Saamiɛɛ Diiŋ Ndɔɔ 6:1-23
6 Mi Deeve chuuŋgiaa vɛlɛ puaa chɔuwaa chaa sɔŋgɔɔ nyɛkɛndɛi o Isɔluɛi niŋnda 30,000.
2 Okoŋ, mi Deeve nda puaa nduaa chɔuwa kpou chaŋ ma kua Baale-chuda, le ma kɔ huŋ a Kɔfu Mɛlɛka tonyaa. Kɔfoo hoo waŋnda ndaa sim lachi ni le Chɛhowa, Mɛlɛka puaa chɔuwa, o cho ichali o kpeŋgbei* ndɔ lemasaa choo Chɛlɔbiiya choo wo* nyunaa le malaa.
3 Kɔfu Mɛlɛka tonyaa wa o chiɛi Abinadabi wo, nduyɛ o pembei choo chiɛiyo hoo wa ni. Mɛɛ nda kɔ chua ndu, ma kɛsi ndu o nyɛ viliaa lawolɔɔ sɛnɛi nda toosiaa wo niŋ le kɔlaŋ a ndu. Nduyɛ puaa Abinadabi wa, Yusaa nda Ahayo sim lachi ni ma wa kɔlaŋ a ndu.
4 Okoŋ ma faŋa Kɔfu Mɛlɛka tonyaa o chiɛi Abinadabi wo o pembei choo, ma kua a ndu. Nduyɛ Ahayo wa kɔlaŋ Kɔfoo lachi ni.
5 Deeve nda waŋnda Isɔluɛi kpou wa kpeŋjoo Chɛhowa lachi ma luaa nyɛm chaaŋ suu o suu. A wa lɔɔ nyɛm chaaŋ yɛ yɛŋ nda toosiaa a yɔmii chunipa ve woŋ, towalaŋ, nyɛm chaaŋ iyooŋ, dundula pɔmbɔlaŋ, chɛkɛlaŋ, a kumbula ŋchiliŋndaŋ.
6 Kɛ mɛɛ nda fuuluu o yasaba luaa ŋwitiiyo Nakɔŋ, mi nauwa kpekesiaa Kɔfu Mɛlɛka tonyaa mbo huŋ le delɔɔ. Okoŋ, mi Yusaa saa ndu.
7 Le hei, mi Chɛhowa, Mɛlɛka tonyaa duaunuŋ tumbe o kala kala a Yusaa. Nduyɛ mbo dii ndu Kɔfu koŋ ikɛi loŋ le nyɛ o tosa koŋ ndo, kanifuule o chɔm lebɛɛ le.
8 Kɛ mi Deeve tambu kɔl tau le mɛɛ Chɛhowa dɔɔnuŋ tumbe a Yusaa mbo dii ndu yɛ. Nduyɛ haaa a paale hauleŋ ndeŋ, fondaŋ koŋ nda veelu ni aa Pɛluɛsi-yusaa.*
9 Le hei, mi Deeve yɔŋ siooŋnde le Chɛhowa o paale leŋ choo. Mbo dimi aa: “Vɛɛnɛ Kɔfu Chɛhowa wo cho yɛ looku hunɔɔ o ya lo?”
10 Deeve ndoo nɔ lɛ iyeema kposoŋ le mi Kɔfu Chɛhowa wo kuɛ o ndu lo chiee le, koŋ cho ni, Chiee Deeve Wo. Kɛ mbo kua a ndu o chiɛi Obɛdi-idɔm ndo, wana waa Kaati.
11 Le paŋgoŋ ŋgaa, Kɔfu Chɛhowa wo wa o chiɛi Obɛdi-idɔm ndo niŋ, wana waa Kaati. Nduyɛ, mi Chɛhowa hiau lachi a Obɛdi-idɔm nda yuŋgu ndɔɔ kpou salaa dɔwɔɔ.
12 Okoŋ, mi konaa komal Masaa Deeve aa: “Chɛhowa dɔu yuŋgu Obɛdi-idɔm ndo sala a nyɛ o nyɛ o nɔ le mɛɛ Kɔfu Mɛlɛka tonyaa cho o ndu lo yɛ.” Le hei, mi Deeve kua le Kɔfu Mɛlɛka tonyaa chuaa o Obɛdi-idɔm ndo chiɛiniŋ, le mbo kuɛ a ndu o ndu Deeve lo chiee a kpeŋjoo.
