Saamiɛɛ Diiŋ Ndɔɔ 22:1-51
22 Mɛɛ Chɛhowa piŋi Deeve yaamɔɔwaa nduaa kpou o ba vɛlɛ a Sɔɔ, mbo soli chondei hei o Chɛhowa lo.
2 Mbo dimi aa:
“Chɛhowa cho pou kpoowa nuu a naa niaa viaŋnaŋnda ni, nduyɛ ndu cho wana piŋi ya wo ni.
3 Mɛlɛka nuu cho pou kpoowa ya viaŋnuŋ ndo ni,
Ndu cho boo chɔu manda ya wo a lee* piŋi ya wo* ni, naa niaa viaŋnaŋaa kala kalaa.
Ndu cho fondaŋ ya nyaanuŋ ndo ni, wana ni piŋiaa. Ndu piŋi ya wanaa lasɔŋguaa o ba ni.
4 I nyuna Chɛhowa le ya malaa, wana bɛnda mbo sɔla saŋgalaa wo,
Nduyɛ, I cho pioŋɔɔ sɔla yaamɔɔwaa niaa o ba.
5 Piɔmndo ndoo balu ya niŋ silɔ maa letindi.
Puaa fonduaa cho maa mɛŋma hunaa wa luei ya siooŋnde.
6 Mi yuei Sɛiyo* pinda pindaŋ ya.
Nduyɛ mi piɔmndo yeŋ ya yaŋɔɔleŋ.
7 I wa o nyɛpalaa niŋ mi nyuna Chɛhowa le malaa,
I wa hiouwɔɔ lachi a Mɛlɛka nuu nyunaa le malaa.
O lo o chiɛi ndɔɔ niŋ mbo tuɛi ya diom,
Nduyɛ mbo tuɛi chaŋ ya wa o ndu lo le malaa wo.
8 Mi lɛŋndeŋ le kandu hiilɔŋndo woku woku.
Mi chiiyuŋ choo choo sim choo woŋ bɛɛ nyiiya.
Miŋ nyiiya kpa kpa le mɛɛ o dɔɔnuŋ tumbe yɛ.
9 Mi kumnde fula ndu o lamiliŋ,
Nduyɛ mi yiŋnde wule wule bɛnduleŋ le fula ndu o sondo.
Dɛŋgultaŋ la wa ndu biyɔɔ lachi.
10 Mɛɛ o wa tolɔɔ, mbo tosa mi choo choo tunduŋ,
Nduyɛ nyumma kpiŋgbima bɛnduaŋ ma wa ndu o peloŋ bɛŋgu.
11 O wa ichali chɛlɔbiinɔɔ o kɔɔ, mbo wa hunɔɔ o hueiye niŋ.
Maalikɛinɔɔ wa hunɔɔ a ndu o kumbaŋnda ndɔlaŋ choo.
12 Mbo tosa mi nyumndaŋ ma balu ndu silɔ maa tɛndii,
O mɛŋma piimiɛiyaŋ niŋ a yumbu yumbu ikpuŋgbaa.
13 Taŋndaŋ ma wa ndu deŋioo lachi, mi dɛŋgultaŋ la fula.
14 Mi Chɛhowa kandu deŋioo o choo choo niŋ maa letaŋ.
Mi Mɛlɛka Kpaaya Kpou Kpou Wo tosa mi waŋnda tuɛi diom ndɔɔ.
15 Mbo vii vii chiŋɔma nduaŋ, mi ma sɛŋi yaamɔɔwaa nduaa.
Mɛɛ nyɛ ŋualalɛiyo kiolu, mi kɔltaŋ la laasiaŋ nda niŋ.
16 Mi lɛŋndeŋ o pee mɛŋma ihɛllo bɛŋgu fula kpendekele.
Mɛɛ Chɛhowa dɔɔnuŋ tumbe, mi chiiyuŋ chieeŋndo chal choo woŋ fula kpendekele,
A hɔŋ bɛndu hueiyii fula ndu o lamiliŋ nde hɔŋ ndo.
