Masaa Tasiaa 14:1-31
14 A teleŋ koŋ, mi Abaicha po Chɛlobowam ndo del a naa.
2 Okoŋ, mi Chɛlobowam dimul laa ndɔ aa: “A yandii, chɔŋ ma siŋga doviŋ numndo, yɔŋii waŋnda sina maa laa nuu ŋ cho ni, nduyɛ ma kuɛ Silɔɔ. Wana suaa le Mɛlɛka wo Ahicha cho loŋ. Masale ya cho leŋ waŋnda haa choo leŋ, ndu ndoo dimul la teleŋ koŋ a leŋ okɔɔ ni.
3 Chua beediiyo* kpuŋgbaŋ tɔ, a katoo, a liaaŋ sanioo cha, ma kuɛ o ndu lo. O cho lakɔ num dimul nyɛ nɔ le yɔŋnɔŋndo a poombɔɔ wo.”
4 Mi lanɔɔ Chɛlobowam tosa nyɛ pɔnɔ ndɔ dimul ndu wo. Mbo chaŋ mbo kua Silɔɔ, nduyɛ mbo kua o chiɛi Ahicha wo. Ahicha wa tofaa, kɛ ndoo chi lɛ le, kanifuule ndoo yuuwa niŋ kudɛɛ.
5 Kɛ Chɛhowa ndoo chii niŋ Ahicha dimul aa: “Mi che lanɔɔ Chɛlobowam hunɔɔ naa num chua, le num nyunaa a naa po ndɔɔ cho wo okɔɔ. I cho num chɔm nyɛ ŋ nɔ ma dimul ndu wo.* Te o fuuluu pɛ, o cho chɔm maa o cho ndu le cho koŋ te.”
6 Dimioo nuaa Ahicha tuei peluŋ ndɔŋ o dio, mbo dimi aa: “Luɛi, lanɔɔ Chɛlobowam. Le yɛɛnɛ ŋ cho yɛ tosaa maa wana cheleŋ ŋ cho ni? A ke ya yooŋgu wɔɔŋ wɔɔŋndo le num.
7 Kɔ dimul Chɛlobowam aa, ‘Nyɛ Chɛhowa, Mɛlɛka Isɔluɛiya dimi wo cho hoo ni: “Ya hɛli num wanaa numnda tɛɛŋ ni, mi kɛsi num wanaa niaa choo, waŋnda Isɔluɛi.
8 Okoŋ mi puu masaleŋ le tiŋ yuŋgu Deeve wo o ba, mi ke num. Kɛ a cho maa buɛi nuu Deeve le. Mbo bii sawala nilaŋ, nduyɛ mbo tual la kɔɔli a kɔl ndɔɔ kpou. Nyɛ wa sakpo ya o hɔl lo suee ndoo tosa ni.
9 Kɛ num, a tosa sɔɔŋ wɔɔŋndoŋ mbo hiau wanaa kei num lachi wa kpou. Ma toosiaa mɛlɛka cheleŋ, piɔmaa ŋchiliŋnda* a ŋiɔɔŋ le ya kɔllo tɛɛmbuuwo. Nduyɛ, ya kpeekpei ŋ mulul koŋ kɔɔ ni.
10 Le sabu koŋ ya cho yuŋgu Chɛlobowam ndo nyɛpalaa tusi choo ni. Nduyɛ o Isɔluɛi niŋ kpou, wana pɔnɔ o wana pɔnɔ cho o chiɛi Chɛlobowam ndo niŋ, I cho ndu tɛɛmbuu, hali wanaa bala fonduaa a wanaa nɔ kpaaya le wa. I cho yuŋgu ndɔɔ basɔɔ tɛɛ, mɛɛ waŋndo basu nuaa poolaŋ mbo kɔndu mbo kɔ viou yɛ!
11 O yuŋgu Chɛlobowam ndo niŋ kinɛi, wana o wana vi pɛ chiee, tuŋnda cho ndu dio ni. Nduyɛ wana o wana vi pɛ yondoo niŋ, youwa cho ndu dio ni, kanifuule Chɛhowa dimi lende ni.”’
12 “Lelaŋ, chɔŋ ma miiŋgu o numndo. Te a pila dɔɔ pɛ pelei chiee, po numndo cho wu.
13 Waŋnda Isɔluɛi kpou cho ndu chaŋ ma kumbu ndu. Nduyɛ o yuŋgu Chɛlobowam ndo niŋ kinɛi, ndupilɛ kpe cho kumbɔɔ sɔla ni. Kanifuule, ndu kinɛi Chɛhowa, Mɛlɛka Isɔluɛiya che nyɛ kɛndɛ o ŋdial ni o yuŋgu Chɛlobowam ndo niŋ.
14 Chɛhowa pila cho hunɔɔ masaa hɛli, mbo kɛsi ndu waŋnda Isɔluɛi choo. Te paale leŋ le fuuluu pɛ, ndu cho hunɔɔ yuŋgu Chɛlobowam ndo basɔɔ* tɛɛ ni. Nduyɛ, paale leŋ le chii niŋ bɛɛ fuuluu.
15 Chɛhowa cho waŋnda Isɔluɛi hiiluu a nyɛpalaa, mɛɛ bil puiyaa wa o peelo wo hiiluŋ nuaa yɛ. O cho nda hunɔɔ kɔndɔɔ* o lɛŋnde kɛndɛle o ke leŋ finyaa ndaa mamaa leŋ niŋ, nduyɛ mbo saŋ nda o Pioo* leeloo, le mɛɛ nda toosiaa fondaŋnda lasooluulaŋ le mɛlɛka Asiɛlua,* ma tɛɛmbuu Chɛhowa kɔl lɛ.
