Saamiɛɛ Diiŋ Ndɔɔ 23:1-39
23 Diomnda mɛɛlaala Deeve dimi laŋ la cho laŋ ni:
“Ya Deeve, po Chɛɛse wo,
Wana Mɛlɛka tosa mbo sɔla tɔɔ wo,
Wana Mɛlɛka Chekɔpu wo pɔya wo,
Wana kaala chondoŋ Isɔluɛi solioo wo cho hoo suɛi ni.
2 Mi nyina Chɛhowa wo suaa naa ya chua,
Nduyɛ, diomnda ndɔlaŋ la wa o diɔɔmule nileŋ choo.
3 Mi Mɛlɛka Isɔluɛiya suaa.
Mi Pou Kpoowaa o Isɔluɛi niŋ dimul la aa:
‘Te wana cho waŋnda choo masaa wo sandu pɛ,
Nduyɛ mbo nɔ siooŋii Mɛlɛkɛi,
4 I wa ko mɛɛ paaleŋ le fula nuaa idii,
Yumbu yumbu kumbu leŋ te yɛ.
I wa ko mɛɛ nyɔɔ diandu nuaa wakee yɛ, te piɔɔ veŋgu pɛ.
Mbo tosa mi billo vil lɛŋ.’
5 Baa o cho nuaa le chiɛi nuu cho Mɛlɛka o hɔl te?
Kanifuule, o yii kpema cho le fɛɛŋ a fɛɛŋ ndo a ya.
Kpema cho o kɛɛsiaa nyɛkɛndɛi, nduyɛ mbo wa kpeekpeiyo o cho ni.
Kanifuule ndu sim le pioŋɔɔ nuu ni, vɛlɛ a nyɛ o nyɛ nɛŋi ya kɔllo.
Baa o cho le saboo hoo le o tosa mi yuŋgu nuu fula tɔɔ le?
6 Kɛ puaa fonduaa nda, a cho nda viouwɔɔ kpou, mɛɛ nda viau nuaa yɔɔŋ yɛ,
Kanifuule ŋ chueŋnuŋ a ba le.
7 Te waŋndo yeema pɛ le muŋ pilaŋndo,
Mɛɛ mbo nɔ chiliŋnde a ballo.
Nduyɛ, ŋ cho lo o fondaŋnda ndalaŋ ma lom muŋ chilikɔ.”
8 Diola puaa chɔuwaa kpaayaa bɛnduaa Deeve wa la cho laŋ ni: Choosɛbi-basiɛbɛti, Takimonaitiinɔɔ. Masa puaa chɔuwaa kpaayaa bɛnduaa a yaa o wa ni. Teleŋ pilɛ, mbo dii yaamɔɔwa 800 a bal ndɔɔ.
9 Wana diiŋ ndɔɔ wa Ɛlieesa ni, po Dodo wo. Dodo yɛ, finya ndɔ wa Ahohi ni. Ɛlieesa wa wana pilɛ o puaa yaawaa kpaayaa bɛnduaa Deeve wa tɛɛŋ, teleŋ nda simul Filitiaŋnda wo. Nduyɛ mɛɛ Filitiaŋnda chuuŋgiaŋ le sɔŋgɔɔ a nda, mi puaa Isɔluɛi nyaanuŋ.
10 Kɛ Ɛlieesa ndu nyeenuŋ te. Mbo hiau lachi a Filitiaŋnda diuwo haaa mi choŋgoo wu ndu doŋ, nduyɛ mi muɛi faŋnde hau ndu o ba. O paale leŋ choo, mi Chɛhowa tosa mbo diu Filitiaŋnda diuwo pila. Nduyɛ mi waŋnda miiŋgu ndu amakɔɔ, le nyɛm wanaa nda diu diu wa chɔuviaa.
11 Wana yaa ndɔɔ wa Siamaa ni, po Akii wo, wana waa Halaluati. Mi Filitiaŋnda chuuŋgiaŋ Lɛhi le sɔŋgɔɔ a Isɔluɛiya, naa kpele ŋkauwo wa wa. Kɛ mi waŋnda nyaanuŋ Filitiaŋnda.
12 Mi Siamaa sim o kpele koŋ tɛɛŋ, o chɛl mi Filitiaŋnda poonda ndu le. Mbo hiau lachi a nda diu diuwo. Mi Chɛhowa tosa mbo yam Filitiaŋnda.
13 O puaa 30 wa puaa chɔuwa bolleŋ nda tɛɛŋ, mi a yaa kua o pouwo naa Deeve wa o viaŋnaŋ o buuloo niŋ Adulam nda. A teleŋ koŋ, Filitiaŋnda wa kunda o dɔɔŋgɔɔ niŋ o Kpoloŋndo* Luɛfem.
14 A boondii keŋ, Deeve wa o vioŋnɔŋndo niŋ, mi puaa chɔuwaa Filitiaŋnda a tiŋ wa o dɔɔŋgɔɔ niŋ Bɛtilɛhɛm.
15 Okoŋ mi Deeve dimi aa: “Te yaa sɔla pɛ mɛŋma cho o sooŋ mamɛŋ cho o dio kpaki chioo Bɛtilɛhɛm ndo le kolɔɔ, nyɔɔ wa ya bɔɔ hɛnaŋ!”
