Koloniko Tasoo 17:1-27
17 Dimioo nuaa mi Deeve hiau o chiɛi ndɔ lemasaa niŋ, mbo chal niko kpeekpei, mbo dimul Netaŋ wana suaa le Mɛlɛka wo aa: “I cho o chiɛi nda taŋgul a yɔmii sida ve wo niŋ, kɛ mi kɔfu kpema Chɛhowa wo ndu wa o tɛndiiyo niŋ.”
2 Mi Netaŋ dimul Deeve aa: “Tosa nyɛ o nyɛ cho num o kɔl, kanifuule Mɛlɛka tonyaa cho a num latulu.”
3 Ichɔl koŋ, mi Mɛlɛka suu naa Netaŋ chua. Mbo dimul ndu aa:
4 “Kɔ dimul buɛi nuu Deeve aa, ‘Nyɛ ya Chɛhowa dimi wo cho hoo ni: “O cho num te cho ya chiɛiyo teŋgul le mi wa leniŋ te.
5 Chɔŋ a teleŋ ya soli Isɔluɛiya o lɛŋnde Ichipi leŋ niŋndo haaa a paale hauleŋ ndeŋ, o cho o chiɛi niŋ te ya wa le, kɛ o tɛndiilaŋ niŋ ya wa kelaa ni.
6 Teleŋ hiou hoo wo kpou, I wa balɔɔ a Isɔluɛiya latulu. Nduyɛ wanaa kialaa ŋyamaa ya yulu iso le wanaa niaa mandaa wa, baa o pilɛ bɛɛ I ŋɔɔchiaŋ pa o lani aa, ‘Le yɛɛnɛ la teŋgul la chiɛiyo a yɔmii sida ve le?’”’
7 “Lelaŋ, dimul buɛi nuu Deeve aa, ‘Nyɛ ya Chɛhowa, Mɛlɛka puaa chɔuwa dimi wo cho hoo ni: “Ya soli num naa ŋ wa saa mandaa yondoo niŋnda ni, le ma wa simlachinɔɔ le wanaa niaa, Isɔluɛiya.
8 Ba o ba ŋ kɔ, I cho wa a num latulu, nduyɛ mi wɔɔsuu yaamɔɔwaa numnda kpou num lachi. I cho tosa ma pɛlnuŋ ladio maa wanaa fula tɔɔ o lɛŋndeŋ choo wa.
9 I cho chaltaŋ nuuviaa le wanaa niaa Isɔluɛiya, mi kɛsi nda loŋ. A cho wa loŋ nduyɛ nyɛ o nyɛ paaliaŋ lɛ niŋ nda le. Wanaa dɛnɛ wɔɔŋnda saaŋgiaa lɛ niŋ nda maa paandu le.
10 Kanifuule, chɔŋ a teleŋ ya hɛli wanaa kialaa ŋyamaa le ma wa nda choo wo, a wa nda saaŋgiaa. I cho tosa yaamɔɔwaa numnda paaliaŋ lɛ num te. Nduyɛ mi dimul num, ‘Ya Chɛhowa cho num chiɛiyo teŋgul ni.’
11 “‘“Te a huŋ wu pɛ, ma kumbu num,* I cho puaa numnda* o pilɛ hɛli chuauwaa numnda tɛɛŋ, mi ke ndu masaleŋ. Nduyɛ, I cho tosa mi masale ndɔleŋ le sim yi.
12 Ndu cho ya chiɛiyo teŋgul ni, nduyɛ I cho tosa mi kpeŋgbei* ndɔ lemasaa wa le fɛɛŋ a fɛɛŋ.
13 I cho simnɔŋ finya ndɔ, mi ndu bɛɛ simnuŋ po ni. I cho ndu kaala lo lechoo nuu faŋa choo, mɛɛ ya faŋa ndu masa keeku ndu lachi wo choo yɛ le.
14 I cho tosa mbo chal o kpeŋgbei ni lemasaa choo le fɛɛŋ a fɛɛŋ, nduyɛ masale ndɔleŋ le cho wa le fɛɛŋ a fɛɛŋ.”’”
15 Mi Netaŋ dimul Deeve yooŋgoo hoo a nyɛ o nyɛ o tuei o yilaŋnde hei niŋ.
16 Okoŋ, mi Masaa Deeve luɛi mbo chal Chɛhowa lachi. Mbo dimul ndu aa: “Oo Chɛhowa Mɛlɛka, wana maavɛɛ kpeekpei ya cho yɛ? Nduyɛ, yɛɛ kpeekpei yuŋgu nuu cho yɛ le ya hei kpou tosallo?
