Saamiɛɛ Diiŋ Ndɔɔ 14:1-33
14 Mi Chowaabi, po Sɛluiya wo tuɛi maa masaa yeema le Abisalɔŋ chɔɔ.
2 Le hei, mi Chowaabi yooŋgu le wana lanɔ kɔl kaloo o Tɛkowa niŋ. Mɛɛ o hiŋ, mbo dimul ndu aa: “A yandii, wounuŋ nyɛla imɔnɔlaŋ ma tosa maa biisioo komal num ni, nduyɛ suiinuŋ machuɛi le. Tosa maa a cho niŋ mɔnɛi biyɔɔ le teleŋ vilɛi.
3 Okoŋ ma kuɛ o masaa lo ma dimul ndu nyɛ ya hiŋ num hoo dimullo wo.” Mi Chowaabi dimul ndu nyɛ o nɔ mbo kɔ dimi wo.
4 Mi chua fula hoo Tɛkowa wo kua naa masaa chua, mbo kɔ hini lɛŋ sanaa a hɔlla a kuumbaa, mbo dimi aa: “Fallo masaa, mala ya fɔ!”
5 Mi masaa nyuna ndu aa: “Yɛɛnɛ yɔŋnuŋ yɛ?” Mbo muli aa: “I nɔ lɛ pɔnɔ le fallo masaa, kanifuule pɔnɔ nuu viŋnuŋ.
6 Ya buɛi numndo, yaa nɔ puaa a ŋiɔɔŋ. Kɛ puaa niaa ŋiɔɔŋnda haa, mɛɛ nda kuɛ yondoo niŋ ma saaŋ chɔulabaa. Wana o wana ve loŋ le nda kpaaliaa le. Okoŋ, mi o pilɔɔ luaa chaaŋ ndɔ mbo dii ndu.
7 Kɛ suŋ suŋ niŋ, yuŋgoo kpou chɛŋ ma chiŋalaŋ ya, nduyɛ ma wa dimioo aa, ‘Soli laŋunɔ dii koŋ pɔmbɔ ndɔ wo nanuŋ miŋ dii ndu le mɛɛ o dii pɔmbɔ ndɔ yɛ, o yɔŋ bɛɛ mi wana ve lɛ le nyɛm kiɔɔŋ loo le!’ Nduyɛ te a dii ndu pɛ, mɛɛ dɛŋgulte mɛɛlaale lo ya o ba leŋ* ko nda hiŋ nyumioo nuaa ni. A cho diola pɔnɔ nuu wɔɔsuu, nduyɛ wana o wana lo lɛ niŋ o chieeŋndo choo le diola ndɔla loo le.”
8 Okoŋ, mi masaa dimul chuaa aa: “Miiŋguŋ o numndo. I cho diomndeŋ yɔŋ o nda lo le num a hei okɔɔ.”
9 Mi chua fula hoo Tɛkowa wo dimul vɛlɛ masaa aa: “Masanɔ nuu, yapila a yuŋgu finya nuu tɔɔyaŋndo cho wa choo ni le nyɛ po nuu tosa wo. Kɛ tɔɔyaŋ cho wa num choo a masale numndeŋ te.”
10 Mi masaa dimul ndu vɛlɛ aa: “Te wana o wana chiŋalaŋ num niŋ pɛ, huŋ dimul la. I cho tosa mbo keluŋ num kɔɔli.”
11 Kɛ mi chuaa dimi aa: “Yandii masanɔ nuu, maa loonuŋ a Chɛhowa Mɛlɛka numndo, yɔŋii wana miŋgiaa maa* dii po nuu.” Okoŋ mi masaa dimul ndu aa: “I mɛnaŋ po o Chɛhowa, Mɛlɛka cho yoomu wo lo maa, yiiŋndeŋ le pilɛ bɛɛ le kendiŋ po numndo o lebol, mi le del lɛŋ te.”
12 Mi chuaa dimi niko aa: “A yandii masanɔ nuu, yaŋ ya nilaŋ mi dimul num isɔɔ.” Mbo dimul ndu aa: “Soo, I cho num lani!”
