Saamiɛɛ Diiŋ Ndɔɔ 10:1-19
-
Chɔula Deeve yem Amɔnaitiiya a Siiliaŋnda choo laŋ (1-19)
10 Okoŋ kɔɔli, mi masa Amɔnaitiiya wu, nduyɛ mi Hanuŋ po ndɔ miiŋgu o masaleŋ choo.
2 Le hei, mi Deeve dimi aa: “I cho Hanuŋ, po Nahasi wo kaala lo lechoo wo chɔm, mɛɛ finya ndɔ chɔm ya kaala lo lechoo wo yɛ.” Okoŋ, mi Deeve viam buɛiyaa nduaa le ma kɔ dɛɛniaa ndu kɔllo le piɔm finya ndɔ wo. Kɛ mɛɛ buɛiyaa Deeve wa luɛi o lɛŋnde Amɔnaitiiya niŋ,
3 mi waŋ banaa Amɔnaitiiya dimul Hanuŋ masanɔ ndaa aa: “A yiyaŋ pa maa le bɛɛle finya numndeŋ Deeve yɔŋ waŋnda ni le num kɔllo dɛɛniaa? O cho suaŋsuaŋndeŋ te Deeve vem buɛiyaa nduaa le ma mɛɛndaŋ chioo, nduyɛ ma bii ndu le?”
4 Okoŋ, mi Hanuŋ bii buɛiyaa Deeve wa, mbo sendi nda siɛiyoŋ kpeŋgei i pilɛ. Nduyɛ mbo kili domala ndalaŋ pɛŋgu yɔŋndaŋ, mbo mal nda ma kuaŋnuŋ.
5 Mɛɛ Deeve tuei a ndi okɔɔ, o lepilɛ niŋ kpe, mbo viam puaa le ma kuɛ nda lachi, kanifuule ndaa tɛɛmbuu nda bɔɔ labɛɛ. Mi masaa dimul nda aa: “La wa Chɛluiko haaa mi siɛiyoŋ miiŋgu nya wulɔɔ, okoŋ mi la miiŋgu niko nanuŋ.”
6 Mi Amɔnaitiiya mɛɛlu sina maa a fula chuŋ wɔɔŋndo Deeve o miliŋ le nyɛ nda tosa koŋ ndo. Le hei, ma piandu puaa chɔuwaa Siiliaŋnda o Bɛti-luihɔbi niŋ a Siiliaŋnda o Soba niŋ 20,000, a kua a ŋpelu wa. Ma sɔla puaa chɔuwa 1,000 masaa le Maaka o ba, nduyɛ ma sɔla puaa chɔuwa Isitobi* 12,000.
7 Mɛɛ Deeve tuei a ndi okɔɔ, mbo yɔŋ Chowaabi a puaa chɔuwa kpou. Puaa nduaa chɔuwaa kpaayaa bɛnduaa bɛɛ wa nda tɛɛŋ.
8 Mi Amɔnaitiiya fula ma sim a bɛɛndiaŋnda le sɔŋgɔɔ o dio kpaki chioo. Kɛ Siiliaŋaa fula Soba a Luihɔbi wa, a wa naa wakpaa yondoo niŋ latulu a puaa chɔuwa Isitobi* a Maaka.
9 Mɛɛ Chowaabi che maa yaamɔɔwaa ndaa cho fulaa lachi, mi haa wa fulaa kɔɔli ma hinul nda, mbo hɛli puaa chɔuwaa chaa sɔŋgɔɔ nyɛkɛndɛi o Isɔluɛi niŋnda, mbo simi nda le ma kuel Siiliaŋnda.
10 Mbo chuuŋgiaa puaa chɔuwa a tuaa Abisiaa bɛ ndɔ o ba bɛŋgu, mbo simi nda le ma kuel Amɔnaitiiya.
11 Okoŋ mi Chowaabi dimi aa: “Te a che pɛ maa Siiliaŋnda chal le ya ba tiu, a huŋ mala ya. Nduyɛ te ya bɛɛ che pɛ maa Amɔnaitiiya chal le num ba tiu, I cho lakɔ mi kɔ mala num.
12 Ŋ nɔ miŋ nɔ yoomuaŋ a kɔl simulaa le miŋ sɔŋga le wanaa naa vɛlɛ a chieeŋ bɛnduŋ Mɛlɛka naa. Nduyɛ, Chɛhowa cho tosa nyɛ bɛnda ndu o hɔl lo.”
13 Okoŋ, mi Chowaabi nda laŋgbaa nduaa kuel Siiliaŋnda le sɔŋgɔɔ. Kɛ mi Siiliaŋnda piɔl nda lachi a kiltaŋ.
14 Mɛɛ Amɔnaitiiya che maa Siiliaŋnda nyaanuŋ, mi nda bɛɛ piɔl a kiltaŋ Abisiaa lachi, ma miiŋguŋ chiee. Okoŋ kɔɔli, mi Chowaabi bɛɛ faŋaŋ Amɔnaitiiya kɔɔli mbo miiŋguŋ Chulusalɛm.
15 Mɛɛ Siiliaŋnda che maa Isɔluɛiya yem nda, ma chuuŋgiaŋ vɛlɛ diompilɛ.
16 Mi Hadadiisa yooŋgu le Siiliaŋaa wa o tanda holnuŋ Pioo* wo wa, okoŋ ma huŋ Hɛlam. Nduyɛ, Soba masa puaa chɔuwaa Hadadiisa wa sim nda lachi ni.
17 Mɛɛ konaa hoo komal Deeve, o lepilɛ niŋ kpe, mbo chuuŋgiaa puaa chɔuwa Isɔluɛi kpou, okoŋ ma taŋ Chɔɔdaŋ ndaŋ ma kua Hɛlam. Mi Siiliaŋnda fula a bɛɛndiaŋnda le chɔuwo ma komal Deeve, nduyɛ ma sɔŋga a ndu.
18 Kɛ mi Siiliaŋnda piɔl Isɔluɛiya lachi a kiltaŋ. Mi Deeve dii Siiliaŋaa kua a nyɛm nyaanaŋ suaa naŋndoŋ nda 700, a Siiliaŋaa kua o suaa choo wa 40,000. Nduyɛ, mbo dii vɛlɛ Soba, masa puaa ndaa chɔuwa loŋ.
19 Mɛɛ masaa wa Hadadiisa o ba bɛŋgu wa kpou che maa Isɔluɛiya yem nda, ma tosa kɔl nyuloo chɔ chɔ a Isɔluɛiya, okoŋ ma wa nda o ba bɛŋgu. Nduyɛ, fɛɛŋ bɛɛ Siiliaŋnda chɛl lɛ le Amɔnaitiiya malaa le.
