Masaa Tasiaa 20:1-43
20 Mi Bɛŋ-hedadi, masaa le Siiliaa chuuŋgiaa puaa nduaa chɔuwa kpou a masaa cheleŋnda 32. Mbo chuuŋgiaa nda a suaa ndaa vɛlɛ a nyɛm ndaŋ nyaanaŋ suaa naŋndoŋ, mbo kɔ luei Sameeliaa o piŋndo niŋ le ndu delɔɔ choo a sɔŋgɔɔ.
2 Okoŋ, mbo viam waŋnda chiee a yooŋgoo naa Masaa Ehaabi chua, masaa le Isɔluɛi. Ma dimul ndu aa: “Nyɛ Bɛŋ-hedadi dimi wo cho hoo ni,
3 ‘Kaniŋ humbuŋ ŋ nɔ woŋ a kooliŋ numndoŋ kpou, ya nɔ muŋ ni. Nduyɛ, laandaa num aa kɛndɛ kɛndiaa a puaa numnda bɛɛ, ya nɔ nda ni.’”
4 Mi masaa le Isɔluɛi muli aa: “Masanɔ nuu, a mɛɛ ŋ dimi yɛ, yapila a nyɛ o nyɛ ya nɔ, num nɔ ni.”
5 Okoŋ kɔɔli, mi wanaa nda vem nda miiŋgu vɛlɛ pila naa Ehaabi chua, ma dimul ndu aa: “Nyɛ Bɛŋ-hedadi dimi wo cho hoo ni, ‘Mi yɔŋ num yooŋgoo hoo aa: “Kaniŋ humbuŋ ŋ nɔ woŋ, a kooliŋ numndoŋ kpou, a laandaa numnda, a puaa numnda, a nɔ ma ke ya.”
6 Kɛ siɔdii, I cho buɛiyaa niaa viomɔɔ naa num chua a teleŋ waa nuaa kinɛi. A cho lakɔ chiɛi numndo a chiɛila buɛiyaa numnda yaasiaa fɛsɛ fɛsɛ, ma chua nyɛ o nyɛ kɛndɛ cho loŋ ma hiŋnuŋ a ndu.’”
7 Okoŋ, mi masaa le Isɔluɛi veelu waŋ banaa kpou o lɛŋndeŋ niŋ, mbo dimul nda aa: “Yandii, la kɛsiŋ o kɔl maa, poo hoo tuunuŋ o kɔl le naa kpundɔɔ chuuwo. Kanifuule, o nyuna ya le mi ke ndu laandaa niaa, puaa niaa, kaniŋ niŋ humboŋ, a kooliŋ nuŋ, nduyɛ I kɛɛ ndu diom te.”
8 Mi waŋ banaa a waŋnda kpou dimul ndu aa: “Chɛl ndu diom te, nduyɛ nyɛ o nyɛ o dimi, tosa le.”
9 Mbo dimul wanaa Bɛŋ-hedadi vem nda aa: “La dimul masanɔ nuu aa, ‘Nyɛ o nyɛ ŋ dimi o tasela ndɔ, buɛi numndo cho tosa. Kɛ hei ndi, I cho tosa le.’” Okoŋ, mi wanaa o vem a yooŋgoo wa miiŋgu ma kɔ dounuŋ ndu kona.
10 Mi Bɛŋ-hedadi lo okoŋ mbo yɔŋ ndu yooŋgoo hoo aa: “I cho Sameeliaa tɛɛmbuu. Nduyɛ chundu cho lo wo, wanaa naŋ hiŋ nda o kɛ kɛ sɔla niŋ baa cha le. Te I tosa keŋ te feu, mɛlɛkaa tusi ya nyɛpalaa bɛndoo choo!”
11 Mi masaa le Isɔluɛi dimi aa: “La dimul ndu aa, ‘Wana doviŋ le chɔuwo ma saŋgalaŋ maa wana yem mbo wa nyɛla chɔulaŋ solioo wo le.’”
12 Masaa Bɛŋ-hedadi nda masaa apiliaa wa kolɔɔlaŋ o tɛndiila* ndalaŋ niŋ, ma huŋ dounuŋ ndu kona. Dimioo nuaa o tuei hei, mbo dimul buɛiyaa nduaa aa: “La bɛɛndiaŋ le chɔuwo!” Okoŋ, ma bɛɛndiaŋ le chioo delɔɔ choo.
