Pitɛ Diiŋ Ndɔɔ 1:1-21
1 Ya Saimɔŋ Pitɛ, chiɔɔ a kiilanɔɔ le Chiisu Kiliti cho yauwo hoo poonyiaa ni. I cho ndu poonyiaa o nya sɔla tiindaŋ sɔvɛ pilɔɔ maa naa wa lo. Le mɛɛ Mɛlɛka a wana naa piŋiaa Chiisu Kiliti cho sakpo yɛ naŋ sɔla tiindaŋndo hoo ni.
2 Maa Mɛlɛka chɔɔlu nya kɔl nyuloo a kɛndɛi nduɛi bɛnduei, le mɛɛ nya sɔla kɔl kalu kpeekpei Mɛlɛkaa a Masanɔ naa Chiisu yɛ fɔ!
3 Kpaaya Mɛlɛkaa ke naa nyɛ o nyɛ naŋ hau ba le waa yoomu, a waa a yɔŋgaŋ o ndu lo. Le mɛɛ naŋ sina Mɛlɛka nyɛkɛndɛi yɛ naŋ sɔla nyɔɔŋ muŋ ni. Mɛlɛka veelu naa le mɛɛ o cho o bɛndu, nduyɛ mbo wa wana ikɛndɛ yɛ.
4 Le sabu koŋ o chuel naa buŋgaŋ sɔvɛ sɔviɔŋ ni, le halikpeŋ mi la wa o inyinaya maa Mɛlɛka. Le mɛɛ naŋ mal sɔɔŋ chieeŋndo hoo a yeemaŋ ndɔŋ wɔɔŋndoŋ yɛ Mɛlɛka chuel naa buŋgaŋ muŋ ni.
5 Le saboo hoo, a tiindaŋ nya nɔ wo fau, la kindiŋ kpoke mi la wa sɔɔŋ kɛndɔŋ tosaa. O fulawɔ o sɔɔŋ kɛndɔŋ tosaa kɔɔli, la nɔ kɔl kaloo.
6 O fulawɔ o kɔl kaloo kɔɔli, la tiu kɔlta nyalaŋ ba. O fulawɔ o kɔlta nyalaŋ baa tiuwo kɔɔli, la nɔ biuwɔŋndo. O fulawɔ o biuwɔŋndo kɔɔli, la yɔŋguŋ o Mɛlɛka lo.
7 O fulawɔ o yɔŋgɔŋndo kɔɔli, la nɔ kaala puaapiliaa. O fulawɔ o kaala puaapiliaa kɔɔli, la nɔ kaalaa le wana o wana.
8 Te la nɔ pɛ kaalaŋ ndaŋ, nduyɛ mi la hiou lachi a kuiyo o nya niŋ, la cho kɔl kalu nya sɔla Masanɔ naa Chiisu Kiliti o ba wo soliŋ kpeku. Nduyɛ koŋ tosa la vi ŋdial, ɔɔ mi la kɛɛ kɔmndeŋ yɔŋgoo le.
9 Wana o wana nɔ kaalaŋ ndaŋ te, mɛɛ o sumɛiyo o cho ni. Kanifuule, o kɛɛ le nyɛ teŋgaa chɔɔ.* Nduyɛ o puɛɛnuŋ maa o sɔla niŋ dindioo paandu pa le hakila ndɔlaŋ.
10 Lelaŋ puaapiliaa, mɛɛ Mɛlɛka veelu nya, nduyɛ mbo hɛli nya yɛ, la kindiŋ niko kpoke mi la bii dikeŋnaŋ koŋ kpiŋ. Nduyɛ te la hiou pɛ lachi a sɔɔŋ muŋ tosaa, la mel niŋ laalaŋ nyaa le.
11 O hei niŋ, la cho di bɛndoo sɔla le luɛiyɔɔ o Masale fafɛɛŋ Masanɔ naa, a wana naa piŋiaa Chiisu Kiliti leŋ niŋ.
12 Lelaŋ, I yeema mi wa nya yiyalaŋndo a sɔɔŋ muŋ okɔɔ teleŋ o teleŋ, mi che bɛɛ la sina muŋ, nduyɛ mi la wa isisi nyɛkɛndɛ yi o tonya nya pɛɛku wo choo.
13 Kɛ te I cho wɔ pɛ o tɛndiiyo* hoo niŋ, I che ndi i sɔvɛ le nya sɔɔŋ muŋ waa yiyalaŋndo.
14 I sina maa o lo lɛ levil te mi huŋ fula o tɛndiiyo hoo niŋ, a mɛɛ Masanɔ naa Chiisu Kiliti chɔm ya kpendekele yɛ.
15 Kɛ I cho kindiŋ o nɛi o nɛi niŋ maa o yɔŋ bɛɛ mi huŋ faŋaŋ, nyapila nɔla mi la wa sɔɔŋ muŋ loonɔŋndo.
16 Yooŋgu naŋ dimul nya a kpaaya Masanɔ naa Chiisu Kiliti, nduyɛ a miiŋgu ndɔɔ nanuŋ okɔɔ wo, o cho o bundɔŋ lachoowaŋ waŋnda kɛɛsiaa woŋ niŋ te naŋ soli ndu le. Kɛ miŋ cha biilu ndɔɔ a lehɔl pɛɛŋ.
17 Mbo sɔla bɛɛleŋ a biiloo Mɛlɛka Finyaa o ba. Hei yɔŋnuŋ a teleŋ Mɛlɛka pila dimi diomndaŋ ndaŋ ndo. Mbo dimi aa: “Po nuu cho hoo ni. I kaala ndu, nduyɛ I hini kɔl a ndu.”
18 A tonya, miŋ tuɛi diomndaŋ ndaŋ fulaa o choo choo niŋ teleŋ naŋ wa latulu naa ndaa o pembii diandɛi choo wo.
19 Le saboo hoo naŋ chɔɔlu laalaŋ ni maa sɔɔŋ Mɛlɛka dimi woŋ cho peelɔŋ. La yaŋ nilaŋ o sɔɔŋ muŋ kpou. Nduyɛ ŋ nɔ miŋ wa o kɔlta nyalaŋ niŋ maa lambui cho teŋgaa o nyumndaŋ niŋndo. La lo keŋ tosaa haaa mi paaleŋ le sɛ, nduyɛ mi luei idiiye fula.
20 I tasei peŋ, la sina pɛŋgu maa sɔɔŋ wanaa ndaa suaa le Mɛlɛka wa dimi, nduyɛ ma poonyiaa muŋ o Yau Mɛlɛkaa niŋndoŋ, o cho ndapila le chal ma kɛɛsiaa muŋ te.
21 Kanifuule, o cho a yiyaŋnda iwana chieeya le wanaa ndaa suaa le Mɛlɛka wa dimi sɔɔŋ muŋ te. Kɛ nyina diandaa nyindu nda ni le sɔɔŋ Mɛlɛkaŋ muŋ dimioo.
