Koloniko Tasoo 13:1-14
13 Mi Deeve suukaŋ a wanaa wa ŋwaŋ waapilɛ a ŋwaŋ kɛmɛ bolle wa, vɛlɛ a wana o wana wa chilaŋ chuaa.
2 Okoŋ mi Deeve dimul Isɔluɛiyaa wa a chuuŋgiaŋ loŋ nda kpou aa: “Te o bɛnda pɛ a nya nduyɛ mi Chɛhowa Mɛlɛka naa chɛl, mɛɛ ŋ yɔŋnuŋ yooŋgoo o Isɔluɛiyaa tuaa lo o tanda Isɔluɛiyo niŋ kpou, a o wanaa soliaa lasalaa lo vɛlɛ a Livaiyaa cho o chieeŋ ndaŋ bɛndoŋ* niŋnda le ma chuuŋgiaŋ naapilɛ, ma hiŋ naa naa chua,
3 okoŋ miŋ kɔ huŋ a Kɔfu Mɛlɛka naa.” Kanifuule a ve ndu chaa biyɔɔ o palɛi Sɔɔ ve niŋ te.
4 Mi waŋnda kpou chɛl le keŋ tosaa, kanifuule ma cha maa kɛɛsiaa kɛndɔɔ pila o cho ni.
5 Okoŋ, mi Deeve chuuŋgiaa Isɔluɛiya kpou, chɔŋ o pioo Ichipi* haaa Lɛbo-Hamaati,* le ma kuɛ Kiliaati-chiaaluim ma kɔ chua Kɔfu Mɛlɛka tonyaa.
6 Mi Deeve a Isɔluɛiya kpou kua Baala, koŋ cho ni Kiliaati-chiaaluim, chioo o Chuda niŋ, le ma kɔ chua Kɔfu Chɛhowa wo, Mɛlɛka tonyaa, o cho ichali o kpeŋgbei* ndɔ lemasaa choo chɛlɔbiiya choo wo.* Nduyɛ loŋ nda veelu diola ndɔlaŋ ni.
7 Kɛ mɛɛ nda kɔ chua Kɔfu Mɛlɛka tonyaa o chiɛi Abinadabi wo niŋ, ma kɛsi ndu o nyɛ viliaa lawolɔɔ sɛnɛi nda toosiaa wo niŋ. Nduyɛ, Yusaa nda Ahayo sim lachi ni ma wa kɔlaŋ a ndu.
8 Deeve nda waŋnda Isɔluɛi kpou wa kpeŋjoo Mɛlɛka tonyaa lachi a kɔl ndaa kpou. A wa chondoŋ solioo, ma luaa towalaŋ, nyɛm chaaŋ iyooŋ, dundula pɔmbɔlaŋ, a kumbula ŋchiliŋndaŋ. Nduyɛ a wa vɛlɛ bululaŋ hɔŋndo.
9 Kɛ mɛɛ nda fuuluu o yasaba luaa ŋwitiiyo Chidɔŋ, mi nauwa kpekesiaa Kɔfu Mɛlɛkaa mbo huŋ le delɔɔ. Okoŋ, mi Yusaa saa ndu.
10 Le hei, mi Chɛhowa duaunuŋ tumbe o kala kala a Yusaa le mɛɛ o soli baa mbo pilaŋ Kɔfoo yɛ. Okoŋ, mbo dii ndu loŋ.
11 Kɛ mi Deeve tambu kɔl tau le mɛɛ Chɛhowa dɔɔnuŋ tumbe a Yusaa mbo dii ndu yɛ. Nduyɛ haaa a paale hauleŋ ndeŋ, fondaŋ koŋ nda veelu ni aa Pɛluɛsi-yusaa.*
12 Le hei, mi Deeve yɔŋ siooŋnde le Mɛlɛka tonyaa o paale leŋ choo. Mbo dimi aa: “Vɛɛnɛ ya cho yɛ looku hunɔɔ a Kɔfu Mɛlɛka tonyaa o ya lo?”
13 Deeve hiŋ lɛ a Kɔfoo o ndu lo chiee le, koŋ cho ni, Chiee Deeve Wo. Kɛ mbo tosa ma kua a ndu o chiɛi Obɛdi-idɔm ndo, wana waa Kaati.
14 Le paŋgoŋ ŋgaa, Kɔfu Mɛlɛka tonyaa wa o chiɛi Obɛdi-idɔm ndo niŋ. Nduyɛ, mi Chɛhowa hiau lachi a yuŋgu Obɛdi-idɔm ndo salaa dɔwɔɔ, vɛlɛ a nyɛ o nyɛ ndoo nɔ.
Tɛɛsiaalaŋ
^ Hibuluiye, “chieeŋ bɛnduŋ nɔ fondaŋndaŋ le chɔluaa diolaŋ ndoŋ.”
^ Ɔɔ “Sihɔɔ o Ichipi niŋ.”
^ Ɔɔ “le luɛiyɔɔ Hamaati.”
^ Ɔɔ “kpɛŋɛ”
^ Ɔɔ “chɛlɔbiiya tɛɛŋ ndo.”
^ O sim, “Naa Nda Dɔɔnuŋ Tumbe a Yusaa Wa.”
