Kɔliŋtiaŋ Diiŋ Ndɔɔ 12:1-21
12 I nɔ mi kelu yoŋgaa, mi che bɛɛ tɔnɔ cho leniŋ te. Kɛ I cho nya dimul yilaŋuŋ ya che woŋ, a sɔɔŋ Masanɔɔ chɔm ya woŋ.
2 I sina po pilɛ, buɛi Kiliti wo o cho ni. Mi Mɛlɛka chua ndu chɔ mbo hel a ndu o choo choo yaa ndɔɔ niŋ. O cho niŋ hau suɛi wɔsila 14. Kɛ ko a dialuŋ ndɔŋ o heelu ndu ni, ko wundule ndɔleŋ ni, I sina le. Mɛlɛka pila sina ni.
3 A tonya, I sina poo hoo. Kɛ ko a dialuŋ ndɔŋ ni, ko wundule ndɔleŋ ni, I sina le. Mɛlɛka pila sina ni.
4 Mi Mɛlɛka helnuŋ a poo hoo, mbo kuaŋnuŋ a ndu o kpele hɛnɛkiɔɔ niŋ. Mbo tuɛi sɔɔŋ kɔndɔfilloŋ, ŋ wanachiee nɔ bɛɛ mbo soo le woŋ.
5 I cho yoŋgaa kiolɔɔ a poo hoo okɔɔ, kɛ o cho a yapila okɔɔ le. Mɛɛ dɔɔ a sɔɔŋ chɔm dialuŋ niŋ vilɛiyoŋ ndoŋ okɔɔ mi kelu yoŋgaa.
6 O yɔŋ bɛɛ mi yeema le yoŋgaa kiolɔɔ, keŋ ve idiɔm te. Kanifuule, tonyaa ya wa koŋ dimioo ni. Kɛ I cho yoŋga kiolɔɔ le, yɔŋii nyɛ ya cho tosaa wo, a nyɛ ya cho dimioo wo tosa mi la chua ya o bɛndu, mbo hiou mɛɛ ya cho kpeekpei yɛ.
7 Yilaŋuŋ kɔndɔfiliŋ ya che muŋ ndoŋ tosa ya o bɛndu, mbo hiau mɛɛ ya cho kpeekpei yɛ le.
Mi sɔla nyɛ nɛiyaa mɛɛ yuɛi i huau nuaa waŋndo mi i lo ndu o ŋdial lɛ, le halikpeŋ I hiu yoŋgaa kiolɔɔ le. Nyɛ nɛiyaa hoo wa ko maa maalikɛinɔ Setanaa le ya mɔnɛi lueiyo. Hei yɔŋnuŋ yɔŋii ya hiu yoŋgaa kiolɔɔ.
8 Bɛmbɔɔ le yaa waŋ ya nyɔɔlu Masanɔɔ ni le mbo soli ya o nyɛ nɛiyaa koŋ niŋ.
9 Kɛ mbo dimul la aa: “Kɛndɛi bɛnduii ya tosal numnde cho letuu. Kanifuule, boondii dialloŋ wu numnde, teleŋ koŋ kpaaya nuu wa wallo a num ni.” Lelaŋ, I naŋ bɔɔ kɔl le yoŋgaa kiolɔɔ a dialuŋ niŋ vilɛiyoŋ, le halikpeŋ mi kpaaya Kiliti wo wa ya choo maa tɛndii.
10 Le hei, o yɔŋ bɛɛ mi vi ŋdial, ma yei ya, mi bahawɛiyo komal la, ma tusi ya nyɛpalaa choo, nduyɛ mi nyɛ kindilaa komal la, te le Kiliti ni, I tembu kɔl te. Kanifuule, boondii dialloŋ wu ya ve, boondii keŋ ya sɔla yoomuaŋ ni.
11 I simnuŋ maa diɔm, kɛ nya tosa keŋ ni. Nya nyaa nɔ le ya chandɔɔ ni. O yɔŋ bɛɛ mi nya chi ya nyɛ o nyɛ le, kɛ kiilaa nyaa chuaŋnuŋ kaŋ maa a cho a sɔvɛ ma hiau chaanda wa, nyɛ o nyɛ cho ma tosa mi kɛɛ ndu tosa le.
