Saamiɛɛ Diiŋ Ndɔɔ 15:1-37
15 Mɛɛ sɔɔŋ muŋ kpou hiou, mi Abisalɔŋ nuuviaa nyɛ nyaanaŋ suaa naŋndo a suaa le ndupila vɛlɛ a puaa ŋwaŋ 50 le ndu kiltaŋ lachi.
2 Mi Abisalɔŋ ndoo chɛŋ idii puŋ, mbo kɔ sim o nɛiyo daŋgala le luɛiyɔɔ o dio kpaki chioo. Te wana o wana ndoo wa pɛ hunɔɔ o masaa lo a suɛi nduɛi le mbo kelu yamɛi, Abisalɔŋ veelu ndu o nyuna ndu aa: “Chiee kuɛɛnɛ ŋ fula yɛ?” Okoŋ, wana koŋ mulul ndu aa: “O kaaleŋ le pilɛ o Isɔluɛi niŋ ya buɛi numndo fula ni.”
3 Okoŋ mi Abisalɔŋ dimul ndu aa: “I dimullɔ num, nyɛ ŋ cho dimioo wo cho tonya, nduyɛ a nɔ di. Kɛ wana o wana cho o masaa lo mbo saalaŋ suɛi numnde le.”
4 Mi Abisalɔŋ ndoo dimi vɛlɛ aa: “Te ndaa yulu ya pɛ iso le waa wana kialaa ŋyamaa o lɛŋndeŋ ndeŋ niŋ, wana o wana ndoo hiŋ pɛ a suɛi nduɛi o ya lo, I wa tosa a sabu mi ndoo sɔla di ndɔɔ.”
5 Te waŋndo ndoo sɔɔŋguu pɛ Abisalɔŋ ikɛi le mbo beŋ ndu wulaŋ, mi Abisalɔŋ ndoo siɛndi baa mbo saa ndu, nduyɛ mbo sɔsa ndu kuuwo.
6 Te Isɔluɛinɔ kɛ kɛ ndoo hiŋ pɛ o masaa lo le suɛi nduɛi dimioo, nuaa Abisalɔŋ ndoo tosal ndu ni. Hei Abisalɔŋ ndoo tosa ni le waŋnda o Isɔluɛi niŋ kɔltaŋ mulioo.*
7 Mɛɛ wɔsilaŋ la hiɔɔlu* hiou okoŋ kɔɔli, mi Abisalɔŋ dimul masaa aa: “Yandii, I yeema mi kuɛ Hɛbulɔŋ, mi kɔ peelu buŋgɛi ya chua o Chɛhowa lo ve.
8 Kanifuule, teleŋ ya buɛi numndo wa Kɛsiɔɔ o Siiliaa niŋndo, mi chua buŋgɛi ikala kala aa: ‘Te Chɛhowa miŋgi ya pɛ Chulusalɛm, I cho salaa soli o ndu Chɛhowa lo.’”
9 Okoŋ mi masaa dimul ndu aa: “Awa, mɛɛ fuuluu kɛndɛ.” Le hei, mbo chaŋ mbo kua Hɛbulɔŋ.
10 Mi Abisalɔŋ viam suaŋsuaŋnda o kaalaŋ o Isɔluɛi niŋ kpou, mbo dimul nda aa: “Te la tuei dɔɔ pɛ mi buloo soo, la yonda aa, ‘Abisalɔŋ simnuŋ masaa o Hɛbulɔŋ niŋ!’”
11 Mi puaa 200 chaŋ Chulusalɛm ma kua loŋ a Abisalɔŋ latulu. Veeloo koni ndoo veelu nda ni ma kua, kɛ a sina nyɛ kpeekpei wa yɔŋnɔŋndo wo le.
12 Okoŋ kɔɔli, mɛɛ Abisalɔŋ chii salalaŋ soli, mbo yooŋgu le wana silaa Deeve wo Ahitofɛɛ, fulaa Kilɔɔ. Wanaa wa Abisalɔŋ tooloo le masaa dumboo* yiiyo wa, wa tuŋ hiouwɔɔ lachi a kuiyo.