17 O lo o choo choo niŋ mbo siɛndi baa mbo saa ya,
Okoŋ mbo soli ya o mɛŋma yiŋgilɛiyaŋ niŋ.
18 Mbo piŋi ya yaamɔɔnɔ ni dialuŋ kalaa o ba,
Mbo piŋi ya wanaa ndaa tul la leyɛ, nduyɛ ma nɔ kpaayaa ma hiau ya wa o ba.
19 Ma simul la o paale nyɛpalaa komal la leŋ choo,
Kɛ Chɛhowa wa wana ni malaa ni.
20 Mbo kua a ya o fondaŋ nyɛ o nyɛ yɔŋnuŋ ya le wo.
Mbo piŋi ya le mɛɛ ndoo hini kɔl a ya yɛ.
21 Chɛhowa fanda ya le mɛɛ ya tosa sɔɔŋ sakpo ndu o hɔl lɛ.
O fanda ya le mɛɛ bala nila cho o suɛi wɔɔŋ* niŋ te yɛ.
22 I cho hiouwɔɔ lachi a sawala Chɛhowa laŋ biyɔɔ,
I mel Mɛlɛka nuu le, I tosa wɔ suɛi wɔɔŋ waa lende le.
23 I kɛsiŋ yamaŋ ndɔŋ o kialu woŋ kpou o kɔl.
I feŋaŋ o sawala ndɔlaŋ choo le.
24 I cho tosa o bii ya tɔɔyaŋ le nyɛ o nyɛ le,
Nduyɛ I cho ba wou o haki niŋ te.
25 Maa Chɛhowa fanda ya, le mɛɛ ya tosa sɔɔŋ sakpo ndu o hɔl lɛ,
Le mɛɛ bala nila cho o suɛi wɔɔŋ niŋ te yɛ.
26 Wana chɔm num lo lechoo wo wo, ndu ŋ chɔm lo lechoo wo ni.
Wana nɔ tɔɔyaŋ o tɔɔyaŋ te wo, a bii ndu tɔɔyaŋ te.
27 Wanaa cho sakpo wa, mi num bɛɛ wa sakpo a nda,
Kɛ wanaa kaŋgalaa nda nda, ma wa yekeŋ a nda.
28 Ma piŋi wanaa tusiaŋnda,
Kɛ wanaa heelaŋnda nda, a yeema ma che nda le, nduyɛ ma tusi nda siɔmbulaŋ.
29 Oo Chɛhowa, num cho lambui nuu ni.
Te I wa pɛ o nyumndaŋ niŋ, Chɛhowa tosa ni mi che nyɛ teŋgaa.
30 A mala numndo, I nɔla mi sɔŋga a wanaa del waŋnda choo le nyɛm ndaŋ poondiaa wa.
A kpaaya Mɛlɛkaa, I tiuba mi huulu kpakioo.
31 Sɔɔŋ Mɛlɛka tonyaa tosa woŋ choŋnuŋ walaŋ.
Nyɛ Chɛhowa dimi wo cho sakpo.*
Boo chɔuwo o cho ni, le wana o wana nyaanuŋ o ndu lo le vioŋnɔŋndo.
32 Mɛlɛka cheleŋ kuɛɛ cho yɛ o Chɛhowa kɔɔli?
Nduyɛ pou kpoowa cheleŋ kuɛɛ cho yɛ o Mɛlɛka naa kɔɔli?
33 Mɛlɛka tonyaa cho fondaŋ kala kala ya viaŋnuŋ ndo ni,
O cho tosa mi nɛi nuu wa sakpo.
34 O tosa mi peluŋ nuŋ kiandu poŋ maa peluŋ kial.
O tosa mi sim o fondaŋnda filioŋndaŋ choo.
35 O pɛɛku bala nilaŋ le chɔuwo.
Bala nilaŋ la nɔla mi la tundu chiɔule chiliŋii siaŋɛi.*
36 A ke ya boo num chɔu piŋi ya wo,
Nduyɛ tusiŋ numndo tosa mi fula tɔɔ.
