Masaa Tasiaa 18:1-46
18 Mɛɛ teleŋ tiŋ hiou, mi Chɛhowa ke Ilaicha yooŋgoo o wɔsi yaa ndɔɔ niŋ. Mbo dimul ndu aa: “Kɔ naa Ehaabi chua le mbo che num, kanifuule I cho tosa mi piɔɔ sia o lɛŋndeŋ choo.”
2 Okoŋ, mi Ilaicha kua naa Ehaabi chua le mbo che ndu. Nduyɛ, yima bɛnduaŋ ma wa Sameeliaa.
3 A teleŋ koŋ, mi Ehaabi veelu Obadaya, wana wa chiɛi lemasaa hɔlteŋ ndo. (Obadaya yɛ, ndoo nɔ siooŋnde tau le Chɛhowa.
4 Mɛɛ Chɛsibɛɛ wa pɛŋ wanaa suaa le Chɛhowa wa diuwo, mi Obadaya chua nda ŋwaŋ 100, mbo viaŋ nda o buululaŋ niŋ. Buulu o buulu, ŋwaŋ 50. Nduyɛ, loŋ o wa nda nyɛdiaa kioo a mɛŋndaŋ ni.)
5 Okoŋ, mi Ehaabi dimul Obadaya aa: “Kɔ ma balu o lɛŋndeŋ niŋ kpou o fondaŋnda mɛŋndaŋ ma wa laŋ a o kpoloŋndaŋ.* Kɛlɛŋgaa miŋ saaluŋ bil puiyaa tau le suaa naa a chɔluaa naa yɛyii muuliaŋnda* mandaa. Okoŋ, chɔluaa naa kpou vi lɛ le.”
6 Ma piɔu lɛŋndeŋ ndapila tɛɛŋ, le naa wana o wana nɔ mbo kɔ balu wa. Mi Ehaabi bii nɛiyo o ndɔɔ, mbo kua ndupilɛ. Nduyɛ, mi Obadaya bɛɛ bii nɛi cheleŋ mbo kua ndupilɛ.
7 Mɛɛ Obadaya wa kɔlaŋ, mi Ilaicha kua ma kɔ bɔŋaŋ. Dimioo nuaa Obadaya che ndu, mbo sina ndu sakpo, okoŋ mbo baŋ wulaŋ mbo fuuluu hɔlla lɛŋ, mbo dimi aa: “Masanɔ nuu Ilaicha, num cho hoo ni?”
8 Mbo mulul ndu aa: “Ya ni. Kɔ dimul masanɔ numndo aa: ‘Ilaicha cho naŋ.’”
9 Kɛ mbo mulul ndu aa: “Yɛɛ ya tɛɛmbuu yɛ ma yeema ya buɛi numndo malɔɔ Ehaabi o ba le mbo dii ya?
10 I mɛnaŋ po o Chɛhowa, Mɛlɛka num cho yoomu wo lo maa, lekaa o lekaa ɔɔ lelɛŋ o lelɛŋ cho mi masanɔ nuu kɛɛ waŋnda viomɔɔ loŋ le num nuuviaa le. Naa nda dimi ko maa a cho loŋ te, o dimul lɛŋnde leŋ a kaale leŋ le ma mɛnaŋ maa a chi num te.
11 Ndu ŋ huŋ ya dimullo ni aa, ‘Kɔ dimul masanɔ numndo aa: “Ilaicha cho naŋ”?’
12 Te I mɛi dɔɔ num pɛ mi kuɛ, nyina Chɛhowa wo cho lakɔŋnɔŋ a num o fondaŋ ya sina le wo. Okoŋ te I kɔ dimul pɛ Ehaabi mbo seeluŋ num te, o cho ya diyɔɔ. Kɛ nduyɛ, ya buɛi numndo nɔ siooŋii Chɛhowa ve chɔŋ o chuaambɔyɛi nii niŋ.
13 Masanɔ nuu, baa num oo tuii nyɛ ya tosa a teleŋ Chɛsibɛɛ wa wanaa suaa le Chɛhowa wa diyɔɔ wo le? Mi chua wanaa suaa le Chɛhowa wa ŋwaŋ 100, mi viaŋ nda o buululaŋ niŋ. Buulu o buulu, ŋwaŋ 50. Nduyɛ loŋ ya wa nda nyɛdiaa kioo a mɛŋndaŋ ni.
