Koloniko Tasoo 18:1-17
18 Mɛɛ teleŋ tiŋ hiou, mi Deeve sɔŋga a Filitiaŋnda, mbo yam nda. Nduyɛ, mbo bii Kaati a chieeŋ cho o tanda ndɔɔ niŋndoŋ Filitiaŋnda o ba.
2 Okoŋ, mbo yam Mowabaitiiya. Mi Mowabaitiiya simnuŋ buɛiyaa Deeve wa, nduyɛ mi ndaa mal ndu paawaa* o ba.
3 Mi Deeve yam vɛlɛ Hadadiisa masaa le Soba, Hamaati ikɛi. O wa kɔlaŋ o Pioo Yufiluaati le mbo kɔ bii tanda koŋ, mbo wa ndu o ba bɛŋgu.
4 Mi Deeve bii nyɛla nyaanaŋnda suaa naŋndaŋ 1,000, wanaa nyaanuŋ suaa wa 7,000, a puaa chɔuwaa kua a ŋpelu wa 20,000 ndu o ba. Nduyɛ, mi Deeve kili kili suaa naŋ nyɛm nyaanaŋndoŋ nda kpou nyɛsuaŋ. Suaa 100 kinɛi o mɛi ni o kili nda manyɛsu le.
5 Mɛɛ waŋnda Siiliaa o Damasikɔɔ niŋ hiŋ le Hadadiisa, masaa le Soba chɔuwo malaa, mi Deeve diu diu Siiliaŋnda 22,000.
6 Okoŋ, mi Deeve kɛsi puaa chɔuwa kundalaŋ yɛ yɛ Siiliaa o Damasikɔɔ niŋ. Mi waŋnda Siiliaa simnuŋ buɛiyaa Deeve wa, nduyɛ mi ndaa mal ndu paawaa o ba. Ba o ba Deeve ndoo kuɛ pɛ o chɔuwo, mi Chɛhowa ndoo tosa mbo yem yaamɔɔwaa nduaa.
7 Okoŋ kɔɔli, boola tiu tiula nda toosiaa a kooliiyoŋ le chɔuwo laŋ, mi Deeve bii laŋ puaa chɔuwaa Hadadiisa wa o ba, mbo kuaŋnuŋ a laŋ Chulusalɛm.
8 Mi Deeve chua chiliŋuŋ siaŋaŋ ŋ hɔbɛi o chieeŋ bɛnduŋ Hadadiisa woŋ niŋ, Tibihati a Kuŋ. Muŋ Sɔlɔmɔŋ soliŋ kpeku ni mbo toosiaa Hɛŋgɛi Bɛndu wouwaa mamɛŋndo, ma veelu ndu aa, Pee Mɛŋma Ihɛl chiliŋii siaŋɛi,* suŋgbuaŋ, a nyɛm laanduŋ chiliŋuŋ siaŋaŋ.
9 Mɛɛ Towu, masaa le Hamaati tuei maa Deeve yem puaa chɔuwaa Hadadiisa wa kpou masaa le Soba,
10 o lepilɛ niŋ kpe, mi Towu viam Hadoluam po ndɔ naa Masaa Deeve chua le ndu yilɔɔ, nduyɛ mbo mel ndu balikaa le mɛɛ o chɔulaba Hadadiisa mbo yam ndu yɛ. (Kanifuule, Hadadiisa ndoo chiŋalaŋ niŋ Towu a sɔŋgɔɔ le teleŋnda bɔɔbɔɔ.) Mɛɛ o wa kɔlaŋ, mbo yoo ndu nyɛm nda toosiaa a kooliiyoŋ, kaniŋ humboŋ, vɛlɛ a chiliŋuŋ siaŋaŋ ndoŋ.
11 Mi Masaa Deeve chua nyɔɔŋ muŋ mbo yɔŋgu muŋ le miŋ wa le Chɛhowa, latulu a kaniŋ humboŋ vɛlɛ a kooliŋ o chua o lɛŋnde hei niŋndoŋ. Ndi cho ni: Idɔm, Mowaabi, Amɔnaitiiya, Filitiaŋnda, a Amalɛkaitiiya.
12 Mi Abisiaa, po Sɛluiya wo dii Idɔmaitiiya 18,000 o Kpoloŋ Ihɛllo.
13 Mbo kɛsi puaa chɔuwa kundalaŋ yɛ yɛ o Idɔm niŋ. Nduyɛ, mi Idɔmaitiiya kpou simnuŋ buɛiyaa Deeve wa. Ba o ba Deeve ndoo kuɛ pɛ o chɔuwo, mi Chɛhowa ndoo tosa mbo yem yaamɔɔwaa nduaa.
14 Mi Deeve hiau lachi a waa o masaleŋ choo o Isɔluɛi niŋ kpou. Nduyɛ, o wa wanaa nduaa kpou sɔɔŋ dimioo tɛɛŋ o nɛi sakpoo choo.
15 Chowaabi, po Sɛluiya wo wa puaa chɔuwa bolleŋ ni. Chɛhosiafati, po Ahiludi wo wa wana kɛsiaa lakonaa ni.
16 Sadɔki, po Ahitubi wo a Ahimɛlɛki, po Abiaata wo wa wanaa soliaa lasalaa ni, nduyɛ Siafisia wa wana poonyiaa ni.
17 Bɛnaya, po Chɛhoyada wo wa Kɛluitaitiiya a Pɛlɛtaitiiya choo ni, nduyɛ mi puaa Deeve velu wa sɔla foofola bɛndulaŋ.
