Koloniko Tasoo 22:1-19
22 Okoŋ mi Deeve dimi aa: “Chiɛi Chɛhowa Mɛlɛka tonyaa cho hoo ni, nduyɛ bandu luamaa lasalaa cho hoo ni le Isɔluɛi.”
2 Mi Deeve dimul waŋnda le ma chuuŋgiaa mialaa wa o lɛŋnde Isɔluɛi leŋ niŋnda naapilɛ. Okoŋ mbo ke nda wallo le ma wa mɛɛsinɛiya* le poutaŋ kiolɔɔ a siɔlɔɔ, le chiɛi Mɛlɛka tonyaa taŋgullo.
3 Mi Deeve chuuŋgiaa vɛlɛ chiliŋndoŋ tau le lɔndimɛiyoŋ toosiaa le diola kpakilaŋ a koŋjiiyoŋ. Nduyɛ mbo chuuŋgiaa chiliŋuŋ siaŋaŋ* tau, wanaa nɔla ma sina lusul ndɔɔ le.
4 Mbo chuuŋgiaa vɛlɛ yɔmii sida ve tau, wanaa nɔla ndi chɔm te. Kanifuule, mi waŋnda Saidɔŋ a waŋnda Taaya huŋ a yɔmii sida ve tau tau naa Deeve chua.
5 Mi Deeve dimi aa: “Sɔlɔmɔŋ po ni cho wɔ o bɔɔ le, nduyɛ o nɔ taasi le. Chiɛi nɔ le taŋgulɔŋndo le Chɛhowa wo yɛ, o cho wa chiɛi tɔɔma bɛndu. Tɔɔ ndɔɔ a naŋɔɔ ndɔɔ cho tiu o lɛŋnde niŋ kpou. Lelaŋ, I cho nyɛ o nyɛ bɛɛndiaa le ndu.” Nduyɛ, mi Deeve chuuŋgiaa nyɛm taŋgulaŋ tau tuupa mbo wu.
6 Okoŋ kɔɔli, mbo veelu Sɔlɔmɔŋ po ndɔ, mbo dimul ndu le mbo taŋgul chiɛiyo le Chɛhowa, Mɛlɛka Isɔluɛiya.
7 Mi Deeve dimul Sɔlɔmɔŋ po ndɔ aa: “Yeemɛi nii kpeekpei wa ni le mi taŋgul chiɛiyo le Chɛhowa Mɛlɛka nuu.
8 Kɛ mi Chɛhowa dimul la aa, ‘A diu bɔɔ waŋnda chieeya, nduyɛ a sɔŋga bɔɔ o chɔula faŋga faŋga niŋ. Lelaŋ, o cho num te cho ya chiɛiyo teŋgul le diola nilaŋ te, kanifuule a diu bɔɔ waŋnda chieeya o lɛŋndeŋ choo ya o hɔl.
9 A cho hunɔɔ poo violɔɔ, nduyɛ wana kɔl nyuloo* o cho wa ni. I cho tosa mbo sɔla pɛŋgioo yaamɔɔwaa nduaa balu ndu wa kpou o ba. Diola ndɔlaŋ la cho wa Sɔlɔmɔŋ* ni, nduyɛ I cho tosa mi Isɔluɛi wa o kɔl nyulu niŋ o teleŋ ndɔɔ niŋ.
10 Ndu cho chiɛiyo taŋgul le diola nilaŋ ni. O cho simnɔŋ po ni, mi ya bɛɛ simnuŋ finya ndɔ. I cho tosa mi kpeŋgbei* ndɔ lemasaa wa le fɛɛŋ a fɛɛŋ o Isɔluɛi niŋ.’
11 “Lelaŋ po nuu, maa Chɛhowa wa latulu a num. Maa sɔla batiuwaa, nduyɛ ma teŋgul Chɛhowa Mɛlɛka numndo chiɛiyo, a mɛɛ o dimi a num okɔɔ yɛ.
12 Te Chɛhowa ke num pɛ kpaayaa Isɔluɛiya choo, maa o ke num taasioo a sinapɛŋgoo, le halikpeŋ ma bii sawala Chɛhowa Mɛlɛka numndo.
13 A cho batiuwaa sɔla te a wa pɛ yekeŋ le sawalaŋ biyɔɔ, nduyɛ ma tosa nyɛ o nyɛ Chɛhowa ke Muuse le Isɔluɛiya. Nɔ kɔl simulaa, ma kendu ŋdial. Yɔŋ isiooŋ ɔɔ ma nyiiya le.
14 I tosa wallo o kala kala mi chuuŋgiaa nyɛm taŋgulaŋ le chiɛi Chɛhowa wo taŋgullo. I sɔla kooliiyoŋ talɛŋndoŋ 100,000,* a kaniŋ humboŋ talɛŋndoŋ 1,000,000. Nduyɛ mi sɔla vɛlɛ chiliŋuŋ siaŋaŋ a chiliŋndoŋ tau tau, wana nɔla ma sina lusul ndɔɔ le. Mi chuuŋgiaa vɛlɛ yɔmnde a poutaŋ, kɛ a nɔ vɛlɛ ma chɔɔlu handɔɔ lechoo.
15 Wanaa walla cho wa a num latulu tau. Wanaa kialu poutaŋ nda, mɛɛsinɛiya, kaapindɛiya,* a wanaa chaa walta yɛ yɛlaŋ a laba wa.
16 Kooliiyoŋ, kaniŋ humboŋ, chiliŋuŋ siaŋaŋ a chiliŋndoŋ cho tau tau, wana nɔla ma sina lusul ndɔɔ le. Lelaŋ, chɔŋ ma kandu wallo. Maa Chɛhowa wa a num latulu.”
17 Okoŋ, mi Deeve dimul waŋ banaa o Isɔluɛi niŋ kpou le ma mala Sɔlɔmɔŋ po ndɔ. Mbo dimul nda aa:
18 “Chɛhowa Mɛlɛka nyaa cho latulu a nya, nduyɛ o tosa mi la sɔla pɛŋgioo ba o ba fee. Kanifuule, o tosa mi yam wanaa wa ichali o lɛŋndeŋ niŋnda, nduyɛ mi lɛŋndeŋ le huŋ Chɛhowa a wanaa nduaa o ba bɛŋgu.
19 Lelaŋ, la kɛɛsiaa a kɔlta nyalaŋ vɛlɛ a yoomula nyalaŋ kpou le Chɛhowa Mɛlɛka nyaa nuuviaa, mi la kandu chiɛi Chɛhowa Mɛlɛka tonyaa taŋgullo. Okoŋ mi la hiŋ a kɔfu kpema Chɛhowa wo vɛlɛ a nyɛm diandaŋ Mɛlɛka tonyaa, o chiɛi cho taŋgulɔŋ le diola Chɛhowa laŋ ndo niŋ.”
Tɛɛsiaalaŋ
^ Ɔɔ “maasɔŋnda.”
^ Ɔɔ “kapaa.”
^ Hibuluiye, “wana pɛŋgi wo.”
^ Fulaa o diom maHibuluiyo niŋ. Diolaŋ ndaŋ la sim “Kɔl Nyuloo.”
^ Ɔɔ “kpɛŋɛ.”
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
^ Ɔɔ “minisieeya.”
