Saamiɛɛ Diiŋ Ndɔɔ 18:1-33
18 Okoŋ, mi Deeve chɔm puaa nduaa chɔuwa, mbo kɛsi nda masaa choo. Masaa apum, puaa chɔuwa waapilɛ wa nda o ba bɛŋgu ni. Apum yɛ, puaa chɔuwa kɛmɛ.
2 Nduyɛ, mi Deeve piɔu puaa nduaa chɔuwa haa kundalaŋ la yaa, mbo yɔŋ nda o chɔuwo. Kundaa o pilɛ wa Chowaabi o ba bɛŋgu. Kundaa o pilɔɔ wa Abisiaa, po Sɛluiya wo o ba bɛŋgu. Chowaabi nda Abisiaa yɛ, pɔmbɔɔ a bɛndoo nda wa ni. Nduyɛ kunda yaa ndɔɔ wa Itai, wana waa Kaati o ba bɛŋgu. Okoŋ, mi masaa dimul nda aa: “Ya bɛɛ I cho lakɔ a nya latulu.”
3 Kɛ ma dimul ndu aa: “Kua le, kanifuule te o yɔŋ pɛ mi kilta kɔ fula, o cho naa le nda cho kɛsi kɔllo choo le. Nduyɛ o yɔŋ bɛɛ ma diu diu puaa naa chɔuwa tɛndaa tɛɛŋ, a heu niŋ ba a keŋ te, kanifuule num pilɛ a cho o sɔvɛ, mbo hiau naa puaa chɔuwa 10,000. Lelaŋ, o bɛnda ma lo chiee, ma wa naa malaa yɔŋndo.”
4 Mi masaa dimul nda aa: “Nyɛ o nyɛ bɛnda pɛ a nya, I cho tosa.” Okoŋ, mi masaa sim o dio kpaki chioo ikɛi, mi puaa chɔuwa kpou fula o kɛmɛlaŋ niŋ a o waalaŋ niŋ le kɔlaŋ o chɔuwo.
5 Mi masaa dimul Chowaabi, Abisiaa, a Itai aa: “A yandii, la yiyaŋ ya choo, mi la bii Abisalɔŋ nyɛkɛndɛi.” Mi puaa chɔuwa kpou tuɛi nyɛ masaa dimul wanaa wa nda bolleŋ nda a Abisalɔŋ okɔɔ wo.
6 Okoŋ, mi puaa chɔuwa mal chioo le ma komal Isɔluɛiya, nduyɛ ma sɔŋga nda ndaa o bundɔɔ niŋ Ifiluem.
7 Mi puaa chɔuwaa Deeve wa yam waŋnda Isɔluɛi loŋ o paale leŋ choo, nduyɛ ma diu nda tau tau. Puaa 20,000 nda diu ni.
8 Mi chɔuwo hoo pɛŋgɛlaŋ o tanda koŋ niŋ kpou. Nduyɛ, wanaa kpundɛla cheleŋ la komal o bundɔɔ niŋ ma wu a ba nda wa ndaa hiou a wanaa nda dii o paale leŋ choo a muɛi faŋnde wa.
9 Abisalɔŋ wa kɔlaŋ mbo cha buɛiyaa Deeve wa hunɔɔ ndu lachi. Nduyɛ, o wa o chɔlu yɛyii muuliaŋndo* choo. Okoŋ, mi chɔloo hoo kei o yɔm bɛndu wa ndu lachi a lɛuwoŋ yukɔŋ ndo bɛŋgu. Nduyɛ, mi bolleŋ le hau Abisalɔŋ o lɛuwuŋ muŋ niŋ. Abisalɔŋ lo o landaŋ ndoŋ, mi chɔloo hiau lachi a kiltaŋ.
10 Mɛɛ waŋndo che ndu, mbo kɔ dimul Chowaabi aa: “I che Abisalɔŋ o landaŋ o yɔm bɛndoo.”
11 Mi Chowaabi dimul po chuu ndu yooŋgoo wo aa: “Le yɛɛnɛ ma cha ndu a dii ndu o foofo le? Te num oo tosa keŋ pɛ, I wa num ke kaniŋ humboŋ tɔ vɛlɛ a yauleŋ.”
