Masaa Tasiaa 21:1-29
21 Okoŋ kɔɔli, mi suɛi kpele makilepiiyo keekaŋ Masaa Ehaabi tɛɛŋ nda Nabɔti, wana waa Chɛsiluɛɛ. Chɛsiluɛɛ kpeloo hoo wa ni o chiɛi lemasa Ehaabi wo ikɛi, masaa le Sameeliaa.
2 Mi Ehaabi dimul Nabɔti aa: “Ke ya kpele makilepii numndo le mi wa tɔlɔɔla pɔmpɔmbɔ laŋ lechoo, kanifuule o chiɛi nuu ikɛi o cho ni. I cho num ke kpele makilepii hiou hoo naŋɔɔ wo sɔŋgɔ koŋ. Te o cho yɛ koŋ te, kilul la baa mi pendu.”
3 Mi Nabɔti dimul Ehaabi aa: “Sako fallo. I del kɔl le mi ke num nyɛm kɛŋ finyaa niaa mamaa mel la woŋ te, kanifuule Chɛhowa kɛɛ keŋ.”
4 Mɛɛ Nabɔti wana waa Chɛsiluɛɛ o mulul ndu aa: “I cho num ke nyɛm kɛŋ finyaa niaa mamaa mel la woŋ te,” mi Ehaabi miiŋgu o bɛɛ a kɔl tambɛiyo, nduyɛ hɔlla wa ndu a tɛɛmbaa pɛsɛkɛ. Okoŋ mbo kɔ hini o kpele ndɔɔ choo, mbo muli hɔlla o kpeloo kɔɔli, nduyɛ mbo kɛɛ le nyɛdiaa dioo.
5 Mi Chɛsibɛɛ laa ndɔ kua o ndu lo, mbo nyuna ndu aa: “Yɛɛnɛ tɛɛmbuu yɛ num kɔllo nuaa kpɛ ma kɛɛ le nyɛdiaa dioo?”
6 Mbo mulul ndu aa: “Kanifuule, I dimul Nabɔti wana waa Chɛsiluɛɛ le mbo ke ya kpele ndɔ makilepiiyo mi pendu, te koŋ te, mi ke ndu kpele makilepii cheleŋ sɔŋgɔ koŋ. Kɛ mbo dimul la aa, ‘I cho num kpele nuu ke le.’”
7 Mi Chɛsibɛɛ laa ndɔ dimul ndu aa: “O cho num te cho masaa le Isɔluɛi le? Chɔŋ ma de nyɛdiaa, nduyɛ ma wa a kɔl kɛndɛ. I cho num kpele makilepii Nabɔti wo ke, wana waa Chɛsiluɛɛ.”
8 Le hei, mbo poonyiaa yaulaŋ o diola Ehaabi laŋ niŋ, nduyɛ mbo handu pondale Ehaabi leŋ o yaulaŋ ndaŋ choo, okoŋ mbo yɔŋ waŋ banaa a laŋgbaa kalla o chiee Nabɔti wo niŋ.
9 Mbo poonyiaa o yaulaŋ ndaŋ niŋ aa: “La yonda le mi waŋnda bii sumndo, nduyɛ mi la kɛsi Nabɔti waŋnda lachi.
10 La tosa mi puaa fonduaa a ŋiɔɔŋ chal ndu lachi, nduyɛ ma hɛɛnduu ndu sɔɔŋ choo aa, ‘A yei Mɛlɛka a masaa!’ Okoŋ, mi la soli ndu mi la vii vii ndu a poutaŋ haaa mbo vi.”
11 Mi puaa o chiee Nabɔti wo niŋ, waŋ banaa, a laŋgbaa kalla o chiee koŋ niŋ tosa mɛɛ Chɛsibɛɛ dimul nda o yaula o poonyial nda laŋ niŋ yɛ.
12 Ma yonda le mi waŋnda bii sumndo, nduyɛ ma tosa mi Nabɔti chal waŋnda lachi.
13 Okoŋ, mi puaa fonduaa a ŋiɔɔŋ huŋ ma huŋ chal Nabɔti lachi, ma kandu ndu sɔɔŋ hɛɛnduuwo choo waŋnda kpou o hɔl aa: “Nabɔti yei Mɛlɛka a masaa!” Okoŋ kɔɔli ma faŋa ndu chiee, ma kɔ lo ndu vii viiyo a poutaŋ haaa mbo wu.
14 Mi waŋ banaa a laŋgbaa kalla yɔŋ Chɛsibɛɛ yooŋgoo aa: “A vii vii Nabɔti a poutaŋ mbo wu.”
15 Dimioo nuaa Chɛsibɛɛ tuei maa a lo Nabɔti vii viiyo a poutaŋ haaa mbo wu, mbo dimul Ehaabi aa: “Chɔŋ ma kɔ chua kpele makilepii Nabɔti wo, wana waa Chɛsiluɛɛ, kanifuule o cho lɛ yoomu le, o vi. Kpele koŋ o kɛɛ le num pisioo o ba ni.”
