Saamiɛɛ Diiŋ Ndɔɔ 5:1-25
5 Mɛɛ teleŋ tiŋ hiou, mi kaalaŋ o Isɔluɛi niŋ kpou kua naa Deeve chua Hɛbulɔŋ, ma dimul ndu aa: “Fallo, kooma piliaŋ kpe naŋ cho naa nyaa ni.
2 Boondii Sɔɔ wa naa choo masa ve, num wa Isɔluɛiya simndaŋ lachi ni le kɔlaŋ o chɔuwo.* Nduyɛ mi Chɛhowa dimul num aa: ‘Num cho wanaa niaa Isɔluɛiya manda ni, nduyɛ ma wa simlachinɔɔ le nda.’”
3 Mi waŋ banaa o Isɔluɛi niŋ kpou huŋ naa Masaa Deeve chua Hɛbulɔŋ, nduyɛ mbo yii kpemaa a nda loŋ Chɛhowa lachi. Okoŋ, ma pɔya Deeve le mbo wa masaa o Isɔluɛi niŋ.
4 Deeve wa wɔsilaŋ 30 mbo simnuŋ masaa, nduyɛ o wa o masaleŋ choo le wɔsilaŋ 40.
5 O chii wɔsilaŋ la 7 a paŋgoŋ 6 o masaleŋ choo Chuda o Hɛbulɔŋ niŋ. Nduyɛ wɔsilaŋ 33 o chii o masaleŋ choo Isɔluɛi a Chuda ni, o Chulusalɛm niŋ.
6 Mi Masaa Deeve nda laŋgbaa nduaa chaŋ le kɔlaŋ Chulusalɛm le ma kɔ chiŋalaŋ Chɛbusaitiiyaa wa o lɛŋndeŋ niŋnda. Mi Chɛbusaitiiya pɛɛsa Deeve, ma dimul ndu aa: “Fɛɛŋ bɛɛ a nɔla ma luɛi nanuŋ te! Wanaa sumɛiya a wanaa bɛvɛiya kɛsɛ bɛɛ nɔla ma tou num.” Ma yiyaŋ maa fɛɛŋ bɛɛ Deeve nɔla mbo bii chioo le.
7 Kɛ mi Deeve kɔ bii Saayɔŋ, chiee nda taŋgul a kpaki kala kalaa wo. Ndu nda veelu hau ni aa Chiee Deeve Wo.
8 Mi Deeve dimi o paale leŋ choo aa: “Wanaa cho lakɔ Chɛbusaitiiya chiŋalaŋ nda nɔ ma keeku o tɛɛŋgu mamɛŋndo niŋ, ma kɔ diu diu wanaa bɛvɛiya a wanaa sumɛiyaa ya tul haa leyɛ wa!” Le saboo hoo i cho i dimiaŋ nde ni aa: “Fɛɛŋ bɛɛ wanaa sumɛiya a wanaa bɛvɛiya luei o chiɛiyo hoo niŋ te.”
9 Okoŋ, mi Deeve kɔ kila chaltaŋ o chiee nɔ hoo kpaki kala kalaa wo niŋ. Nduyɛ ndaa veelu ndu aa* Chiee Deeve Wo. Mi Deeve kandu taŋgullo o bembelaŋ choo, a o fondaŋnda cheleŋ o chioo niŋ.
10 Mi Deeve hiau lachi a simnɔŋndo wana kpaaya bɛndu. Nduyɛ Chɛhowa, Mɛlɛka puaa chɔuwa* wa a ndu latulu.
11 Mi masaa Hiluam o Taaya niŋ yɔŋ waŋnda a yooŋgoo naa Deeve chua. Mbo yɔŋ vɛlɛ yɔmii sida ve, kaapindɛiya,* a mɛɛsinɛiya,* okoŋ ma kandu chiɛiyo* taŋgullo le Deeve.
12 Mi Deeve sina kɛsɛ maa Chɛhowa tosa mi masale o ke ndu Isɔluɛi leŋ le sim yi. Nduyɛ, mbo tosa mi masale ndɔleŋ le sɔla tɔɔ le sabu wanaa nduaa, Isɔluɛiya.
