Saamiɛɛ Diiŋ Ndɔɔ 9:1-13
-
Deeve chɔm Mɛfibosiɛɛ kaala lo lechoo wo (1-13)
9 Mi Deeve dimi aa: “Baa wana o wana lo pa o yuŋgu Sɔɔ wo niŋ o ya nɔla mi chɔm kaala lo lechoo wo le sabu Chonataŋ ndo wo?”
2 Sɔɔ ndoo nɔ buɛiyo o yuŋgu ndɔɔ choo diolaŋ aa Saiba. Le hei, ma veelu ndu naa Masaa Deeve chua. Okoŋ mi masaa nyuna ndu aa: “Num cho Saiba ni?” Mbo muli aa: “Ei, buɛi numndo ya cho ni.”
3 Mi Masaa hiau lachi a suɛi aa: “Baa wana lo pa yoomu o yuŋgu Sɔɔ wo choo, o ya nɔla mi chɔm kaala lo lechoo Mɛlɛkaa wo?” Mi Saiba mulul Masaa aa: “Po Chonataŋ ndo o pilɛ cho wɔ yoomu, nduyɛ o nɔ namtaleŋ o peluŋ muuŋ ndoŋ kpou.”
4 Mi Masaa nyuna ndu aa: “Kuɛɛnɛ o cho yɛ?” Mi Saiba mulul Masaa aa: “O cho Lo-dɛba o Makaya lo, po Amiɛɛ wo.”
5 O lepilɛ niŋ kpe, mi Masaa Deeve viam waŋnda Lo-dɛba o Makaya lo po Amiɛɛ wo, ma kɔ huŋ a ndu.
6 Mɛɛ Mɛfibosiɛɛ po Chonataŋ ndo, ndu yɔŋnuŋ ni maa po mama Sɔɔ wo hiŋ naa Deeve chua, o lepilɛ niŋ kpe, mbo baŋ wulaŋ, mbo fuuluu hɔlla lɛŋ. Mi Deeve veelu ndu aa: “Mɛfibosiɛɛ!” Mbo muli aa: “A che ya, buɛi numndo.”
7 Mi Deeve dimul ndu aa: “Yɔŋ isiooŋ te, kanifuule I cho num kaala lo lechoo wo chɔm le sabu Chonataŋ finya numndo. Lɛŋnde Sɔɔ finya num mama leŋ kpou, I cho num leŋ miŋgi o ba. Nduyɛ le teleŋ o teleŋ, o tibii* nuu choo ŋ cho wa nyɛdiaa* dioo ni.”
8 Okoŋ, mi Mɛfibosiɛɛ fuuluu vɛlɛ hɔlla lɛŋ mbo dimi aa: “Wana maavɛɛ kpeekpei ya buɛi numndo cho yɛ, ya tuŋ vilɛiyo hoo, le ma nɔ yiyaŋ kɛndɛ waa nuaa a ya?”
9 Mi masaa yooŋgu le Saiba buɛi Sɔɔ wo. Mɛɛ o hiŋ, mbo dimul ndu aa: “Nyɛ o nyɛ masanɔ numndo Sɔɔ a yuŋgu ndɔɔ kpou ndoo nɔ, l chua mi ke po ndɔ mamaa.
10 Num nya chuauwaa numnda a buɛiyaa numnda kpou, nya cho wa wallo tosaa o lɛŋnde masanɔ numndo choo ni, le mi po ndɔ mamaa sɔla nyɛdiaa le yuŋgu ndɔɔ. Kɛ Mɛfibosiɛɛ, po mama Masanɔ numndo ndu, o tibii nuu choo o cho wa nyɛdiaa dioo ni le teleŋ o teleŋ.”
Saiba yɛ, ndoo nɔ puaa 15 a buɛiya 20.
11 Okoŋ, mi Saiba dimul Masaa aa: “Masanɔ nuu, nyɛ o nyɛ ŋ dimul ya buɛi numndo le tosaa, I cho tosa.” Okoŋ, mi Mɛfibosiɛɛ wa niko nyɛdiaa dioo o tibii Deeve wo choo maa puaa Masaa.
12 Kɛ Mɛfibosiɛɛ ndoo nɔ poombɔɔ diolaŋ aa Mikaa. Nduyɛ wana o wana wa o yuŋgu Saiba wo niŋ, ma simnuŋ buɛiyaa Mɛfibosiɛɛ wa.
13 Mi Mɛfibosiɛɛ hiau lachi a waa Chulusalɛm, nduyɛ le teleŋ o teleŋ o tibii Masaa choo ndoo dia nyɛdiaa ni. Ndoo nɔ namtaleŋ o peluŋ muuŋ ndoŋ kpou.
