Saamiɛɛ Diiŋ Ndɔɔ 19:1-43
19 Ma dimul Chowaabi aa: “Masaa cho chaŋndo nduyɛ mbo wa mɔnɛi biyɔɔ tau le Abisalɔŋ.”
2 Mɛɛ puaa chɔuwa kpou tuei maa masaa cho chaŋndo kpeekpei le po ndɔɔ, mi nyaale nda wa o paale leŋ choo le batiuwaa nda sɔla wo siŋgaŋ a mɔnɛi.
3 O paale leŋ choo, mi puaa chɔuwa miiŋgu chiee a meiyaa doŋ, mɛɛ waŋnda nyaanuŋ nuaa chɔuwo ma wa miiŋgoo a siɔmbulaŋ yɛ.
4 Mi masaa kumbu hɔlaa nduaa, nduyɛ o wa tuŋ hiouwɔɔ lachi a chaŋndo choo choo kpeleŋ mbo dimi aa: “Kpokoo ya po nuu Abisalɔŋ, ee ya Abisalɔŋ po nuu, oo ya po nuu!”
5 Okoŋ, mi Chowaabi luɛi chiɛiniŋ naa masaa chua. Mbo dimul ndu aa: “Buɛiyaa num aa piŋi hau yoomu numndo, yoomula puaa numnda, yoomula chuaa num aa laanduaa, yoomula laandaa numnda, vɛlɛ a yoomula laandaa num aa pɔmbuaa wa kpou, a tusi nda hau siɔmbulaŋ.
6 A kaala wanaa tul num leyɛ wa, nduyɛ ma tul wanaa kaala numnda leyɛ. A chɔm hau kpendekele maa wanaa ŋ kɛsi puaa chɔuwaa numnda bolleŋ nda, a buɛiyaa numnda cho nyɛ o nyɛ num o hɔl te. Kanifuule, I laalaŋ kɛsɛ maa yeemɛi numnde wa ni mi Abisalɔŋ ndoo lo hau yoomu, nduyɛ mi naa tuaa kpou naŋ vi.
7 I mɛnaŋ po o Chɛhowa lo maa, te a cheŋ ma fula ma kɔ soo o buɛiyaa numnda lo le, nanuŋ a dɔɔ, wana o wana cho wa a num latulu le. Nduyɛ, keŋ hiau niŋ lewɔu a sɔɔŋ palaŋ kɛ kɛ kei num choo chɔŋ o feleŋgɔyɛi numnde niŋ, haaa mbo huŋ bii a hau.”
8 Okoŋ, mi masaa chaŋ mbo kɔ chal o dio kpaki chioo. Ma dimul waŋnda kpou aa: “Masaa cho suŋ suŋ ichali o dio kpaki chioo.” Mi nda kpou kɔ chuuŋgiaŋ masaa lachi.
Kɛ mi Isɔluɛiya nyaanuŋ, nduyɛ mi wana o wana miiŋguŋ o ndu lo.
9 Waŋnda o kaalaŋ niŋ Isɔluɛi kpou wa suukaŋndo ndapila tɛɛŋ, ma dimi aa: “Masaa Deeve piŋi naa yaamɔɔwaa naa o ba ni, nduyɛ mbo piŋi naa Filitiaŋnda o ba. Kɛ suŋ suŋ, o mal lɛŋndeŋ mbo nyaanuŋ le Abisalɔŋ.
10 Abisalɔŋ yɛ, wana naŋ pɔya le mbo wa naa choo masa wo vi o chɔuwo. Mɛɛ le yɛɛnɛ ŋ cho nyɛ o nyɛ tosa le miŋ miŋgi masaa nanuŋ te?”
11 Mi Masaa Deeve yɔŋ yooŋgoo hoo o Sadɔki a o Abiaata lo, wanaa soliaa lasalaa aa: “La soo o waŋ banaa Chuda lo, mi la dimul nda aa, ‘I lo o chiɛi nuu mi tuɛi nyɛ waŋnda Isɔluɛi kpou kɛɛsiaa le tosaa wo. Mɛɛ le yɛɛnɛ nya yeema yɛ waa wanaa mɛɛlaa le masaa miŋgioo o chiɛi ndɔ lemasaa niŋ?
12 Wanayaŋ nuŋ nya cho ni, nduyɛ kooma piliaŋ naŋ cho ni. Le yɛɛnɛ nya yeema yɛ waa wanaa mɛɛlaa le masaa miŋgioo pila?’
13 La dimul vɛlɛ Amasa aa, ‘Baa o cho kooma piliaŋ te naŋ cho naa num te? Chɔŋ hau kɔ kɛ, num cho miiŋgu masa puaa niaa chɔuwa ni o foofo Chowaabi wo. Te I tosa keŋ te, Mɛlɛka tusi ya nyɛpalaa bɛndoo choo.’”
