Masaa Tasiaa 16:1-34
16 Okoŋ, mi Chɛhowa ke Chehu, po Hanani wo yooŋgu wɔɔŋndo le Baasia, mbo dimi aa:
2 “Ya soli num o chundoo niŋ ni mi kɛsi num wanaa niaa choo, waŋnda Isɔluɛi. Kɛ a koŋ kpou, a cho kɔlaŋ o nɛila Chɛlobowam ndaŋ choo, nduyɛ ma tosa mi wanaa niaa Isɔluɛi a tosa hakioo, ma tɛɛmbuu ya kɔllo.
3 Lelaŋ, I cho Baasia a chiɛi ndɔɔ kpou basɔɔ, nduyɛ mi tosa mi chiɛi ndɔɔ simnuŋ maa chiɛi Chɛlobowam ndo, po Nebati wo.
4 Wana o wana cho o yuŋgu Baasia wo niŋ, o kɛ kɛ vi pɛ chiee, tuŋnda cho ndu dio ni. Nduyɛ o kɛ kɛ vi pɛ yondoo niŋ, youwa cho ndu dio ni.”
5 Sɔɔŋ cheleŋ cho a Baasia okɔɔ woŋ, nyɛ o nyɛ o tosa, a kpaaya ndɔɔ, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ.
6 Okoŋ mi Baasia wu,* ma kumbu ndu Tiɛsa. Nduyɛ, mi Ɛlaa po ndɔ miiŋgu o masaleŋ choo o foofo ndɔɔ.
7 Kɛ nduyɛ, mi Chɛhowa ke wana suaa le ndu wo Chehu, po Hanani wo yooŋgu wɔɔŋndo le Baasia a chiɛi ndɔɔ. Le sɔɔŋ wɔɔŋ o tosa Chɛhowa o hɔl, mbo tɛɛmbuu ndu kɔllo woŋ o sɔla yooŋgoo hoo ni. Mbo tosa mɛɛ o mɛɛ yuŋgu Chɛlobowam ndo tosa yɛ, nduyɛ mbo dii vɛlɛ Nadabi.*
8 O wɔsi 26 Esa, masaa le Chuda wa o masaleŋ choo wo niŋ, Ɛlaa po Baasia wo simnuŋ masaa Isɔluɛi choo ni o Tiɛsa niŋ. Nduyɛ, wɔsilaŋ la tiɔɔŋ o chii o masaleŋ choo ni.
9 Kɛ mi buɛi ndɔɔ o pilɛ Simili yii ndu dumbu.* Puaa sɔŋga o nyɛm nyaanaŋ suaa naŋndoŋ niŋnda, ndu wa kundaa o pilɛ bolleŋ ni. Ɛlaa wa muɛiyaŋ kolɔɔ Tiɛsa tau tau o Asa lo chiɛiniŋ, wana wa chiɛi lemasaa Tiɛsa loŋ hɔlteŋ choo wo, mbo yii ndu dumbu.
10 Mi Simili luɛi mbo kɔ dii ndu, okoŋ mbo miiŋgu o masaleŋ choo o foofo ndɔɔ. Hei yɔŋnuŋ o wɔsi 27 Esa, masaa le Chuda wa o masaleŋ choo wo niŋ.
11 Mɛɛ Simili simnuŋ masaa, dimioo nuaa o chal o kpeŋgbei* ndɔ lemasaa choo, mbo dii wana o wana wa o Baasia lo chiɛiniŋ. Wanayaŋ ndɔŋ* ni, chaaŋaa nduaa ni, wana pɔnɔɔ o pilɛ bɛɛ o mɛi yoomu le.
12 Mi Simili diu wana o wana wa o Baasia lo chiɛiniŋ a mɛɛ Chɛhowa ke Chehu, wana suaa le ndu wo yooŋgoo le mbo dimul Baasia maa i cho yɔŋnɔŋ yɛ.
13 Le hakila Baasia nda Ɛlaa po ndɔ tosa laŋ, a le mɛɛ nda tosa mi waŋnda Isɔluɛi luei balaŋ o hakioo niŋ yɛ hei yɔŋnuŋ ni. Ma tɛɛmbuu Chɛhowa, Mɛlɛka Isɔluɛiya kɔl a piɔmaa ndaa fonduaa nda wa sooluuwo wa.
14 Sɔɔŋ cheleŋ cho a Ɛlaa okɔɔ woŋ, nyɛ o nyɛ o tosa, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ.
15 O wɔsi 27 Esa, masaa le Chuda wa o masaleŋ choo wo niŋ, Simili simnuŋ masaa ni. Nduyɛ palɛi i ŋɔmmɛu o chii o masaleŋ choo Tiɛsa ni. A boondii keŋ, puaa chɔuwa ndaa kuɛ Kibɛtɔŋ, chiee Filitiaŋnda, ma kialu dɔɔŋgɔɔ loŋ le sɔŋgɔɔ.
16 A lo o dɔɔŋgɔɔ niŋ loŋ ma tuɛi aa: “Simili yii masaa dumbu mbo dii ndu.” Okoŋ mi waŋnda Isɔluɛi kpou chua Omili, masa puaa chɔuwa, ma siiŋguu ndu masaa Isɔluɛi choo kpou paale leŋ o dɔɔŋgɔɔ niŋ loŋ.
17 Mi Omili nda waŋnda Isɔluɛi kpou mal Kibɛtɔŋ ma huŋ Tiɛsa, ma duau chioo o piŋndo niŋ.
18 Mɛɛ Simili che maa puaa bii chioo, mbo kɔ luɛi o fondaŋ nda taŋgul o kala kala o chiɛi lemasaa wo, mbo mal ndu o yiŋ ndupila choo, okoŋ mbo wu.
