Chɔŋ Diiŋ Ndɔɔ 1:1-13
1 Ya bɛndu yuuwo, ya cho yauwo hoo poonyiaa ni. I cho ndu poonyiaa o chua Mɛlɛka hɛli wo lo nda chuauwaa nduaa ya kaala wa. O cho ko ya le, kɛ wanaa sina tonyaa wa bɛɛ kpou kaala nda.
2 Kanifuule, tonyaa cho naa o lakɔl, nduyɛ o cho naa lo o lakɔl lefafɛɛŋ.
3 Mɛlɛka Finya naa, a Po ndɔɔ Chiisu Kiliti cho naa kɛndɛi ndɛi bɛnduei tosal, ma tuiinuŋ naa inyiɛɛ, ma ke naa kɔl nyuloo, nduyɛ ma pɛɛku naa tonyaa a kaalaa.
4 I naŋ bɔɔ kɔl le mɛɛ ya che chuauwaa nyaa apum kɔlaŋ o nɛi tonyaa choo, a mɛɛ Finya naa ke naa sawaa yɛ.
5 Lelaŋ, num chua Mɛlɛka hɛli hoo wo, I cho num nyɔɔloo maa ŋ kaaliaŋ vellaa velle. (O cho a sawa sɛnɛi okɔɔ le ya cho nya poonyiallo le, kɛ a sawa paandu naŋ sɔla o kandɔŋndo pa wo okɔɔ.)
6 Nyɛ kaalaa sim ndo cho nyɛ sawala ndɔlaŋ la dimi wo tosaa ni. Sawa paandu nya tuei o kandɔŋndo pa wo cho ni maa, la wa kaalaa chɔmndo lɔɔlɔɔ.
7 Wanaa hui waŋnda wa a bɔɔbɔɔ cho niŋ o chieeŋndo niŋ. Waŋnda haa sɛɛŋgiaa ni maa Chiisu Kiliti hiŋ o chieeŋndo choo o iwana chieeya le. Nda cho wanaa huiyaa a wanaa simul Kiliti wa ni.
8 La mandaŋ a nyɛ nya tosa wo, yɔŋii wali kala kala naŋ tosa wo simnuŋ nyɛ fondoo fuu. O hei niŋ, la nɔla mi la sɔla fanda Mɛlɛka nɔ le nya wo.
9 Wana o wana lo o pɛɛku Kiliti wo bɛŋgu le, nduyɛ mbo kandu pɛɛkula lachoowalaŋ pɛɛkoo, mɛɛ o cho diompilɛ a Mɛlɛka le. Kɛ wana lo pɛ o pɛɛkoo hoo bɛŋgu, mɛɛ wana koŋ cho o diompilɔɔ niŋ a Finyaa nda Po ndɔɔ.
10 Wana o wana komal nya pɛ, mbo chuu nya pɛɛkoo hoo le, la yiya ndu o chiɛila nyalaŋ niŋ te. Nduyɛ la yil ndu le.
11 Kanifuule, wana yil ndu pɛ, mɛɛ o toolu wana koŋ o yɔŋ ndɔ wɔɔŋndo niŋ.
12 Mi che bɛɛ I nɔ sɔɔŋ tau le nya dimullo, kɛ I yeema mi poonyiaa muŋ o yau choo le. I nɔ yeemɛi le mi kuɛ o nya lo, okoŋ mi soo o nya lo sanaa,* le halikpeŋ mi la wa a nyaale tau.
13 Bɛ num Mɛlɛka hɛli wo, chuauwaa nduaa yil num lapi.
Tɛɛsiaalaŋ
^ Kilikiiye, “hɔlla a hɔlla.”