12 Boondii ya wa nya tɛɛŋnde, mi sɔɔŋ ya tosa woŋ chɔm maa kiilanɔ Chiisu wo ya cho ni. Mi tosa sɔɔŋ kɔndɔfilloŋ a kaamaalaŋ nya tɛɛŋ o biuwɔŋndo niŋ.
13 Nyɛ o nyɛ ya tosal kundalaŋ la pilɛ laŋ, I kɛɛ nya ndu tosal te. Mɛɛ dɔɔ mbo wa le mɛɛ ya siiluu nya kalaŋ nuu le yɛ. Kɛ te yɔŋ wɔɔŋndo ya tosal nya koŋ ni, mɛɛ la mal la haki.
14 Lɔɔlaŋ yaa ndɔɔ ya yem hoo ni le nya hunɔɔ yilɔɔ, nduyɛ I cho nya kalaŋ nuu siiluu le. O cho nyɛm nyaŋ te ya yeema le, kɛ nyapila. Kanifuule, o cho chuauwa le nɔ ma nuuviaa nyɛm kiɔɔŋ le wanaa velu nda wa le, kɛ kalaŋ chuauwa nɔ ni ma nuuviaa nyɛm kiɔɔŋ le chuauwaa ndaa.
15 Lelaŋ, I cho bɔɔ a kɔl kɛndɛ le mi pisi nyɛ o nyɛ ya nɔ le nya malaa, nduyɛ mi yɔŋguŋ kpou le nya. Te I kaala nya pɛ nuaa kpɛ, vɛ mi nya kaala ya nyɛɛmbɔ?
16 Nyapila bɛɛ la cho lesei maa I siiluu nya kalaŋ ni le. Kɛ a koŋ kpou, la dimi maa wana “kaŋgalaa” ya cho ni, nduyɛ maa I tosal nya “kafalaŋ.”
17 Wanaa ya wa viomɔɔ o nya lo wa kinɛi, opilɛ bɛɛ I dimul le mbo bii nya nyɛ o nyɛ o ba le, lende le?
18 Mi dɛɛniaa Taitɔɔ a puaapilɛnɔ cheleŋ le ma kɔ tofa nya. Taitɔɔ bii nya nyɛ o nyɛ o ba le, lende le? Yiyaŋ pilɔɔ kpe naŋ nɔ ni, lende le? Kaa pilɔɔ kpe naŋ nɔ ni, lende le?
19 Kɛlɛŋgaa mi la wa dɔɔ yiyaŋndo maa nɛilaŋ naŋ cho nuuviaa ni le fulaŋndo leniŋ, kɛ o cho lende le. Buɛiyaa Kiliti wa naŋ cho ni, nduyɛ Mɛlɛka sina maa tonyaa naŋ cho dimioo ni. Chaaŋaa naa kaalaa, nyɛ o nyɛ naŋ cho tosaa, ŋ cho ndu tosaa le nya yoomuaŋ lueiyo.
20 Buulaŋndo cho ya maa te I hiŋ pɛ o nya lo, I komal niŋ nya mɛɛ ya yeema yɛ le, nduyɛ ya bɛɛ ve niŋ mɛɛ nya yeema yɛ le. Te I hiŋ pɛ, kɛlɛŋgaa I komal niŋ sɛɛŋgiaŋndaŋ, paŋaliaŋndaŋ, kɔlta tuulaŋ, piɔuwaŋndo, yiouwaŋndaŋ, choŋgulaŋ, yoŋgaa, a sɔɔŋ laasi laasi.
21 Naapum te I hiŋ vɛlɛ pɛ, Mɛlɛka cho tosa mi siɔmbulaŋ la bii ya nya o hɔl. Naapum I cho chaŋ wanaa bɔɔbɔɔ choo, a kɛɛ hakila ndalaŋ malɔɔ wa. Waŋnda haa siŋga wɔ yiyaŋnda ndalaŋ a sɔɔŋ wɔɔŋ nda wa paandu choo woŋ okɔɔ le. Muŋ cho ni, sɔɔŋ nɔɔlɛiyoŋ, kaa ihini nɔɔlɛiyo,* a kaa kɔl vesɛiyo.*
Tɛɛsiaalaŋ
^ Kilikiiye, pɔniaa. Tofa Tɛɛsiaa.
^ Ɔɔ “sɔɔŋ lasiɔmboŋ.” Kilikiiye, asɛlchiaa. Tofa Tɛɛsiaa.
