Masaa Tasiaa 19:1-21
19 Okoŋ, mi Ehaabi dounuŋ Chɛsibɛɛ kona a nyɛ o nyɛ Ilaicha tosa okɔɔ, vɛlɛ a mɛɛ o diu diu wanaa suaa le Baal la kpou a muɛi faŋnde yɛ.
2 Le hei, mi Chɛsibɛɛ viam waŋndo o Ilaicha lo a yooŋgoo aa: “A teleŋndo hoo siɔdii, num bɛɛ te I dii num mɛɛ ŋ dii nda yɛ le feu, mɛlɛkaa tusi ya nyɛpalaa bɛndoo choo!”
3 Mɛɛ o tuei hei, mi siooŋnde bii ndu, okoŋ mbo chaŋ mbo nyaanuŋ le yoomu ndɔɔ piŋioo. Mbo huŋ Biaa-siɛba, chiee waa o Chuda niŋ, mbo mɛi buɛi ndɔɔ loŋ.
4 Mɛɛ o kuɛ le kɔla paale pilɛ o pollo niŋ, mbo chal o bɔɔ yɔmndo bɛŋgu mbo yeema piɔmndo. Mbo dimi aa: “Ya I saŋga niŋ fɔ! Oo Chɛhowa, chua niŋ yoomu nuu. Kanifuule, I cho o sɔvɛ mi hiau finyaa niaa mamaa le.”
5 Okoŋ, mi Ilaicha hini o bɔɔ yɔm koŋ bɛŋgu, mbo hiau o luaŋ. Kɛ o lepilɛ niŋ kpe, mi maalikɛinɔɔ pilaŋ ndu mbo dimul ndu aa: “Chɔŋ ma de nyɛdiaa.”
6 Mɛɛ o tendu, mbo cha kpuŋgbɛi beedii* tiilaŋnde o pouta tuu laŋ choo ndu o bolleŋ a mɛŋndaŋ o nyɛ kolaa niŋ. Mbo chaŋ mbo dia, mbo kol mɛŋndaŋ, nduyɛ mbo hini vɛlɛ.
7 Okoŋ kɔɔli, mi maalikɛinɔ Chɛhowa wo huŋ vɛlɛ hunɔɔ diiŋ ndɔɔ mbo pilaŋ ndu, nduyɛ mbo dimul ndu aa: “Chɔŋ ma de nyɛdiaa, kanifuule tiŋ ŋ nɔ le kɔlaŋ ndo bandu bɔɔ.”
8 Mbo chaŋ mbo dia, nduyɛ mbo kol. Mi nyɛdiaa o de koŋ ndo luei ndu yoomuaŋ le palɛi 40 a nyumndaŋ 40, haaa mbo fuuluu o Pembii Holuɛɛbi Ve, pembii Mɛlɛka tonyaa.
9 Mɛɛ o fuuluu loŋ, mbo luɛi o buuloo niŋ le luaŋ. Nduyɛ, mi Chɛhowa suaa naa ndu chua, mbo nyuna ndu aa: “Yɛɛnɛ ŋ hiŋ yɛ tosaa nanuŋ Ilaicha?”
10 Okoŋ mbo muli aa: “I piɛi num niŋ tau a sɛmbɔɔ Chɛhowa, Mɛlɛka puaa chɔuwa,* kɛ waŋnda Isɔluɛi a faŋaŋ o kpema numndo choo. Bandula numnda luamaa lasalalaŋ, a chii laŋ tɛɛmbuu, nduyɛ ma diu diu wanaa suaa le numnda a muɛi faŋnde. Yapilɛ kpe lo niŋ ni. Kɛ ya bɛɛ, a cho ya nuuviaa le ya diyɔɔ.”
11 Mi Mɛlɛka dimi aa: “Fula ma sim o pembei choo ya Chɛhowa lachi.” Okoŋ, Chɛhowa wa hiouwɔɔ, nduyɛ hueiyii kpaayɛi bɛnduei wa pembuŋ bɛndoŋ tɛɛndiaa a pouta kpoowa laŋ pesi pesioo ndu Chɛhowa lachi. Kɛ Chɛhowa ve o hueiyii keŋ niŋ te. Okoŋ kɔɔli, mi lɛŋndeŋ le nyiiya. Kɛ Chɛhowa ve o lɛŋnde nyiiyaa le leŋ niŋ te.
