Saamiɛɛ Diiŋ Ndɔɔ 7:1-29
7 Mi masaa hiau o chiɛi ndɔ lemasaa niŋ, mbo chal niko kpeekpei. Nduyɛ mi Chɛhowa tosa mbo sɔla pɛŋgioo, kanifuule yaamɔɔwaa nduaa ndaa balu ndu wa ve lɛ ndu paaliaŋ te.
2 Okoŋ, mi masaa dimul Netaŋ wana suaa le Mɛlɛka wo aa: “I cho o chiɛi yɔmii sida ve niŋ, kɛ mi Kɔfu Mɛlɛka tonyaa ndu wa o tɛndiiyo niŋ.”
3 Mi Netaŋ dimul masaa aa: “Kɔ ma tosa nyɛ o nyɛ cho num o kɔl, kanifuule Chɛhowa cho a num latulu.”
4 Ichɔl koŋ, mi Chɛhowa suaa naa Netaŋ chua. Mbo dimul ndu aa:
5 “Kɔ dimul buɛi nuu Deeve aa, ‘Nyɛ ya Chɛhowa dimi wo cho hoo ni: “Baa num nɔ ni ma teŋgul la chiɛiyo le mi wa leniŋ?
6 Chɔŋ a teleŋ ya soli Isɔluɛiya o lɛŋnde Ichipi leŋ niŋndo haaa a paale hauleŋ ndeŋ, o cho o chiɛi niŋ te ya wa le, kɛ o tɛndiilaŋ niŋ ya wa kelaa ni.
7 Teleŋ hiou hoo wo kpou, I wa balɔɔ a Isɔluɛiya* latulu. Nduyɛ simlachiaa le kaaye o Isɔluɛi niŋ, a ya yulu iso le wanaa niaa Isɔluɛiya mandaa wa, baa o pilɛ bɛɛ I ŋɔɔchiaŋ pa o lani aa, ‘Le yɛɛnɛ la teŋgul la chiɛiyo a yɔmii sida ve le?’”’
8 Lelaŋ, dimul buɛi nuu Deeve aa, ‘Nyɛ ya Chɛhowa, Mɛlɛka puaa chɔuwa dimi wo cho hoo ni: “Ya soli num naa ŋ wa saa mandaa yondoo niŋnda ni, le ma wa simlachinɔɔ le wanaa niaa, Isɔluɛiya.
9 Ba o ba ŋ kɔ, I cho wa a num latulu, nduyɛ mi wɔɔsuu yaamɔɔwaa numnda kpou num lachi. I cho tosa ma pɛlnuŋ ladio maa wanaa fula tɔɔ o chieeŋndo choo wa.
10 I cho chaltaŋ nuuviaa le wanaa niaa Isɔluɛiya, mi kɛsi nda loŋ. A cho wa loŋ, nduyɛ nyɛ o nyɛ paaliaŋ lɛ niŋ nda le. Wanaa dɛnɛ wɔɔŋnda saaŋgiaa lɛ niŋ nda maa paandu le.
11 Kanifuule, chɔŋ a teleŋ ya hɛli wanaa kialaa ŋyamaa le ma wa nda choo wo, a wa nda saaŋgiaa. I cho tosa ma sɔla pɛŋgioo yaamɔɔwaa numnda kpou o ba.
“‘“Nduyɛ, mi ya Chɛhowa dimul num maa ya Chɛhowa cho num chiɛiyo teŋgul.
12 Te a huŋ wu pɛ, nduyɛ ma kumbu num,* I cho puaa numnda o pilɛ hɛli chuauwaa numnda tɛɛŋ, mi ke ndu masaleŋ. Nduyɛ, I cho tosa mi masale ndɔleŋ le sim yi.
13 Ndu cho chiɛiyo taŋgul le diola nilaŋ ni, nduyɛ mi tosa mi kpeŋgbei* ndɔ lemasaa wa le fɛɛŋ a fɛɛŋ.
14 I cho simnɔŋ finya ndɔ, mi ndu bɛɛ simnuŋ po ni. Te o tosa pɛ suɛi wɔɔŋnde, I cho ndu miŋgi o nɛi, nduyɛ mi sila ndu a sioŋndeŋ mɛɛ waŋnda chieeya tosa yɛ.
15 Kaala lo lechoo nuu feŋaŋ ndu niŋ choo, mɛɛ ya faŋa ndu Sɔɔ choo mi miŋgi num o foofo ndɔɔ yɛ le.
16 Yuŋgu numndo a masale numndeŋ le cho wa le fɛɛŋ a fɛɛŋ, nduyɛ mi kpeŋgbei num lemasaa bɛɛ wa le fɛɛŋ a fɛɛŋ.”’”
17 Mi Netaŋ dimul Deeve yooŋgoo hoo a nyɛ o nyɛ o tuei o yilaŋnde hei niŋ.
18 Okoŋ, mi Masaa Deeve luɛi mbo chal Chɛhowa lachi. Mbo dimul ndu aa: “Oo Chɛhowa, Mɛlɛka Kpuluŋguma Bɛndoo, wana maavɛɛ kpeekpei ya cho yɛ? Nduyɛ, yɛɛ kpeekpei yuŋgu nuu cho yɛ le ya hei kpou tosallo?
