Masaa Tasiaa 2:1-46
2 Mɛɛ piɔm Deeve wo sɔɔŋguu kpɛɛluŋ, mbo ke Sɔlɔmɔŋ po ndɔ silalaŋ ndaŋ:
2 “I cho niŋ o piɔmndo hɔlndɔ. Lelaŋ, nɔ dialuŋ kalaŋ nduyɛ ma chɔm wana pɔnɔyɛi.
3 A nɔ ma tosa nyɛ o nyɛ cho num kuee le Chɛhowa Mɛlɛka numndo. Wa kɔlaŋ o nɛila ndɔlaŋ choo. Nduyɛ, nyɛ o nyɛ cho o poonyiaa o yau laSawa Muuse wo niŋ a sawala ndɔlaŋ okɔɔ, yamaŋ ndɔŋ, a loonɔŋnda ndɔlaŋ, faŋaŋ lechoo le. Te a tosa keŋ pɛ, a cho wa wana taasi nduyɛ ma sɔla batiuwaa ba o ba ŋ kɔ.
4 Nduyɛ, Chɛhowa cho peelu buŋgɛi o chua a ya okɔɔ ve. Mbo dimi aa: ‘Te puaa numnda chaa pɛ kela ya o hɔl, ma wa ya pɛiyo o laalaŋndo choo a kɔl ndaa kpou vɛlɛ a yoomu* ndaa kpou, waŋndo cho wa teleŋ o teleŋ o pulale numndeŋ choo le challe o kpeŋgbei* lemasaa choo Isɔluɛi.’
5 “Numpila sina nyɛ Chowaabi, po Sɛluiya wo tosal la wo. Mbo dii masaa wa puaa chɔuwa Isɔluɛi bolleŋ nda a ŋiɔɔŋ, Abina po Nɛɛ wo a Amasa po Chɛtɛɛ wo. Mbo dii nda a teleŋ kɔl nyuloo naŋ chaa o chɔuwo o wa ni. Nduyɛ, mi kooma ndaŋ ma sayiaŋ ndu o yaule wa ndu o chaŋ ndeŋ a o kɔvɛila* wa ndu o ŋpelu laŋ.
6 Lelaŋ, soliŋ taasi numndo kpeku nduyɛ chɛl mi yuluŋii nduɛi kuɛ o Sɛiyo* niŋ o kɔl nyulu niŋ te.
7 “Kɛ Baasilai fula Kiliaadi wo ndu, a nɔ ma chɔm puaa nduaa kaala lo lechoo wo. Puaa nduaa nɔ ma wa wanaa cho wa nyɛdiaa dioo o tibii* numndo choo wa tɛɛŋ. Kanifuule, lende nda mala ya ni teleŋ ya nyaanuŋ Abisalɔm bɛ numndo.
8 “Simɛi po Kiluaa wo, fulaa Bahuluim o kaale Bɛŋjamiŋ ndeŋ choo bɛɛ cho nanuŋ a num latulu. Paale ya wa kɔlaŋ Mahanɛm ndeŋ, ndu kei ya bɛɛlaŋ tɛɛmbuu ni, nduyɛ mbo yei ya yeiyo pila. Kɛ mɛɛ o hiŋ mbo komal la o Pioo Chɔɔdaŋ, mi mɛnaŋ o ndu lo o diola Chɛhowa laŋ niŋ aa: ‘I cho num diyɔɔ le.’
9 Mal ndu le nyɛ o tosa koŋ ndo le. Wana taasioo ŋ cho ni, nduyɛ a sina nyɛ ŋ nɔ ma tosa a ndu wo. A nɔ ma tosa mi yuluŋii nduɛi kuɛ o Sɛiyo* niŋ a koowaŋ.”
10 Okoŋ mi Deeve wu,* ma kumbu ndu o Chiee Deeve Wo niŋ.
11 Wɔsilaŋ 40 Deeve chii o masaleŋ choo Isɔluɛi ni. O chii wɔsilaŋ la 7 o masaleŋ choo Hibulɔŋ, nduyɛ mbo chii wɔsilaŋ 33 o masaleŋ choo Chulusalɛm.
