Koloniko Tasoo 28:1-21
28 Okoŋ kɔɔli, mi Deeve yooŋgu le mi waŋ banaa o Isɔluɛi niŋ kpou chuuŋgiaŋ Chulusalɛm. Nda cho ni: wanaa wa kaalaŋ bolle wa, wanaa wa chilaŋ le kundala wa walta masaa tosaa wa, wanaa waŋnda waapilɛ a waŋnda kɛmɛ wa o ba bɛŋgu wa, wanaa wa nyɛm masaa, chɔluaa nduaa, a puaa nduaa kpou hɔlteŋ nda, latulu a puaa wa wallo o masaleŋ niŋnda, puaa kpaayaa bɛnduaa, vɛlɛ a puaa wana nɔla ma tiindaŋ nda.
2 Okoŋ mi Deeve chaŋ mbo sim, mbo dimi aa:
“Puaapiliaa niaa a wanaa niaa, la yaŋ ya nilaŋ. Yeemɛi nii wa ni le mi taŋgul chiɛiyo mi kɔfu kpema Chɛhowa wo wa leniŋ, nduyɛ mi Mɛlɛka naa sɔla fondaŋ o kɛsi peluŋ ndɔŋ ndo. Lelaŋ, mi bɛɛndiaŋ nyɛkɛndɛi le ndu taŋgullo.
3 Kɛ mi Mɛlɛka tonyaa dimul la aa, ‘O cho num te cho chiɛiyo taŋgul le diola nilaŋ te. Kanifuule, wana chɔuwo ŋ cho ni, nduyɛ a tɛɛmbuu niŋ bɔɔ koowaŋ.’
4 Kɛ nduyɛ mi Chɛhowa, Mɛlɛka Isɔluɛiya hɛli ya o yuŋgu finya nuu niŋ kpou, le mi simnuŋ masaa o Isɔluɛi niŋ le fɛɛŋ a fɛɛŋ. Mbo hɛli Chuda le mbo wa simlachinɔɔ. Nduyɛ o kaale Chuda le niŋ, mbo hɛli yuŋgu finya nuu. O puaa finya nuu tɛɛŋ, ya o hɛli ni mbo siiŋguu ya masaa le Isɔluɛi kpou.
5 Mi Chɛhowa ke ya puaa tau. Nduyɛ o puaa o ke ya wa tɛɛŋ, mbo hɛli Sɔlɔmɔŋ po ni le mbo chal o kpeŋgbei lemasa Chɛhowa wo choo Isɔluɛi.
6 “Mbo dimul la aa, ‘Sɔlɔmɔŋ po num cho ya chiɛiyo teŋgul ni vɛlɛ a luŋndo. Kanifuule, ndu ya hɛli ni le mbo wa po nuu, mi ya simnuŋ finya ndɔ.
7 Te o bii pɛ sawala nilaŋ nduyɛ mbo tol nɛila nila chɔmaalaŋ kɔɔli, a mɛɛ o cho tosaa suŋ suŋ yɛ, I cho tosa mi masale ndɔleŋ le wa le fɛɛŋ a fɛɛŋ.’
8 Lelaŋ ya cho ndi dimioo Isɔluɛiya kpou o hɔl ni, wanaa Chɛhowa wa, nduyɛ mi Mɛlɛka naa bɛɛ wa ndi tueiyɔɔ maa la nɔ mi la wa yekeŋ le sawala Chɛhowa Mɛlɛka nyaa nuuviaa, nduyɛ mi la tosa nyɛ la dimi wo. Hei cho tosa mi la chal o lɛŋnde kɛndɛleŋ niŋ, mi le wa nyɛm kiɔɔŋ le nya vɛlɛ a puaa nyaa le fɛɛŋ a fɛɛŋ.
9 “Nduyɛ num Sɔlɔmɔŋ po ni, sina Mɛlɛka finya numndo, ma piɛi ndu a kɔl numndo kpou vɛlɛ a yoomu numndo kpou. Kanifuule mi Chɛhowa yaasiaa kɔltaŋ kpou, nduyɛ mbo sina yiyaŋnda cho leniŋ ndaŋ. Te a nuuviaa ndu pɛ, o cho tosa ma saaluŋ ndu. Kɛ te a mal ndu pɛ, ndu bɛɛ cho num malɔɔ le fɛɛŋ a fɛɛŋ.
10 Kɛsiŋ o kɔl maa Chɛhowa hɛli num le ma teŋgul ndu chiɛiyo. Lelaŋ nɔ kɔl simulaa, nduyɛ ma tosa wallo.”
11 Okoŋ, mi Deeve ke Sɔlɔmɔŋ po ndɔ tuula chiɛiyo a toŋgola ndɔlaŋ, lumuilaŋ kpou, lumuila nda kɛsi wolɔɔlaŋ ndaŋ, lumuilaŋ choo choo, lumuilaŋ leniŋ, vɛlɛ a fondaŋ malɔɔ lahakioo.