14 Mi Deeve muli kɔlta puaa o Chuda niŋ kpou o ndu lo. Okoŋ ma yɔŋ yooŋgoo o ndu lo aa: “Num a buɛiyaa numnda kpou la miiŋgu nanuŋ.”
15 Mi masaa bii nɛiyo le miiŋgoo, okoŋ mbo fuuluu o Pioo Chɔɔdaŋ. Mi waŋnda Chuda huŋ ndu lachi Kikaa, le ma liila ndu mbo taŋ Pioo Chɔɔdaŋ.
16 Mi Simɛi, po Kiluaa wo, wana waa Bahuluim, fulaa o yuŋgu Bɛŋjamiŋ ndo choo bɛɛ tual puaa Chuda kɔɔli, le Masaa Deeve komallo.
17 Nduyɛ puaa 1,000, fulaa o yuŋgu Bɛŋjamiŋ ndo choo wa a ndu latulu. Mi Saiba, wana wa chiɛi Sɔɔ wo bolleŋ ndo bɛɛ mal a puaa nduaa 15 vɛlɛ a buɛiyaa nduaa 20 le kɔlaŋ o Pioo Chɔɔdaŋ, masaa Deeve lachi.
18 Mbo* taŋ pioo le mbo kɔ huŋ a masaa vɛlɛ a yuŋgu ndɔɔ, nduyɛ mbo tosa nyɛ o nyɛ o nɔla le mbo nɛŋi ndu kɔllo. Kɛ mɛɛ masaa Deeve hiŋ le Pioo Chɔɔdaŋ taŋɔɔ, mi Simɛi po Kiluaa wo del ndu o labɛŋguniŋ.
19 Mbo dimul masaa aa: “Suɛi wɔɔŋii ya buɛi numndo tosa o paale ŋ wa fulaa Chulusalɛm ndeŋ choo ve, bii ya buɛi numndo tɔɔyaŋ nduyɛ ma loonuŋ a ndi le masanɔ nuu. Maa masaa kɛsiŋ ndi o kɔl te fɔ!
20 Kanifuule, I sina kɛsɛ maa I tosa hakioo. Lelaŋ hau, o yuŋgu Choosɛ wo niŋ kpou, ya cho wana tasoo ni le hunɔɔ masa nuu lachi.”
21 O lepilɛ niŋ kpe, mi Abisiaa, po Sɛluiya wo dimi aa: “Simɛi nɔ mbo sɔla piɔmndo le hei, kanifuule o yiei wana Chɛhowa pɔya wo.”
22 Kɛ mi Deeve dimi aa: “Nya puaa Sɛluiya wa, o cho suɛi nya le cho hei le. Le yɛɛnɛ mi la simul nyɛ ya kɛɛsiaa le tosaa wo? Wana o wana nɔ mbo sɔla hau piɔmndo o Isɔluɛi niŋ te, kanifuule I sina niŋ kɛsɛ maa ya cho niŋ masaa o Isɔluɛi niŋ ni.”
23 Okoŋ mi masaa dimul Simɛi aa: “A cho wu le.” Nduyɛ mbo chuel ndu buŋgɛi.
24 Mi Mɛfibosiɛɛ, po mama Sɔɔ wo bɛɛ kua masaa lachi. Chɔŋ a paale masaa mal Chulusalɛm ndeŋ haaa mbo miiŋgu o kɔl nyuloo niŋ, Mɛfibosiɛɛ pulu ŋpelu le, o sendi isiɛi le, kɛlɛŋgaa niŋ te mbo tɔɔ nyɛla wa ndu lekɔɔ laŋ.
25 Mɛɛ Mɛfibosiɛɛ hiŋ Chulusalɛm le masaa chɔɔ, mi masaa nyuna ndu aa: “Mɛfibosiɛɛ, vɛ a kue a ya latulu le?”
26 Okoŋ mbo muli aa: “Masanɔ nuu, buɛi nuu hui ya ni. Numpila sina maa namtaa ya cho ni. Lelaŋ mi ya buɛi numndo dimul ndu aa, ‘Bɛɛndial la sofɛlɛ nuu mi hel lechoo, okoŋ mi kuɛ a masaa latulu.’
27 Kɛ mbo huŋ tɛɛmbuu diola nilaŋ naa num chua. Num masanɔ nuu, a cho ko maa maalikɛinɔ Mɛlɛka tonyaa. Lelaŋ, tosa nyɛ o nyɛ bɛnda num o hɔl.
28 Masanɔ nuu ndoo tiuba mbo diu diu wanaa cho o yuŋgu finya nuu niŋnda kpou. Kɛ a koŋ kpou, ma chua ya, ma kɛsi ya o wanaa dia nyɛdiaa o tibii* numndo choo wa tɛɛŋ. Yɛɛ cheleŋ kpeekpei ya nɔ yɛ vɛlɛ mi nyuna masanɔ nuu le ndu?”