14 Te I kuɛ pɛ a mɛɛ ŋ dimi yɛ mi kɔ dimul masanɔ nuu maa Ilaicha cho naŋ, o cho ya diyɔɔ.”
15 Kɛ mi Ilaicha dimul ndu aa: “I mɛnaŋ po o Chɛhowa lo, Mɛlɛka puaa chɔuwa* o cho yoomu mi wa ndu piɛiyo* wo maa, hau I cho lakɔ naa ndu chua mbo che ya.”
16 Okoŋ, mi Obadaya kua naa Ehaabi chua mbo dimul ndu. Nduyɛ, mi Ehaabi mal mbo kua le Ilaicha chɔɔ.
17 Dimioo nuaa Ehaabi che Ilaicha, mbo nyuna ndu aa: “Num cho hoo ni, num wana cho hunɔɔ a kpundɛla* bɛŋndaŋ Isɔluɛiyo?”
18 Mbo mulul ndu aa: “O cho ya le cho hunɔɔ a lakpundɛ Isɔluɛi le, kɛ num a chiɛi finya numndo hiŋ a laŋ ni. Kanifuule, la mal sawala Chɛhowa laŋ mi la muliŋ Baal sooluuwo.
19 Lelaŋ, chuuŋgiaa waŋnda Isɔluɛi kpou naa ya chua o Pembii Kamɛɛ Ve. Nduyɛ, ŋwaŋ 450 suaa le Baal la, a ŋwaŋ 400 suaa le mɛlɛka Asiɛlua* mi nda kpou wa nyɛdiaa dioo o tibii* Chɛsibɛɛ wo choo wa, nda bɛɛ ma chuuŋgiaa nda.”
20 Okoŋ, mi Ehaabi yɔŋ yooŋgoo naa waŋnda Isɔluɛi chua kpou. Nduyɛ, mbo chuuŋgiaa wanaa suaa le mɛlɛkaa haa wa o Pembii Kamɛɛ Ve.
21 Okoŋ, mi Ilaicha sɔɔŋguu waŋnda kpou ikɛi mbo dimul nda aa: “Le vɛɛ kpɛ nya cho yɛ wa o yɔm tɛndaa tɛɛŋ? Te Chɛhowa cho Mɛlɛka tonyaa ni, la tol ndu kɔɔli. Kɛ te Baal cho Mɛlɛka tonyaa ni, mɛɛ la tol ndu kɔɔli!” Kɛ wana pilɛ bɛɛ suu le.
22 Mi Ilaicha dimul vɛlɛ waŋnda aa: “Wanaa suaa le Chɛhowa wa kpou, yapilɛ kpe lo niŋ ni. Kɛ wanaa suaa le Baal la, a cho puaa ŋwaŋ 450.
23 La chuu naa nauwaa piaanduaa fɔŋnduaa a ŋiɔɔŋ, mi nda chua o pilɛ. A siɔŋ nauwo o ndaa ma kɛsi o yɔmnde choo, kɛ a chiŋa leyiŋ te. Ya bɛɛ cho nauwo o nuu siɔŋ mi kɛsi o yɔmnde choo, kɛ I cho leyiŋ chiŋa le.
24 Te ŋ chii pɛ, nya veelu diola mɛlɛka nyaa. Nduyɛ ya bɛɛ, I cho diola Chɛhowa laŋ veelu. Mɛlɛka cho muli mbo yɔŋ yiŋndeŋ ndo cho chɔm kɛsɛ maa ndu cho Mɛlɛka tonyaa ni.” Okoŋ mi waŋnda kpou muli aa: “Ŋ chɛl nyɛ ŋ dimi wo.”
25 Mi Ilaicha dimul wanaa suaa le Baal la aa: “Nya hɛli fɛŋ nau piaandu fɔŋndɔɔ mi la bɛɛndiaa ndu le salaa, kanifuule nya cho faŋga ni. Kɛ la chiŋa leyiŋ te. La veelu diola mɛlɛka nyaa le mbo yɔŋ yiŋndeŋ.”
26 Okoŋ, ma chua nau piaandu fɔŋndɔ nda ke nda wo ma bɛɛndiaa. Nduyɛ chɔŋ idiiyo haaa mi paaleŋ le kiandu, a wa diola mɛlɛka ndaa Baal veeloo aa: “Oo Baal, muli naa diom fɔ!” Kɛ a tuii diom o diom te, nduyɛ wana mulul nda le. A wa huuloo a yolaŋ ma balu bandu luamaa lasala nda toosiaa wo.