12 Mbo ke ndu tuulaa le nyɛ o nyɛ nyina Mɛlɛkaa chɔm ndu le luŋ chiɛi Chɛhowa wo, fondaŋnda diaa nyɛdiaala balu ndu laŋ kpou, fondaŋnda nda kɛsi nyɛsɔlaa le chiɛi Mɛlɛka tonyaa laŋ, a fondaŋnda nda kɛsi chuuŋgiaala diandaalaŋ ndaŋ.
13 Mbo chɔm ndu vɛlɛ mɛɛ kundala wanaa soliaa lasalaa a Livaiya nɔ mi la wa la kɔɔnaa yɛ, walta nɔ mi la tosaŋ o chiɛi Chɛhowa wo niŋndaŋ kpou, vɛlɛ a nyɛm laanduŋ nda nɔ ma soliŋ kpeku le wallo tosaa o chiɛi Chɛhowa wo niŋndoŋ.
14 Mbo chɔm ndu vɛlɛ mɛɛ kooliiyoŋ nɔ miŋ wa lusullo yɛ, kooliŋ nda nɔ ma toosiaa nyɛm laandoŋ le walta yɛ yɛlaŋ ndoŋ, lusul nyɛm laanduŋ nda cho toosiaa a kanii humbuei kpou woŋ, a nyɛm laanduŋ nda nɔ ma soliŋ kpeku le walta yɛ yɛlaŋ ndoŋ kpou.
15 Mbo chɔm ndu vɛlɛ lusul nyɛla kɛsiaa lambuila nda nɔ le toosiaa a kooliiye laŋ vɛlɛ a lambuila ndalaŋ, lusul nyɛla kɛsiaa lambuila yɛ yɛlaŋ a lambuila ndalaŋ, lusul nyɛla kɛsiaa lambuila nda nɔ le toosiaa a kanii humbuei laŋ, ma toosiaa nyɛ kɛsiaa la lambui kɛ kɛ a lambuila ndɔlaŋ a mɛɛ wali ndɔɔ cho yɛ.
16 Le tibii* kɛ kɛ toosiaa, mbo chɔm ndu mɛɛ kooliŋ nda nɔ le laŋ toosiaa woŋ nɔ miŋ wa lusullo yɛ. Nduyɛ o tibiilaŋ ndaŋ choo beedii* cho wa o yɔŋgaŋ o Mɛlɛka lo wo cho wa o kɛsiaa ni. Mbo chɔm ndu vɛlɛ lusul kaniŋ humbuŋ nda nɔ ma toosiaa tibiilaŋ ndoŋ,
17 chula saŋgilaŋ, hɛŋgɛilaŋ, taalala bɛndula nda toosiaa a koolii kɛndɛ kɛndɛi laŋ, lusul hɛŋgɛi pɔmbɔ kɛ kɛ nda toosiaa a kooliiye, vɛlɛ a lusul hɛŋgɛi pɔmbɔ kɛ kɛ nda toosiaa a kanii humbuei.
18 Mbo chɔm ndu vɛlɛ lusul kolii kɛndɛ kɛndɛi nda nɔ ma toosiaa bandu luamaa nyɛm chuŋ kɛndɔɔ ve, a nyɛ velaŋ a kandu Mɛlɛkaa wo, koŋ cho ni, chɛlɔbiiyaa ŋkoolii cho kumbaŋnda ndalaŋ pɛɛŋga o kɔfu kpema Chɛhowa wo choo wa.
19 Okoŋ mi Deeve dimi aa: “Ba Chɛhowa wo wa ya choo ni, mbo ke ya taasioo mi tuuliaa chiɛiyo hoo, nduyɛ mi poonyiaa nyɛ o nyɛ a ndu okɔɔ.”
20 Okoŋ kɔɔli, mi Deeve dimul Sɔlɔmɔŋ po ndɔ aa: “Nɔ kɔl simulaa, ma kendu ŋdial, nduyɛ ma tosa wallo. Yɔŋ isiooŋ ɔɔ ma nyiiya le, kanifuule Chɛhowa Mɛlɛka nuu cho a num latulu. O cho num kɛɛ ɔɔ mbo mal num te. Kɛ o cho wa a num latulu haaa mi wali cho a chiɛi Chɛhowa wo okɔɔ wo kpou chuu tosa.
21 Wanaa soliaa lasalaa a Livaiya cho a kundalaŋ le wali kɛ kɛ tosaa o chiɛi Mɛlɛka tonyaa. A nɔ wanaa chaa wali suu o suu tosaa, nduyɛ ma nɔ yeemɛi le ndu tosaa wa. Nduyɛ a nɔ vɛlɛ waŋ banaa a Isɔluɛiyaa tuaa kpou, a cho wa nɛila chɔmaala numndaŋ kpou tolɔɔ kɔɔli wa.”
