Masaa Tasiaa 4:1-34
4 Mi Masaa Sɔlɔmɔŋ tosa masaleŋ o lɛŋnde Isɔluɛi leŋ niŋ kpou.
2 Wanaa nduaa bɛnduaa wa haa ni: Asaluaya, po Sadɔki wo wa wana soliaa lasalaa ni.
3 Puaa Sisiaa wa, Ɛliholuɛfi nda Ahicha wa wanaa poonyiaa ni. Chɛhosiafati, po Ahiludi wo wa wana kɛsiaa lakonaa ni.
4 Bɛnaya, po Chɛhoyada wo wa puaa chɔuwa bolleŋ ni. Sadɔki nda Abiaata, wa wanaa soliaa lasalaa ni.
5 Asaluaya, po Netaŋ ndo wa masaa pɔmbuaa choo ni. Sabɔdi, po Netaŋ ndo bɛɛ wana soliaa lasalaa o wa ni, nduyɛ chaaŋ o masaa o wa ni.
6 Ahisiaa wa chiɛi lemasaa hɔlteŋ ni. Nduyɛ Adoniluam, po Abida wo wa wanaa nda hɛli le wali lechiɔɔ tosaa wa bolleŋ ni.
7 Sɔlɔmɔŋ ndoo nɔ masaa pɔmbuaa 12 o Isɔluɛi niŋ kpou, nduyɛ nda ndaa huŋ a nyɛdiaa ni le masaa vɛlɛ a chiɛi lemasaa. O kɛ kɛ ndoo nɔ kalaŋndo le hunɔɔ a nyɛdiaa paŋgei i pilɛ o wɔsioo niŋ.
8 Masaa kaŋ cho haa ni: Po Hɔɔ wo, o wa lɛŋnde ŋpembuleŋ Ifiluem choo wo.
9 Po Dika wo, o wa Makasi, Siaabim, Bɛti-siɛmɛsi a Ɛlɔŋ-bɛti-hanaŋ choo wo.
10 Po Hisɛdi wo, o wa Alubɔti choo wo. (Ndu wa vɛlɛ Sookɔ a lɛŋnde Hɛfa leŋ kpou choo ni.)
11 Po Abinadabi wo, o wa pembuŋ holnuŋ Dɔɔ woŋ kpou choo wo. (Ndu chua Tafati, chua Sɔlɔmɔŋ ndo o nɔɔ niŋ ni.)
12 Baana, po Ahiludi wo, o wa Taanaki, Mɛkidɔɔ, a tanda Bɛti-siaŋ ndo kpou choo wo. Saluɛtaŋ ikɛi tandaa hoo cho ni, Chɛsiluɛɛ amatou. Tandaa hoo wa chɔŋ Bɛti-siaŋ mbo kua Ebɛl-mɛhola haaa o tanda Chokimiam ndo.
13 Po Kibɛɛ wo wa Luamɔti-kiliaadi choo ni. (Sɔndɔkɔlta Chaa laŋ o buŋgɛi Kiliaadi ve niŋ bɛɛ ndu wa laŋ choo ni. Chaa koŋ yɛ, Manaasɛ velu ndu ni. Tanda Akɔbi wo o Baasiaŋ niŋ bɛɛ, ndu o ba bɛŋgu o wa ni. Chieeŋ bɛndoŋ 60 wa o tandaa hoo niŋ ni, nduyɛ muŋ nɔ kpakilaŋ a diola ŋchiliŋndaŋ.)
14 Ahinadabi, po Idɔɔ wo wa Mahanɛm choo ni.
15 Ahimaasi wa buŋgɛi Nafitalii ve choo ni. (Mbo chua Basimati, chua Sɔlɔmɔŋ ndo o pilɔɔ o nɔɔ niŋ.)
16 Baana, po Husaiyo wa buŋgɛi Asia ve choo ni a Biyalɔti.
17 Chɛhosiafati, po Palua wo wa buŋgɛi Isaka ve choo ni.
18 Simɛi, po Ɛla wo wa buŋgɛi Bɛŋjamiŋ nde choo ni.
19 Kibɛɛ, po Yuluiyo wa buŋgɛi Kiliaadi ve choo ni. Saihɔŋ, masaa le Amɔluaitiiya a Ɔku, masaa le Baasiaŋ ndaa nɔ lɛŋndeŋ ndeŋ ni. Masaa pɔmbuaa wa haa o lɛŋndeŋ niŋ nda kpou, masa cheleŋ wa nda hɔlteŋ choo.
20 Waŋnda Chuda a waŋnda Isɔluɛi, a wa a hɔbɛi mɛɛ siooŋnde wa nuaa o pee mɛŋma ihɛllo kɔŋgɔ yɛ. A wa diola nda a kolɔɔla nda, nduyɛ wana o wana waŋnuŋ a kɔl kɛndɛ.
21 Masɛi wa chɔŋ o Pioo* kɔ o lɛŋnde Filitiaa leŋ niŋ haaa o pɛŋgulaŋ Ichipi ve kpou, Sɔlɔmɔŋ o ba bɛŋgu i wa ni. O palɛi Sɔlɔmɔŋ nde niŋ kpou, mi masaa wa o lɛŋnde hei niŋnda ndaa mal paawaa* o ndu lo, nduyɛ buɛiyaa nduaa nda wa ni.