27 A pɛŋgu paale kalaleŋ kinɛi, mi Ilaicha kandu nda mamɔɔ, mbo dimi aa: “La chɔɔlu wɔ veelu choo choo! Kanifuule, la dimi aa mɛlɛka o cho ni! Kɛlɛŋgaa o cho yiyaŋndo o isɔɔ choo ɔɔ yondoniŋndo o kuɛ ni.* Ɔɔ naapum o luaŋ o cho ni, nduyɛ mɛɛ mi waŋndo kɔ tindi ndu!”
28 A wa veeloo choo choo kpeleŋ, nduyɛ ma tɛɛndiaa dialuŋ ndaŋ a mɔɔŋ biŋgioŋ vɛlɛ a baltaŋ, a mɛɛ naamu ndaa wa yɛ. A lo muŋ tɛɛndiaa haaa mi koowaŋ ma tiu nda lekɔɔ kpou.
29 Nduyɛ, chɔŋ a paale kala le leŋ haaa mi teleŋ nda soli sala tɔlɔɔ kullo a paale yɔŋgaŋ ndeŋ ndo fuuluu, a wa sɔɔŋ tosaa lende yalaka yalaka,* kɛ a tuii diom o diom te, nduyɛ wana mulul nda le. Wana o wana ve nda nila yaŋɔɔ le.
30 O mɛɛlulaŋ kpɔŋ, mi Ilaicha dimul waŋnda kpou aa: “La sɔɔŋguu nanuŋ.” Mi nda kpou sɔɔŋguu ndu ikɛi. Okoŋ, mbo miŋgi bandu luamaa lasala Chɛhowa wo, o nda tɛɛmbuu wo bɛɛndiaa.
31 Mi Ilaicha chua poutaŋ 12 a mɛɛ kaala fula o puaa Chekɔpu wa niŋndaŋ la wa yɛ. Chekɔpu wo hoo Chɛhowa ndoo dimul ni aa: “Diola numndaŋ la cho niŋ wa Isɔluɛi ni.”
32 Mbo taŋgul bandu luamaa lasalaa le Chɛhowa a poutaŋ ndaŋ. Mɛɛ o chii ndu taŋgul, mbo balu sooŋndo touwɔɔ chɛ chɛ. Nduyɛ fondaŋ sooŋndo hoo ndoo balu wo, wanaa saŋ kulloŋ le kiloo tɔ.*
33 Okoŋ kɔɔli, mbo kɛsu kɛsuu yɔmnde o bandu luamaa lasala koŋ choo. Mbo kili kili nau piaandu fɔŋndɔ koŋ, mbo kɛsi visiŋ muŋ o yɔmii keŋ choo. Mbo dimi niko aa: “La kɔndu mɛŋndaŋ o kpɛɛnɛŋ bɛndoŋ ŋ hiɔɔlu niŋ, mi la dɔu maŋ o sala luamaa hoo choo a o yɔmnde choo.”
34 Mɛɛ nda dɔu, mbo dimi aa: “La dɔu vɛlɛ.” Ma duau vɛlɛ. Mbo chɔɔlu vɛlɛ dimi aa: “La dɔu vɛlɛ dɔwɔɔ yaa ndɔɔ.” Okoŋ, ma duau dɔwɔɔ yaa ndɔɔ.
35 Mi mɛŋndaŋ ma kua koŋgilaŋ o bandu luamaa lasalaa balɔɔ silɔ, nduyɛ mbo pei vɛlɛ sooŋndo cha a mɛŋndaŋ.
36 A teleŋ nda soli sala tɔlɔɔ ŋkullo a paale yɔŋgaŋ ndeŋ ndo kinɛi, mi Ilaicha, wana suaa le Mɛlɛka wo sɔɔŋguu lachi mbo dimi aa: “Oo Chɛhowa, Mɛlɛka Ebilaham ndo, Aase, a Isɔluɛi, tosa mi waŋnda sina hau maa num cho Mɛlɛka o Isɔluɛi niŋ ni, nduyɛ maa ya cho buɛi numndo ni. Tosa ma sina maa num dimul la le sɔɔŋ muŋ kpou tosaa ni.