19 Le hakila Simili pila tosa laŋ, a le hakila o tosa mi waŋnda Isɔluɛi luei balaŋ leniŋ ndaŋ hei yɔŋnuŋ ni. Mbo tosa sɔɔŋ bɛnda Chɛhowa o hɔl te woŋ, nduyɛ mbo kua o nɛila Chɛlobowam ndaŋ choo.
20 Sɔɔŋ cheleŋ cho a Simili okɔɔ woŋ, a dumbu o yii masaa wo, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ.
21 A boondii keŋ waŋnda Isɔluɛi piɔuwaŋ kundalaŋ la tiɔɔŋ ni. Kundaa o pilɛ wa Tibinai, po Kinati wo kɔɔli, kanifuule ndaa yeema ma siiŋguu ndu masaa. Nduyɛ, mi kundaa o pilɔɔ ndu sim Omili kɔɔli.
22 Kɛ mi wanaa wa Omili kɔɔli wa sɔla kpaayaa ma hiau wanaa wa Tibinai, po Kinati wo kɔɔli wa. Okoŋ mi Tibinai wu, nduyɛ mi Omili simnuŋ masaa.
23 O wɔsi 31 Esa, masaa le Chuda wa o masaleŋ choo wo niŋ Omili simnuŋ masaa le Isɔluɛi ni. Wɔsilaŋ 12 o chii o masaleŋ choo ni, nduyɛ le wɔsilaŋ la ŋɔmpum, o wa o masaleŋ choo Tiɛsa.
24 Mbo piandu pembei Sameeliaa kaniŋ humbuŋ talɛŋndoŋ ŋmuuŋ* Simaa o ba, okoŋ mbo taŋgul chioo o pembei hei choo. Mbo ke chioo hoo diolaŋ aa Sameeliaa,* diola Simaa laŋ, wana* ndoo nɔ pembei heiyo.
25 Mi Omili hiau lachi a sɔɔŋ bɛnda le woŋ tosaa Chɛhowa o hɔl. Ndoo wɔu mbo hiau wanaa keeku ndu lachi wa kpou.
26 Nduyɛ nɛila Chɛlobowam, po Nebati wo wa choo laŋ, a haki o tosa mi waŋnda Isɔluɛi a luei balaŋ leniŋ, ma tɛɛmbuu Chɛhowa Mɛlɛka ndaa kɔl a piɔmaa ndaa fonduaa sooluuwo wo, mi Omili bɛɛ tual o nɛila laŋ choo.
27 Sɔɔŋ cheleŋ cho a Omili okɔɔ woŋ, nyɛ o nyɛ o tosa, a chɔula o yem ndaŋ, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ.
28 Okoŋ mi Omili wu,* ma kumbu ndu Sameeliaa. Nduyɛ, mi Ehaabi po ndɔ miiŋgu o masaleŋ choo o foofo ndɔɔ.
29 O wɔsi 38 Esa, masaa le Chuda wa o masaleŋ choo wo niŋ, Ehaabi po Omili wo simnuŋ masaa le Isɔluɛi ni. Nduyɛ, wɔsilaŋ 22 o chii o masaleŋ choo Sameeliaa ni.
30 Kɛ Ehaabi po Omili wo ndoo wɔu Chɛhowa o hɔl mbo hiau wanaa keeku ndu lachi wa kpou.
31 Ehaabi chi ndi bɛɛ isɔɔ le hakila Chɛlobowam, po Nebati wo tosa laŋ tolɔɔ kɔɔli le. O faŋaŋ okoŋ kɔɔli, mbo chua vɛlɛ Chɛsibɛɛ o nɔɔ niŋ, chua Ɛtibaal lo, masaa le Saidɔŋ. Nduyɛ mbo kandu Baal sooluuwo.
32 Okoŋ kɔɔli, mbo taŋgul chiɛiyo* Sameeliaa le Baal, nduyɛ mbo simi bandu luamaa lasalaa loŋ le ndu sooluuwo.
33 Mi Ehaabi toosiaa vɛlɛ suŋgbuleŋ a yɔmndo.* Nyɛ Ehaabi tosa le Chɛhowa, Mɛlɛka Isɔluɛiya kɔllo tɛɛmbuuwo wo ndoo hiou nyɛ o nyɛ masaa keeku ndu lachi Isɔluɛi ya ndaa tosa wo.
34 O palɛi nduɛi niŋ, mi Hiɛɛ wana waa Bɛtɛl miŋgi Chɛluiko taŋgul. Mɛɛ o kila chiyii nduɛi, mi Abailuam po ndɔ tasoo wu. Nduyɛ mɛɛ o dɔu diolaŋ, mi Sɛkubi po ndɔ mɛɛlaa wu. Mi i yɔŋnuŋ mɛɛ Chɛhowa dimul Chɔɔsuaa po Nuŋ ndo yɛ.
Tɛɛsiaalaŋ
^ Hibuluiye, “ma yambu ndu nda finyaa nduaa mamaa.”
^ Koŋ cho ni, po Chɛlobowam ndo.
^ Ɔɔ “defoo.”
^ Ɔɔ “kpɛŋɛ .”
^ Ɔɔ “wanaa nduaa miŋgi maa wa.”
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
^ Diolaŋ ndaŋ la sim, “Kaale Simaa Leŋ le Nɔ Ni.”
^ Hibuluiye, “masanɔ.”
^ Hibuluiye, “ma yambu ndu nda finyaa nduaa mamaa.”
^ Ɔɔ “maaŋndo.”
^ Tofa Tɛɛsiaa.