37 A kumbi nɛi ya kei choo wo wakpa.
Nduyɛ peluŋ nuŋ kpekesiaŋ te.
38 I cho yaamɔɔwaa niaa tisa kɔɔli, nduyɛ mi tɛɛmbuu nda.
Te I chii nda basɔɔ tɛɛ le, I miiŋgu le.
39 I cho yaamɔɔwaa niaa basɔɔ tɛɛ, mi chuii nda, a nɔla lɛ ma chɛŋ te.
A cho deli ya o peloŋ bɛŋgu.
40 A cho ya yoomuaŋ luei le sɔŋgɔɔ.
A cho tosa mi yaamɔɔwaa niaa deli o peluŋ nuŋ bɛŋgu.
41 A cho tosa mi yaamɔɔwaa niaa muliŋ ma nyaanuŋ ya.*
I cho wanaa tul la leyɛ wa kpou chii.*
42 Ma chaŋ le malaa, kɛ wana o wana piŋi nda le.
Ma chaŋ vɛlɛ pɛŋ o Chɛhowa lo, kɛ o mulul nda le.
43 I cho nda chuii ma simnuŋ mɛɛ chundoo wa nuaa lɛŋ yɛ.
I cho nda chuii, nduyɛ mi niɔu niɔu nda mɛɛ loolioo wa nuaa o nɛilaŋ yɛ.
44 A cho ya piŋi wanaa niaa nuuviaa ya biondɔŋndaŋ o ŋdial la o ba.
A cho ya manda le mi wa kaalaŋ kpou bolleŋ.
Nduyɛ wanaa ya sina bɛɛ le wa cho wa wallo le ya.
45 Wanaa lekaawa cho hunɔɔ ya nyiiya lachi a siooŋnde.
Nyɛ nda cho tueiyɔɔ a ya okɔɔ wo cho tosa ma diikuŋ ya.
46 Yoomuaŋ ma cho wanaa lekaawa fula po.
A cho wa fuuliaa o fondaŋnda ndala viaŋnaŋ ndaŋ ma huŋ a nyiiyaa.
47 Chɛhowa cho yoomu! Saŋgalaa cho le Pou Kpoowa nuu!
Maa Mɛlɛka, pou kpoowa piŋi ya wo sɔla saŋgalaa fɔ!
48 Mɛlɛka tonyaa cho wana miŋgi maa le ya wo ni.
O tosa mi waŋnda kpou wa ya o ba bɛŋgu.
49 Mbo piŋi ya yaamɔɔwaa niaa o ba.
Ma heelu ya choo choo pɔ, le wanaa chiŋalaŋ ya wa.
Ma piŋi ya wana kaala sɔŋgɔlaŋ ndo o ba.
50 Oo Chɛhowa, le saboo hoo, I cho num balikaa mel kaalaŋ kpou tɛɛŋ,
Nduyɛ I cho chondoŋ soli* le diola numndaŋ saŋgalaa.
51 Mbo piŋi masa ndɔɔ o nɛila kɔndɔfilta bɛndu niŋ.
Mbo chɔm wana o pɔya wo Deeve a chuauwaa nduaa mamaa,*
Kaala lo lechoo wo le teleŋ o teleŋ.”
Tɛɛsiaalaŋ
^ Tofa Tɛɛsiaa.
^ Ɔɔ “wana ni piŋiaa kpaaya bɛndoo.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Hibuluiye, “la cho la diandaa yɛ.”
^ Ɔɔ “keeku fɛlɛŋ o yiŋ.”
^ Ɔɔ “kapaa.”
^ Ɔɔ “a cho ya kɔɔla yaamɔɔwaa niaa chɔm.”
^ Hibuluiye, “mei doŋ.”
^ Ɔɔ “nyɛchaa lɔɔ.”
^ Hibuluiye, “kulle.”