13 Kɛ mi wana suaa le Mɛlɛka wo komal Ehaabi, masaa le Isɔluɛi, mbo dimul ndu aa: “Nyɛ Chɛhowa dimi wo cho hoo ni, ‘A che wanaa faŋga bɛnduaa haa kpou? I cho num nda hau malɔɔ o ba, okoŋ ma sina maa ya cho Chɛhowa ni.’”
14 Mi Ehaabi nyuna aa: “Vɛɛnɛ hei cho yɛ yɔŋnɔŋ?” Mi wana suaa le Mɛlɛka wo mulul ndu aa: “Nyɛ Chɛhowa dimi wo cho hoo ni, ‘Masaa ŋbuŋgaa, wanaa ndaa malaa cho chɔuwo hoo tosa ni.’” Mbo nyuna vɛlɛ aa: “Nɛɛnɛ cho yɛ chɔuwo hoo kandɔɔ?” Mbo mulul ndu aa: “Num!”
15 Okoŋ mi Ehaabi chɔm masaa ŋbuŋgaa wanaa ndaa malaa. A wa kpou kpou ŋwaŋ 232. Okoŋ kɔɔli, mbo chɔm puaa chɔuwaa Isɔluɛiya kpou, a wa 7,000.
16 Bɛŋ-hedadi wa muɛiyaŋ kolɔɔ kala kalaa ipalaa nda masaa 32 wa ndu malaa wa o tɛndiila* ndalaŋ niŋ, ma fulal nda.
17 Mɛɛ masaa ŋbuŋgaa wanaa ndaa malaa fula dɔɔ, mi Bɛŋ-hedadi viam waŋnda o nda lo. Ma dounuŋ ndu kona aa: “Puaa fula Sameeliaa ma huŋ.”
18 Okoŋ mbo dimi aa: “Te hunɔɔ kɔl nyuloo nda hiŋ ni, la huŋ a nda yoomu. Te le chɔuwo nda hiŋ ni, mɛɛ la huŋ vɛlɛ a nda yoomu.”
19 Kɛ mɛɛ masaa ŋbuŋgaa wanaa ndaa malaa a puaa chɔuwaa wa nda tolɔɔ kɔɔli wa mal chioo,
20 mi wana o wana dii wana hinul ndu le sɔŋgɔɔ wo. Okoŋ, mi Siiliaŋnda nyaanuŋ, nduyɛ mi Isɔluɛiya tisa nda kɔɔli. Kɛ mi Bɛŋ-hedadi masaa le Siiliaa hialuŋ, mbo nyaanuŋ o soo choo nda puaa sɔŋga o suaa choo wa atiŋ.
21 Kɛ mi masaa le Isɔluɛi fula, mbo hiau lachi a wanaa sɔŋga o suaa choo a o nyɛm nyaanaŋ suaa naŋndoŋ niŋnda diuwo. Nduyɛ, mbo dii Siiliaŋnda diuwo pila.
22 Okoŋ kɔɔli, mi wana suaa le Mɛlɛka wo kua naa masaa le Isɔluɛi chua, mbo dimul ndu aa: “Kɔ ma bɛɛndiaa puaa num aa chɔuwa, nduyɛ ma yiyaŋ a nyɛ ŋ cho tosa wo okɔɔ. Kanifuule, masaa le Siiliaa cho hunɔɔ num chiŋalaŋ nyilasiaŋ o wɔsioo kandɔŋndo.”*
23 Mi masaa le Siiliaa buɛiyaa nduaa a dimul ndu aa: “Mɛlɛka ŋpemboo Mɛlɛka ndaa cho ni. Lelaŋ nda yem naa ni. Kɛ te ŋ chɔulaba nda pɛ o dɛŋgbɔɔ niŋ, ŋ cho nda yomɔɔ.
