Koloniko Diiŋ Ndɔɔ 14:1-15
14 Okoŋ mi Abaicha wu,* ma kumbu ndu o Chiee Deeve Wo. Nduyɛ, mi Esa po ndɔ miiŋgu o masaleŋ choo o foofo ndɔɔ. Le wɔsilaŋ tɔ, kɔl nyuloo wa o lɛŋndeŋ niŋ o masale ndɔleŋ bɛŋgu.
2 Mi Esa tosa nyɛ cho o kɛndɔɔ wo, vɛlɛ a nyɛ cho sakpo Chɛhowa Mɛlɛka ndɔɔ o hɔl lo.
3 Mbo faaŋiaa bandula luamaa lasalala mɛlɛkaa lachoowaa, a fondaŋnda filioŋndaŋ. Nduyɛ, mbo pesi pesi suŋgbuma nda toosiaa a poutaŋ ndaŋ vɛlɛ a suŋgbuma iyɔm nda simi le sooluuwo waŋ.*
4 Okoŋ kɔɔli, mbo dimul waŋnda Chuda le ma nuuviaa Chɛhowa, Mɛlɛka finyaa ndaa mamaa, ma bii Sawala ndɔlaŋ, nduyɛ ma tosa nyɛ o nyɛ o dimul nda le tosaa.
5 Mbo faaŋiaa fondaŋnda filioŋndaŋ o chieeŋ bɛndoŋ o Chuda niŋ kpou, vɛlɛ a bandula nda luam nyɛm chuŋ kɛndɔŋ lechoo laŋ. Nduyɛ o masale ndɔleŋ bɛŋgu, kɔl nyuloo wa o lɛŋndeŋ niŋ kpou.
6 O wɔsila o wa o masaleŋ choo laŋ bɛŋgu, lɛŋndeŋ le wa o kɔl nyulu niŋ nduyɛ wana o wana chiŋalaŋ ndu a chɔu le. Le hei, mbo taŋgul chieeŋ bɛndoŋ a kpakila kala kalalaŋ o Chuda niŋ, kanifuule mi Chɛhowa tosa mbo sɔla pɛŋgioo.
7 Mbo dimul waŋnda Chuda aa: “La ŋ taŋguluŋ chieeŋ bɛndoŋ muŋ, miŋ balu muŋ a kpakila kala kalalaŋ vɛlɛ a bandula vilɛilaŋ, miŋ wou diola kpakilaŋ a koŋjiiyoŋ. Kanifuule, lɛŋndeŋ le cho wɔ naa o ba bɛŋgu, le mɛɛ naŋ nuuviaa Chɛhowa Mɛlɛka naa yɛ. Ŋ nuuviaa ndu, nduyɛ mbo tosa miŋ sɔla pɛŋgioo ba o ba fee.” Okoŋ, ma sɔla batiuwaa o wali taŋgulaa koŋ niŋ.
8 Esa ndoo nɔ puaa chɔuwa 300,000 o Chuda niŋ. Nda kpou ndaa nɔ boola chɔula bɛndulaŋ a baltaŋ. Nduyɛ, ndoo nɔ puaa chɔuwaa kpaayaa bɛnduaa 280,000, fulaa o yuŋgu Bɛŋjamiŋ ndo choo. Ndaa nɔ boola chɔula pɔmbɔlaŋ* a chiɔulaŋ.*
9 Okoŋ kɔɔli, mi Siluaa Itoopiaanɔɔ huŋ a puaa chɔuwa 1,000,000 vɛlɛ a nyɛla nyaanaŋnda suaa naŋ ndaŋ 300, le nda chiŋalaŋndo a sɔŋgɔɔ. Mɛɛ o fuuluu Maluɛsiaa,
10 mi Esa kuel ndu, ma kɔ sim a bɛɛndiaŋnda le chɔuwo o Kpoloŋndo Sɛfataa o Maluɛsiaa niŋ.
11 Okoŋ mi Esa piɛi o Chɛhowa Mɛlɛka ndɔɔ lo, mbo dimul ndu aa: “Oo Chɛhowa, wanaa num aa ŋ piŋi wa, o yɔŋ bɛɛ ma wa tau ɔɔ ma nɔ bɛɛ kpaaya le, o cho keŋ te ŋ tofa le. Oo Chɛhowa Mɛlɛka naa, a yandii mala naa, kanifuule num naŋ tiindaŋ ni. O diola numndaŋ niŋ naŋ hiŋ faŋgaa hoo chiŋalaŋndo ni. Oo Chɛhowa, num cho Mɛlɛka naa ni, nduyɛ chɛl mi wanachioo yem num te.”
12 Okoŋ, mi Chɛhowa yam Itoopiaŋnda Esa a waŋnda Chuda o hɔl, nduyɛ mi Itoopiaŋnda nyaanuŋ.
13 Mi Esa nda wanaa wa ndu kɔɔli wa tisa nda kɔɔli haaa Kɛlua. Nduyɛ, a lo Itoopiaŋnda kɔlaŋ a diu diuwo haaa ma chii nda mɛu, wana pilɛ bɛɛ lo yoomu le. Kanifuule mi Chɛhowa nda puaa nduaa chɔuwa tɛɛmbuu nda kpata kpata. Okoŋ kɔɔli, ma kuandu nyɔɔŋ tau tau ma kuaŋnuŋ a muŋ.
14 Le handɔɔ lechoo, ma tɛɛmbuu chieeŋ bɛnduŋ balu Kɛlua woŋ kpou. Kanifuule wanaa wa o chieeŋ bɛndoŋ muŋ niŋnda, mi siooŋii bɛnduei bii nda le Chɛhowa. Nduyɛ ma puŋga nyɛm wa o chiooŋ muŋ niŋndoŋ kpou, kanifuule nyɔɔŋ wa o chiooŋ muŋ niŋ tau tau.
15 Okoŋ kɔɔli, ma kɔ del tɛndiila wanaa ndaa nɔ chɔluaa wa choo, ma bii saa a nyɔɔmiaa ndaa tau tau, okoŋ ma miiŋguŋ Chulusalɛm.
Tɛɛsiaalaŋ
^ Hibuluiye, “ma yambu Abaicha nda finyaa nduaa mamaa.”
^ Tofa Tɛɛsiaa.
^ Boolaŋ ndaŋ, wanaa wuu chiŋuaŋ nda soliŋ ndaŋ kpeku ni.
^ Hibuluiye, “Ndaa chaa chiɔulaŋ kindɔɔ.”
