Kɔliŋtiaŋ Diiŋ Ndɔɔ 2:1-17
2 I chii kɛɛsiaa maa I hiŋ lɛ nya yilɔɔ le nya kɔl tɛɛmbuu le.
2 Te I tɛɛmbuu pɛ nya wanaa tosa mi dɔɔnuŋ nyaale wa kɔltaŋ, nɛɛ yaa cho yɛ tosa mi dɔɔnuŋ nyaale?
3 Le sabu koŋ ya poonyial nya ni maa te I hiŋ pɛ, I ve a kɔl tambɛi le, kanifuule nya tosa ni mi wa a nyaale. I laalaŋ maa sɔɔŋ tosa mi dɔɔnuŋ nyaale woŋ, muŋ koni tosa ni mi la dɔɔnuŋ nyaale.
4 A kɔl tambɛi bɛndoo vɛlɛ a mɛmiaŋ o lahɔl ya poonyial nya ni. O cho le nya kɔl tɛɛmbuu le, kɛ le nya chɔmndo mɛɛ kpɛ ya kaala nya yɛ.
5 Te waŋndo tosa pɛ suɛi tɛɛmbuu wana kɔllo ve, o cho ya le wana koŋ tɛɛmbuu kɔl te, kɛ nya kpou. O cho nuaa maa kindilaa le ya cho ndi hiuwo le.
6 Kɛ sila wana koŋ sɔla wanaa bɔɔbɔɔ o ba wo cho letuu le ndu.
7 Lelaŋ, la mal ndu haki fasɛi, nduyɛ mi la dɛɛniaa ndu, yɔŋii o hiu kɔllo tambu mbo vi ŋdial.
8 I cho nya dɛɛniaa le mi la chɔm maa la kaala ndu.
9 Le saboo hoo ya poonyial nya ni, le sinaa te la cho wanaa diikuŋ o isɔɔ o isɔɔ niŋ.
10 Te la mal wana haki le nyɛ o nyɛ pɛ, ya bɛɛ I mal ndu haki. Te I mal pɛ waŋndo haki, le nya malaa ya tosa ndi ni. Nduyɛ Kiliti o hɔl ya tosa ndi ni,
11 le halikpeŋ Setana hui naa le. Kanifuule, ŋ sina nɛila ndɔla kaŋgalaalaŋ.
12 Mɛɛ ya fuuluu Towaasi le yooŋgu kɛndɔɔ dimioo a Kiliti okɔɔ, mi dioo kumbiŋ le ya o wali Masanɔɔ niŋ.
13 Kɛ mi tambu kɔllo tau, kanifuule I komal Taitɔɔ puaapilɛnɔ nuu loŋ te. Okoŋ mi choŋguŋ nda, mi hiau Masidooniaa.
14 Ŋ mel Mɛlɛka balikaa le mɛɛ o sim naa lachi naa Kiliti waa, mɛɛ puaa chɔuwa wa nuaa miiŋgoo a kɔŋgaŋndo le mɛɛ nda yem chɔuwo yɛ. Kɔl kalu Mɛlɛkaa cho ko maa nyɛ chuŋ kɛndɛ. Nduyɛ o cho wali naŋ cho tosaa wo soliŋndo kpeku le mi waŋnda ba o ba fee tuei ndu chuŋ.
15 Naŋ cho yooŋgu kɛndɔɔ dimioo a Kiliti okɔɔ wa, ŋ cho ko maa siɛndiima chuŋ kɛndiaŋ le Mɛlɛka. Chuŋ kɛndɔɔ hoo cho wanaa nɔ le pioŋɔɔ sɔlaa wa, a wanaa nɔ le tambei sɔlaa wa komallo.
16 Wanaa nɔ le tambei sɔlaa wa cho chuŋndo tueiyɔɔ le piɔmndo sɔlaa, nduyɛ wanaa nɔ le pioŋɔɔ sɔlaa wa cho chuŋndo tueiyɔɔ le yoomoo sɔlaa. Nɛɛ yaa kpeekpei suliŋ yɛ le wallo hoo tosaa?
17 Naŋ suliŋ ni, kanifuule ŋ tosa leyula a diom Mɛlɛkaa maa waŋnda apum te. Kɛ o nɛi sakpoo choo naŋ dimul waŋnda yooŋgu Mɛlɛkaa ni. Nduyɛ Mɛlɛka vem naa ni, miŋ wa wallo hoo tosaa naa Kiliti waa latulu ndu o hɔl.