16 Mi puaa chɔuwaa yaawaa kpaayaa bɛnduaa mal, ma kua o dɔɔŋgɔ Filitiaŋnda niŋ a kaka, okoŋ ma kɔ kɔndu mɛŋndaŋ o sooŋ mamɛŋ cho o dio kpaki chioo Bɛtilɛhɛm ndo, ma chuu Deeve le mbo kol. Kɛ mbo kɛɛ le maŋ kolɔɔ, nduyɛ mbo chuiŋi maŋ Chɛhowa lachi.
17 Mi Deeve dimi aa: “Oo Chɛhowa, kɔl del la bɛɛ pɛŋ le i waa nuaa tosa le. Baa o bɛnda pa mi kol kooma puaa luei haa yoomula ndalaŋ o kpundɔɔ niŋnda?” Le hei, mbo kɛɛ le maŋ kolɔɔ. Puaa chɔuwaa yaawaa kpaayaa bɛnduaa Deeve wa, sɔɔŋ nda tosa woŋ cho muŋ ni.
18 Abisiaa, bɛndoo Chowaabi, po Sɛluiya wo wa kunda wanaa yaa cheleŋ bolleŋ ni. A teleŋ pilɛ, mbo dii yaamɔɔwa 300 a bal ndɔɔ. Ndu bɛɛ, mi tɔɔ ndɔɔ tiu maa puaa yaawa.
19 Mi che bɛɛ Abisiaa ndoo hiou tɔɔ fula a puaa yaawa a piliaa o wa bolleŋ nda, kɛ o sɔla foofoo maa puaa yaawaa tasiaa le.
20 Bɛnaya, po Chɛhoyada wo wa wana kɔl simulaa, nduyɛ mbo tosa sɔɔŋ kɔndɔfiliŋ bɛndoŋ tau tau o Kabisɛɛ niŋ. Mbo dii puaa ŋiɔɔŋaa Aluɛɛ wa, wana waa Mowaabi. Nduyɛ, mbo tual o sooŋ mamɛŋndo niŋ a teleŋ mɔmndo wa chuchɔɔ tau wo, okoŋ mbo dii kpɔkuŋndo.*
21 Mbo dii vɛlɛ po Ichipiaŋnɔɔ, nduyɛ poo hoo wa o bɛndu heu. Mi che bɛɛ po Ichipiaŋnɔ koŋ ndoo nɔ ballo o ba, kɛ mbo kuel ndu a yɔmndo, mbo poonda ndu ballo o ba, okoŋ mbo dii ndu a bal ndɔɔ.
22 Sɔɔŋ Bɛnaya, po Chɛhoyada wo tosa woŋ cho muŋ ni. Nduyɛ ndu bɛɛ, mi tɔɔ ndɔɔ tiu maa puaa chɔuwaa yaawaa kpaayaa bɛnduaa.
23 Mi che bɛɛ ndu ndoo hiou tɔɔ fula o puaa chɔuwaa 30 wa tɛɛŋ, kɛ o sɔla foofoo maa puaa yaawa le. A koŋ kpou, mi Deeve siiŋguu ndu wana bɛndoo le puaa chɔuwaa manda ndu wa.
24 Asahɛɛ, pɔmbɔɔ Chowaabi wa puaa chɔuwaa 30 haa tɛɛŋ: Ɛlihanaŋ po Dodo wo, wana waa Bɛtilɛhɛm,
25 Siamaa wana waa Halɔdi, Ɛlika wana waa Halɔdi,
26 Hilɛɛsi, wana waa Palɛti, Ilua po Ikɛɛsi wo, wana waa Tɛkowa,
27 Abi-isa wana waa Anatɔti, Mɛbunai wana waa Husiaa,
28 Samɔŋ wana waa Ahohi, Mahalai wana waa Nɛtofa,
29 Hilɛdi po Bana wo, wana waa Nɛtofa, Itai po Luibai yo, wana waa Kibiya, fulaa o yuŋgu Bɛŋjamiŋ ndo choo,
30 Bɛnaya wana waa Piluatɔŋ, Hidai wana waa o kpoloŋndo* Kaasi,
31 Abi-abɔŋ wana waa Abati,* Asimavɛti wana waa Bahuluim,
32 Ɛliaaba wana waa Siaabɔŋ, puaa Chasiɛŋ nda, Chonataŋ,
33 Siamaa Halaluaitiinɔɔ, Ahayam po Sialuaa wo, Halaluaitiinɔɔ,
34 Ɛlifɛlɛti po Ahasibai yo, nduyɛ Ahasibai, finya ndɔ wa Maakati ni, Iliam po Ahitofɛɛ wo, wana waa Kilɔɔ,
35 Hɛsilo wana waa Kamɛɛ, Paalai wana waa Alueebiaa,
36 Ika po Netaŋ ndo, wana waa Sobaa, Bani wana waa Kaadi,
37 Silɛki wana waa Amɔŋ, Nahaluai wana waa Biaalɔti, wana biilul Chowaabi, po Sɛluiya wo wolɔɔla chɔulaŋ ndo,
38 Ilua wana waa Itiluai, Keluɛbi wana waa Itiluai,
39 a Yuulaya Hitaitiinɔɔ. A wa kpou kpou ŋwaŋ 37.