29 Okoŋ, mi masaa dimul ndu aa: “O wa lende. Nyɛ ŋ dimi wo cho tuuleŋ. I chii kɛɛsiaa maa la nɔ mi la piɔuwaŋ yondoo tɛɛŋ nya Saiba.”
30 Mi Mɛfibosiɛɛ dimul masaa aa: “Mɛɛ o chua kpou. Miiŋgu masanɔ nuu miiŋgu o chiɛi ndɔ lemasaa niŋ o kɔl nyulu niŋndo bɛɛ tuŋ nɛŋi ya kɔllo.”
31 Okoŋ kɔɔli, mi Baasilai, wana waa Kiliaadi chaŋ Lɔkilim mbo kua o Pioo Chɔɔdaŋ le masaa liilaa.
32 Baasilai ndoo yuuwa niŋ kudɛɛ, nduyɛ wɔsilaŋ 80 ndoo nɔ ni. Teleŋ masaa wa Mahanɛm ndo, ndu ndoo ke ndu nyɛdiaa ni, kanifuule wana sulaa pila o wa ni.
33 Okoŋ mi masaa dimul Baasilai aa: “Ŋ taŋ latulu, mi kɔ manda num.”
34 Kɛ mi Baasilai dimul masaa aa: “Ya cho niŋ hoo o sɛiyo hɔlndɔ wo kua vɛlɛ latulu a masaa Chulusalɛm ni?
35 I cho niŋ hau wɔsilaŋ 80. Baa I nɔla lɛ pa mi sina teŋgeŋndo o kɛndɔɔ tɛɛŋ a o wɔɔŋndo? O yɔŋ bɛɛ mi de nyɛdiaa ɔɔ mi kol muɛiyaŋ, baa ya buɛi numndo nɔla lɛ pa mi sina yeela ndɔɔ? Puaa a waŋ laanduaa wa bɛɛ chondoŋ solioo, baa I nɔla lɛ pa mi tuei muŋ? Mɛɛ le yɛɛnɛ mi ya buɛi numndo simnuŋ vɛlɛ kalaŋ cheleŋ le num masanɔ nuu?
36 Liila ya buɛi numndo liila num hoo o Pioo Chɔɔdaŋ ndo bɛɛ cho letuu. Baa I nɔ pa mi sɔla fanda waa nuaa masaa o ba?
37 Lelaŋ a yandii, chɛl la mi kɔ wu o ya lo chiee, naa nda kumbu finya nuu a kala nuu wa. Kɛ a che buɛi numndo Chimiham. La taŋ latulu nya ndu masanɔ nuu, nduyɛ ma tosal ndu nyɛ o nyɛ ŋ yiyaŋ pɛ maa o bɛnda.”
38 Okoŋ mi masaa dimul ndu aa: “Chimiham cho lakɔ a ya latulu. Nduyɛ, I cho ndu tosal nyɛ o nyɛ ŋ yiyaŋ pɛ maa o bɛnda le num. Nyɛ o nyɛ ŋ nyuna ya pɛ le ndu, I cho ndu tosal.”
39 Mi waŋnda kpou kandu Chɔɔdaŋ ndaŋ taŋɔɔ. Mɛɛ masaa hiŋ le taŋɔɔ, mbo sɔsa Baasilai kuuwo, nduyɛ mbo duau ndu sala. Okoŋ, mi Baasilai miiŋguŋ o ndu lo.
40 Mɛɛ masaa taŋ le kɔlaŋ Kikaa, mi Chimiham bɛɛ taŋ a ndu latulu. Mi waŋnda Chuda kpou a waŋnda Isɔluɛi tɛndaa tɛɛŋ tɛɛŋguu masaa leeloo.
41 Mi puaa Isɔluɛiya a piliaa sɔɔŋguu masaa ikɛi, ma dimul ndu aa: “Le yɛɛnɛ mi puaapiliaa naa Chuda chiimbuu num masa naa, ma chua yuŋgu numndo, vɛlɛ a puaa cho a num latulu wa kpou, ma tɛɛŋguu nya Chɔɔdaŋ ndaŋ sɔɔsɔɔ?”
42 Mi puaa Chuda kpou mulul puaa Isɔluɛi aa: “Kanifuule, wanayɛi naŋ cho naa masaa waa ni. Le yɛɛnɛ mi la dɔɔnuŋ tumbe le hei? Baa nyɛdiaa masaa ke naa ni miŋ dia, ɔɔ baa nyɔɔŋ o piɔu naa ni?”
43 Kɛ mi puaa Isɔluɛi mulul puaa Chuda aa: “Naŋ cho kaalaŋ tɔ. Lelaŋ, naŋ hiou Deeve nɔ poloŋ a nya. Mɛɛ le sabu yɛɛ nya chua yɛ naa chɔdɔ? Baa o cho naa le naŋ nɔ miŋ wa wanaa tasiaa le hunɔɔ a masa naa le?” Kɛ mi puaa Chuda hiau puaa Isɔluɛi a sondo.