13 Mɛɛ wanaa wa kɔlaŋ a Kɔfu Chɛhowa wo wa nɛi le ŋɔmpum, mbo soli nau towaa a chɔlu chelulɛi cheleŋ salaa.
14 Deeve wa mulu mulɔŋndo a yolaŋ kpeekpei Chɛhowa lachi, nduyɛ doma biŋgioo* wa ndu lekɔɔ.
15 Deeve nda Isɔluɛiya kpou wa kɔlaŋ a Kɔfu Chɛhowa wo. A wa deŋioo a nyaaloo kpeekpei ma hɔŋ bululaŋ.
16 Kɛ mɛɛ Kɔfu Chɛhowa wo fuuluu o Chiee Deeve Wo, mi Maikaa chua Sɔɔ wo tofa o wundɛiyo,* mbo cha Masaa Deeve huuloo mbo mulu muluŋ a yolaŋ Chɛhowa lachi. Okoŋ, mbo data ndu o kɔl ndɔɔ niŋ.
17 Ma kua a Kɔfu Chɛhowa wo o tɛndii Deeve ndoo toosiaa le ndu kɛsioo wo niŋ, nduyɛ ma kɛsi ndu o fondaŋ ndɔɔ. Okoŋ mi Deeve soli salala luamaa laŋ a salala kɔl nyulu laŋ Chɛhowa lachi.
18 Mɛɛ Deeve chii salala luamaa laŋ a salala kɔl nyulu laŋ soli, mbo duau waŋnda sala o diola Chɛhowa laŋ niŋ, Mɛlɛka puaa chɔuwa.
19 Okoŋ kɔɔli, wanaa faŋga bɛnduaa wa Isɔluɛi ya kpou, wana pɔnɔ ni, wana lanɔ ni, o kɛ kɛ mbo ke ndu beedii tiu tiuwo* kpuŋgbɛi i pilɛ, kato nda toosiaa a kɛmbɛŋ wauwo* wo kpuŋgbɛi i pilɛ, a kato nda toosiaa a fikiima vesɛiyaŋ ndo kpuŋgbɛi i pilɛ. Okoŋ, mi wana o wana mal mbo miiŋguŋ o ndu lo.
20 Mɛɛ Deeve miiŋgu o bɛɛ le mbo dɔu yuŋgu ndɔɔ sala, mi Maikaa chua Sɔɔ wo fula mbo komal ndu. Mbo dimul Deeve aa: “Tɔɔ yɛɛ kpeekpei masa bɛndoo le Isɔluɛi sɔla yɛ hau hoo? Nuawɔ se mɛɛ o kɔ yuŋgaŋ chiaa laanduaa cho buɛiyaa nduaa piaanduaa o ba bɛŋgu wa o hɔl lɛ, naŋ chaa wana seemɛiyo yuŋgaŋ o luŋ kpendekele ni!”
21 Mi Deeve dimul Maikaa aa: “Le Chɛhowa ya wa kpeŋjoo ni, kanifuule ndu kɛɛ finya num a yuŋgu ndɔɔ ni, okoŋ mbo hɛli ya. Ndu Chɛhowa siiŋguu ya masaa wanaa nduaa choo ni, Isɔluɛiya. Lelaŋ, mɛɛ mi wuu kpeŋjoo Chɛhowa lachi.
22 I cho tusiŋ toolo mbo hiou bɛɛ mɛɛ ya tosa yɛ, nduyɛ mi chuaŋnuŋ chɔdɔ mbo hiou bɛɛ hoo. Kɛ chiaa laanduaa ŋ soo a nda okɔɔ wa, a cho ya bɛɛleŋ ke.”
23 Nduyɛ haaa mi Maikaa chua Sɔɔ wo wu, o vilu chua le.
Tɛɛsiaalaŋ
^ Ɔɔ “kpɛŋɛ.”
^ Ɔɔ naapum, “tɛɛŋ ndo.”
^ O sim, “Naa Nda Dɔɔnuŋ Tumbe a Yusaa Wa.”
^ Tofa Tɛɛsiaa.
^ Ɔɔ “finɛteloo.”
^ Ɔɔ “bulu nda toosiaa tiu tiu maa ikela wo.”
^ Wauwo hoo, o lɛŋnde Palɛstaŋ ndeŋ niŋ wana saaluŋ ndu tau ni.