13 Mɛɛ Deeve faŋaŋ Hɛbulɔŋ mbo huŋ chal Chulusalɛm, mbo chɔɔlu laanduaa vɛlɛ a laanduaa pɔmbuaa chua tau. Nduyɛ ma chɔɔlu Deeve puaa a waŋ laanduaa vilul.
14 Chuauwaa nda vilul ndu Chulusalɛm nda cho haa ni: Siaamua, Siobabi, Netaŋ, Sɔlɔmɔŋ,
15 Ibihaa, Ɛlisuaa, Nifɛki, Chafiya,
16 Ɛlisiama, Ɛliaada, a Ɛlifɛlɛti.
17 Mɛɛ Filitiaŋnda tuei maa Deeve sɔla pɔyaa le waa masaa o Isɔluɛi niŋ, mi nda kpou chaŋ le ndu kɔlaŋ nuuviaa. Mɛɛ Deeve tuei a ndi okɔɔ, mbo kuaŋnuŋ o fondaŋ viaŋnaŋndo.
18 Okoŋ, mi Filitiaŋnda huŋ pɛŋgɛlaŋ lɛtɛu o Kpoloŋndo* Luɛfem.
19 Mi Deeve nyuna Chɛhowa aa: “Baa I kɔ chiŋalaŋ Filitiaŋnda? A cho nda malɔɔ ya o ba?” Mi Chɛhowa mulul Deeve aa: “Ei, kɔ. I cho Filitiaŋnda malɔɔ num o ba.”
20 Okoŋ mi Deeve kua Baal-pɛluasim, mbo kɔ diu diu nda loŋ. Mbo dimi aa: “Chɛhowa pɛl yaamɔɔwaa niaa ya lachi mɛɛ mɛŋndaŋ ma pial nuaa kpakioo yɛ.” Le saboo hoo o ke fondaŋ koŋ diolaŋ ni aa Baal-pɛluasim.
21 Mi Filitiaŋnda vii vii piɔmaa ndaa loŋ, okoŋ mi Deeve nda laŋgbaa nduaa chɔuviaa nda ma kuaŋnuŋ a nda.
22 Okoŋ kɔɔli, mi Filitiaŋnda huŋ pɛŋgɛlaŋ vɛlɛ lɛtɛu o Kpoloŋndo* Luɛfem.
23 Mi Deeve nyuna vɛlɛ Chɛhowa te o kɔ mbo kɔ sɔŋga a nda. Kɛ mbo dimi aa: “Kua nda o hɔl sanaa le. Kɛ kei nda amakɔɔ, okoŋ ma fulal nda o yɔmii bakaa ve, ma chiŋalaŋ nda a sɔŋgɔɔ.
24 Te a tuei pɛ bɔɔluuwo o yɔmii bakaa ve choo mɛɛ waŋnda wa nuaa kɔlaŋ yɛ, chɔŋ o lepilɛ niŋ kpe ma kuɛ. Kanifuule, ya Chɛhowa cho num wa koŋ kɔlaŋ lachi ni le puaa chɔuwaa Filitiaŋnda diuwo.”
25 Mi Deeve tosa mɛɛ Chɛhowa dimul ndu yɛ, nduyɛ mbo lo Filitiaŋnda diuwo chɔŋ Kiba haaa kɔ Kiisa.
Tɛɛsiaalaŋ
^ Hibuluiye, “Num wa fulaa a Isɔluɛiya ni nduyɛ ma miiŋgu a nda.”
^ Ɔɔ naapum, “mbo ke ndu diolaŋ aa.”
^ Koŋ cho ni, puaa chɔuwa o choo choo niŋ.
^ Ɔɔ “minisieeya.”
^ Ɔɔ “maasɔŋnda.”
^ Ɔɔ “chiɛi lemasaa.”
^ Ɔɔ “dɛŋgbɔɔ.”
^ Ɔɔ “dɛŋgbɔɔ.”