16 Dimioo nuaa Ehaabi tuei maa Nabɔti vi, mbo chaŋ nya mbo kua o kpele makilepii Nabɔti wo niŋ, wana waa Chɛsiluɛɛ, le mbo siiŋguu ndu nyɛ ndɔ.
17 Kɛ mi Chɛhowa dimul Ilaicha, Tisibaitiinɔɔ aa:
18 “Chɔŋ ma kuɛ o Ehaabi lo masaa le Isɔluɛi, o cho Sameeliaa wo. O cho o kpele makilepii Nabɔti wo niŋ, nduyɛ o kuɛ le mbo siiŋguu ndu nyɛ ndɔ.
19 Kɔ dimul ndu aa, ‘Nyɛ Chɛhowa dimi wo cho hoo ni: “A dii waŋndo nduyɛ ma chua nyɛm kɛŋ ndɔŋ.”’ Okoŋ ma dimul ndu aa, ‘Nyɛ Chɛhowa dimi wo cho hoo ni: “O fondaŋ tuŋnda deembuu kooma Nabɔti waŋ ndo, loŋ tuŋnda cho kooma numndaŋ deembuu ni.”’”
20 Mi Ehaabi dimul Ilaicha aa: “Num yaamɔɔnɔ nuu kɛsɛ ŋ cho ni! Yee a che ya?” Mbo mulul ndu aa: “I che num, nduyɛ yooŋgu ya sɔla wo cho hoo ni, ‘Le mɛɛ ŋ kɛɛsiaŋ o kɔl le nyɛ bɛnda ya Chɛhowa o hɔl te wo tosaa yɛ,
21 I cho num kpundɔɔ tusi choo. Nduyɛ o Isɔluɛi niŋ kpou, wana pɔnɔ o wana pɔnɔ cho o num Ehaabi lo chiɛiniŋ, I cho nda basɔɔ tɛɛ, mi tɛɛmbuu nda. Hali wanaa bala fonduaa a wanaa nɔ kpaaya le wa bɛɛ.
22 I cho tosa mi chiɛi numndo simnuŋ maa chiɛi Chɛlobowam po Nebati wo, a chiɛi Baasia po Ahicha wo. Kanifuule a yasa ya kɔllo, ma tosa mi Isɔluɛi tosa hakioo.’
23 Nduyɛ nyɛ Chɛhowa dimi a Chɛsibɛɛ okɔɔ wo cho hoo ni: ‘O buŋgɛi lelɛŋnde Chɛsiluɛɛ tuŋnda cho Chɛsibɛɛ dio ni.
24 O yuŋgu Ehaabi wo niŋ kinɛi, wana o wana vi pɛ chiee, tuŋnda cho ndu dio ni. Nduyɛ wana o wana vi pɛ yondoo niŋ, youwa cho ndu dio ni.
25 A tonya, kani bɛɛ wana o wana kɛɛsiaŋ ndɔ o kɔl le nyɛ bɛnda Chɛhowa o hɔl te wo tosaa maa Ehaabi le. Nduyɛ Chɛsibɛɛ laa ndɔ nyindu ndu ni le keŋ tosaa.
26 Ehaabi tosa sɔɔŋ wɔɔŋndoŋ mbo hiau wana o wana. O tol piɔmaa nɔɔlɛiya* kɔɔli maa Amɔluaitiiya kpou, a Chɛhowa tou Isɔluɛiya lachi wa.’”
27 Dimioo nuaa Ehaabi tuei yooŋgoo hoo, mbo sɛɛsiaŋ nyɛlaŋ lekɔɔ mbo wounuŋ nyɛla labɛkilaŋ, nduyɛ mbo bii sumndo. O wa hinilaŋ a nyɛla labɛkilaŋ lekɔɔ, nduyɛ mbo kela a mɔnɛi biyɔɔ.
28 Okoŋ, mi Chɛhowa dimul Ilaicha, Tisibaitiinɔɔ aa:
29 “A che mɛɛ Ehaabi tusiŋ ya o hɔl lɛ? Le mɛɛ o tusiŋ ya o hɔl lɛ, kpundɛla ya dimi laŋ ndaŋ kpou, I cho hunɔɔ a laŋ boondii o cho yoomu ve le. O palɛi po ndɔɔ niŋ ya cho kpundɛlaŋ ndaŋ tusi chiɛi ndɔɔ choo ni.”
Tɛɛsiaalaŋ
^ Diom maHibului nda soliŋ kpeku wo chiɛɛliaŋ lepum a “poolaŋ.” Nduyɛ, ma soliŋ ndu kpeku le nyɔɔ pɛɛsaa.