12 Kɛ mi poo hoo dimul Chowaabi aa: “O yɔŋ bɛɛ ma ke ya kaniŋ humboŋ 1,000, I bii kɔllo mi hol po masaa baa le, kanifuule miŋ tuɛi mi masaa dimul num, Abisiaa, vɛlɛ a Itai aa, ‘Nya kpou, la mandal la Abisalɔŋ.’
13 Te yaa soli pɛ masaa diom mi dii ndu, i ve lo i viaŋnaŋ te. Nduyɛ te masaa ndoo sina pɛ a ndi okɔɔ, num bɛɛ a ve ya soli leniŋ te.”
14 Mi Chowaabi dimi aa: “I cho lɛ bɛɛ pɛŋ teleŋ ni tɛɛmbuu le suɛi o numndo le.” Okoŋ, mbo chua chiŋuaŋ ma yaa mbo kua naa Abisalɔŋ wa o landaŋ o yɔmndo wa. O wa wɔ yoomu, mbo baŋ ndu maŋ o kɔllo.
15 Chowaabi ndoo nɔ buɛiya tɔ, a ndaa biilul ndu wolɔɔla chɔulaŋ nda. Nduyɛ, nda huŋ siou niŋ Abisalɔŋ diyɔɔ ni.
16 Okoŋ, mi Chowaabi hɔŋ niko buloo le mi chɔuwo mɛɛlu, nduyɛ mi puaa chɔuwa pɛŋgi Isɔluɛiya kiltaŋ kɔɔli, ma miiŋguŋ.
17 Ma chua dialuŋ Abisalɔŋ ndoŋ, ma kɔ viou muŋ o sooŋ bɛndoo niŋ o bundɔɔ niŋ. Okoŋ, ma dii poutaŋ kunda bɛndoo o dialuŋ muŋ choo. Mi Isɔluɛiya kpou miiŋguŋ o la nda lo a kiltaŋ.
18 Teleŋ Abisalɔŋ wa yoomu wo, mbo simi suŋgbuleŋ o Kpoloŋ* Masaa, le mi waŋnda koma wa loonɔŋndo a ndu. Kanifuule mbo dimi aa: “I nɔ po le mbo loo diola nilaŋ te.” Le hei, mbo ke suŋgbule leŋ diola ndɔlaŋ. Nduyɛ haaa a paale hauleŋ ndeŋ, waŋnda cho wɔ leŋ veeloo aa, Suŋgbule Abisalɔŋ Ndeŋ.
19 Mi Ahimaasi, po Sadɔki wo dimi aa: “Yandii, mal la mi nyaanuŋ mi kɔ dimul masaa yooŋgoo hoo, kanifuule Chɛhowa kelu hau yamɛi le ndu mbo piŋi ndu yaamɔɔwaa nduaa o ba.”
20 Kɛ mi Chowaabi dimul ndu aa: “A nɔ ma kuɛ hau a yooŋgu le. Paale cheleŋ le cho wa ma kuɛ a yooŋgoo. Kɛ hau ndu, a cho lakɔ a yooŋgu le, kanifuule po masaa vi nuaa ni.”
21 Okoŋ, mi Chowaabi dimul po Kusaitiinɔɔ aa: “Kɔ, ma dimul masaa nyɛ ŋ che wo.” Mi Kusaitiinɔɔ hoo tunduŋ Chowaabi lachi, mbo kua a kiltaŋ.
22 Mi Ahimaasi, po Sadɔki wo dimul vɛlɛ Chowaabi aa: “Mɛɛ mɛɛ la wa, yandii, ya bɛɛ I nyaanuŋ ndɔɔ Kusaitiinɔɔ kɔɔli.” Kɛ mi Chowaabi dimi aa: “Le yɛɛnɛ ŋ yeema yɛ vɛlɛ ma nyaanuŋ ndu kɔɔli po nuu? Yooŋgu cheleŋ cho lɛ le ma kɔ dimi le.”
