Saamiɛɛ Diiŋ Ndɔɔ 12:1-31
12 Okoŋ mi Chɛhowa viam Netaŋ naa Deeve chua. Mbo kɔ dimul ndu aa: “Puaa a ŋiɔɔŋ wa o chiee bɛndu pilɛ niŋ, hoo wana sulaa, o pilɔɔ wana bala fondoo.
2 Po sulaa hoo ndoo nɔ saa a nauwa tau.
3 Kɛ po bala fondoo ndoo nɔ nyɛ o nyɛ le, mɛɛ saale laaŋnde o pendu leŋ kinɛi. Mbo manda saa ndɔɔ hoo nyɛkɛndɛi. Nduyɛ, saa hoo lo ndu o ba haaa mbo sul latulu a puaa nduaa. Nyɛdiaa pɔmbɔ ndoo nɔ wo saa hoo ndoo dia ni, mi ndoo kol vɛlɛ o taala ndɔɔ niŋ. Nduyɛ, ndu o ibuŋ ndoo lɔl ni. Mi saa hoo simnuŋ maa chua ndɔ laandu.
4 Paale pilɛ, mi miallo huŋ po sulaa hoo o bɛŋgu choo. Yɔŋii ndoo bii saa nduaa ɔɔ nauwaa nduaa o pilɛ mbo toosial mial ndɔɔ nyɛdiaa yɛ, saale fɔŋndɔle po bala fondoo ndoo nɔ leŋ o bii ni, mbo toosial po hiŋ ndu o bɛŋgu choo wo nyɛdiaa.”
5 Mɛɛ Deeve tuei hei, mbo duaunuŋ tumbe tau a po koŋ, okoŋ mbo dimul Netaŋ aa: “I mɛnaŋ po o Chɛhowa, Mɛlɛka cho yoomu wo lo maa, po tosa suɛi heiyo nɔ mbo sɔla piɔmndo!
6 Nduyɛ, o nɔ mbo paawa* le saa fɔŋndɔ koŋ bɛmbɔɔ le hiɔɔlu le dɛnɛ wɔɔŋ o tosa koŋ ndo, kanifuule o chɔm inyiɛɛ le.”
7 Okoŋ mi Netaŋ dimul Deeve aa: “Num kpeekpei cho po koŋ ni! Nyɛ Chɛhowa, Mɛlɛka Isɔluɛiya dimi wo cho hoo ni: ‘Yapila pɔya num ni le ma wa masaa Isɔluɛi, nduyɛ mi piŋi num Sɔɔ o ba.
8 Mi ke num chiɛi masanɔ numndo vɛlɛ a laandaa nduaa a kɔl nuu kpou. Mi tosa ma wa masaa waŋnda Isɔluɛi a waŋnda Chuda choo. Kɛ a koŋ kpou, keŋ ve le tuu le. Mi kɛɛsiaa vɛlɛ le mi tosal num mbo hiou bɛɛ lende.
9 Le yɛɛnɛ ŋ che yɛ diom Chɛhowa wo nyɛ fondoo, ma tosa suɛi bɛnda ndu o hɔl te ve? A dii Yuulaya Hitaitiinɔɔ a muɛi faŋnde! Mɛɛ ŋ tosa mi Amɔnaitiiya dii ndu a muɛi faŋnde, ma chua laa ndɔ le mbo wa laa num.
10 Lelaŋ, fɛɛŋ bɛɛ muɛi faŋnde feŋaŋ lɛ o yuŋgu numndo niŋ te, kanifuule a kɛɛ le ya bɛɛleŋ kioo, le mɛɛ ŋ chua lanɔɔ Yuulaya Hitaitiinɔɔ le mbo wa laa num yɛ.’
11 Nyɛ Chɛhowa dimi wo cho hoo ni: ‘Dɛnɛ palaa ya cho num tusi choo wo, o numndo chiɛiniŋ kpeekpei o cho chɔnɔŋ ni. A cho wa nuaa chiŋ, mi chua laandaa numnda, mi ke wana pɔnɔ cheleŋ. Nduyɛ ipala deŋ o cho ihini a nda ni.
12 Num chii i numnde tosa sɔɔ sɔɔ. Kɛ ya ya, ipala deŋ ya cho ndi tosa Isɔluɛiya kpou o hɔl ni.’”
13 Okoŋ mi Deeve dimul Netaŋ aa: “I tosa hakioo a Chɛhowa.” Mi Netaŋ dimul Deeve aa: “Chɛhowa bɛɛ mal num haki le nyɛ ŋ tosa wo. A cho wu le.
14 Kɛ a koŋ kpou, le mɛɛ ŋ tosa suɛi hei ma tɛɛmbuu Chɛhowa labɛɛ yɛ, po nda laŋga vilul numndo cho wu pɛ.”
15 Mɛɛ Netaŋ chii suɛi, mbo miiŋguŋ o ndu lo bɛɛ.
Okoŋ, mi Chɛhowa tosa mi poombɔ lanɔɔ Yuulaya vilul Deeve wo del a naa.
16 Mi Deeve nyɔɔlu Mɛlɛka tonyaa le poombɔɔ hoo. Mbo bii sum kala kalaa. Nduyɛ te ndoo luɛi pɛ o lumui ndɔɔ niŋ, lɛŋ ndoo lɔl ihini ni.
17 Mɛɛ waŋ banaa wa o chiɛi ndɔ lemasaa wa kuɛ ma sim ndu choo, ma dimul ndu le mbo chɛŋ lɛŋ, mbo kɛɛ. Nduyɛ ndoo di nyɛdiaa a nda latulu le.