13 Mɛɛ teleŋ tiŋ hiou, mi waŋndo mal mbo kua o Deeve lo a yooŋgoo aa: “Waŋnda Isɔluɛi kpou muliŋ Abisalɔŋ kɔɔli.”
14 O lepilɛ niŋ kpe, mi Deeve dimul buɛiyaa nduaa nda wa Chulusalɛm nda kpou aa: “La chɔŋ miŋ nyaanuŋ, kanifuule wana o wana nɔla niŋ mbo hɛluŋ Abisalɔŋ te! La keleŋa chɔ chɔ, yɔŋii o huŋ del naa choo mbo tiu naa ba, okoŋ mbo diu diu wanaa cho chiee naŋ nda kpou a muɛi faŋnde!”
15 Mi buɛiya mulul masaa aa: “Nyɛ o nyɛ masa naa kɛɛsiaa pɛ le tosaa, naa buɛiyaa numnda cho a bɛɛndiaŋ le ndu tosaa.”
16 Mi masaa chua yuŋgu ndɔɔ kpou mbo kuaŋnuŋ a nda. Kɛ mbo mɛi laandaa nduaa pɔmbuaa tɔ kɔɔli, le ma lo chiɛiyo* ikɛi.
17 Okoŋ, mi masaa a wanaa wa ndu kɔɔli wa kpou hiau lachi a kɔlaŋ, ma kɔ sim Bɛti-mɛhaki.
18 Buɛiyaa nduaa kpou, Kɛluitaitiiya, Pɛlɛtaitiiya vɛlɛ a puaa Kitaitiiya 600 fula Kaati ma tual ndu kɔɔli wa wa hiouwɔɔ, mi Masaa Deeve wa nda mɛɛndaŋndo.
19 Okoŋ mbo dimul Itai wana waa Kaati aa: “Le yɛɛnɛ ŋ cho yɛ naa hunɔɔ kɔɔli? Miiŋgu ma kɔ wa a masa sɛnɛiyo latulu, kanifuule miallo ŋ cho ni, nduyɛ wana nyaanaŋndo ŋ cho ni.
20 Chiɛi koni ŋ hiŋ ni. Baa I nɔ pa mi dimul num le ma tol la kɔɔli miŋ wa heeloo a tuusoo latulu? I sina naa ya cho kɔlaŋ nda le, nduyɛ I sina teleŋ ya cho kɔlaŋ ndo le. Lelaŋ, chua wanaa numnda mi la miiŋgu. Maa Chɛhowa chɔm num kaala lo lechoo wo le teleŋ o teleŋ fɔ!”
21 Kɛ mi Itai mulul masaa aa: “I mɛnaŋ po o Chɛhowa, Mɛlɛka cho yoomu wo lo maa te num masanɔ nuu cho pɛ yoomu, ba o ba ŋ wa pɛ, loŋ ya buɛi numndo cho wa ni, o yɔŋ bɛɛ aa le piɔmndo ɔɔ le waa yoomu!”
22 Okoŋ mi Deeve dimul Itai aa: “Kɔ ma kɔ taŋ.” Mi Itai, fulaa Kaati kɔ taŋ latulu a puaa nduaa kpou, vɛlɛ a chuauwaa nduaa.
23 Wanaa wa o lɛŋndeŋ niŋnda kpou wa chaŋndo choo choo kpeleŋ mɛɛ waŋnda haa wa kpoloŋndo taŋɔɔ. Nduyɛ, masaa wa isisi o Kpoloŋndo Kidilɔŋ. Waŋnda kpou wa taŋɔɔ le kɔlaŋ o nɛi kuɛ o pollo niŋndo.
24 Sadɔki bɛɛ wa loŋ, nduyɛ Livaiyaa wa kɔlaŋ a kɔfu kpema Mɛlɛka tonyaa wa bɛɛ wa a ndu latulu. Okoŋ, ma kɛsi Kɔfu Mɛlɛka tonyaa, nduyɛ Abiaata bɛɛ wa loŋ mi wanaa fula chiee wa kpou siou taŋɔɔ.