23 A koŋ kpou, mbo dimi aa: “O wa bɛɛ lende, chɛl la mi kuɛ.” Okoŋ, mi Chowaabi dimul ndu aa: “Mɛɛ kɔ!” Mi Ahimaasi bii nɛi kuɛ o tanda Chɔɔdaŋ ndo wo a kiltaŋ. Nduyɛ, o lo kiltaŋ haaa mbo kɔ hiou po Kusaitiinɔɔ.
24 A teleŋ koŋ, Deeve wa ichali o diola tiɔɔŋnda kpaki chioo tɛɛŋ. Nduyɛ, mi wana mɛŋgɛlaa kua mbo kɔ hel o yindɔ cho o dio kpakioo choo wo. Mɛɛ o chua hɔlla, mbo cha poo hunɔɔ a kiltaŋ ndupilɛ.
25 Okoŋ, mi wana mɛŋgɛlaa veelu, mbo dimul masaa. Mi masaa dimi aa: “Te o yɔŋ pɛ aa ndupilɛ cho kiltaŋ ni, mɛɛ a yooŋgoo o cho hunɔɔ ni.” Mɛɛ ndu kandu tiŋ sɔɔŋguuwo,
26 mi wana mɛŋgɛlaa cha vɛlɛ po cheleŋ hunɔɔ a kiltaŋ. Mbo dimul wana wa dio kpakioo mandaa wo aa: “I cho vɛlɛ chɔɔ po cheleŋ hunɔɔ a kiltaŋ ndupilɛ!” Mi masaa dimi aa: “Ndu bɛɛ a yooŋgoo o cho hunɔɔ ni.”
27 Mi wana mɛŋgɛlaa dimi aa: “Po tase ya che wo, wana che ndu kiltaŋ pɛ aa Ahimaasi po Sadɔki wo ni.” Okoŋ mi masaa dimi aa: “Wana kɛndɔɔ o cho ni, nduyɛ a yooŋgu kɛndɔɔ o cho hunɔɔ ni.”
28 Mɛɛ Ahimaasi sɔɔŋguu masaa ikɛi, mbo dimul ndu aa: “Nyɛ o nyɛ bɛnda!” Okoŋ, mbo tunduŋ masaa lachi, mbo dimi aa: “Maa Chɛhowa Mɛlɛka numndo sɔla saŋgalaa, masanɔ nuu, kanifuule puaa simul numnda kpou, o mal num nda o ba!”
29 Kɛ mi masaa nyuna ndu aa: “Baa sɔɔŋ cho pa ŋ kɛndɛ a Abisalɔŋ?” Okoŋ mi Ahimaasi muli aa: “Teleŋ Chowaabi vem buɛi numndo o pilɔɔ a ya buɛi numndo wo, mi tuɛi wooluŋ wooluŋ bɛndoo, kɛ I sina nyɛ wa yɔŋnɔŋndo wo le.”
30 Mi masaa dimul ndu aa: “Hiouwɔ, ma sim nanuŋ.” Okoŋ, mbo hiau mbo kɔ sim.
31 Okoŋ kɔɔli, mi Kusaitiinɔɔ bɛɛ fuuluu mbo dimi aa: “Masanɔ nuu, yandii yaŋ nilaŋ o yooŋgu ya chuu num hoo wo: Chɛhowa kelu hau yamɛi le num, nduyɛ mbo piŋi num wanaa simul numnda kpou o ba.”
32 Kɛ mi masaa nyuna po Kusaitiinɔɔ aa: “Baa sɔɔŋ cho pa ŋ kɛndɛ a Abisalɔŋ?” Mi po Kusaitiinɔɔ muli aa: “Maa yaamɔɔwaa masanɔ nuu kpou vɛlɛ a wanaa simul num le num nyɛpalaa tusioo choo wa simnuŋ maa po koŋ!”
33 Mi suɛi hei tɛɛmbuu masaa kɔllo tau. Le hei, mbo hel o lumui wa o yindɔɔ o dio kpakioo choo wo mbo chaŋ. O wa kɔlaŋ a chaŋndo mbo dimi aa: “Kpokoo ya po nuu Abisalɔŋ, ee ya po nuu, oo ya po nuu Abisalɔŋ! Te ya koni yaa vi ni po nuu, oo ya po nuu Abisalɔŋ, ee ya po nuu!”
