Koloniko Tasoo 16:1-43
16 Okoŋ ma huŋ a Kɔfu Mɛlɛka tonyaa, ma kɛsi ndu o tɛndii Deeve ndoo toosiaa wo niŋ. Okoŋ kɔɔli, ma soli salala luamaa laŋ a salala kɔl nyulu laŋ Mɛlɛka tonyaa lachi.
2 Mɛɛ Deeve chii salala luamaa laŋ a salala kɔl nyulu laŋ soli, mbo duau waŋnda sala o diola Chɛhowa laŋ niŋ.
3 Okoŋ kɔɔli, Isɔluɛiya kpou, wana pɔnɔ ni, wana lanɔ ni, o kɛ kɛ mbo ke ndu beedii tiu tiuwo* kpuŋgbɛi i pilɛ, kato nda toosiaa a kɛmbɛŋ wauwo* wo kpuŋgbɛi i pilɛ, a kato nda toosiaa a fikiima vesɛiyaŋ ndo kpuŋgbɛi i pilɛ.
4 Nduyɛ, mbo yulu Livaiya a pum iso le ma wa wallo Kɔfu Chɛhowa Wo lachi, okoŋ ma ke* Chɛhowa Mɛlɛka Isɔluɛiya bɛɛleŋ, ma mel ndu balikaa, nduyɛ ma saŋgala ndu.
5 Asafi wa nda bolleŋ ni, nduyɛ Sɛkalaya wa ndu ikɛi ni. Chɛyɛɛ, Siɛmilamɔti, Chɛhayɛɛ, Matitiya, Ɛliaabi, Bɛnaya, Obɛdi-idɔm, a Chɛyɛɛ ndaa luaa nyɛm chaaŋ iyooŋ ni a towalaŋ. Asafi ndoo luaa kumbula ŋchiliŋndaŋ ni.
6 Bɛnaya nda Chahasiɛɛ wanaa soliaa lasalaa, ndaa hɔŋ bululaŋ teleŋ o teleŋ kɔfu kpema Mɛlɛka tonyaa lachi ni.
7 Paale taseleŋ le wa leŋ ni mi Deeve ke Asafi a chaaŋaa nduaa Livaiya chondei, le ma soli le Chɛhowa balikaa mello:
8 “La mel Chɛhowa balikaa, la veelu diola ndɔlaŋ.La dimul waŋnda a sɔɔŋ o tosa woŋ okɔɔ!
9 La solul ndu chondei, la saŋgala ndu o chondei niŋ.*La yiyaŋ* a walta ndɔla kɔndɔfiltaŋ kpou okɔɔ.
10 La pɛɛluŋ a diola ndɔla diandaa laŋ.
Maa wanaa cho Chɛhowa nuuviaa wa dɔɔnuŋ nyaale o kɔlta ndalaŋ niŋ.
11 La nuuviaa Chɛhowa, nduyɛ mi la nyuna ndu le mbo ke nya yoomuaŋ.
La nyuna ndu le malaa teleŋ o teleŋ.
12 La loonuŋ a walta ndɔla kɔndɔfiltaŋ okɔɔ,Kaamaala ndɔlaŋ, vɛlɛ a yamaŋ o kelu woŋ.
13 Nya chuauwaa mamaa* Isɔluɛi buɛi ndɔ wa,Nya puaa Chekɔpu wa, wanaa nduaa o hɛli wa.
14 Ndu cho Chɛhowa Mɛlɛka naa ni.
Ndu kialu yamaŋ o lɛŋndeŋ choo kpou ni.
15 Fɛɛŋ bɛɛ o puɛɛnuŋ a kpema ndɔɔ,Vɛlɛ a buŋgɛi o chua le wanaa cho hunɔɔ o chilaŋ niŋ o waalaŋ niŋnda le.
16 Kpemaa hoo o yii a Ebilaham ni,Nduyɛ mbo chuel Aase buŋgɛi mbo mɛnaŋ po.
17 Mbo yii vɛlɛ kpemaa hoo a Chekɔpu.Nduyɛ kpema fɛɛŋ a fɛɛŋndo o cho le Isɔluɛi ni.
18 Mbo dimi aa: ‘I cho nya lɛŋnde Kenaŋ ndeŋ ke,Mi le simnuŋ nyɛm kɛŋ nya.’
19 A teleŋ nyaa kuiyɔ tau le wo o chuel nya buŋgɛi hei ni.A tonya, nyaa kuiyɔ tau le, nduyɛ mialla nya wa o lɛŋndeŋ niŋ ni.
20 A wa balɔɔ o lɛŋnde niŋ.A chɛŋ pɛ o masaleŋ ndeŋ bɛŋgu, a kuɛ o masale cheleŋ bɛŋgu.
21 Mɛlɛka chɛl mi wana o wana tusi nda nyɛpalaa choo le,Kɛ mbo tusi masaa waa nyɛpalaa choo le nda.
22 Mbo dimi aa: ‘La pilaŋ wanaa niaa ya pɔya wa le,Nduyɛ wanaa niaa suaa le ya wa, la tosal nda nyɛ o nyɛ wɔɔŋ te.’
23 Nya waŋnda o lɛŋndeŋ choo kpou, la solul Chɛhowa chondei!
Lepaa o lepaa, la yonda maa ndu cho wana piŋiaa ni!
24 La dimul waŋnda o lɛŋnde niŋ a naŋɔɔ ndɔ bɛndoo okɔɔ,Nduyɛ, mi la dimul nda kpou a walta ndɔla kɔndɔfiltaŋ okɔɔ.
25 Kanifuule Chɛhowa cho o bɛndu, nduyɛ o nɔ mbo sɔla saŋgalaa.
Mɛlɛka waŋnda nɔ ma nɔ siooŋii nduɛi mbo hiou mɛlɛkaa cheleŋnda kpou wo o cho ni.
