Saamiɛɛ Diiŋ Ndɔɔ 11:1-27
11 O wɔsioo kandɔŋndo, a teleŋ masaa waa kua o chɔulaŋ ndo, mi Deeve viam Chowaabi nda buɛiyaa nduaa, a puaa chɔuwa Isɔluɛi kpou le ma kɔ tɛɛmbuu Amɔnaitiiya. Mɛɛ nda kuɛ, ma duau chioo Luaba o piŋndo niŋ, kɛ mi Deeve ndu lo Chulusalɛm.
2 A paale delaale pilɛ, mi Deeve chaŋ o kpele, mbo wa balɔɔ o chiɛi ndɔ lemasaa choo. O lo loŋ, mbo cha wana lanɔɔ pulɔŋndo, nduyɛ naŋɔɔ pila chuaa hoo ndoo naŋ ni.
3 Mi Deeve viam waŋndo le sinaa a chuaa hoo okɔɔ. Okoŋ, mi wana o vem ndo huŋ dimul ndu aa: “Ba-siɛɛba ni, chua Iliam ndo, lanɔɔ Yuulaya Hitaitiinɔɔ.”
4 Mi Deeve viam waŋnda le ma kɔ huŋ a ndu. Mɛɛ o hiŋ, mbo luɛi o Deeve lo, nduyɛ mbo hini a ndu. (A teleŋ chuaa hoo wa ndupila dindiŋndo* wo kinɛi suɛi hei yɔŋnuŋ ni.) Okoŋ kɔɔli, mbo miiŋgu o ndu lo bɛɛ.
5 Mi chuaa hoo chua folioo,* okoŋ mbo yɔŋ Deeve yooŋgoo aa: “I cho a folioo.”
6 Mɛɛ Deeve tuei hei, mbo yɔŋ yooŋgoo naa Chowaabi chua aa: “Mal lɔ Yuulaya Hitaitiinɔɔ mbo hiŋ.” Okoŋ mi Chowaabi yɔŋ Yuulaya naa Deeve chua.
7 Mɛɛ Yuulaya hiŋ naa ndu chua, mi Deeve nyuna ndu le sinaa mɛɛ Chowaabi a puaa chɔuwa a tuaa kpou cho yɛ, vɛlɛ a mɛɛ chɔuwo cho kɔlaŋ yɛ okɔɔ.
8 Okoŋ kɔɔli, mi Deeve dimul Yuulaya aa: “Kɔ o numndo bɛɛ ma kɔ pɛŋgi.”* Mɛɛ Yuulaya mal chiɛi lemasaa mbo kuaŋnuŋ, mi masaa soli nyɛ mbo viam waŋndo ndu kɔɔli le ndu kɔlaŋ kioo.
9 Kɛ Yuulaya kue o ndu lo bɛɛ le, mbo lɔl ichɔl koŋ o dio chiɛi lemasaa nda buɛiyaa masanɔ ndɔɔ a piliaa.
10 Okoŋ, ma dimul Deeve aa: “Yuulaya kue o ndu lo bɛɛ le.” Le hei, mi Deeve dimul Yuulaya aa: “Tiŋ vilɛiyo ŋ laŋga buli nuaa ni. Vɛ a kue o numndo bɛɛ le?”
11 Mi Yuulaya mulul Deeve aa: “Kɔfoo ni, waŋnda Isɔluɛi a waŋnda Chuda ni, a cho o tɛndiilaŋ bɛŋgu. Nduyɛ masanɔ nuu Chowaabi a buɛiyaa numnda cho yondo o dɔɔŋgɔɔ niŋ. Vɛɛ ya bii yɛ kɔllo mi kuɛ o ya lo chiɛiniŋ, mi de nyɛdiaa, mi kol, nduyɛ miŋ wa naa laa nuu? I mɛnaŋ po maa te a cho pɛ achal, nduyɛ ma wa yoomu, I bii kɔllo mi tosa keŋ te!”
12 Okoŋ, mi Deeve dimul Yuulaya aa: “Mɛɛ lɔl vɛlɛ hau naŋ. Siɔdii, I cho num malɔɔ ma miiŋgu.” Mi Yuulaya siou paale leŋ Chulusalɛm, nduyɛ paaleŋ le pilɛ leŋ bɛɛ o wa loŋ.
13 Okoŋ kɔɔli, mi Deeve yooŋgu le Yuulaya, le mbo hiŋ ma de nyɛdiaa, nduyɛ ma kol muɛiyaŋ latulu. O lo ndu maŋ kioo haaa mi ma bii ndu. Ichɔl koŋ bɛɛ, Yuulaya kue o ndu lo bɛɛ le, kɛ mbo fulaŋ mbo kɔ lɔl nda buɛiyaa masanɔ ndɔɔ latulu.