12 Okoŋ, mi Sɔlɔmɔŋ chal o kpeŋgbei lemasa Deeve finya ndɔ wo choo. Nduyɛ o pɔmpɔmbɔ, mi masale ndɔleŋ le sim nyɛkɛndɛ yi.
13 Mɛɛ teleŋndo hiou tiŋ, mi Adonicha po Hakiti wo huŋ naa Ba-siɛɛba chua, kalaa Sɔlɔmɔŋ. Mbo nyuna ndu aa: “Baa hunɔɔ kɔl nyuloo pa ŋ hiŋ ni?” Mi Adonicha muli aa: “Ei, hunɔɔ kɔl nyuloo.”
14 Okoŋ mbo dimi aa: “I yeema mi dimul num isɔɔ.” Mi Ba-siɛɛba dimi aa: “Awa, soo.”
15 Mbo hiau lachi a suɛi aa: “Numpila sina maa ya masaleŋ le wa miiŋgu o ba ni. Nduyɛ, waŋnda Isɔluɛi kpou wa ya kɔl* le mi simnuŋ masaa. Kɛ mi masaleŋ le hialuŋ ya mi pɔmbɔ nuu sɔla leŋ. Kanifuule, Chɛhowa kɛɛsiaa ni le mbo sɔla leŋ.
16 Kɛ nyɔɔ o pilɛ kpe ya yeema ni mi nyuna num le ndu. Yandii, kɛɛ le ya ndu tosallo le.” Mi Ba-siɛɛba dimul ndu aa: “Awa, soo.”
17 Okoŋ mbo dimi aa: “Masaa Sɔlɔmɔŋ kɛɛ num diom te, yandii dimul la ndu mbo ke ya Abisiaki, Sunamaitiinɔɔ le mbo wa laa ni.”
18 Okoŋ, mi Ba-siɛɛba dimi aa: “O cho suɛi wɔɔŋ te. I cho isɔɔ naa masaa chua le num.”
19 Okoŋ, mi Ba-siɛɛba kua naa Masaa Sɔlɔmɔŋ chua le mbo soo o ndu lo le Adonicha. Mi masaa chaŋ o lepilɛ niŋ kpe mbo kua naa ndu chua, mbo tunduŋ ndu lachi. Okoŋ mbo miiŋgu mbo kɔ chal o kpeŋgbei ndɔ lemasaa choo. Mbo kɛsul vɛlɛ kala ndɔ kpeŋgbei lemasaa le mbo chal o ba ndɔ kɛndɔɔ choo.
20 Mi Ba-siɛɛba dimi aa: “I yeema num ma tosal la suɛi pɔmbɔ, yandii kɛɛ ya diom te.” Okoŋ mi masaa dimul ndu aa: “O yɛɛnɛ ŋ yeema yɛ nde, dimul la, I cho num diom kɛɛ le.”
21 Mbo dimi aa: “I yeema ma ke Adonicha bɛ num Abisiaki, chuaambɔ Sunamaitiinɔɔ le mbo wa laa ndɔ.”
22 Mi Masaa Sɔlɔmɔŋ mulul kala ndɔ aa: “Le yɛɛnɛ ŋ cho yɛ ya dimullo le mi chua Abisiaki, chuaambɔ Sunamaitiinɔɔ mi ke Adonicha? Dimul la vɛlɛ mi ke ndu masaleŋ, kanifuule bɛ nuu o cho ni. Nduyɛ Abiaata, wana soliaa lasalaa a Chowaabi, po Sɛluiya wo cho ndu kɔɔli.”
23 Le hei, mi Masaa Sɔlɔmɔŋ mɛnaŋ o Chɛhowa lo aa: “Te Adonicha sɔla piɔmndo le nyɛ o nyuna hoo wo le feu, Mɛlɛka tusi ya nyɛpalaa bɛndoo choo.
