Saamiɛɛ Diiŋ Ndɔɔ 8:1-18
8 Mɛɛ teleŋ tiŋ hiou, mi Deeve sɔŋga a Filitiaŋnda mbo yam nda. Nduyɛ, mbo bii Mɛtɛki-ama Filitiaŋnda o ba.
2 Mɛɛ o yem Mowabaitiiya, mbo tosa ma hini lɛŋ o pulaleŋ. Okoŋ mbo tuu nda a yooleŋ, mbo piɔu nda kundalaŋ la yaa. Kundalaŋ la tiɔɔŋ laa nɔ le piɔmndo sɔlaa, mi o pilɔɔ ndoo lo yoomu. Mi Mowabaitiiya simnuŋ buɛiyaa Deeve wa, nduyɛ mi ndaa mal ndu paawaa* o ba.
3 Mi Deeve yam vɛlɛ Hadadiisa masaa le Soba, po Luihɔbi wo. O wa kɔlaŋ o Pioo Yufiluaati le mbo kɔ bii tanda koŋ, mbo wa ndu o ba bɛŋgu.
4 Mi Deeve bii puaa chɔuwaa kua o suaa choo wa 1,700, vɛlɛ a puaa chɔuwaa kua a ŋpelu wa 20,000 ndu o ba. Nduyɛ, mi Deeve kili kili suaa naŋ nyɛm nyaanaŋndoŋ nda kpou nyɛsuaŋ. Suaa 100 kinɛi o mɛi ni o kili nda manyɛsu le.
5 Mɛɛ waŋnda Siiliaa o Damasikɔɔ niŋ hiŋ le Hadadiisa, masaa le Soba chɔuwo malaa, mi Deeve diu diu Siiliaŋnda 22,000.
6 Okoŋ, mi Deeve kɛsi puaa chɔuwa kundalaŋ yɛ yɛ Siiliaa o Damasikɔɔ niŋ. Mi waŋnda Siiliaa simnuŋ buɛiyaa Deeve wa, nduyɛ mi ndaa mal ndu paawaa o ba. Ba o ba Deeve ndoo kuɛ pɛ o chɔuwo, mi Chɛhowa ndoo tosa mbo yem yaamɔɔwaa nduaa.
7 Okoŋ kɔɔli, boola tiu tiu la nda toosiaa a kooliiyoŋ le chɔuwo laŋ, mi Deeve bii laŋ puaa chɔuwaa Hadadiisa wa o ba, mbo kuaŋnuŋ a laŋ Chulusalɛm.
8 Mi Masaa Deeve chua chiliŋuŋ siaŋaŋ* ŋ hɔbɛi o chieeŋ bɛnduŋ Hadadiisa woŋ niŋ, Bɛtaa a Bɛlɔtai.
9 Mi Towai, masaa le Hamaati tuɛi maa Deeve yem puaa chɔuwaa Hadadiisa wa kpou.
10 Okoŋ, mi Towai viam Choluam po ndɔ naa Masaa Deeve chua le ndu yilɔɔ, nduyɛ mbo mel ndu balikaa le mɛɛ o chɔulaba Hadadiisa mbo yam ndu yɛ. (Kanifuule Hadadiisa ndoo chiŋalaŋ niŋ Towai a sɔŋgɔɔ le teleŋnda bɔɔbɔɔ.) Mɛɛ o wa kɔlaŋ, mbo yoo ndu nyɛm nda toosiaa a kaniŋ humboŋ, kooliiyoŋ, vɛlɛ a chiliŋuŋ siaŋaŋ ndoŋ.*
11 Mi Masaa Deeve chua nyɔɔŋ muŋ mbo yɔŋgu muŋ le miŋ wa le Chɛhowa, latulu a kaniŋ humboŋ vɛlɛ a kooliŋ o chua o kaala o yem ndaŋ niŋndoŋ kpou.
12 Mbo chua muŋ Siiliaŋnda, Mowabaitiiya, Amɔnaitiiya, Filitiaŋnda, a Amalɛkaitiiya o ba. Mbo chua vɛlɛ muŋ Hadadiisa, masaa le Soba, po Luihɔbi wo o ba.
13 Mɛɛ Deeve kɔ dii Idɔmaitiiya 18,000 o Kpoloŋ Ihɛllo mbo miiŋguŋ, mbo fula vɛlɛ tɔɔ tau.
14 Mbo kɛsi puaa chɔuwa kundalaŋ yɛ yɛ o Idɔm niŋ. Mbo tiu nda o lɛŋnde Idɔm ndeŋ niŋ kpou, nduyɛ mi Idɔmaitiiya simnuŋ buɛiyaa Deeve wa. Ba o ba Deeve ndoo kuɛ pɛ o chɔuwo, mi Chɛhowa ndoo tosa mbo yem yaamɔɔwaa nduaa.
15 Mi Deeve hiau lachi a waa o masaleŋ choo o Isɔluɛi niŋ kpou. Nduyɛ, o wa wanaa nduaa kpou sɔɔŋ dimioo tɛɛŋ o nɛi sakpoo choo.
16 Chowaabi, po Sɛluiya wo wa puaa chɔuwa bolleŋ ni, nduyɛ Chɛhosiafati, po Ahiludi wo wa wana kɛsiaa lakonaa ni.
17 Sadɔki, po Ahitubi wo a Ahimɛlɛki, po Abiaata wo wa wanaa soliaa lasalaa ni. Sɛluiya wa wana poonyiaa ni.
18 Bɛnaya, po Chɛhoyada wo wa Kɛluitaitiiya a Pɛlɛtaitiiya choo ni. Nduyɛ mi puaa Deeve velu wa sɔla foofola bɛndulaŋ.