14 Diimandɔɔ, mi Deeve poonyiaa yauwo o Chowaabi lo, mbo ke Yuulaya pila le mbo kuɛ a ndu.
15 Mbo dimi o yauwo niŋ aa: “La hivi Yuulaya lachi naa chɔuwo tuulu ketu ketu wa, okoŋ mi la miiŋguŋ amakɔɔ le ma dii ndu.”
16 Chowaabi ndoo chii niŋ chioo mɛɛndaŋ nyɛkɛndɛi. Le hei, mbo hivi Yuulaya naa o sina maa puaa chɔuwaa kpaaya bɛnduaa cho wa.
17 Mɛɛ puaa chɔuwa o chiee koŋ niŋ fula, ma sɔŋga a Chowaabi, nduyɛ ma dii buɛiyaa Deeve wa apum. Yuulaya Hitaitiinɔɔ bɛɛ wa o wanaa nda dii kaŋ nda tɛɛŋ.
18 Okoŋ, mi Chowaabi yɔŋ Deeve konaa a chɔuwo okɔɔ.
19 Mbo dimul wana o vem a yooŋgoo wo aa: “Te a chii pɛ masaa konaa dounɔŋ a chɔuwo okɔɔ,
20 naapum masaa cho tumbe dɔɔnɔŋ mbo dimul num aa, ‘Le yɛɛnɛ nya sɔɔŋguu yɛ chioo ikɛi kpɛɛluŋ le sɔŋgɔɔ? Baa nyaa sina nuaa maa a wa lo o kpakioo choo ma wuu nya a chiŋuaŋ te?
21 Nɛɛnɛ ndoo dii yɛ Abimɛlɛki po Chɛlubasɛti wo? O cho wana lanɔɔ le lo o kpakioo choo Tibɛɛsi, mbo mal ndu pou nda chuii nyɔɔŋ ndo* choo mbo wu le? Le yɛɛnɛ nya sɔɔŋguu yɛ kpakioo ikɛi kpɛɛluŋ?’ Okoŋ ma dimul ndu aa, ‘Buɛi numndo Yuulaya Hitaitiinɔɔ bɛɛ vi.’”
22 Mi wana Chowaabi vem a yooŋgoo wo kɔ dimul Deeve nyɛ o nyɛ nda dimul ndu.
23 Mbo dimul Deeve aa: “Puaa ndaa chɔuwa ndaa hiou naa mayoomu, nduyɛ ma hinul naa le sɔŋgɔɔ naa naŋ wa yondoo niŋnda. Miŋ chua nda touwɔɔ kau, miŋ miŋgi nda o dio kpaki chioo.
24 Kɛ wanaa wuu chiŋuaŋ nda lo o kpakioo choo ma wa buɛiyaa numnda vii viiyo, nduyɛ ma dii buɛiyaa numnda apum. Buɛi numndo Yuulaya Hitaitiinɔɔ bɛɛ vi.”
25 Okoŋ, mi Deeve dimul wana chuu ndu yooŋgoo wo aa: “Dimul Chowaabi aa: ‘O cho suɛi ŋ nɔ ma tambu kɔl te cho hei le. Muɛi faŋnde hɛli wana o wana le. La chɔɔlu chioo kindɔɔ mi la yem ndu.’ A kuɛ pɛ a dɛɛniaa ndu kɔllo.”
26 Mɛɛ Ba-siɛɛba tuei maa Yuulaya pɔnɔ ndɔ vi, mbo kandu chaŋndo le pɔnɔ ndɔ.
27 Dimioo nuaa teleŋ o chua le chaŋndo wo o chuu, mi Deeve yooŋgu le ndu, ma huŋ a ndu o chiɛi ndɔɔ. Nduyɛ mbo simnuŋ laa ndɔ, okoŋ mbo vilul ndu poo. Kɛ mi nyɛ Deeve tosa hoo wo tɛɛmbuu* Chɛhowa kɔllo tau tau.
Tɛɛsiaalaŋ
^ Naapum mɛɛ o chii teleŋ ndɔɔ chɔ.
^ Ɔɔ “yollo.”
^ Hibuluiye, “ma pulu peloŋ.”
^ Tofa Tɛɛsiaa.
^ Hibuluiye, “wa bɔɔ suɛi wɔɔŋ bɛndu ndu o hɔl.”
