Koloniko Tasoo 5:1-26
5 Lubɛŋ wa po tase Isɔluɛi velu wo ni. Kɛ le mɛɛ ndoo nɔɔliaa kpele finya ndɔ wo yɛ, ma poonda ndu di ndoo nɔ maa po tase wo o ba, ma ke puaa Choosɛ wa, Isɔluɛi po ndɔɔ. Le hei, a poonyiaa ndu diolaŋ maa po tase, teleŋ nda wa yuŋgu ndaa diolaŋ poonyiaa wo le.
2 Mi che bɛɛ Chuda ndoo nɔ kpaayaa mbo hiau pɔmbuaa nduaa, nduyɛ o pulale ndɔleŋ choo wana ndoo nɔ le waa masaa wo fula ni, kɛ Choosɛ sɔla di po tasoo nɔ o yuŋgoo niŋndo ni.
3 Lubɛŋ po tase Isɔluɛi yo, puaa o velu wa cho haa ni: Hanɔki, Palu, Hɛsilɔŋ, a Kaami.
4 Wanaa* fula o pulale Chowɛɛ leŋ choo wa cho haa ni: Chowɛɛ velu Siɛmaya ni, nduyɛ Siɛmaya velu Kɔɔki ni. Kɔɔki velu Simɛi ni,
5 Simɛi velu Maika ni, Maika velu Lueiyaa ni, Lueiyaa velu Baal ni,
6 nduyɛ Baal velu Bɛɛluaa ni. Bɛɛluaa wo hoo Masaa Tikilati-pilinɛsa kuɛ o biyɔɔ niŋ Asiiliaa ni. Ndu wa yuŋgu lebollo le kaale Lubɛŋ ndeŋ ni.
7 Wanayaŋ ndɔŋ nda poonyiaa diolaŋ o yuŋgula fula o pulale ndɔleŋ choo laŋ, wanaa wa nda bolleŋ nda cho haa ni: Chɛyɛɛ, Sɛkalaya,
8 a Bɛla po Asasi wo. Nduyɛ Asasi velu Siɛma ni, Siɛma velu Chowɛɛ ni. Aloya nda wa ichali ni haaa kɔ bii Nibo a Baal-miɔŋ.
9 Waŋnda haa wa vɛlɛ ichali ba paaleŋ le chaŋ ndo, chɔŋ naa pollo kanduŋ nda haaa mbo holnuŋ Pioo Yufiluaati. Kanifuule, chɔluaa ndaa ndaa kui niŋ tau o lɛŋnde Kiliaadi leŋ niŋ.
10 O teleŋ Sɔɔ wo niŋ, ma kɔ del Hakiluaitiiya choo a chɔuwo, nduyɛ ma yam nda. Okoŋ, ma chal o tɛndiila ndalaŋ niŋ o tanda koŋ niŋ kpou, Kiliaadi ba paaleŋ le chaŋ ndo.
11 Nduyɛ wanaa fula o pulale Kaadi leŋ choo wa wa nda ikɛi, chɔŋ o lɛŋnde Baasiaŋ ndeŋ niŋ haaa Salɛkaa.
12 O Baasiaŋ niŋ, Chowɛɛ wa nda bolleŋ ni, mi Siafam wa ndu ikɛi. Nduyɛ Chenai nda Siafati bɛɛ, simlachiaa nda wa loŋ ni.
13 Wanayaŋ ndaŋ wa yuŋgula yɛ yɛlaŋ bolle wa cho haa ni: Maikɛɛ, Mɛsiulam, Siɛba, Cholai, Chakaŋ, Saaya, a Iba. Kpou kpou, a wa a ŋɔmmɛu.
14 Abihee velu puaa haa ni. Abihee yɛ, finya ndɔ wa Hului ni, Hului finya ndɔ wa Chaloya ni, Chaloya finya ndɔ wa Kiliaadi ni, Kiliaadi finya ndɔ wa Maikɛɛ ni, Maikɛɛ finya ndɔ wa Chɛsisai ni, Chɛsisai finya ndɔ wa Chaado ni, Chaado finya ndɔ wa Buusi ni.