26 Kanifuule, mɛlɛkaa fonduaa mɛlɛkaa waŋnda chieeya kpou cho ni,Kɛ Chɛhowa ndu, ndu toosiaa choo choo ni.
27 Kpaaya ndɔɔ a naŋɔɔ ndɔ bɛndoo cho ndu o balaa silɔ.Kpaayaa a nyaaloo cho o fondaŋ o cho wo.
28 Yuŋgulaŋ o lɛŋndeŋ choo kpou, la ke Chɛhowa bɛɛle o nɔ mbo sɔla leŋ.La ke Chɛhowa bɛɛle o nɔ mbo sɔla leŋ le naŋɔɔ ndɔɔ a kpaaya ndɔɔ.
29 La ke Chɛhowa bɛɛle diola ndɔlaŋ la nɔ mi la sɔla leŋ.La huŋ a kela nyalaŋ naa ndu chua.
La beŋ Chɛhowa wulaŋ a nyɛla diandaa laŋ lekɔɔ.
30 Waŋnda o lɛŋndeŋ choo kpou, la nyiiya ndu lachi!
Lɛŋndeŋ le cho le fɛɛŋ a fɛɛŋ, nyɛ o nyɛ nɔla leŋ faŋa* o foofo ndɔɔ le.
31 Maa choo choo dɔɔnuŋ nyaale, nduyɛ mi lɛŋndeŋ le wa a kɔl kɛndɛ.La dimul kaalaŋ kpou aa: ‘Chɛhowa simnuŋ Masaa!’
32 Maa pee mɛŋma ihɛllo a nyɛ o nyɛ cho leniŋ deŋi choo choo a bɔɔluu bɛndoo,Mi yondolaŋ a nyɛ o nyɛ cho leniŋ dɔɔnuŋ nyaale.
33 Yɔmii cho o bundɔɔ niŋnde bɛɛ deŋi a nyaaloo Chɛhowa lachi,Kanifuule o cho hunɔɔ* le lɛŋndeŋ yamɛi kilullo.
34 La mel Chɛhowa balikaa, kanifuule o cho wana kɛndɛ.Kaala lo lechoo ndɔɔ cho le fɛɛŋ a fɛɛŋ.
35 Nduyɛ la dimi aa, ‘Oo Mɛlɛka piŋi naa wo, piŋi naa fɔ!Soli naa o lɛŋnde niŋ ma chuuŋgiaa naa naapilɛ,Le halikpeŋ miŋ mel diola numnda diandaalaŋ balikaa,Nduyɛ miŋ saŋgala num a kɔl kɛndɛ.
36 Maa Chɛhowa, Mɛlɛka Isɔluɛiya sɔla saŋgalaa,Le fɛɛŋ a fɛɛŋ fɔ!’”
Okoŋ, mi waŋnda kpou dimi aa, “Amiina!”* Nduyɛ ma saŋgala Chɛhowa.
37 Okoŋ kɔɔli, mi Deeve mɛi Asafi a wanayaŋ ndɔŋ o Kɔfu kpema Chɛhowa wo hɔlndɔ, le ma wa wallo tosaa loŋ teleŋ o teleŋ mɛɛ ndaa tosa lepaa o lepaa yɛ.
38 Obɛdi-idɔm a wanayaŋ ndɔŋ 68, a Obɛdi-idɔm po Chɛdutɔŋ ndo, vɛlɛ a Hoosa wa wanaa ndaa manda diola kpakilaŋ nda ni.
39 Sadɔki wana soliaa lasalaa a chaaŋaa nduaa wanaa soliaa lasalaa wa o tɛndii Chɛhowa wo hɔlndɔ ni, o fondaŋ filioŋndo Kibiɔŋ,
40 le ma wa salala luamaa laŋ solioo teleŋ o teleŋ o Chɛhowa lo o bandu luamaa lasalaa choo idii a ichɔl. Nduyɛ, nyɛ o nyɛ cho o poonyiaa o sawala Chɛhowa ke Isɔluɛiya laŋ niŋ, ndaa nɔ ma tosa ndu kpou.
41 Himaŋ nda Chɛdutɔŋ wa a nda latulu vɛlɛ a puaa nda hɛli, ma poonyiaa nda diolaŋ le Chɛhowa balikaa mello wa. Kanifuule, “kaala lo lechoo ndɔɔ cho le fɛɛŋ a fɛɛŋ.”
42 Nduyɛ, Himaŋ nda Chɛdutɔŋ wa a nda latulu le bululaŋ hɔŋndo, kumbula ŋchiliŋndaŋ lɔɔ, vɛlɛ a nyɛm chaaŋ cheleŋ ndaa soliŋ kpeku le Mɛlɛka tonyaa saŋgalaa woŋ. Nduyɛ, puaa Chɛdutɔŋ nda wa o dio kpakioo ni.
43 Okoŋ, mi waŋnda kpou kuaŋnuŋ o la nda lo bɛɛ, nduyɛ mi Deeve kua le yuŋgu ndɔɔ salaa dɔwɔɔ.
Tɛɛsiaalaŋ
^ Ɔɔ “bulu nda toosiaa tiu tiu maa ikela wo.”
^ Wauwo hoo, o lɛŋnde Palɛstaŋ ndeŋ niŋ wana saaluŋ ndu tau ni.
^ Hibuluiye, “ma loonuŋ.”
^ Ɔɔ “la loolul ndu nyɛchaa.”
^ Ɔɔ naapum, “La soo.”
^ Hibuluiye, “kulii.”
^ Ɔɔ “hiiluu.”
^ Ɔɔ “o hiŋ.”
^ Ɔɔ “I Yɔŋnuŋ Lende Fɔ!”