24 Chɛhowa, Mɛlɛka cho yoomu wo, ndu kɛsi ya o kpeŋgbei lemasa Deeve finya nuu choo ni, nduyɛ mbo ke chiɛi nuu masaleŋ ndeŋ a mɛɛ o chua buŋgɛi yɛ. I mɛnaŋ o ndu lo po maa, Adonicha nɔ mbo sɔla piɔmndo paale hauleŋ ndeŋ.”
25 O lepilɛ niŋ kpe, mi masaa Sɔlɔmɔŋ viam Bɛnaya po Chɛhoyada wo le mbo kɔ dii Adonicha. Okoŋ, mbo kɔ dii ndu.
26 Mi masaa dimul Abiaata wana soliaa lasalaa aa: “Miiŋgu Anatɔti naa yondola numndaŋ la cho wa. A nɔ le piɔmndo sɔlaa, kɛ I cho num diyɔɔ hau le. Kanifuule, ma kua a Kɔfu Chɛhowa wo, Mɛlɛka Kpuluŋguma Bɛndoo Deeve finya nuu lachi. Nduyɛ, saŋga o saŋga keeku finya nuu choo, nya ndu o keeku choo ni.”
27 Mi Sɔlɔmɔŋ faŋa Abiaata o wali soliaa lasalaa le Chɛhowa. Nduyɛ, mi hei peelu nyɛ Chɛhowa dimi o Silɔɔ niŋ a chiɛi Ilai yo okɔɔ wo.
28 Mɛɛ Chowaabi tuei yooŋgoo hoo, mbo nyaanuŋ o tɛndii Chɛhowa wo, mbo kɔ saa leela bandu luamaa lasalaa. Kanifuule, mi Chowaabi toolu Adonicha mi che bɛɛ ndoo toolu Abisalɔm te.
29 Okoŋ ma dimul Masaa Sɔlɔmɔŋ aa: “Chowaabi nyaanuŋ o tɛndii Chɛhowa wo, nduyɛ o cho o bandu luamaa lasalaa ikɛi loŋ.” Mi Sɔlɔmɔŋ dimul Bɛnaya, po Chɛhoyada wo aa: “Kɔ ma kɔ dii ndu!”
30 Mi Bɛnaya kua o tɛndii Chɛhowa wo, mbo dimul Chowaabi aa: “Masaa dimi maa num fula nanuŋ!” Kɛ mbo muli aa: “I fula le! Nanuŋ ya cho wu ni.” Mi Bɛnaya miiŋgu, mbo kɔ dounuŋ masaa kona a nyɛ Chowaabi dimi wo okɔɔ, nduyɛ a mɛɛ o mulul ndu yɛ.
31 Mi masaa dimul ndu aa: “Tosa mɛɛ o dimi yɛ. Kɔ ma kɔ dii ndu, ma kumbu ndu. Okoŋ, ma faŋa kooma wanaa Chowaabi dii o fondo fuu wo choo wa ya o lebol a o chiɛi finya nuu choo.
32 Ndupila Chɛhowa cho kooma nduaŋ handɔɔ o lebol ni. Kanifuule Deeve finya ni ve o sina choo le, mbo del wanaa sandu ma hiau ndu wa a ŋiɔɔŋ choo mbo dii nda a muɛi faŋnde. Nda yɔŋnuŋ ni maa Abina po Nɛɛ wo, masa puaa chɔuwa le Isɔluɛi, a Amasa po Chɛtɛɛ wo, masa puaa chɔuwa le Chuda.
33 Kooma ndaŋ ma cho wa Chowaabi a chuauwaa nduaa o lebol le fɛɛŋ a fɛɛŋ. Kɛ maa Chɛhowa tosa mi Deeve, chuauwaa nduaa, chiɛi ndɔɔ, a kpeŋgbei ndɔ lemasaa wa o kɔl nyulu niŋ le fɛɛŋ a fɛɛŋ fɔ.”