12 Mɛɛ lɛŋndeŋ le pɛŋgi nyiiyaa, mi yiŋnde bɛnduleŋ le sandu. Kɛ Chɛhowa ve o yiŋnde leŋ niŋ te. Mɛɛ yiŋndeŋ le faŋaŋ, mi diomndo suaa toolo toolo.
13 Dimioo nuaa Ilaicha tuei diom koŋ, mbo handuŋ doma wa ndu lekɔɔ wo o hɔl, okoŋ mbo fula mbo kɔ sim o buuloo sondoo. Mi diom koŋ nyuna ndu aa: “Yɛɛnɛ ŋ hiŋ yɛ tosaa nanuŋ Ilaicha?”
14 Okoŋ mbo muli aa: “I piɛi num niŋ tau a sɛmbɔɔ Chɛhowa, Mɛlɛka puaa chɔuwa. Kɛ waŋnda Isɔluɛi, a faŋaŋ o kpema numndo choo. Bandula numnda luamaa lasalalaŋ, a chii laŋ tɛɛmbuu, nduyɛ ma diu diu wanaa suaa le numnda a muɛi faŋnde. Yapilɛ kpe lo niŋ ni. Kɛ ya bɛɛ, a cho ya nuuviaa le ya diyɔɔ.”
15 Mi Chɛhowa dimul ndu aa: “Miiŋgu ma kuɛ o pollo niŋ Damasikɔɔ. Te a fuuluu loŋ pɛ, pɔya Hasayɛɛ le mbo wa masaa le Siiliaa.
16 A nɔ vɛlɛ ma pɔya Chehu, po mama Nimisai yo le mbo wa masaa Isɔluɛi choo. Nduyɛ, ma pɔya vɛlɛ Ilaasia* po Siafati wo, fulaa Ebɛl-mɛhola, le mbo wa wana suaa le Mɛlɛka wo. Ndu cho miiŋgu o foofo numndo ni.
17 Wana o wana hɛluŋ pɛ muɛi faŋii Hasayɛɛ le, Chehu cho ndu diyɔɔ ni. Nduyɛ, wana o wana hɛluŋ pɛ muɛi faŋii Chehu ve, Ilaasia cho ndu diyɔɔ ni.
18 I nɔ wɔ waŋnda 7,000 o Isɔluɛi niŋ. Nda kpou wana pilɛ bɛɛ beŋ ndɔ Baal wulaŋ mbo sooluu ndu le, nduyɛ wana pilɛ bɛɛ sɔsa wɔ ndu kuuwo le.”
19 Mɛɛ o chɛŋ loŋ, mbo komal Ilaasia po Siafati wo waa a nauwaa towaa 24 ndu lachi. Nauwa haa wa a mɔsɔŋaa a ŋiɔɔŋ ŋiɔɔŋnda, nduyɛ o wa o a ŋiɔɔŋaa mɛɛlaa ikɛi. Mi Ilaicha kua naa ndu chua mbo wuu ndu doma ndɔɔ choo.
20 Okoŋ, mi Ilaasia mal nauwaa kaŋ mbo nyaanuŋ Ilaicha kɔɔli, mbo dimul ndu aa: “Yandii, chɛl la mi kɔ sɔsa kɛkɛ nuu nda nde nuu kuuwo le nda choŋgɔŋndo. Okoŋ, miŋ huŋ kɔ niko naa num.” Mi Ilaicha dimul ndu aa: “Kɔ, vɛɛ ya nɔla yɛ mi kuuna num keŋ tosaa?”
21 Mbo miiŋgu, mbo chua nauwaa towaa a ŋiɔɔŋ mbo soli nda salaa. Nduyɛ, mbo yau visiŋ ndaŋ a yɔmii ndaa baa nauwaa kaŋ le waa ve, mbo ke waŋnda ma dia. Okoŋ kɔɔli, mbo chaŋ mbo tual Ilaicha kɔɔli, nduyɛ mbo simnuŋ wana ndɔ malaa.
Tɛɛsiaalaŋ
^ Ɔɔ “bulu.”
^ Koŋ cho ni, puaa chɔuwa o choo choo niŋ.
^ Diolaŋ ndaŋ la sim, “Mɛlɛka Cho Wana Piŋiaa Ni.”