24 Nyɛ ŋ nɔ vɛlɛ ma tosa wo cho hoo ni: Faŋa masaa bɛnduaa kpou o foofola ndalaŋ, ma miŋgi masaa ŋbuŋgaa loŋ.
25 Chuuŋgiaa puaa chɔuwa mɛɛ a hɛluŋ num nda wa yɛ, nduyɛ ma chuuŋgiaa suaa vɛlɛ a nyɛm nyaanaŋ suaa naŋndoŋ mɛɛ ŋ wa paandu yɛ. Okoŋ, miŋ kɔ chɔulaba nda o lɛŋnde dɛŋgbɛleŋ choo. Ŋ cho nda yomɔɔ.” Mbo yaŋ nilaŋ o sila ndaa, nduyɛ mbo tosa mɛɛ nda dimi yɛ.
26 O wɔsioo kandɔŋndo,* mi Bɛŋ-hedadi chuuŋgiaa Siiliaŋnda mbo kua Afɛki le sɔŋgɔɔ a Isɔluɛiya.
27 Mi waŋnda Isɔluɛi bɛɛ chuuŋgiaŋ, nduyɛ ma ke nda nyɛm nda hauba woŋ, okoŋ ma kuel nda. Mɛɛ waŋnda Isɔluɛi kelu dɔɔŋgɔɔ nda lachi, a wa ko mɛɛ chuiŋnda wa nuaa kundala taaniŋndaŋ la tiɔɔŋ yɛ. Kɛ Siiliaŋnda wa a pɛŋgɛlaŋ o tanda koŋ niŋ kpou.
28 Okoŋ, mi wana suaa le Mɛlɛka tonyaa wo kua naa masaa le Isɔluɛi chua, mbo dimul ndu aa: “Nyɛ Chɛhowa dimi wo cho hoo ni, ‘Le mɛɛ Siiliaŋnda dimi aa: “Chɛhowa, Mɛlɛka ŋpemboo o cho ni, kɛ o cho Mɛlɛka dɛŋgbɛ le” yɛ, I cho faŋga bɛndoo hoo kpou malɔɔ num o ba, nduyɛ ma sina kpendekele maa ya cho Chɛhowa ni.’”
29 A wa o dɔɔŋgɔla ndalaŋ niŋ le palɛi i ŋɔmmɛu, nduyɛ o paale ŋɔmmɛu leŋ choo ma kandu sɔŋgɔɔ. O paaleŋ lepilɛ niŋ kpe, mi waŋnda Isɔluɛi diu puaa chɔuwaa Siiliaŋaa kua a ŋpelu wa 100,000.
30 Mi a tuaa kpou nyaanuŋ o chiee bɛndoo niŋ Afɛki. Kɛ mi kpakioo komba puaa 27,000 choo. Mi Bɛŋ-hedadi bɛɛ nyaanuŋ chiee, mbo kɔ vioŋnuŋ o lumuiyo niŋ pɔ.
31 Okoŋ mi wanaa nduaa silaa dimul ndu aa: “Fallo, ŋ tuei maa masaa cho Isɔluɛi ya nɔ nyiɛɛye tau*. Lelaŋ yandii, ŋ yiinuŋ ndɔɔ nyɛla labɛkilaŋ o lachaŋ miŋ baiyiaŋ yuei o lebol, okoŋ miŋ kuɛ o masaa Isɔluɛi lo. Naapum o cho num diyɔɔ le.”
32 Ma yiinuŋ nyɛla labɛkilaŋ o lachaŋ, nduyɛ ma baiyiaŋ yuei o lebol, ma kua o masaa Isɔluɛi lo, ma dimul ndu aa: “Bɛŋ-hedadi buɛi numndo dimi aa, ‘Yandii, dii ya le.’” Mbo muli aa: “O cho wɔ yoomu? Puaapilɛnɔ nuu o cho ni.”
33 Mi puaa haa cha maa dɛnɛ kɛndɛ cho fula o nyɛ o dimi wo niŋ, nduyɛ ma laalaŋ ndu. Okoŋ ma dimi aa: “Puaapilɛnɔ numndo Bɛŋ-hedadi cho ni.” Mbo dimul nda aa: “La kɔ huŋ a ndu.” Mi Bɛŋ-hedadi fula mbo kua o ndu lo, nduyɛ mi Ehaabi heelu ndu o nyɛ nyaanaŋ suaa naŋndo choo.