17 Oo Mɛlɛka, sɔɔŋ ŋ tosal la niŋndoŋ cho bɔɔ. Kɛ a koŋ kpou, a chɔm vɛlɛ ya buɛi numndo sɔɔŋ ŋ cho tosa le yuŋgu nuu o siɔdii lachioo niŋ pɔɔli woŋ. Oo Chɛhowa Mɛlɛka, a chua ya maa wana tɔɔ bɛndu bɛndoo ya cho ni.
18 Sondo suaa bɛɛ ya buɛi numndo Deeve nɔ le, kanifuule a sina ya walaŋ.
19 Oo Chɛhowa, le ya buɛi numndo ŋ tosa sɔɔŋ bɛndoŋ muŋ kpou ni, nduyɛ ma chɔm ya buɛi numndo muŋ le mi diomnde numndeŋ le peeluŋ, okoŋ ma chɔm tɔɔmayɛi numnde.
20 Oo Chɛhowa, wana o wana cho maa num te, nduyɛ numpilɛ kpe cho Mɛlɛka tonyaa ni. Sɔɔŋ naŋ tueiyoŋ kpou chɔm kɛsɛ maa hei cho tonya.
21 O lɛŋndeŋ choo kpou, nɛɛ yaa kpeekpei cho yɛ maa wanaa numnda, Isɔluɛiya? Num Mɛlɛka tonyaa, ma kɔ baŋa wanaa numnda haa. Ma tosa sɔɔŋ kɔndɔfiliŋ bɛndoŋ le nda, mi diola numndaŋ la fula tɔɔ. Ma tuau kaalaŋ wanaa numnda lachi, a ŋ baŋa o Ichipi niŋnda.
22 Oo Chɛhowa, a chua Isɔluɛiya maa wanaa numnda kpeekpei nda cho ni le fɛɛŋ a fɛɛŋ, nduyɛ ma simnuŋ Mɛlɛka ndaa.
23 Lelaŋ, Oo Chɛhowa, ya buɛi numndo, buŋgɛi ŋ chuel la a yuŋgu nuu ve, tosa a sabu mi i peeluŋ le fɛɛŋ a fɛɛŋ. Nduyɛ maa tosa mi buŋgɛi ŋ chuel la ve i peeluŋ fɔ!
24 Maa tosa mi diola numndaŋ la sɔla saŋgalaa le fɛɛŋ a fɛɛŋ, okoŋ mi waŋnda dimi aa, ‘Chɛhowa, Mɛlɛka puaa chɔuwa, ndu cho Mɛlɛka Isɔluɛiya ni.’ Nduyɛ ya buɛi numndo Deeve, maa tosa mi yuŋgu nuu wa le fɛɛŋ a fɛɛŋ num o hɔl fɔ!
25 Kanifuule num Mɛlɛka nuu, a chɔm ya buɛi numndo sabu ŋ cho chiɛiyo hoo taŋgullo wo. Le saboo hoo kpeekpei ya buɛi numndo bii kɔllo ni mi wa piɛileŋ ndeŋ o numndo.
26 Lelaŋ, oo Chɛhowa, num cho Mɛlɛka tonyaa ni, nduyɛ num dimi ni maa a cho ya buɛi numndo sɔɔŋ kɛndɔŋ muŋ tosal.
27 Lelaŋ, maa i wa hɛnaŋ numndo le ma dɔu yuŋgu nuu sala fɔ! Maa yuŋgu nuu hiou lachi a waa num o hɔl le fɛɛŋ a fɛɛŋ, kanifuule num Chɛhowa, a dɔu yuŋgu nuu sala, nduyɛ sala koŋ cho ndu wa choo le fɛɛŋ a fɛɛŋ.”
Tɛɛsiaalaŋ
^ Hibuluiye, “ma yambu num maa finyaa num aa mamaa.”
^ Hibuluiye, “kulii numnde.”
^ Ɔɔ “kpɛŋɛ.”
