduyɛ ma nɔ kpaayaa yɛ, ma mala Deeve mbo chɔulaba a wanaa wɔɔŋaa kei waŋnda delɔɔ choo wa. Nduyɛ, ma simnuŋ masaa puaa chɔuwaa Deeve wa tɛɛŋ.
22 Lepaa o lepaa, waŋnda wa tuŋ hunɔɔ naa Deeve chua le ndu malaa. A lo hunɔɔ haaa mi dɔɔŋgɔ ndaa simnuŋ o bɛndu bɛndu maa dɔɔŋgɔ puaa chɔuwaa Mɛlɛkaa.
23 Puaa chɔuwa haa kuɛ naa Deeve chua Hɛbulɔŋ ni, nduyɛ a wa a bɛɛndiaŋ le chɔuwo. Ndaa kuɛ le ma puu Sɔɔ masaleŋ o ba ma ke Deeve, a mɛɛ Chɛhowa ndoo dimi yɛ.
24 Puaa chɔuwa Chuda, a ndaa nɔ boola chɔula bɛndulaŋ a baltaŋ o laba wa, a wa 6,800. Nduyɛ nda kpou wa a bɛɛndiaŋ le chɔuwo.
25 Puaa chɔuwaa kpaayaa bɛnduaa fula o yuŋgu Simiɔŋ ndo choo, nduyɛ ma nɔ kɔl simulaa wa, a wa 7,100.
26 A fula o yuŋgu Livaiyo choo wa, a wa 4,600.
27 Chɛhoyada wa puaa Elɔŋ nda bolleŋ ni. Nduyɛ puaa wa a ndu latulu wa, a wa 3,700.
28 Sadɔki bɛɛ wa nda tɛɛŋ. Chua piaandu ndoo nɔ kpaayaa a kɔl simulaa wo o wa ni. Mbo kua a wanaa lebolla 22, fulaa o yuŋgu finya ndɔ wo niŋ.
29 A fula o yuŋgu Bɛŋjamiŋ ndo choo wa, wanayaŋ Sɔɔ woŋ, a wa 3,000. Nduyɛ o nda tɛɛŋ, a bɔɔbɔɔ yuŋgu Sɔɔ wo nda wa paandu tooloo ni.
30 A fula o yuŋgu Ifiluem ndo choo wa, a wa 20,800. Puaa ndaa nɔ kpaayaa, kɔl simulaa, nduyɛ ma fula tɔɔ o yuŋgula finyaa ndaa niŋnda nda wa ni.
31 A fula o yuŋgu Manaasɛ wo tɛndaa tɛɛŋ niŋnda, ma hɛli puaa 18,000 le ma kɔ siiŋguu Deeve masaa.
32 A fula o yuŋgu Isaka wo choo ma bii sɔɔŋ bila, nduyɛ ma sina nyɛ Isɔluɛi nɔ le tosaa wo wa, wanaa ndaa lebolla wa 200. Nduyɛ wanayaŋ ndaŋ kpou, nda o ba bɛŋgu nda wa ni.
33 O yuŋgu Sɛbulɔŋ ndo choo, a wa 50,000 a ndaa suliŋ le chɔuwo wa. Puaa haa wa a bɛɛndiaŋ le chɔuwo, nduyɛ ndaa nɔ nyɛm chɔu suu o suu. Mi nda kpou kua naa Deeve chua a kɔl ndaa kpou.
34 O yuŋgu Nafitalii wo choo, ma hɛli wanaa lebolla 1,000, vɛlɛ a puaa chɔuwa 37,000. Nda kpou ndaa nɔ boola bɛndula chɔulaŋ a baltaŋ.
35 O yuŋgu Daŋ ndo choo, wanaa wa a bɛɛndiaŋ le chɔuwo wa, a wa 28,600.
36 O yuŋgu Asia wo choo, wanaa ndaa suliŋ ma wa a bɛɛndiaŋ le chɔuwo wa, a wa 40,000.
37 Puaa chɔuwaa fula Chɔɔdaŋ ndaŋ leeloo o yuŋgu Lubɛŋ ndo, yuŋgu Kaadi wo, a yuŋgu Manaasɛ wo tɛndaa tɛɛŋ niŋnda, a wa 120,000. Nduyɛ nda kpou ndaa nɔ nyɛm chɔu suu o suu.
38 Nda kpou puaa chɔuwa nda wa ni, nduyɛ a wa a bɛɛndiaŋ le chɔuwo. Ma kua naa Deeve chua Hɛbulɔŋ a kɔl ndaa kpou, le ma siiŋguu ndu masaa Isɔluɛi. Nduyɛ, wanaa tuaa o Isɔluɛi niŋ kpou wa diompilɛ le ma siiŋguu Deeve masaa.
39 Ma chii loŋ palɛi i yaa a Deeve latulu. A wa diolaŋ a kolɔɔ, kanifuule wanayaŋ ndaŋ ndaa chii niŋ bɛɛndiaŋ le nda.
40 Nduyɛ, wanaa wa nda kpɛɛluŋ nda a wanaa wa bɛɛ landaŋ nda, mɛɛ Isaka, Sɛbulɔŋ, a Nafitalii cho nuaa yɛ, a wa hunɔɔ a nyɛdiaa o sofɛliaa, nyɔɔmiaa, chɔluaa yɛyii muuliaŋ nda, a o nauwaa ndaa choo. Ma huŋ vɛlɛ a kpeyaŋndo, kato nda toosiaa a fikiima vesɛiyaŋ vɛlɛ a kilepiiyaŋ ndo, muɛiyaŋ, chuɛiyaŋ, nauwa, a saa tau tau. Kanifuule, waŋnda wa nyaaloo o Isɔluɛi niŋ.