13 Mi chuaa dimi aa: “Mɛɛ le yɛɛnɛ ŋ tosa yɛ niko suɛi wɔɔŋ waa nuaa a wanaa Mɛlɛkaa? A chii yamɛi kilulɔŋ a nyɛ ŋ dimi hoo wo fallo masaa. Nduyɛ tɔɔyaŋndo cho num choo, kanifuule a tou po numndo, ma kɛɛ le ndu miŋgioo.
14 Naa kpou nɔ le piɔmndo sɔlaa, nduyɛ miŋ simnuŋ mɛɛ nda chuiŋi nuaa mɛŋndaŋ lɛŋ wana nɔla lɛ maŋ kɔndɔɔ le yɛ. Kɛ Mɛlɛka ndu cho wana diyaa le, nduyɛ te a tou pɛ waŋndo, mbo nuuviaa nɛilaŋ le mi wana nda tou koŋ ndo miiŋgu ndu o ibuŋ.
15 Masanɔ nuu, le sabu ya hiŋ num suɛi hei dimullo wo cho ni maa waŋnda luei ya siooŋnde ni. Lelaŋ ya dimi ni aa, ‘Yandii, I suaa wɔ naa masaa chua. Kɛlɛŋgaa mi masaa tosa dɔɔ nyɛ ya chɛ ndɔɔ dimul ndu wo.
16 Naapum mbo yaŋ ya nilaŋ, nduyɛ mbo piŋi ya wana cho kindiŋndo le mbo dii ya a pole nile pilɛleŋ ndo o ba, le halikpeŋ mbo faŋa naa o nyɛm kɛŋ Mɛlɛka ke naa woŋ choo.’
17 Okoŋ, mi ya buɛi numndo dimi aa, ‘Maa nyɛ masanɔ nuu cho ya dimul lo ke ya kɔl dɛɛniaa fɔ!’ Kanifuule, masanɔ nuu cho ko maa kiilanɔ Mɛlɛka tonyaa le sinaa ikɛndɛi tɛɛŋ a iwɔɔŋnde. Maa Chɛhowa Mɛlɛka numndo wa a num latulu fɔ!”
18 Okoŋ, mi masaa dimul chuaa aa: “A yandii, I yeema mi nyuna num isɔɔ. Kɛ viŋ ya nyɛ o nyɛ le.” Mi chuaa dimi aa: “Yandii masanɔ nuu, soo. I cho num lani!”
19 Mi masaa nyuna ndu aa: “Baa Chowaabi vem num ni le ya sɔɔŋ muŋ kpou dimullo?” Mi chuaa muli aa: “I mɛnaŋ po naa num chua masanɔ nuu maa, nyɛ ŋ dimi wo cho tonya. Chowaabi buɛi numndo kpeekpei vem ya ni mbo duau ya diomndaŋ ndaŋ kpou o sondo.
20 Chowaabi buɛi numndo tosa hei le ma che sɔɔŋ o nɛi cheleŋ choo. Kɛ num masanɔ nuu, a nɔ taasioo maa maalikɛinɔ Mɛlɛka tonyaa, nduyɛ a sina nyɛ o nyɛ cho yɔŋnɔŋndo o lɛŋndeŋ niŋ.”
21 Okoŋ kɔɔli, mi masaa dimul Chowaabi aa: “Awa, I tuei. Kɔ ma kɔ miŋgi Abisalɔŋ nanuŋ.”
22 Le hei, mi Chowaabi baŋ wulaŋ, mbo fuuluu hɔlla lɛŋ, nduyɛ mbo saŋgala masaa. Mbo dimi aa: “Oo masanɔ nuu, ya buɛi numndo, I sina hau maa I cho wana sɔvɛ num o hɔl, kanifuule a tosa nyɛ ya dimul numndo.”
