Kɔliŋtiaŋ Diiŋ Ndɔɔ 13:1-14
13 Lɔɔlaŋ yaa ndɔɔ ya yem hoo ni le nya hunɔɔ yilɔɔ. “Le sinaa te tonya nyɛ dimiŋndo cho ni ɔɔ o cho tonya le, mɛɛ mi seiya wa fɛlɛŋ a ŋiɔɔŋ ɔɔ a yaa.”
2 Mi che bɛɛ I cho a nya latulu le, kɛ la chua ndi maa I wa a nya latulu o lɔɔ diiŋ ndɔ ya yem ndo. Tuupa mi hiŋ, I cho pɔɔ wanaa tosa hakioo wa silaa a nya kpou. Okoŋ lɔɔ ya cho hunɔɔ wo, I cho wana o wana sila le nyɛ o tosa wo.
3 Kanifuule, la cho kindiŋndo le sinaa te Kiliti kpeekpei dɔu ya sɔɔŋ muŋ o sondo ni. Kiliti cho wana dialuŋ vilɛi le, kɛ o nɔ kpaayaa nya tɛɛŋ.
4 Tonya i cho ni maa teleŋ nda baŋ ndu o yɔmndo choo wo, ndoo nɔ mayoomu le. Kɛ kpaaya Mɛlɛkaa tosa mbo miiŋgu yoomu. Naa bɛɛ ŋ nɔ mayoomu le. Kɛ, ŋ cho wa yoomu latulu a ndu, kanifuule kpaaya Mɛlɛkaa cho nya choo.
5 La yaasiaŋndɔ nyɛkɛndɛi le sinaa te la cho pɛ o laalaŋndo choo. La mɛɛndiaŋ o kɔlta nyalaŋ niŋ le sinaa wanaa suu nya cho kpeekpeiya. La sina nuaa maa Chiisu Kiliti cho diompilɛ a nya le? Mɛɛ dɔɔ mi Mɛlɛka kɛɛ nya.
6 Kɛ naa, o kɛɛ naa le. I laalaŋ kɛsɛ maa la sina keŋ.
7 Ŋ cho Mɛlɛka piɛiyo maa la tosa yɔŋ wɔɔŋ te. O cho le mi waŋnda che maa Mɛlɛka chɛl naa le, kɛ le mi la hiou lachi a sɔɔŋ kɛndɔŋ tosaa, o yɔŋ bɛɛ mi waŋnda kɛɛ naa.
8 Le tonyaa naŋ cho wallo ni. Lelaŋ, ŋ nɔla miŋ tosa nyɛ o nyɛ simul tonyaa le.
9 Mi naŋ nɔ bɛɛ kpaaya le, kɛ te nya nɔ pɛ, miŋ naŋ kɔl tau. Le hei naŋ cho piɛileŋ ni maa la miiŋgu mɛɛ nya wa paandu yɛ.
10 Lelaŋ ya cho nya yauwo hoo poonyiallo ni tuupa mi hiŋ. Okoŋ te I hiŋ pɛ, I soliŋ lɛ kpaaya Masanɔɔ ke ya wo kpeku, mi bii nya ŋua ŋua le. Kpaaya ya sɔla hoo wo, o cho le nya nyɛpalaa tusi choo le, kɛ le nya simioo yi o laalaŋ nyaa choo.
11 Lelaŋ puaapiliaa, la hiou lachi a waa a nyaale, mi la miiŋgu mɛɛ nya wa paandu yɛ, mi la chɛl kɔl dɛɛniaa, mi la nɔ yiyaŋ pilɔɔ, nduyɛ mi la wa o kɔl nyulu niŋ. Maa Mɛlɛka kaala naa mbo ke naa kɔl nyuloo wo wa a nya latulu fɔ!
12 La yilaŋ vellaa velle o kaalaa niŋ.
13 Wanaa laalaŋnda* kpou yil nya lapi.
14 Maa kɛndɛi bɛnduii Masanɔ naa Chiisu Kiliti ve, a kaala Mɛlɛkaa wa nya choo fɔ! Maa la hiou lachi a tɔnɔla nyina diandaa sɔlaa fɔ!
Tɛɛsiaalaŋ
^ Kilikiiye, “wanaa diandaa.”
