Saamiɛɛ Diiŋ Ndɔɔ 20:1-26
20 Wana mɛliaa ŋsɔɔ pilɛ wa diolaŋ aa Siɛba, po Bikilai yo, fulaa o yuŋgu Bɛŋjamiŋ ndo choo. Mbo hɔŋ buloo, okoŋ mbo dimi aa: “Ŋ heuba a Deeve le, nduyɛ po Chɛɛse wo nɔ nyɛ o nyɛ le naa le. Lelaŋ nya waŋnda Isɔluɛi, wana o wana miiŋguŋ o mɛlɛkaa nduaa lo.”*
2 Okoŋ mi puaa Isɔluɛi kpou faŋaŋ Deeve kɔɔli, ma tual Siɛba, po Bikilai yo kɔɔli. Kɛ puaa Chuda feŋaŋ masa ndaa kɔɔli le. A lo ndu liilaa chɔŋ Chɔɔdaŋ haaa ma fuuluu Chulusalɛm.
3 Mɛɛ Deeve fuuluu o chiɛi ndɔɔ* Chulusalɛm, mbo chua laanduaa pɔmbuaa o mɛi le waa chiɛi lemasaa hɔlteŋ nda, mbo luei nda chiɛiniŋ, a wa ŋwaŋ tɔ. Okoŋ, mbo handu puaa le ma wa nda hɔlteŋ choo. O wa nda nyɛdiaa kioo, kɛ paale pilɛ bɛɛ o hiviŋ lɛ nda kɔɔli le. A lo a kindaa chiɛiniŋ haaa ma chuu wu. Mi che bɛɛ pɔnɔ nda wa yoomu, kɛ a wa naŋ chaa wanaa vii piaanduaa wa ni.
4 Okoŋ mi masaa dimul Amasa aa: “Dimul puaa Chuda le ma chuuŋgiaŋ nanuŋ o palɛi i yaa bɛŋgu, nduyɛ num bɛɛ nɔ ma wa nanuŋ.”
5 Okoŋ mi Amasa kɔ veelu puaa Chuda. Kɛ o hiŋ a teleŋ ndoo nɔ le hunɔɔ wo le.
6 Mi Deeve dimul Abisiaa aa: “Siɛba, po Bikilai yo cho naa nyɛpalaa tusi choo mbo hiou bɛɛ mɛɛ Abisalɔm tosa yɛ. Lelaŋ, chua buɛiyaa masanɔ numndo ma tisa ndu kɔɔli, yɔŋii o hiɔluŋ naa mbo kɔ vioŋnuŋ o chieeŋ nɔ kpakila kala kalalaŋ ndoŋ niŋ.”
7 Okoŋ mi puaa Chowaabi wa, Kɛluitaitiiya, Pɛlɛtaitiiya, a puaa kpaayaa bɛnduaa kpou tisa ndu kɔɔli. Ma mal Chulusalɛm, ma tisa Siɛba, po Bikilai yo kɔɔli.
8 Mɛɛ nda fuuluu o pou bɛndoo Kibiɔŋ ikɛi, mi Amasa komal nda. Nyɛla chɔulaŋ la wa Chowaabi lekɔɔ, nduyɛ muɛi faŋnde wa ndu i sayiaŋ o chaŋ o boo niŋ. Mɛɛ o sɔɔŋguu Amasa ikɛi, mi muɛi del lɛŋ.
9 Mi Chowaabi nyuna Amasa aa: “A cho pa kɛndɛ chaaŋ nuu?” Okoŋ, mi Chowaabi saa Amasa siɛiye a ba kɛndɔɔ naŋ chaa kuuwo ndoo yeema le ndu sɔsaa ni.
10 Muɛi wa Chowaabi o ba, kɛ Amasa ve kɔl te, mi Chowaabi chuku ndu chollo a ndi, mi puloŋ fula miŋ huluŋ lɛŋ. Le pilɛ kpe o chuku ndu ni mbo wu, o peelu lediiŋ te. Okoŋ, mi Chowaabi nda Abisiaa pɔmbɔ ndɔ tisa Siɛba, po Bikilai yo kɔɔli.
11 Mi puaa Chowaabi wa o pilɛ sim Amasa ikɛi mbo wa dimioo aa: “Wanaa cho kumbuii Chowaabi ve a Deeve wa kpou, la tol Chowaabi kɔɔli!”
12 A teleŋ koŋ kpou, Amasa wa lau lauwo o nɛi kɔllo o kooma nduaŋ niŋ. Mɛɛ poo hoo che maa waŋnda kpou cho simndaŋ le dialuŋ Amasa woŋ tofaa, mbo faŋa muŋ o nɛi kɔllo, mbo kua a muŋ yondoo niŋ. Okoŋ, mbo kuumbuu domaa o muŋ choo, kanifuule mbo cha maa wanaa wa hiouwɔɔ wa kpou wa simndaŋ le ndu tofaa.
