Kɔliŋtiaŋ Diiŋ Ndɔɔ 4:1-18
4 Lelaŋ, le mɛɛ Mɛlɛka tuiinuŋ naa inyiɛɛ mbo ke naa wallo hoo yɛ, ŋ vi ŋdial kposoŋ te.
2 Ŋ mal sɔɔŋ lasiɔmboŋ a sɔɔŋ waŋnda tosa sɔɔ sɔɔ woŋ. Ŋ hui wana le, nduyɛ ŋ siŋga nyɛ diom Mɛlɛkaa dimi wo le. Kɛ miŋ chɔm waŋnda tonyaa kpendekele, okoŋ miŋ simnuŋ wanaa tamasi kɛndɛ Mɛlɛka o hɔl le kɔlta iyamala waŋnda kpou.
3 O yɔŋ bɛɛ mi yooŋgu kɛndɛ naŋ cho dimioo wo wa o kumbaa, wanaa nɔ le tambei sɔlaa wa o hɔl o cho o kumbaa ni.
4 Nda cho wanaa laalaŋ o Mɛlɛka niŋ te wa ni. Nda mɛlɛka chieeŋndo hoo suumiaa kɔltaŋ ni. O tosa hei yɔŋii waŋnda chɔ nyɛ teŋgaa yooŋgu kɛndɛ cho a Kiliti okɔɔ wo, o cho velaŋ Mɛlɛkaa wo.
5 O cho a naapila okɔɔ le naŋ cho yooŋgu kɛndɔɔ dimioo le, kɛ a Chiisu Kiliti okɔɔ, maa ndu cho Masanɔɔ ni, mi naŋ simnuŋ chiaa le nya le sabu Chiisu wo.
6 Kanifuule mi Mɛlɛka dimi aa: “Nyɛ teŋgaa diondu o nyumndaŋ niŋ.” Nduyɛ Mɛlɛka tosa mi nyɛ teŋgaa ndɔɔ wa diondɔɔ o kɔlta naalaŋ niŋ. Nyɛ teŋgaa sɔvɛ bɛndu koŋ ke naa kɔl kalu Mɛlɛkaa ni, o cho diondɔɔ Kiliti o hɔl lo.
7 Naŋ nɔ sullo hoo o ba wa, ŋ cho machuaa kpɛɛnɛŋ puuloŋ. Lelaŋ, kpaaya naŋ nɔ wo cho kpaaya naa le, kɛ kpaaya fula Mɛlɛka o ba wo.
8 A cho naa kindilaa o nɛi o nɛi niŋ, kɛ a nɔla naa bɛviaa le. Mi sɔɔŋ kɔndɔfilloŋ yɔŋnuŋ naa, kɛ ŋ bumba fulaa leniŋ te.
9 A cho naa nyɛpalaa tusioo choo, kɛ Mɛlɛka mel naa le. A cho naa chuwɔɔ lɛŋ, kɛ a nɔla naa diu le.
10 Ba o ba naŋ kɔ, ŋ cho o kpundɔɔ niŋ le piɔmndo sɔlaa maa Chiisu, le mi waŋnda sina maa naa bɛɛ ŋ cho saŋgaa maa Chiisu.
11 Teleŋ o teleŋ yoomula naalaŋ la cho o kpundɔɔ niŋ le mɛɛ naŋ cho Chiisu tolɔɔ kɔɔli yɛ, le mi waŋnda sina maa naa bɛɛ ŋ cho saŋgaa maa Chiisu.
12 Teleŋ o teleŋ ŋ cho o piɔmndo hɔlndɔ, le mi la sɔla yoomoo.
13 Le mɛɛ naŋ nɔ laalaŋ pilɔɔ yɛ, i cho i poonyiaa aa: “Le mɛɛ ya laalaŋ yɛ, lelaŋ ya soo ni.” Naa bɛɛ le mɛɛ naŋ laalaŋ yɛ, lelaŋ naŋ cho suɛi ni.
14 Ŋ sina maa Mɛlɛka miŋgi Chiisu yoomu wo cho naa miŋgi yoomu, le miŋ wa latulu a Chiisu. Okoŋ kɔɔli, naa ni, nya ni, mbo yɔŋgu naa o Chiisu lo.
15 Le dɛnɛ nya kɛndɔɔ sɔɔŋ muŋ kpou cho yɔŋnɔŋndo ni, le mi wanaa bɔɔbɔɔ sɔla kɛndɛi bɛnduii Mɛlɛkɛi. Nduyɛ wanaa bɔɔbɔɔ cho Mɛlɛka balikaa mello, ma wa ndu saŋgalaa.
16 Lelaŋ ŋ vi ŋdial te. A yɔŋ bɛɛ mi dialuŋ naŋ yɔkpa, wana suu naŋ cho o kɔllo niŋndo cho wa miiŋgoo o sɛnɛi lepaa o lepaa.
17 Nyɛpalaa cho naa choo wo cho nyɛ o nyɛ le, nduyɛ le teleŋ biŋgi koni o cho ni. Nyɛpalaa hoo cho tosa miŋ sɔla fanda hiou nyɛ o nyɛ wo, nduyɛ o cho wa le fɛɛŋ a fɛɛŋ.
18 Lelaŋ, o cho o nyɛm naŋ cho chɔɔ woŋ choo le naŋ kɛsi kɔltaŋ te, kɛ o nyɛm naŋ chi le woŋ choo. Kanifuule, nyɛm naŋ cho chɔɔ woŋ, le teleŋ biŋgi koni ŋ cho ni. Kɛ nyɛm naŋ chi le woŋ, le fɛɛŋ a fɛɛŋ ŋ cho ni.