15 Ehai wa yuŋgu lebollo le yuŋgu ndaa ni. Ehai yɛ, finya ndɔ wa Abidiɛɛ ni, Abidiɛɛ finya ndɔ wa Kuni ni.
16 A wa ichali Kiliaadi a Baasiaŋ vɛlɛ a chieeŋ balu muŋ ndoŋ. A wa vɛlɛ ichali Sialɔŋ o fondaŋnda chɔluaa dia billo laŋ haaa mbo kua kɛ.
17 Ma poonyiaa nda diolaŋ o lepula a boondii Chotam wa masaa Chuda, nduyɛ mi Chɛlobowam* wa masaa le Isɔluɛiyo.
18 Yuŋgu Lubɛŋ ndo, yuŋgu Kaadi wo, a yuŋgu Manaasɛ wo tɛndaa tɛɛŋ, ndaa nɔ puaa chɔuwaa kpaaya bɛnduaa 44,760. Ndaa nɔ boola chɔulaŋ, mɔɔŋ faŋndoŋ vɛlɛ a chiɔulaŋ. Nduyɛ ma pɛɛku tau a chɔuwo okɔɔ.
19 Ma chiŋalaŋ Hakiluaitiiya, waŋnda Chɛtɔɔ, Nafisi, a Nɔdabi a chɔuwo.
20 Mɛɛ nda wa sɔŋgaa a nda, mi Mɛlɛka mala nda ma yam Hakiluaitiiya a wana o wana wa a nda latulu, le mɛɛ nda nyuna Mɛlɛka le mbo mala nda o chɔu koŋ niŋ yɛ. Nduyɛ mi Mɛlɛka muli piɛile ndaleŋ, kanifuule ma duau tiindaŋndo o ndu niŋ.
21 Ma biu chɔluaa ndaa, nyɔɔmiaa 50,000, saa 250,000, a sofɛliaa 2,000. Nduyɛ, ma biu vɛlɛ waŋnda chieeya 100,000.
22 Ma diu wanaa bɔɔbɔɔ, kanifuule Mɛlɛka tonyaa kpeekpei wa sɔŋgaa le nda ni. Okoŋ ma chal o fondaŋnda ndalaŋ, nduyɛ a lo loŋ haaa a boondii nda kuɛ o chɛleŋ niŋnde.
23 Yuŋgu Manaasɛ wo tɛndaa tɛɛŋ wa ichali o lɛŋndeŋ niŋ, chɔŋ Baasiaŋ kɔ Baal-hɛmɔŋ, Sɛniɛɛ, vɛlɛ a Pembei Hɛmɔŋ. Nduyɛ a wa tau tau.
24 Wanaa wa yuŋgula ndalaŋ bolle wa cho haa ni: Ɛfa, Isihai, Iliɛɛ, Asiliɛɛ, Chɛluimaya, Hɔdivaya, a Chaadiɛɛ. Kuubaa chɔuwaa dialuŋ kalaa pila nda wa ni. Ndaa nɔ tɔɔ, nduyɛ nda wa yuŋgula ndalaŋ bolle ni.
25 Kɛ ma kɛɛ le waa sakpo a Mɛlɛka finyaa ndaa mamaa, nduyɛ ma tosa kaa nɔɔlɛiyo a mɛlɛkaa waŋnda ndaa piɛi o lɛŋnde leŋ niŋnda, a Mɛlɛka tɛɛmbuu nda lachi wa.
26 Le hei, mi Mɛlɛka Isɔluɛiya tosa mi Pul, masaa le Asiiliaa (koŋ cho ni, Tikilati-pilinɛsa, masaa le Asiiliaa) yusa kɔllo mbo bii yuŋgu Lubɛŋ ndo, yuŋgu Kaadi wo, a yuŋgu Manaasɛ wo tɛndaa tɛɛŋ, mbo kua a nda o chɛleŋ niŋ Hela, Habɔɔ, Haluaa, a o pioo Kosaŋ ikɛi. Nduyɛ a cho wɔ loŋ o biyɔɔ niŋ haaa a paale hauleŋ ndeŋ.