18 O paale ŋɔmmɛuleŋ choo, mi poombɔɔ wu. Kɛ Deeve buɛiyaa nduaa wa siooŋnde le ndu dimullo maa poombɔɔ vi, kanifuule ma dimi aa: “Teleŋ poombɔɔ wa yoomu wo, miŋ kindiŋ le suɛi o ndu lo, kɛ o yeŋ naa lani le. Vɛɛnɛ naŋ cho yɛ ndu looku dimul maa poombɔɔ vi? Naapum mbo tosa dɔɔ suɛi wɔɔŋ wɔɔŋnde.”
19 Mɛɛ Deeve che buɛiyaa nduaa inyiimu nyiimuei, mbo bii bila maa poombɔɔ vi. Mi Deeve nyuna buɛiyaa nduaa aa: “Baa poombɔɔ vi ni?” Ma mulul ndu aa: “Ei, o vi.”
20 Okoŋ mi Deeve chaŋ lɛŋ, mbo puluŋ, nduyɛ mbo suinuŋ chuɛiyaŋ. Mbo siŋga nyɛla wa ndu lekɔɔ laŋ, okoŋ mbo kua o chiɛi Chɛhowa wo mbo kɔ baŋ wulaŋ, mbo fuuluu hɔlla lɛŋ. Okoŋ kɔɔli, mbo kua o chiɛi ndɔɔ, mbo nyuna le ma ke ndu nyɛdiaa, nduyɛ mbo dia.
21 Mi buɛiyaa nduaa nyuna ndu aa: “Le yɛɛnɛ ŋ tosa yɛ hei? Teleŋ poombɔɔ wa yoomu wo, ma bii sumndo, nduyɛ a wa chaŋndo. Kɛ dimioo nuaa mi poombɔɔ wu, ma chaŋ nya nduyɛ ma dia nyɛdiaa.”
22 Mbo muli aa: “A tonya, teleŋ poombɔɔ wa yoomu wo, mi bii sumndo, nduyɛ I wa chaŋndo, kanifuule mi dimiŋ o kɔl aa, ‘Kɛlɛŋgaa dɔɔ mi Chɛhowa tuiinuŋ ya inyiɛɛ mbo tosa poombɔɔ vi lɛ le.’
23 Kɛ mɛɛ o vi niŋ nuaa yɛ, le yɛɛnɛ mi bii vɛlɛ sumndo? I nɔla pa mi miŋgi ndu yoomu? I cho lakɔ naa o cho wa, kɛ ndu miiŋgu naa ya chua le.”
24 Okoŋ, mi Deeve dɛɛniaa Ba-siɛɛba laa ndɔ kɔllo. Mbo kua o ndu lo chiɛiniŋ, ma bɔŋa nɔɔ. Okoŋ kɔɔli, mi Ba-siɛɛba vilul ndu poo, ma ke ndu diolaŋ aa Sɔlɔmɔŋ.* Chɛhowa ndoo kaala poombɔɔ hoo tau.
25 Nduyɛ, mbo viam Netaŋ wana suaa le Mɛlɛka wo, le mbo kɔ ke ndu diolaŋ aa Chɛdidaya,* le mɛɛ Chɛhowa kaala ndu yɛ.
26 Mi Chowaabi hiau lachi a Luaba chiŋalaŋndo a sɔŋgɔɔ, chiee Amɔnaitiiya, nduyɛ mbo bii fonda lemasaa.*
27 Mi Chowaabi viam waŋnda naa Deeve chua a yooŋgoo aa: “I chiŋalaŋ Luaba a sɔŋgɔɔ , nduyɛ mi bii fonda mamɛŋndo.*
28 Lelaŋ, chuuŋgiaa puaa chɔuwa a tuaa kpou ma huŋ del chioo choo, okoŋ ma bii ndu. Te o cho koŋ te, ya cho chioo biyɔɔ ni, mi fula tɔɔ.”*
29 Mi Deeve chuuŋgiaa puaa chɔuwa kpou, ma kua Luaba ma kɔ del chioo choo a sɔŋgɔɔ, nduyɛ ma bii ndu.
30 Okoŋ, mbo faŋa Malikam mɔsil lemasa ŋkooliiyo o lebol. Lusul mɔsillo hoo wa le talɛŋnde i pilɛ,* nduyɛ pouta baa kala kalalaŋ la wa la holi holiaa o mɔsil koŋ. Ma chua mɔsil koŋ ma wou Deeve. Mi Deeve kuandu vɛlɛ nyɔɔŋ ŋ hɔbɛi o chioo hoo niŋ.
31 Mbo soli wanaa wa o chiee koŋ niŋnda mbo ke nda wallo. Mbo handu nda le poutaŋ siɔlɔɔ, wallo a chiliŋuŋ sɛɛmbiaŋ, chooŋ, vɛlɛ a kpilikioŋ lɔɔ. Mɛɛ nuaa o tosa a chieeŋ bɛnduŋ Amɔnaitiiya kpou ni. O mɛɛlulaŋ kpɔŋ, mi Deeve a puaa chɔuwa kpou miiŋgu Chulusalɛm.
Tɛɛsiaalaŋ
^ Ɔɔ “sala.”
^ Diolaŋ ndaŋ la sim, “Kɔl Nyuloo,” fulaa o diom maHibuluiyo niŋ.
^ Diolaŋ ndaŋ la sim, “Wana Chɛhowa Kaala Wo.”
^ Ɔɔ “chiee lemasaa.”
^ Ɔɔ “chiee mamɛŋndo.”
^ Hibuluiye, “nduyɛ mi diola nilaŋ la wa ndu choo.”
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