37 Oo Chɛhowa, a yandii muli ya diom! Muli ya diom le mi waŋnda haa sina maa num Chɛhowa, num cho Mɛlɛka tonyaa ni. Nduyɛ maa a yeema nda ma muli kɔlta ndalaŋ o numndo.”
38 Okoŋ, mi Chɛhowa tosa mi yiŋndeŋ le fula choo choo mi le huŋ lom sala luamaa koŋ, yɔmnde, poutaŋ, a chundoo. Mi le veesiaa vɛlɛ mɛŋma wa o sooŋndo niŋndaŋ sɛɛŋ.
39 Mɛɛ waŋnda kpou che hei, ma baŋ wulaŋ ma fuuluu hɔlla lɛŋ o lepilɛ niŋ kpe. Ma dimi aa: “Chɛhowa cho Mɛlɛka tonyaa ni! Chɛhowa cho Mɛlɛka tonyaa ni!”
40 Okoŋ, mi Ilaicha dimul nda aa: “La bii wanaa suaa le Baal la. La tosa mi o pilɛ bɛɛ hɛluŋ te!” Ma biu biu nda o foofo loŋ, mi Ilaicha tuusu a nda o pioo* Kisiɔŋ, nduyɛ mbo diu diu nda loŋ.
41 Mi Ilaicha dimul niko Ehaabi aa: “Hel pembei ma kɔ dio nyɛdiaa ma kol, kanifuule I cho tueiyɔɔ piɔɔ bɛndoo yimndo.”
42 Mi Ehaabi kua le mbo de nyɛdiaa mbo kol. Kɛ mi Ilaicha ndu hel o Pembii Kamɛɛ Ve choo, mbo kɔ baŋ wulaŋ lɛŋ mbo tundu bolleŋ o wulaŋ tɛɛŋ.
43 Okoŋ mbo dimul buɛi ndɔɔ aa: “Yandii, hellɔ naa temaa ma tofa kumbuii pee mɛŋma ihɛllo.” Mi buɛi ndɔɔ kua mbo kɔ tofa, nduyɛ mbo dimul ndu aa: “I chi nyɛ o nyɛ le.” Mi Ilaicha miŋgi ndu bɛmbɔɔ le ŋɔmmɛu le mbo kɔ tofa.
44 Mɛɛ buɛi ndɔɔ miiŋgu miiŋgu ŋɔmmɛu ndɔɔ, mbo dimul ndu aa: “I cho chɔɔ yumu yumboo fulaa nyɛɛmbɔ o pee mɛŋma ihɛllo choo maa ba wanachiee.” Mi Ilaicha dimul ndu aa: “Kɔ ma kɔ dimul Ehaabi aa, ‘Baa nyɛ nyaanaŋ suaa naŋndo o suaa! Chɔŋ ma kandu kɔlaŋ, yɔŋii piɔɔ bii num naŋ!’”
45 O teleŋ koŋ bɛŋgu, mi choo piimiaa kpilo, mi hueiye hɔŋ, okoŋ mi piɔɔ bɛndoo tual. Mi Ehaabi biyaŋ kiltaŋ o nyɛ ndɔ nyaanaŋ suaa naŋ ndo niŋ le kɔlaŋ Chɛsiluɛɛ.
46 Kɛ mi Chɛhowa handu Ilaicha ba ndɔɔ choo, okoŋ mbo yiinuŋ doma ndɔɔ o chaŋ. Nduyɛ mbo lo kiltaŋ haaa mbo hiau Ehaabi, mbo fuuluu ndu tase Chɛsiluɛɛ.
Tɛɛsiaalaŋ
^ Ɔɔ “peelaŋ.” Tofa Tɛɛsiaa.
^ Chɔluaa haa, sofɛlɛ piaandoo hel so laandoo ni ma kom nda.
^ Koŋ cho ni, puaa chɔuwa o choo choo niŋ.
^ Hibuluiye, “o ya sim lachi wo.”
^ Ɔɔ “sendila.”
^ Ɔɔ “suŋbule nda toosiaa a yɔmndo leŋ.” Tofa Tɛɛsiaa.
^ Ɔɔ “tabali.”
^ Ɔɔ naapum, “o kuɛ kelaa inɛ.”
^ Ɔɔ “maa wanaa suaa le mɛlɛka wa.”
^ Ɔɔ “siyaa le diiŋ.” Tofa Tɛɛsiaa B14.
^ Tofa Tɛɛsiaa.