22 Nyɛdiaa ndaa toosiaa le Sɔlɔmɔŋ o paaleŋ niŋndo wa hoo ni: Kpeyaŋ kɛndɛ kɛndɔɔ kilolaŋ 3,300,* a kpeyaŋ cheleŋ kilolaŋ 6,600.*
23 Nauwaa nda ke nyɛdiaa o hioo niŋnda, a chelulɛiyaa kɛndɛ kɛndiaa 10, nauwaa kua diolaŋ nda 20, a saa 100. O faŋaŋ o haa kɔɔli, mi ndaa dii vɛlɛ kialla, puuviaa, kialaa suu cheleŋ, a youwaa chelulɛiyaa kɛndɛ kɛndiaa.
24 Nyɛ o nyɛ wa Pioo leeloo,* chɔŋ Tifisa kɔ Kaasa, a masaa wa loŋ nda kpou, Masaa Sɔlɔmɔŋ o ba bɛŋgu nda wa ni. Kɔl nyuloo wa ba o ba fee o lɛŋnde ndɔleŋ niŋ. Nduyɛ kɔl nyuloo wa ndu tɛɛŋ a lɛŋii balu ndu ve.
25 O palɛi Sɔlɔmɔŋ nde niŋ kpou, waŋnda Chuda a waŋnda Isɔluɛi a waŋnuŋ o ba ndaa choo hɛnɛkɛ. Chɔŋ Daŋ kɔ Biaa-siɛba, wana o wana waŋnuŋ o yɔm ndɔ makilepiiyo a o yɔm ndɔ mafikiiyo bɛŋgu.
26 Sɔlɔmɔŋ ndoo nɔ fondaŋndaŋ 4,000* le suaa nduaa kɛsioo, nyɛm ndɔŋ nyaanaŋ suaa naŋndoŋ vɛlɛ a suaa* 12,000.
27 Masaa pɔmbuaa haa ndaa ke Masaa Sɔlɔmɔŋ nyɛdiaa ni, a wana o wana ndoo dia nyɛdiaa o tibii* Masaa Sɔlɔmɔŋ ndo choo. O kɛ kɛ ndoo nɔ mbo yɔŋgu nyɛdiaa le paŋgei i pilɛ, nduyɛ mbo tosa a sabu maa nyɛ o nyɛ ve le pɛŋ te.
28 Mi ndaa kuɛ vɛlɛ a baliiyoŋ a billo le suaa yɛ yiaa vɛlɛ a suaa naŋ nyɛm nyaanaŋndoŋ nda, ba o ba ndaa yeema pɛ ndu. Mi o kɛ kɛ ndoo kuɛ a ndu mɛɛ nda dimul ndu yɛ.
29 Mi Mɛlɛka ke Sɔlɔmɔŋ taasioo a sinapɛŋgoo tau tau. Nduyɛ, kɔl kalu ndɔɔ wa o hɔbɛi mɛɛ siooŋnde wa nuaa o pee mɛŋma ihɛllo kɔŋgɔ yɛ.
30 Sɔlɔmɔŋ ndoo nɔ taasioo mbo hiau wanaa wa ba Paaleŋ le Chaŋ ndo, a wanaa wa o lɛŋnde Ichipi leŋ niŋnda kpou.
31 Wana o wana ndoo nɔ taasi maa ndu le. Ndoo nɔ taasioo mbo hiau Itaŋ, Ɛsiluahaitiinɔɔ a puaa Mahɔɔ wa, Himaŋ, Kaakɔɔ, a Daada. Mi tɔɔ ndɔɔ tiu o lɛŋii balu ndu ve niŋ kpou.
32 Mbo dimi talelaŋ 3,000 nduyɛ mbo soli chondoŋ 1,005.
33 Mi ndoo tɛɛsiaa sɔɔŋ a yɔmnde okɔɔ. Mi ndoo soo a yɔm sida wo o cho Lebanɔŋ ndo a tɔlɔɔ hisɔpi wo, o wul o kpakioo choo wo okɔɔ. Mi ndoo soo vɛlɛ a visiaa okɔɔ, youwa, nyaa yoomaa kua o demboo choo wa, a suuwa.
34 Mi waŋnda ndaa fula o lelɛŋ o lelɛŋ niŋ ma hiŋ naa Sɔlɔmɔŋ chua, le sɔɔŋ kɔl kaluŋ ndoo dimi woŋ tueiyɔɔ. Masaa bɛnduaa wa ba o ba fee o chieeŋndo choo ma tuɛi a taasi ndɔɔ okɔɔ wa bɛɛ, mi ndaa hiŋ.
Tɛɛsiaalaŋ
^ Koŋ cho ni, Yufiluaati.
^ Ɔɔ “muloo.”
^ Hibuluiye, “kɔɔ tuuwo 30.” Tofa Tɛɛsiaa B14.
^ Hibuluiye, “kɔɔ tuuwo 60.” Tofa Tɛɛsiaa B14.
^ Koŋ cho ni, Yufiluaati ba paaleŋ le dello.
^ Nɔmbɛiyo hoo cho o yaula Baabuila masindɛ laŋ lapum niŋ ni, a o 2Ko 9:25. Yaula Baabuila masindɛ laŋ lapum la dimi maa 40,000.
^ Ɔɔ “puaa sɔŋga o suaa choo wa.”
^ Ɔɔ “tabali.”
