Koloniko Tasoo 20:1-8
20 O wɔsioo kandɔŋndo, a teleŋ masaa waa kua o chɔulaŋ ndo, mi Chowaabi sim puaa chɔuwa lachi ma kɔ tɛɛmbuu lɛŋnde Amɔnaitiiya. Mɛɛ o kuɛ, mbo duau chioo Luaba o piŋndo niŋ, mbo del ndu choo, nduyɛ mbo tɛɛmbuu ndu kpata kpata. Kɛ mi Deeve ndu lo Chulusalɛm.
2 Okoŋ, mi Deeve faŋa Malikam mɔsil lemasa ŋkooliiyo o lebol. Lusul mɔsillo hoo wa le talɛŋnde i pilɛ.* Nduyɛ, pouta baa kala kalalaŋ la wa la holi holiaa lechoo. Ma chua mɔsil koŋ ma wou Deeve. Nduyɛ, mi Deeve kuandu vɛlɛ nyɔɔŋ ŋ hɔbɛi o chioo hoo niŋ.
3 Mbo soli wanaa wa o chiee koŋ niŋnda mbo ke nda wallo. Mbo handu nda le poutaŋ siɔlɔɔ, wallo a chiliŋuŋ sɛɛmbiaŋ, vɛlɛ a chooŋ. Mɛɛ nuaa Deeve tosa a chieeŋ bɛnduŋ Amɔnaitiiya kpou ni. O mɛɛlulaŋ kpɔŋ, mi Deeve a puaa chɔuwa kpou miiŋgu Chulusalɛm.
4 Okoŋ kɔɔli, mi chɔu cheleŋ del nda vɛlɛ tɛɛŋ nda Filitiaŋnda o Kiisa niŋ. A teleŋ koŋ, mi Sibɛkai, Husiataitiinɔɔ dii Sipai, fulaa o yuŋgu Luɛfem ndo choo, nduyɛ ma yam nda.
5 Mi Chɔu cheleŋ del nda vɛlɛ tɛɛŋ nda Filitiaŋnda. Nduyɛ mi Ɛlihanaŋ po Chaa wo dii Lamai, pɔmbɔɔ Koolaya Kitaitiinɔɔ. Lamai yɛ, piau bal ndɔɔ wa chelullo maa yɔm nda simbul kola luaa wo.
6 Mi chɔu cheleŋ del nda vɛlɛ tɛɛŋ Kaati. Po pilɛ wa loŋ, o waŋnuŋ o bɛndu heu. Ba ndɔ kɛ kɛ ndoo nɔ sooŋ ŋɔmpum, nduyɛ pelii kɛ kɛ ndii nɔ sooŋ ŋɔmpum. Kpou kpou, ndoo nɔ sooŋ 24. Ndu bɛɛ, o yuŋgu Luɛfem ndo choo ndoo fula ni.
7 O wa Isɔluɛiya simullo teleŋ o teleŋ. Kɛ mi Chonataŋ po Simiaa wo, bɛndoo Deeve dii ndu.
8 Puaa haa kpou Kaati nda wa ni, fulaa o yuŋgu Luɛfem ndo choo. Kɛ mi Deeve a puaa nduaa chɔuwa diu nda.
Tɛɛsiaalaŋ
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