16 O cho Isɔluɛiya baa faŋa kɔɔli le haki Chɛlobowam tosa wo, a le mɛɛ o tosa mi Isɔluɛiya bɛɛ luei balaŋ o hakioo niŋ yɛ.”
17 Okoŋ, mi lanɔɔ Chɛlobowam chaŋ mbo kuaŋnuŋ, nduyɛ mbo fuuluu Tiɛsa. Dimioo nuaa o hiŋ le luɛiyɔɔ chiɛiniŋ, mi poombɔɔ wu.
18 Okoŋ ma kumbu ndu. Mi Isɔluɛiya kpou chaŋ ndu, a mɛɛ Chɛhowa dimul Ahicha, wana suaa le ndu wo yɛ.
19 Sɔɔŋ cheleŋ cho a Chɛlobowam okɔɔ woŋ, chɔula o chɔulaba laŋ a mɛɛ o tosa masaleŋ yɛ, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ.
20 Wɔsilaŋ 22 Chɛlobowam chii o masaleŋ choo ni mbo wu.* Okoŋ, mi Nadabi po ndɔ miiŋgu o masaleŋ choo o foofo ndɔɔ.
21 A teleŋ koŋ, Luihobowam po Sɔlɔmɔŋ ndo bɛɛ wa o masaleŋ choo Chuda. Luihobowam wa wɔsilaŋ 41 mbo simnuŋ masaa, nduyɛ wɔsilaŋ 17 o chii o masaleŋ choo Chulusalɛm ni. O kaalaŋ Isɔluɛi tɛɛŋ kpou, chioo hoo Chɛhowa hɛli ni mbo handu diola ndɔlaŋ ndu choo. Kalaa Luihobowam ndoo nɔ diolaŋ ni aa Naama, Amɔnaitiinɔɔ.
22 Waŋnda Chuda wa tosaa sɔɔŋ bɛnda Chɛhowa o hɔl te woŋ. Nduyɛ, mi hakila nda wa tosaa laŋ la tɛɛmbuu ndu kɔl mbo hiau bɛɛ mɛɛ finyaa ndaa mamaa ndaa tosa yɛ.
23 Mi nda bɛɛ hiau lachi a fondaŋnda filioŋndaŋ toosiaa le ndapila. Ma simi suŋgbuaŋ a poutaŋ vɛlɛ a yɔmnde* o pembii suu o suu choo, a o yɔm bɛndu kɛ kɛ bɛŋgu.
24 Waŋ piaanduaa hini a chaaŋaa ndaa waŋ piaanduaa o maaŋnda mɛlɛkaa ndaa niŋnda wa vɛlɛ o lɛŋndeŋ niŋ. Kaala Chɛhowa ndoo tou Isɔluɛiya lachi laŋ, sɔɔŋ nɔɔlɛi wɔɔŋ wɔɔŋ ndaa tosa woŋ kpou, ma wou balaŋ o muŋ niŋ.
25 O wɔsi ŋuɛɛnu ndɔ Masaa Luihobowam wa o masaleŋ choo wo niŋ, mi Sisiaki, masaa le Ichipi huŋ del Chulusalɛm choo.
26 Mbo chua nyɛm baa kalaŋ wa o chiɛi Chɛhowa wo niŋndoŋ a ŋ wa o chiɛi lemasaa niŋndoŋ. Mbo chua nyɛ o nyɛ, a boola chɔula Sɔlɔmɔŋ ndoo toosiaa a kooliiye laŋ kpou.
27 Okoŋ, mi Masaa Luihobowam toosiaa boola chɔula cheleŋ a chiliŋii siaŋɛi.* Mbo chua laŋ mbo ke wanaa wa bolleŋ le wanaa ndaa manda dioo le luɛiyɔɔ o chiɛi lemasaa wa.
28 Teleŋ o teleŋ masaa ndoo wa pɛ kɔlaŋ o chiɛi Chɛhowa wo, wanaa ndaa manda ndu wa chua laŋ a liila ndu. Nduyɛ te a chii pɛ, a miŋgi laŋ o fondaŋ ndaa.
29 Sɔɔŋ cheleŋ cho a Luihobowam okɔɔ woŋ, nyɛ o nyɛ o tosa, ŋ cho o yau nda poonyiaa konaa a masaa keeku Chuda wa okɔɔ wo niŋ.
30 Le teleŋ o teleŋ, chɔuwo wa Luihobowam nda Chɛlobowam tɛɛŋ.
31 O mɛɛlulaŋ kpɔŋ, mi Luihobowam wu,* nduyɛ ma kumbu ndu nda finyaa nduaa mamaa latulu o Chiee Deeve Wo. Kala ndɔ ndoo nɔ diolaŋ ni aa Naama, Amɔnaitiinɔɔ. Mɛɛ Luihobowam vi, mi Abaicham* po ndɔ miiŋgu o masaleŋ choo o foofo ndɔɔ.
Tɛɛsiaalaŋ
^ Ɔɔ “buloo.”
^ Ɔɔ “Hei a hei ŋ nɔ ni ma dimul ndu.”
^ Ɔɔ “piɔmaa nda toosiaa a chiliŋii teeŋgiɛi ya.”
^ Hibuluiye, “tɛɛmbuu.”
^ Ɔɔ “suŋgɔɔ.”
^ Koŋ cho ni, Pioo Yufiluaati.
^ Tofa Tɛɛsiaa.
^ Hibuluiye, “ma yambu ndu nda finyaa nduaa mamaa.”
^ Tofa Tɛɛsiaa.
^ Ɔɔ “kapaa.”
^ Hibuluiye, “ma yambu Luihobowam nda finyaa nduaa mamaa.”
^ Ndu nda veelu vɛlɛ ni aa Abaicha.