34 Mi Bɛŋ-hedadi dimul ndu aa: “Chieeŋ finya nuu bii finya num o ba woŋ, I cho miŋgi. Okoŋ ma kumbi lɔɔlaŋ Damasikɔɔ le numpila, mɛɛ finya nuu tosa o Sameeliaa niŋ yɛ.”
Mi Ehaabi muli aa: “I cho num malɔɔ ma kuɛ, le kpemaa hoo.”
Okoŋ ma yii kpemaa, mbo mal ndu mbo kuaŋnuŋ.
35 Mi Chɛhowa ke puaa wanaa suaa le Mɛlɛka wa* o pilɛ yooŋgoo. Mbo dimul chaaŋ ndɔ aa: “Yandii, lɔɔ ya.” Kɛ mbo kɛɛ le ndu lɔɔ.
36 Le hei, mbo dimul chaaŋ ndɔ koŋ aa: “Le mɛɛ ŋ kɛɛ le Chɛhowa nilaŋ yaŋɔɔ yɛ, dimioo nuaa a faŋaŋ ya ikɛi, kpɔkuŋndo* cho num diyɔɔ.” Mɛɛ o faŋaŋ ndu ikɛi, mi kpɔkuŋndo hinul ndu mbo dii ndu.
37 Mbo komal po cheleŋ mbo dimul ndu aa: “Yandii, lɔɔ ya.” Mi poo luaa ndu, nduyɛ mbo boli ndu.
38 Okoŋ, mi wana suaa hoo le Mɛlɛka wo yiinuŋ kola ipɛŋgɔɔ o hɔl, mbo kua mbo kɔ chum masaa o nɛi.
39 Mɛɛ masaa wa hiouwɔɔ, mbo dimul ndu choo choo kpeleŋ aa: “Ya buɛi numndo wa kɔlaŋ naa sɔŋgɔɔ ndoo tuulu tau wa, mi waŋndo fula loŋ mbo chuu ya poo, mbo dimi aa, ‘Manda poo hoo. Te o luusiaŋ pɛ, num cho miiŋgu o foofo ndɔɔ ni. Te o cho koŋ te, a cho kaniŋ humboŋ paawa talɛŋnde i pilɛ.’*
40 Nduyɛ boondii ya buɛi numndo wa kpɔndi kpɔndi ve, mi poo hoo chimbu mbo kuaŋnuŋ.” Mi masaa le Isɔluɛi dimul ndu aa: “Numpila chii yamɛi kilulɔŋ. Mɛɛ ŋ dimi yɛ, lende i cho yɔŋnɔŋ a num ni.”
41 Mbo faŋaŋ kola ipɛŋgɔɔ o hɔl chɔ chɔ, nduyɛ mi masaa sina maa o cho waŋndo o pilɛ o wanaa suaa le Mɛlɛka wa tɛɛŋ.
42 Mbo dimul ndu aa: “Nyɛ Chɛhowa dimi wo cho hoo ni, ‘Le mɛɛ ŋ mal po ya dimul num maa o nɔ le piɔmndo sɔlaa wo mbo hialuŋ num yɛ, num cho miiŋgu o foofo ndɔɔ ni. Nduyɛ wanaa numnda cho miiŋgu o foofo wanaa nduaa ni.’”
43 Okoŋ, mi masaa le Isɔluɛi miiŋgu o ndu lo chiee Sameeliaa a kɔl tambɛiyo nduyɛ a dialloŋ ŋ vilɛi pɛ.
Tɛɛsiaalaŋ
^ Ɔɔ “bafɛila.”
^ Ɔɔ “bafɛila.”
^ Koŋ cho ni, a mɛɛ Hibuluiya chɔm paŋgoŋ yɛ. Tofa Tɛɛsiaa B15.
^ Koŋ cho ni, a mɛɛ Hibuluiya chɔm paŋgoŋ yɛ. Tofa Tɛɛsiaa B15.
^ Ɔɔ “nɔ kaala lo lechoo wo.”
^ Wana che pɛ maa, “puaa wanaa suaa le Mɛlɛka wa” sim le sukuu nda pɛɛku wanaa suaa le Mɛlɛka wa, ɔɔ kunda wanaa suaa le Mɛlɛka wa.
^ Ɔɔ “yalakanaa.”
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
