Koloniko Diiŋ Ndɔɔ 13:1-22
13 O wɔsi 18 Masaa Chɛlobowam wa o masaleŋ choo wo, Abaicha simnuŋ masaa le Chuda ni.
2 Mbo chii wɔsilaŋ la yaa o masaleŋ choo Chulusalɛm. Kala ndɔ ndoo nɔ diolaŋ ni aa Maikaya, chua Yuluɛɛ wo, wana waa Kibiya. Nduyɛ, chɔuwo wa Abaicha tɛɛŋ nda Chɛlobowam.
3 Okoŋ, mi Abaicha kua a puaa chɔuwaa kpaayaa bɛnduaa chaa sɔŋgɔɔ nyɛkɛndɛi ya 400,000 o chɔuwo. Nduyɛ mi Chɛlobowam kɔ sim o bɛɛndiaŋ le ndu chiŋalaŋndo a sɔŋgɔɔ, a puaa chɔuwaa kpaayaa bɛnduaa chaa sɔŋgɔɔ nyɛkɛndɛiya 800,000.
4 Okoŋ mi Abaicha kɔ sim o Pembei Sɛmaluem choo, o tanda ŋpemboo Ifiluem, mbo dimi aa: “Num Chɛlobowam a waŋnda Isɔluɛi kpou, la yaŋ ya nilaŋ.
5 Baa la sina nuaa maa Chɛhowa, Mɛlɛka Isɔluɛiya yii kpema ihɛllo* a Deeve, mbo ke ndu a puaa nduaa masaleŋ o Isɔluɛi niŋ le fɛɛŋ a fɛɛŋ te?
6 Kɛ mi Chɛlobowam po Nebati wo, buɛi Sɔlɔmɔŋ ndo po Deeve wo chaŋ mbo simul masanɔ ndɔɔ.
7 Nduyɛ mi puaa fonduaa, puaa kɔl vesɛiya wa hunɔɔ naa ndu chua. Ma tiu Luihobowam po Sɔlɔmɔŋ ndo ba, kanifuule o wa feleŋgɔnɔ nduyɛ siooŋnde wa ndu. Le hei, ndoo nɔla mbo simul nda le.
8 “Le mɛɛ nya cho faŋga bɛndoo, nduyɛ mi nauwaa ŋkoolii Chɛlobowam toosiaa maa mɛlɛkaa nya wa wa nya o ba yɛ, baa la yiyaŋ pa maa la nɔla mi la simul masale Chɛhowa ke puaa Deeve wa leŋ?
9 Nya tou wanaa soliaa lasalaa Chɛhowa wa, a fula o pulale Elɔŋ ndeŋ choo wa a Livaiya ni. Nduyɛ, mi la yulu wanaa soliaa lasalaa iso le nyapila, mɛɛ waŋnda o lɛŋii cheleŋnde niŋ tosa yɛ. Wana o wana hiŋ pɛ a nau fɔŋndɔɔ vɛlɛ a saa fɔŋnduaa a ŋɔmmɛu, la siiŋguu ndu wana soliaa lasalaa le piɔmaa cho ŋ mɛlɛka le wa.
10 Kɛ naa naa, Chɛhowa cho Mɛlɛka naa ni nduyɛ ŋ mel ndu le. Wanaa naa soliaa lasalaa fula o pulale Elɔŋ ndeŋ choo wa cho wallo le Chɛhowa, nduyɛ mi Livaiya wa nda malaa.
11 A cho salala luamaa laŋ solioo o Chɛhowa lo idii a ichɔl, nduyɛ ma luam nyɛm chuŋ kɛndɔŋ. Beedii* cho o yɔŋgaŋ o Mɛlɛka lo wo cho o kɛsiaa o tibii* nda toosiaa a koolii kɛndɛ kɛndɛiyo choo, nduyɛ lambuila cho o nyɛ kɛsiaa la lambui nda toosiaa a kooliiye laŋ, ma mɛndul taŋ ichɔl o ichɔl. Ŋ cho wali Chɛhowa Mɛlɛka ke naa wo tosaa, kɛ mi nya faŋaŋ ndu kɔɔli.
12 Mɛlɛka tonyaa cho a naa latulu mbo wa naa nɛiyo chɔmndo. Nduyɛ, wanaa nduaa soliaa lasalaa cho bulula chɔulaŋ hɔŋndo le nya chiŋalaŋndo a sɔŋgɔɔ. Lelaŋ waŋnda Isɔluɛi, la sɔŋga a Chɛhowa Mɛlɛka finyaa nyaa mamaa le, kanifuule la cho batiuwaa sɔla le.”
13 Kɛ mi Chɛlobowam yɔŋ puaa chɔuwa a tiŋ le ma fulal puaa chɔuwa Chuda amakɔɔ.
14 Mɛɛ puaa chɔuwa Chuda muliŋ amakɔɔ, ma cha maa a nɔ le sɔŋgɔɔ a yaamɔɔwaa ndaa wa nda kɔɔli wa, vɛlɛ a yaamɔɔwaa wa nda lachi wa. Le hei, ma kandu chaŋndo naa Chɛhowa chua le malaa, mi wanaa soliaa lasalaa wa tuŋ hiouwɔɔ lachi a bululaŋ hɔŋndo choo choo kpeleŋ.
15 Mi puaa chɔuwa Chuda deŋi choo choo le chɔuwo. Mɛɛ nda deŋi choo choo le chɔuwo, mi Mɛlɛka tonyaa tosa mi Abaicha nda waŋnda Chuda yam Chɛlobowam a waŋnda Isɔluɛi kpou.
16 Mi Isɔluɛiya nyaanuŋ waŋnda Chuda. Nduyɛ, mi Mɛlɛka mal Isɔluɛiya waŋnda Chuda o ba.
17 Mi Abaicha nda wanaa nduaa diu Isɔluɛiya diuwo pila. Nduyɛ, ma diu puaa chɔuwaa ndaa chaa sɔŋgɔɔ wa 500,000.
18 Mɛɛ nuaa nda tusi puaa chɔuwa Isɔluɛi siɔmbulaŋ a boondii keŋ ni. Kɛ mi puaa chɔuwa Chuda sɔla batiuwaa, kanifuule ma tiindaŋ Chɛhowa, Mɛlɛka finyaa ndaa mamaa.
19 Mi Abaicha tisa Chɛlobowam kɔɔli, nduyɛ mbo bii chieeŋ ndɔŋ bɛndoŋ. Muŋ cho ni: Bɛtɛl a chieeŋ balu ndu woŋ, Chɛsiaana a chieeŋ balu ndu woŋ, a Ɛfilɔŋ a chieeŋ balu ndu woŋ.
20 A teleŋ Abaicha wo kpou, Chɛlobowam miiŋgu lɛ kpaaya ndɔɔ sɔla le. Okoŋ, mi Chɛhowa tosa mbo wu.
21 Kɛ mi Abaicha hiau lachi a kpaayaa sɔlaa. Mɛɛ teleŋ tiŋ hiou, mbo chua laanduaa 14. Nduyɛ, mbo vialu puaa 22 a waŋ laanduaa 16.
22 Sɔɔŋ cheleŋ cho a Abaicha okɔɔ woŋ, sɔɔŋ o tosa woŋ vɛlɛ a nyɛ o dimi wo, ŋ cho ŋ poonyiaa o nyɛ Idɔɔ, wana suaa le Mɛlɛka wo poonyiaa wo niŋ.
