Koloniko Tasoo 19:1-19

  • Amɔnaitiiya tusi wanaa Deeve vem nda siɔmbulaŋ (1-5)

  • A yem Amɔnaitiiya a Siiliaŋnda (6-19)

19  Okoŋ kɔɔli, mi Nahasi, masa Amɔnaitiiya wu. Nduyɛ mi po ndɔɔ miiŋgu o masaleŋ choo.  Le hei, mi Deeve dimi aa: “I cho Hanuŋ po Nahasi wo kaala lo lechoo wo chɔm, mɛɛ finya ndɔ chɔm ya kaala lo lechoo wo yɛ.” Okoŋ, mi Deeve viam buɛiyaa nduaa le ma kɔ dɛɛniaa ndu kɔllo le piɔm finya ndɔ wo. Kɛ mɛɛ buɛiyaa Deeve wa luɛi o lɛŋnde Amɔnaitiiya niŋ le ma kɔ dɛɛniaa ndu kɔllo,  mi waŋ banaa Amɔnaitiiya dimul Hanuŋ aa: “A yiyaŋ pa maa le bɛɛle finya numndeŋ Deeve yɔŋ waŋnda ni le num kɔllo dɛɛniaa? O cho suaŋsuaŋndeŋ te Deeve vem buɛiyaa nduaa le ma mɛɛndiaŋ chioo, nduyɛ ma bii ndu le?”  Okoŋ, mi Hanuŋ bii buɛiyaa Deeve wa, mbo sendi nda siɛiyoŋ. Nduyɛ mbo kili domala ndalaŋ pɛŋgu yɔŋndaŋ, mbo mal nda ma kuaŋnuŋ.  Mɛɛ Deeve tuei a ndi okɔɔ, o lepilɛ niŋ kpe, mbo viam puaa le ma kuɛ nda lachi, kanifuule ndaa tɛɛmbuu nda bɔɔ labɛɛ. Mi masaa dimul nda aa: “La wa Chɛluiko haaa mi siɛiyoŋ miiŋgu nya wulɔɔ, okoŋ mi la miiŋgu niko nanuŋ.”  Mi Amɔnaitiiya mɛɛlu sina maa a fula chuŋ wɔɔŋndo Deeve o miliŋ le nyɛ nda tosa koŋ ndo. Le hei, mi Hanuŋ nda Amɔnaitiiya yɔŋ kaniŋ humboŋ talɛŋndoŋ 1,000* Mɛsopoteemiaa, Aluam-maaka, a Soba, le nyɛm nyaanaŋ suaa naŋndoŋ, a wanaa nyaanuŋ suaa wa piondɔɔ.  Okoŋ, ma piandu nyɛm nyaanaŋ suaa naŋndoŋ 32,000, latulu a masaa le Maaka vɛlɛ a wanaa nduaa. Okoŋ kɔɔli, ma kɔ kila dɔɔŋgɔɔ Mɛdiba ikɛi. Mi Amɔnaitiiya fula o chieeŋ ndaŋ bɛndoŋ niŋ, ma chuuŋgiaŋ naapilɛ le chɔuwo.  Mɛɛ Deeve tuei a ndi okɔɔ, mbo yɔŋ Chowaabi a puaa chɔuwa kpou. Kuubaa nduaa kpaayaa bɛnduaa bɛɛ wa nda tɛɛŋ.  Mi Amɔnaitiiya fula ma sim a bɛɛndiaŋnda le sɔŋgɔɔ o dio kpaki chioo. Kɛ masaa ndaa hiŋ le nda malaa sɔŋgɔɔ a wa naa wakpaa yondoo niŋ. 10  Mɛɛ Chowaabi che maa yaamɔɔwaa ndaa cho fulaa nda lachi, mi haa wa nda fulaa kɔɔli ma hinul nda, mbo hɛli puaa chɔuwaa chaa sɔŋgɔɔ nyɛkɛndɛ kɛndɛi o Isɔluɛi niŋnda, mbo simi nda le ma kuel Siiliaŋnda. 11  Mbo chuuŋgiaa puaa chɔuwa a tuaa Abisiaa bɛ ndɔ o ba bɛŋgu, mbo simi nda le ma kuel Amɔnaitiiya. 12  Okoŋ mbo dimi aa: “Te a che pɛ maa Siiliaŋnda chal le ya ba tiu, a huŋ mala ya. Nduyɛ te ya bɛɛ che pɛ maa Amɔnaitiiya chal le num ba tiu, I cho lakɔ mi kɔ mala num. 13  Ŋ nɔ miŋ nɔ yoomuaŋ a kɔl simulaa le miŋ sɔŋga le wanaa naa vɛlɛ a chieeŋ bɛnduŋ Mɛlɛka naa. Nduyɛ, Chɛhowa cho tosa nyɛ bɛnda ndu o hɔl lo.” 14  Okoŋ, mi Chowaabi nda laŋgbaa nduaa kuel Siiliaŋnda le sɔŋgɔɔ. Kɛ mi Siiliaŋnda piɔl nda lachi a kiltaŋ. 15  Mɛɛ Amɔnaitiiya che maa Siiliaŋnda nyaanuŋ, mi nda bɛɛ piɔl a kiltaŋ Abisiaa bɛ ndɔ lachi, ma miiŋguŋ chiee. Okoŋ kɔɔli, mi Chowaabi bɛɛ miiŋguŋ Chulusalɛm. 16  Mɛɛ Siiliaŋnda che maa Isɔluɛiya yem nda, ma viam waŋnda le ma kɔ chuuŋgiaa Siiliaŋaa wa o tanda holnuŋ Pioo* wa. Nduyɛ, Siofaa masa puaa chɔuwaa Hadadiisa wa sim nda lachi ni. 17  Mɛɛ konaa hoo komal Deeve, o lepilɛ niŋ kpe, mbo chuuŋgiaa puaa chɔuwa Isɔluɛi kpou, okoŋ ma taŋ Chɔɔdaŋ ndaŋ ma kuel nda. Nduyɛ a wa a bɛɛndiaŋnda le chɔuwo. Mi Deeve fula o bɛɛndiaŋndo le chɔuwo mbo komal Siiliaŋnda, nduyɛ ma sɔŋga a ndu. 18  Kɛ mi Siiliaŋnda piɔl Isɔluɛiya lachi a kiltaŋ. Mi Deeve dii Siiliaŋaa kua a nyɛm nyaanaŋ suaa naŋndoŋ nda 7,000, a puaa chɔuwaa Siiliaŋnda 40,000. Nduyɛ mbo dii vɛlɛ Siofaa, masa puaa ndaa chɔuwa. 19  Mɛɛ buɛiyaa Hadadiisa wa che maa Isɔluɛiya yem nda, ma tosa kɔl nyuloo chɔ chɔ a Deeve, okoŋ ma wa ndu o ba bɛŋgu. Nduyɛ, fɛɛŋ bɛɛ Siiliaŋnda chɛl lɛ le Amɔnaitiiya malaa le.

Tɛɛsiaalaŋ

Tofa Tɛɛsiaa B14.
Koŋ cho ni, Yufiluaati.