13 Mɛɛ o faŋa ndu o nɛi, mi puaa kpou tual Chowaabi kɔɔli ma tisa Siɛba po Bikilai yo kɔɔli.
14 Mi Siɛba kei o kaalaŋ o Isɔluɛi niŋ kpou, mbo kua Ebɛɛ o Bɛti-maaka niŋ. Mi Bikilaitiiya chuuŋgiaŋ naapilɛ, mi nda bɛɛ tisa ndu kɔɔli.
15 Mɛɛ Chowaabi nda puaa nduaa fuuluu Ebɛɛ o Bɛti-maaka niŋ, ma luei chioo o piŋndo niŋ le Siɛba biyɔɔ. Chioo hoo wa o balaa a kpaki kala kalaa. Okoŋ, mi Chowaabi nda puaa nduaa kpou kandu kpakioo hoo touwɔɔ le mbo komba.
16 Mi wana lanɔ taasioo o chioo niŋ veelu choo choo kpeleŋ aa: “Puaa sei, la yaŋ ndɔ ya nilaŋ! A yandii, la veelullɔ ya Chowaabi mbo hiŋ nanuŋ mi soo o ndu lo.”
17 Okoŋ mi Chowaabi sɔɔŋguu ndu ikɛi. Mi wana lanɔɔ hoo nyuna ndu aa: “Num cho Chowaabi ni?” Mbo muli aa: “Ei.” Okoŋ mi chuaa dimul ndu aa: “Yaŋ nilaŋ o nyɛ ya buɛi numndo cho num dimullo wo.” Mi Chowaabi dimul ndu aa: “Soo, I cho num lani.”
18 Mbo hiau lachi a suɛi aa: “Nuaa waŋnda ndaa dimi paandu ni aa, ‘A kɔ nyuna le nɛi chɔmaa o chioo Ebɛɛ niŋ, bahawɛi ndaa cho fula.’
19 Ya sim lewundu le wanaa kɔl nyuluaa a wanaa sakpuaa o Isɔluɛi niŋ ni. A cho kindiŋndo le ma tɛɛmbuu chiee cho maa kala chua o Isɔluɛi niŋndo. Le yɛɛnɛ ŋ yeema yɛ ma tɛɛmbuu* nyɛm kɛŋ Chɛhowa woŋ?”
20 Mi Chowaabi muli aa: “Keŋ del la bɛɛ pɛŋ o kɔl le mi tɛɛmbuu ndu le.
21 Pesiŋ bɛɛ I nɔla mi tosa keŋ te. Kɛ po pilɛ diolaŋ aa Siɛba, po Bikilai yo, fulaa o tanda ŋpemboo Ifiluem, simul Masaa Deeve ni. Te la mal la dɔɔ pɛ poo hoo o ba, I faŋaŋ chiee nyaa kɔɔli.” Okoŋ mi chuaa dimul Chowaabi aa: “Chumndɔ! Ŋ cho num bolle ndɔleŋ wuulul o kpakioo kɔɔli!”
22 Mi chuaa hoo kua chɔ chɔ mbo kɔ dounuŋ waŋnda kpou kona. Okoŋ, ma kialu Siɛba, po Bikilai yo bolleŋ ma wuulul Chowaabi. Okoŋ kɔɔli mi Chowaabi hɔŋ buloo, mi puaa wa a ndu latulu wa kpou puusiaŋ ma mal chioo. Mi wana o wana miiŋguŋ o ndu lo, nduyɛ mi Chowaabi bɛɛ miiŋguŋ Chulusalɛm o masaa lo.
23 Chowaabi wa niŋ puaa chɔuwa o Isɔluɛi niŋ kpou bolleŋ ni. Bɛnaya, po Chɛhoyada wo wa Kɛluitaitiiya a Pɛlɛtaitiiya bolleŋ ni.
24 Adoluam wa wanaa masaa siiŋguu chiaa le waltaŋ tosaa wa bolleŋ ni, nduyɛ Chɛhosiafati, po Ahiludi wo wa wana kɛsiaa lakonaa ni.
25 Siɛva wa wana poonyiaa ni, nduyɛ Sadɔki nda Abiaata wa wanaa soliaa lasalaa ni.
26 Mi Ilua, Chaluaitiinɔɔ simnuŋ wana bɛndoo* le Deeve.
Tɛɛsiaalaŋ
^ Ɔɔ naapum, “o tɛndiila ndɔlaŋ niŋ.”
^ Ɔɔ “chiɛi ndɔ lemasaa.”
^ Hibuluiye, “ma mel.”
^ Hibuluiye, “simnuŋ wana soliaa lasalaa.”