23 Okoŋ, mi Chowaabi chaŋ mbo kua Kɛsiɔɔ, mbo kɔ huŋ a Abisalɔŋ Chulusalɛm.
24 Kɛ mi masaa dimi aa: “O kɔ mbo wa o ndu lo bɛɛ, o nɔ mbo che ya le.” Mi Abisalɔŋ miiŋgu o ndu lo bɛɛ, nduyɛ o chi masaa hɔlla le.
25 O Isɔluɛi niŋ kpou, wana pɔnɔ o wana pɔnɔ ve ma lisa ndu le naŋɔɔ maa Abisalɔŋ te. Chɔŋ o peloŋ haaa o bolleŋ, ndoo nɔ sɔŋ o sɔŋ te.
26 Yiiŋii wa ndu o lebol le ndii lusul. Le hei, mɛɛ mi ndoo kili ndi o wɔsi kɛ kɛ mɛɛlulaŋ. Nduyɛ yiiŋii ndoo kili keŋ nde, te ndaa handu ndi pɛ o pou wa o chiɛi lemasaa le lusul nyɔɔŋ sinaa wo choo,* lusul ndɔɔ ndoo wa siɛkɛlloŋ 200.*
27 Mi Abisalɔŋ vialu puaa a yaa a wana lanɔɔ o pilɛ diolaŋ aa Tamaa. Nduyɛ, naŋɔɔ pila chuaambɔɔ hoo ndoo naŋ ni.
28 Le wɔsilaŋ la tiɔɔŋ kpulukuu Abisalɔŋ wa Chulusalɛm, kɛ o chi masaa hɔlla le.
29 Okoŋ, mi Abisalɔŋ yooŋgu Chowaabi le mbo hiŋ mbo vem ndu o masaa lo. Kɛ Chowaabi kue o ndu lo le. Mbo yooŋgu ndu vɛlɛ, kɛ a koŋ kpou, mi Chowaabi kɛɛ le kɔlaŋ.
30 O mɛɛlulaŋ kpɔŋ, mbo dimul buɛiyaa nduaa aa: “Lɛŋnde Chowaabi leŋ le cho lɛŋnde nileŋ ikɛi. Nduyɛ, o waa baliiyoŋ lechoo. La kɔ mal chiɛi nduɛi o yiŋ.” Okoŋ, mi buɛiyaa Abisalɔŋ nda kɔ mal chiɛi Chowaabi ve o yiŋ.
31 Mi Chowaabi chaŋ mbo kua naa Abisalɔŋ chua. Mbo nyuna ndu aa: “Le yɛɛnɛ buɛiyaa numnda kɔ mal lɛ chiɛi nii o yiŋ?”
32 Mi Abisalɔŋ mulul Chowaabi aa: “Chumndɔ, I yɔŋ yooŋgoo naa num chua mi dimul num aa, ‘Huŋ mi vem num o masaa lo ma kɔ nyunal la ndu aa: “Le yɛɛnɛ ya fula yɛ Kɛsiɔɔ mi huŋ nanuŋ? Ndoo bɛnda bɔɔ mi yaa waŋnuŋ loŋ. Lelaŋ, I yeema mi che masaa. Te o yiyaŋ pɛ maa I nɔ mi sɔla piɔmndo, mɛɛ o dii ya.”’”
33 Okoŋ, mi Chowaabi kua mbo suaa naa masaa chua. Nduyɛ, mi masaa veelu Abisalɔŋ. Mɛɛ o hiŋ, mbo baŋ wulaŋ, mbo hini lɛŋ sanaa masaa lachi a hɔlla a kuumbaa. Okoŋ, mi masaa sɔsa Abisalɔŋ kuuwo.
Tɛɛsiaalaŋ
^ Koŋ cho ni, wana nda tiindaŋ le mi pulale yuŋgoo le hiou lachi wo.
^ Ɔɔ “wanayɛi kpɛɛluŋ wana nda dii yo.”
^ Naapum le chiɛi lemasa kinɛi pouwo hoo ndu wa ni. Nduyɛ, ndu wa teŋgeŋ a pouta cheleŋ ndaa soliŋ kpeku le lusul nyɔɔŋ sinaa wo.
^ Tofa Tɛɛsiaa B14.
