Pitɛ Diiŋ Ndɔɔ 3:1-18
3 Chaaŋaa niaa kaalaa, yau diiŋ ndɔɔ ya cho niŋ nya hoo poonyiallo ni. O yaula tiɔɔŋ ndaŋ niŋ kpou, I cho nya yiyalaŋndo le mi la handu kɔltaŋ o sɔɔŋ ya cho nya dimullo woŋ choo.
2 I cho hei tosaa le mi la loonuŋ sɔɔŋ wanaa ndaa suaa le Mɛlɛka wa dimul nya woŋ, a pɛɛkula Masanɔ naa, o piŋi naa wo. Nduyɛ, kiilaa pɛɛku nya sɔɔŋ muŋ ni.
3 I tasei, la sina pɛŋgu maa o palɛi mɛɛlɛi niŋ, wanaa mamaa wa niŋ sɔɔŋ sɔviɔŋ mamɔɔ. Nduyɛ a cho wa sɔɔŋ wɔɔŋndoŋ tosaa mɛɛ nda hɛnaŋ yɛ.
4 A cho wa dimioo aa: “Ndu le dimi maa o cho miiŋgu naŋ te? Ɔɔ niko ndu? Chɔŋ a boondii finyaa naa mamaa vi ve mbo huŋ bii a hau, nyɛ o nyɛ siŋgaŋ ndɔ le. Lende koni sɔɔŋ cho wɔ yɔŋnɔŋndo ni chɔŋ a kandɔŋ chieeŋndo.”
5 Kiɔɔ koni waŋnda haa kɛɛ le tonyaa chɛlɔɔ ni maa, sindɛ niŋ pa choo choo wa ni. Nduyɛ a mɛɛ diom Mɛlɛkaa dimi yɛ, mi lɛŋndeŋ le fula o mɛŋndaŋ niŋ, mi le sim tɛɛŋ.
6 A nyɔɔŋ muŋ Mɛlɛka tɛɛmbuu waŋnda o teleŋ koŋ niŋ ni. Hei yɔŋnuŋ teleŋ mɛŋndaŋ ma kumbu chieeŋndo kpou wo.
7 Kɛ diom Mɛlɛkaa dimi vɛlɛ maa, choo choo a chieeŋ cho pɛŋgoo hoo wo, la cho la kɛsiaa le tambei sɔlaa a yiŋndeŋ. Ŋ cho lo ŋ kɛsiaa haaa mi paale kɔɔsɔleŋ le fuuluu, paale Mɛlɛka tɛɛmbuu niŋ wanaa dɛnɛ wɔɔŋnda leŋ.
8 Kɛ nduyɛ, la puɛɛnuŋ a hei le chaaŋaa niaa kaalaa. Le Chɛhowa,* paaleŋ lepilɛ le cho ko maa wɔsilaŋ waapilɛ. Nduyɛ wɔsilaŋ waapilɛ la cho ko maa paaleŋ lepilɛ.
9 Chɛhowa* nɔ ipindi le nyɛ o dimi wo tosaa, a mɛɛ waŋnda apum yiyaŋ yɛ le. O cho nya biuwɔŋndo, kanifuule o yeema mi wana o wana sɔla tambei le. Kɛ o yeema mi waŋnda kpou mal yɔŋnda ndala wɔɔŋndaŋ.
10 Paale Chɛhowa* leŋ le huŋ niŋ maa viinɔ. O paale leŋ choo, choo choo hiau niŋ a bɔɔluu bɛndoo. Okoŋ mi nyɔɔŋ o choo choo niŋ a muŋ o lɛŋndeŋ choo tuulu kpɛi kpɛi, miŋ teŋga. Nduyɛ, mi lɛŋndeŋ a walta cho leniŋ ndaŋ la fula kpendekele.
11 Mɛɛ nyɔɔŋ muŋ kpou nɔ le teŋgaa lende yɛ, la yiyaŋndɔ a wanaa suu nya nɔ le waa wa okɔɔ. La nɔ mi la nɔ kaala diandaa laŋ, nduyɛ mi la wa wanaa cho a yɔŋgaŋ o Mɛlɛka lo wa.
12 La wa paale Chɛhowa* leŋ chumndo, nduyɛ mi la kɛsiŋ ndeŋ o kɔl kpiŋ. Choo choo nɔ le tambei sɔlaa o yiŋnde wule wule leŋ niŋ, nduyɛ mi nyɛm cho leniŋ ndoŋ kpou teŋga a haŋgul tuu kpɛiyo!
13 Kɛ a mɛɛ o mɛi lediom yɛ, ŋ cho choo choo sɛnɛiyo a chieeŋ sɛnɛiyo chumndo. Loŋ ndu, nyɛ o nyɛ cho wa sakpo.
14 Lelaŋ chaaŋaa niaa kaalaa, mɛɛ nya cho sɔɔŋ muŋ chumndo yɛ, la kindiŋ o nɛi o nɛi niŋ Mɛlɛka saaluŋ nya a sɔŋ o sɔŋ te, nduyɛ mi la wa o kɔl nyulu niŋ a ndu.
15 La sina pɛŋgu maa le naa piŋioo Masanɔɔ cho biuwɔŋndo ni. Nyɛ pilɛ koŋ kpe puaapilɛnɔ naa kaalaa Pɔɔl bɛɛ poonyiaa a taasi Mɛlɛka ke ndu wo ni.
16 Mbo suaa a nyɔɔŋ muŋ okɔɔ o yaula o poonyiaa laŋ niŋ kpou. Kɛ sɔɔŋ ŋpum o yaulaŋ ndaŋ niŋ ŋ kendu bila biyɔɔ. Nduyɛ wanaa bii sɔɔŋ muŋ bila le wa, ɔɔ a cho a kala o laalaŋ ndaa niŋ te wa cho muŋ siŋgafilaa, mɛɛ nda tosa o fondaŋnda cheleŋ o Yau Mɛlɛkaa niŋ yɛ. Nduyɛ a cho hunɔɔ tambei sɔla le keŋ.
17 Kɛ nya chaaŋaa niaa kaalaa, mɛɛ nya sina niŋ sɔɔŋ muŋ pɛŋgu yɛ, la mandaŋ yɔŋii wanaa nɔ lebɛɛ le sawala Mɛlɛkalaŋ te wa faŋa nya o nɛi sakpoo choo. Kanifuule, hei tosa mi la mal tiindaŋ kala nya sim choo wo.
18 La hiou lachi a kɛndɛi Masanɔ naa Chiisu Kiliti ve sɔlaa, nduyɛ mi la chɔɔlu ndu sina. Ndu cho wana naa piŋiaa ni. Maa o sɔla biiloo kanduŋ suŋ suŋ, mbo kuɛ le fɛɛŋ a fɛɛŋ fɔ! Amiina.*
Tɛɛsiaalaŋ
^ Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
^ Koŋ cho ni, i yɔŋnuŋ lende fɔ.