19 Oo Chɛhowa, Mɛlɛka Kpuluŋguma Bɛndoo, sɔɔŋ ŋ tosal la niŋndoŋ cho bɔɔ. Kɛ a koŋ kpou, a chɔm vɛlɛ ya buɛi numndo sɔɔŋ ŋ cho tosa le yuŋgu nuu o siɔdii lachioo niŋ pɔɔli woŋ. Oo Chɛhowa, Mɛlɛka Kpuluŋguma Bɛndoo, nyɛ ŋ dimi hoo wo,* le waŋnda chieeya kpou o cho ni.
20 Oo Chɛhowa, Mɛlɛka Kpuluŋguma Bɛndoo, sondo suaa bɛɛ ya buɛi numndo Deeve nɔ le, kanifuule a sina ya walaŋ.
21 A tosa sɔɔŋ bɛndoŋ muŋ kpou, nduyɛ ma chɔm ya buɛi numndo muŋ le mi diomnde numndeŋ le peeluŋ, okoŋ mi hɛnaŋ numndo yɔŋnuŋ.
22 Oo Chɛhowa, Mɛlɛka Kpuluŋguma Bɛndoo, le saboo hoo ŋ cho wana kɔndɔfili bɛndu ni. Wana o wana cho maa num te, nduyɛ numpilɛ kpe cho Mɛlɛka tonyaa ni. Sɔɔŋ naŋ tueiyoŋ kpou chɔm kɛsɛ maa hei cho tonya.
23 Nduyɛ o chieeŋndo choo kpou, nɛɛ yaa kpeekpei cho yɛ maa wanaa numnda, Isɔluɛiya? Num Mɛlɛka, ma kɔ baŋa wanaa numnda haa. Ma tosa sɔɔŋ kɔndɔfiliŋ bɛndoŋ le nda, mi diola numndaŋ la fula tɔɔ. Ma tuau kaalaŋ a mɛlɛkaa ndaa le wanaa numnda, a numpila baŋa o Ichipi niŋnda.
24 Oo Chɛhowa, a chua Isɔluɛiya maa wanaa numnda kpeekpei nda cho ni le fɛɛŋ a fɛɛŋ, nduyɛ ma simnuŋ Mɛlɛka ndaa.
25 “Lelaŋ, oo Chɛhowa Mɛlɛka, ya buɛi numndo, buŋgɛi ŋ chuel la a yuŋgu nuu ve, tosa a sabu mi i peeluŋ le fɛɛŋ a fɛɛŋ. Nduyɛ maa tosa mi buŋgɛi ŋ chuel la ve i peeluŋ fɔ!
26 Maa tosa mi diola numndaŋ la sɔla saŋgalaa le fɛɛŋ a fɛɛŋ, okoŋ mi waŋnda dimi aa, ‘Chɛhowa, Mɛlɛka puaa chɔuwa, ndu cho Mɛlɛka Isɔluɛiya ni.’ Nduyɛ ya buɛi numndo Deeve, maa tosa mi yuŋgu nuu wa le fɛɛŋ a fɛɛŋ num o hɔl.
27 Kanifuule num Chɛhowa, Mɛlɛka puaa chɔuwa, Mɛlɛka Isɔluɛiya, num chɔm ya buɛi numndo nyɛ ŋ dimi le tosaa wo ni. Ma dimi aa, ‘I cho num chiɛiyo* teŋgul.’ Le saboo hoo kpeekpei ya buɛi numndo bii kɔllo ni mi wa piɛileŋ ndeŋ o numndo.
28 Lelaŋ, oo Chɛhowa, Mɛlɛka Kpuluŋguma Bɛndoo, num cho Mɛlɛka tonyaa ni, nduyɛ diomnda ŋ dimi laŋ la cho tonya. Num dimi ni maa a cho ya buɛi numndo sɔɔŋ kɛndɔŋ muŋ tosal.
29 Lelaŋ, maa i wa hɛnaŋ numndo le ma dɔu yuŋgu nuu sala fɔ! Maa yuŋgu nuu hiou lachi a waa num o hɔl le fɛɛŋ a fɛɛŋ, kanifuule num Chɛhowa, Mɛlɛka Kpuluŋguma Bɛndoo chua buŋgɛi ni. Nduyɛ maa sala numndo wa yuŋgu nuu choo le fɛɛŋ a fɛɛŋ.”
Tɛɛsiaalaŋ
^ Hibuluiye, “chuauwa Isɔluɛi.”
^ Hibuluiye, “ma yambu num maa finyaa num aa mamaa.”
^ Ɔɔ “kpɛŋɛ.”
^ Ɔɔ “sawaa hoo.”
^ Ɔɔ “masaleŋ.”
