Koloniko Tasoo 14:1-17
14 Mi Masaa Hiluam o Taaya niŋ yɔŋ waŋnda a yooŋgoo naa Deeve chua. Mbo yɔŋ vɛlɛ yɔmii sida ve, kaapindɛiya,* a mɛɛsinɛiya* le ma teŋgul ndu chiɛiyo.*
2 Mi Deeve sina kɛsɛ maa Chɛhowa tosa mi masale o ke ndu Isɔluɛi leŋ le sim yi. Nduyɛ, mbo tosa mi masale ndɔleŋ le sɔla tɔɔ le sabu wanaa nduaa, Isɔluɛiya.
3 Mi Deeve chɔɔlu laanduaa chua o Chulusalɛm niŋ, nduyɛ mbo chɔɔlu puaa a waŋ laanduaa violɔɔ.
4 Chuauwaa nda vilul ndu Chulusalɛm nda cho haa ni: Siaamua, Siobabi, Netaŋ, Sɔlɔmɔŋ,
5 Ibihaa, Ɛlisuaa, Ɛlipɛlɛti,
6 Nokaa, Nifɛki, Chafiya,
7 Ɛlisiama, Bɛɛliada, a Ɛlifɛlɛti.
8 Mɛɛ Filitiaŋnda tuei maa Deeve sɔla pɔyaa le waa masaa o Isɔluɛi niŋ, mi nda kpou chaŋ le ndu kɔlaŋ nuuviaa. Mɛɛ Deeve tuei a ndi okɔɔ, mbo kɔ chiŋalaŋ nda.
9 Okoŋ mi Filitiaŋnda huŋ, ma kandu wanaa wa o Kpoloŋndo* Luɛfem niŋnda delɔɔ choo ma puŋga nyɛm ndaŋ.
10 Mi Deeve nyuna Mɛlɛka aa: “Baa I kɔ chiŋalaŋ Filitiaŋnda? A cho nda malɔɔ ya o ba?” Mi Chɛhowa mulul ndu aa: “Ei, kɔ. I cho Filitiaŋnda malɔɔ num o ba.”
11 Okoŋ mi Deeve kua Baal-pɛluasim, mbo kɔ diu diu nda loŋ. Mbo dimi aa: “Mɛlɛka tonyaa pɛl yaamɔɔwaa niaa ya lachi mɛɛ mɛŋndaŋ ma pial nuaa kpakioo yɛ.” Le sabu hoo nda ke fondaŋ koŋ diolaŋ ni aa Baal-pɛluasim.
12 Mi Filitiaŋnda mɛi mɛlɛkaa ndaa loŋ, nduyɛ mi Deeve dimul waŋnda maa a lom nda, okoŋ ma luam nda.
13 Okoŋ kɔɔli, mi Filitiaŋnda huŋ del vɛlɛ wanaa wa o Kpoloŋndo* niŋnda choo ma puŋga nyɛm ndaŋ.
14 Mi Deeve nyuna vɛlɛ Mɛlɛka. Kɛ mi Mɛlɛka tonyaa dimul ndu aa: “Kua nda o hɔl sanaa le. Kɛ kei nda amakɔɔ, okoŋ ma fulal nda o yɔmii bakaa ve, ma chiŋalaŋ nda a sɔŋgɔɔ.
15 Te a tuei pɛ bɔɔluuwo o yɔmii bakaa ve choo mɛɛ waŋnda wa nuaa kɔlaŋ yɛ, chɔŋ ma kɔ chiŋalaŋ nda. Kanifuule, ya Mɛlɛka tonyaa cho num wa koŋ kɔlaŋ lachi ni le puaa chɔuwaa Filitiaŋnda diuwo.”
16 Mi Deeve tosa mɛɛ Mɛlɛka tonyaa dimul ndu yɛ, nduyɛ ma lo puaa chɔuwaa Filitiaŋnda diuwo chɔŋ Kibiɔŋ haaa kɔ Kiisa.
17 Mi tɔɔ Deeve wo tiu o lɛŋnde niŋ kpou, nduyɛ mi Chɛhowa tosa mi kaalaŋ kpou la nɔ siooŋii nduɛi.
Tɛɛsiaalaŋ
^ Ɔɔ “minisieeya.”
^ Ɔɔ “maasɔŋnda.”
^ Ɔɔ “chiɛi lemasaa.”
^ Ɔɔ “Lɛŋnde Dɛŋgbɛleŋ.”
^ Ɔɔ “Lɛŋnde Dɛŋgbɛleŋ.”
