Kɔliŋtiaŋ Diiŋ Ndɔɔ 8:1-24
8 Puaapiliaa, ŋ yeema mi la sina nyɛ kɛndɛi bɛnduii Mɛlɛkɛi tosal kundala wanaa laalaŋnda o Masidooniaa niŋndo.
2 Boondii nda wa saŋgaa o tɔɔndaŋ kala kalaa bɛŋgu ve, ma yɔŋgu malaa a nyaale bɛndoo mi che bɛɛ a wa o kuɛi niŋ. Mi hei chɔm mɛɛ kpɛ nda nɔ kɛndɛi yɛ.
3 Yapila cho lesei maa mi waŋnda haa yɔŋgu mɛɛ nda tiuba yɛ. Nduyɛ ma yɔŋgu pɛŋ mbo hiau sɔla ndaa.
4 Ndapila kɛsɛ wa naa nyɔɔloo ni le mi nda bɛɛ sɔla dikeŋnaŋndo le tooloo yɔŋgoo le wanaa laalaŋnda* malaa.
5 Ma tosa mbo hiau mɛɛ naŋ wa kɔl lɛ. A yɔŋguŋ fɛlɛŋ o Masanɔɔ lo. Okoŋ kɔɔli, ma yɔŋguŋ o naa lo, mɛɛ Mɛlɛka yeema nda ma tosa yɛ.
6 Taitɔɔ kandu tooloo hoo biyɔɔ nya tɛɛŋ ni. Le saboo hoo, miŋ nyɔɔlu ndu le mbo kɔ siou wali kɛndɔɔ hoo tosa.
7 La cho tosaa nyɛkɛndɛi o nyɛ o nyɛ niŋ. Laalaŋ nyaa cho o kala poŋ. La chaa suɛi, la nɔ kɔl kaloo tau, la nɔ sɛmbɔɔ le nyɛ o nyɛ tosaa, nduyɛ la kaala acheleŋnda tau mɛɛ naŋ kaala nya yɛ. Lelaŋ, la tosa vɛlɛ tau o tooloo yɔŋgoo niŋ.
8 O cho le nya baŋɔɔ le ya cho hei dimioo le, kɛ le mi la sina sɛmbɛ acheleŋnda nɔ wo. Nduyɛ, le nya tofaa mi sina te la nɔ pɛ kaala kpeekpeiyo o lakɔl.
9 Nyapila sina kɛndɛi bɛnduii Masanɔ naa Chiisu Kiliti tosal naa ve. Mi che bɛɛ o wa wana sulaa, mbo simnuŋ wana bala fondo le nya, le halikpeŋ mi la simnuŋ wanaa sulaa o bala fondola ndɔlaŋ niŋ.
10 O hei niŋ, yiyaŋ nuu cho hoo ni: Wallo hoo tosaa chuu nya tɔnɔɔ. La cho niŋ ndu tosaa le suɛi wɔsi pilɛ, nduyɛ mi la chɔm yeemɛi le ndu tosaa.
11 Lelaŋ, la siou niko wali nya kandu hoo tosaa wo. Yeemɛi wa nya tau le ndu siouwo, mɛɛ nya nɔla sɔlaa yɛ.
12 Kanifuule, te waŋndo nɔ pɛ yeemɛi le yɔŋgoo, ke waa lende kpeekpei Mɛlɛka chɛl ni. Mɛɛ waŋndo nɔla sɔlaa yɛ o yɔŋgu ni, kɛ o cho mɛɛ o nɔla sɔla le yɛ le.
13 O cho dimi le ya cho maa la soli bahawɛila chaanda, mi nya koma lo o bahawɛiyo niŋ te.
14 Boondii nya nɔ hei tau ve, la mala wanaa cho o bahawɛiyo niŋnda a nyɛ nya nɔ wo o tiŋ. Okoŋ, boondii nda bɛɛ cho sɔla tau, mi nya wa o bahawɛiyo niŋndo, nda bɛɛ mala nya. Keŋ tosa ni mi kpeŋ kpeŋndo wa.
15 I cho i poonyiaa aa: “Wana nɔ hoo tau wo, o hiu nɔ tau le. Nduyɛ wana nɔ hoo nyɛɛmbɔ wo, pɛŋnde bii ndu le.”
16 Ŋ mel Mɛlɛka balikaa, kanifuule mɛɛ naŋ buulaŋ le nya yɛ, lende koni Taitɔɔ bɛɛ buulaŋ le nya ni.
17 O chɛl ko nyɛ naŋ dimul ndu le tosaa wo le, kɛ o wa a yeemɛi kpeekpei le ndu tosaa. Nduyɛ ndupila kɛɛsiaa ni le kɔlaŋ naa nya chua.
18 Kɛ ŋ cho ndu viomɔɔ nda puaapilɛnɔ pilɛ, o wanaa laalaŋnda o kundalaŋ niŋ kpou cho chandɔɔ le yooŋgu kɛndɔɔ dimioo wo.
19 O cho ko keŋ te, ndu kundala wanaa laalaŋnda kpou hɛli ni le miŋ kuɛ naa ndaa, le naa malaa toolula naŋ sɔla laŋ piɔuwo, le mi Masanɔɔ sɔla biiloo. O hei niŋ, ŋ cho chɔm maa ŋ wa a bɛɛndiaŋ le acheleŋnda malaa.
20 Lelaŋ, mandaŋndo pila naŋ mandaŋ a toolula bɛndula cho laŋ yɔŋgɔŋndo laŋ ni, yɔŋii naŋ sɔla diola wɔɔŋ a wana o wana.
21 Kanifuule, ‘nyɛ o nyɛ naŋ cho tosaa, o sandei choo naŋ cho ndu tosaa ni. O cho ko Chɛhowa* o hɔl te, kɛ waŋchieeya kpou o hɔl.’
22 Ŋ cho vɛlɛ puaapilɛnɔ naa cheleŋ viomɔɔ le ma kuɛ nda ndaa. Ŋ tofa niŋ ndu o sɔɔŋ bɔɔbɔɔ niŋ, miŋ saaluŋ maa nyɛ o nyɛ o wa pɛ tosaa, mbo wou sɛmbɔɔ tau. Nduyɛ ŋ laalaŋ maa o cho chɔɔlu sɛmbɔɔ dɔwɔɔ tau le mɛɛ o nɔ laalaŋndo o nya niŋ yɛ.
23 Nduyɛ wana o wana kiisaŋ a Taitɔɔ le, kanifuule chaaŋ ni naŋ tosa wallo le tɔnɔ nyaa wo o cho ni. La kiisaŋ vɛlɛ a puaapiliaa naa le, kanifuule nda kundala wanaa laalaŋnda vem ni. Nda bɛɛ cho tosaa mi waŋnda wa Kiliti saŋgalaa.
24 Lelaŋ, la chɔm puaapiliaa haa maa la kaala nda, nduyɛ mi la chɔm kundalaŋ le sabu naŋ kelu yoŋgaa a nya okɔɔ wo.