34 Okoŋ mi Bɛnaya, po Chɛhoyada wo kɔ del Chowaabi choo mbo dii ndu. Nduyɛ, ma kumbu ndu o chiɛi ndɔɔ o pollo niŋ.
35 Mi masaa miŋgi Bɛnaya, po Chɛhoyada wo puaa chɔuwa bolleŋ o foofo Chowaabi wo. Nduyɛ, mbo miŋgi Sadɔki wana soliaa lasalaa o foofo Abiaata wo.
36 Mi masaa yooŋgu le Simɛi, mbo dimul ndu aa: “Taŋgul chiɛiyo Chulusalɛm ma wa loŋ. Fɛɛŋ bɛɛ soli pelei ma kuɛ ba o ba le.
37 Paale ŋ fula pɛ kɔɔli ma taŋ Kpoloŋndo Kidilɔŋ ma kuɛ inɛ, a cho piɔmndo sɔla. Nduyɛ kooma numndaŋ ma cho wa numpila o lebol.”
38 Mi Simɛi mulul masaa aa: “Nyɛ ŋ dimi wo bɛnda. Masanɔ nuu, ya buɛi numndo, I cho tosa a mɛɛ ŋ dimi yɛ.” Okoŋ, le palɛi bɔɔbɔɔ, Simɛi wa Chulusalɛm.
39 Kɛ mɛɛ wɔsilaŋ la hiou la yaa, mi chiaa Simɛi ya a ŋiɔɔŋ nyaanuŋ Kaati o Masaa Akisi lo, po Maaka wo. Mɛɛ nda dimul Simɛi aa: “Fallo, chiaa numnda kuɛŋnuŋ Kaati,”
40 mi Simɛi hel o Sofɛlɛ ndɔɔ choo o lepilɛ niŋ kpe, mbo kua chiaa nduaa kɔɔli Kaati o Akisi lo. Mɛɛ Simɛi fula Kaati mbo miiŋgu a chiaa nduaa,
41 ma dimul Sɔlɔmɔŋ aa: “Simɛi mal Chulusalɛm mbo kua Kaati, kɛ o hiŋ.”
42 Okoŋ, mi masaa yooŋgu le Simɛi mbo nyuna ndu aa: “O cho ya le kɛsi num o sawaa bɛŋgu o diola Chɛhowa laŋ niŋ mi dimul num aa: ‘Paale ŋ cho fula kɔɔli ma soli pelei nanuŋ ma kuɛ inɛ leŋ a cho piɔmndo sɔla’ le? Nduyɛ ma dimul la aa: “Nyɛ ŋ dimi wo bɛnda, I cho tosa a mɛɛ ŋ dimi yɛ,” lende le?
43 Mɛɛ le yɛɛnɛ ŋ faŋaŋ yɛ o buŋgɛi ŋ chua Chɛhowa o hɔl le choo, a sawa ya kɛsul numndo?”
44 Okoŋ mi masaa dimul Simɛi aa: “Nyɛ nɛiyaa o nyɛ nɛiyaa ŋ luei finya nuu Deeve, a sina ndu o kɔl numndo niŋ walaŋ. Nduyɛ, Chɛhowa cho num nyɛ nɛiyaa koŋ miŋgi o lebol.
45 Kɛ ya Masaa Sɔlɔmɔŋ, salaa cho wa ya choo nduyɛ mi kpeŋgbei lemasa Deeve wo sim yi Chɛhowa o hɔl le fɛɛŋ a fɛɛŋ.”
46 Okoŋ mi masaa viam Bɛnaya, po Chɛhoyada wo mbo kɔ del Simɛi choo mbo dii ndu.
Mi masaleŋ le sim niko nyɛkɛndɛ yi Sɔlɔmɔŋ o ba.
Tɛɛsiaalaŋ
^ Tofa Tɛɛsiaa.
^ Ɔɔ “kpɛŋɛ.”
^ Ɔɔ “samtala.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Ɔɔ “tabali.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Hibuluiye, “ma yambu ndu nda finyaa nduaa mamaa.”
^ Hibuluiye, “ndaa kɛsi ya niŋ hɔlteŋ choo.”