25 Kɛ mi masaa dimul Sadɔki aa: “Miiŋgu a Kɔfu Mɛlɛka tonyaa chiee. Te Chɛhowa hini pɛ kɔl a ya, o cho ya miŋgi pila, nduyɛ mbo tosa mi che Kɔfoo hoo vɛlɛ a fondaŋ o cho wa wo.
26 Kɛ te o dimi pɛ maa o hini lɛ kɔl a ya le, mɛɛ o tosal la nyɛ o nyɛ o yiyaŋ pɛ maa o bɛnda ndu o hɔl.”
27 Mi masaa dimul vɛlɛ Sadɔki wana soliaa lasalaa aa: “O cho num te cho wana cha wo le? Miiŋguŋ chiee. Maa kɔ wa kɛndɛ fɔ! Chua puaa nyaa ŋiɔɔŋnda, Ahimaasi po num, a Chonataŋ po Abiaata wo mi la miiŋgu.
28 Ya bɛɛ I cho chum o fondaŋnda taŋaalaŋ o pioo Chɔɔdaŋ o pollo niŋ haaa ma yɔŋ ya yooŋgoo a mɛɛ sɔɔŋ cho yɛ okɔɔ.”
29 Okoŋ mi Sadɔki nda Abiaata chua Kɔfu Mɛlɛka tonyaa ma miiŋgu a ndu Chulusalɛm, ma kɔ wa loŋ.
30 Deeve wa Pembii Ɔlifiive helɔɔ mbo wa chaŋndo. Bolleŋ le wa ndu le kumbaa, nduyɛ peluŋ fondo o wa kɔlaŋ ni. Wanaa wa kɔlaŋ a ndu latulu wa kpou bɛɛ, ma kumbu bolle, nduyɛ a wa pembei helɔɔ a chaŋndo.
31 Okoŋ, mi yooŋgoo komal Deeve aa: “Ahitofɛɛ cho waŋndo o pilɛ o wanaa hiou Abisalɔŋ kɔɔli le num dumboo yiiyo wa tɛɛŋ.” Mɛɛ Deeve tuei hei, mbo dimi aa: “Oo Chɛhowa, yandii laasiaa sila Ahitofɛɛ wo mbo simnuŋ diɔmnde!”
32 Mɛɛ Deeve fuuluu o pembei bolleŋ naa waŋnda ndaa baŋ wulaŋ o Mɛlɛka lo wa, Husai Akaitiinɔɔ wa loŋ le ndu demullo. Domaa wa ndu o sɛɛsiɛi lekɔɔ, nduyɛ chundoo wa ndu o lebol.
33 Mi Deeve dimul ndu aa: “Te a kuɛ pɛ ya kɔɔli, a cho wa kalaŋndo le ya.
34 Lelaŋ, I yeema ma miiŋgu chiee ma kɔ dimul Abisalɔŋ aa, ‘Fallo Masaa, buɛi numndo ya cho ni. Buɛi finya numndo ya wa paandu ni, kɛ suŋ suŋ niŋ, ya bɛɛ buɛi numndo ya cho niŋ ni.’ Okoŋ, a nɔla ma laasial la sila Ahitofɛɛ wo.
35 Wanaa soliaa lasalaa, Sadɔki nda Abiaata bɛɛ cho wa loŋ a num. Nyɛ o nyɛ ŋ tuei pɛ o chiɛi lemasaa niŋ, dimul nda a ndi okɔɔ.
36 Puaa ndaa ŋiɔɔŋnda, Ahimaasi po Sadɔki wo, a Chonataŋ po Abiaata wo bɛɛ cho loŋ a nda latulu. Nyɛ o nyɛ nya tuei pɛ, la viom nda ma huŋ dounuŋ ya kona.”
37 Okoŋ mi Husai, chaaŋ o Deeve miiŋgu chiee, nduyɛ o komal kinɛi Abisalɔŋ cho luɛiyɔɔ Chulusalɛm.
Tɛɛsiaalaŋ
^ Hibuluiye, “chiimbuuwo.”
^ Ɔɔ naapum, “wɔsilaŋ 40.”
^ Ɔɔ “defoo.”
^ Ɔɔ “chiɛi lemasaa.”
