Koloniko Diiŋ Ndɔɔ 16:1-14
16 O wɔsi 36 Esa wa o masaleŋ choo wo, mi Masaa Baasia o Isɔluɛi niŋ huŋ chiŋalaŋ Chuda a sɔŋgɔɔ, okoŋ mbo taŋgul* Luama le mbo kuuna waŋnda luɛiyɔɔ a fulaa Chuda, o tanda Esa wa o masaleŋ choo wo niŋ.
2 A teleŋ koŋ, mi Esa chua kaniŋ humboŋ a kooliŋ wa o fondaŋ nda kɛsi nyɛm baa kalaŋ o chiɛi Chɛhowa wo a o chiɛi lemasaa niŋndo, mbo yɔŋ Bɛŋ-hedadi masaa le Siiliaa, o wa ichali Damasikɔɔ wo. Mbo dimul ndu aa:
3 “Kpemaa cho naa tɛɛŋ naa num, nduyɛ kpemaa cho vɛlɛ finya nuu tɛɛŋ nda finya num. I cho kaniŋ humboŋ a kooliiyoŋ yɔŋndo le ma kɔ ke num. Lelaŋ, kpema ŋ yii nya Baasia masaa le Isɔluɛi yo, huŋ ma tɛɛmbuu ndu le mbo keluŋ ya kɔɔli.”
4 Okoŋ, mi Bɛŋ-hedadi tosa nyɛ Masaa Esa dimul ndo wo. Mbo yɔŋ masaa wa puaa chuauwa bolleŋ nda ma huŋ del chiooŋ Isɔluɛi choo. Ma yam Ichɔŋ, Daŋ, Ebɛl-meyam, a fondaŋnda ndaa kɛsi nyɔɔŋ o chieeŋ bɛnduŋ Nafitalii yoŋ niŋndaŋ kpou.
5 Mɛɛ Baasia tuei hei, o lepilɛ niŋ kpe mbo mal Luama taŋgullo, vɛlɛ a wali o wa tosaa lechoo wo.
6 Okoŋ mi Masaa Esa chua waŋnda Chuda kpou, ma chua poutaŋ a yɔmii Masaa Baasia wa Luama taŋgullo ve, mbo kɔ taŋgul Kiba a Misipa.
7 A teleŋ koŋ, mi Hanani wana cha wo kua naa Esa masaa le Chuda chua, mbo dimul ndu aa: “Le mɛɛ ŋ kɛɛ Chɛhowa Mɛlɛka numndo tiindaŋndo nduyɛ ma duau tiindaŋ numndo o masaa le Siiliaa niŋ yɛ, le sabu koŋ, a nɔla ma yem puaa chuauwaa masaa le Siiliaa wa le.
8 Waŋnda Itoopiaa a waŋnda Liibiaa ndaa nɔ puaa chuauwa tau tau, nyɛm nyaanaŋ suaa naŋndo, vɛlɛ a wanaa nyaanuŋ suaa wa. Kɛ le mɛɛ ŋ dɔu tiindaŋ numndo o Chɛhowa niŋ yɛ, mbo mal nda num o ba ma yam nda.
9 Hɔlte Chɛhowa leŋ le cho lɛŋndeŋ kpou mɛɛndiaŋndo, le mbo chɔm kpaaya ndɔɔ o wanaa* cho ndu piɛiyo a kɔl ndaa kpou wa lo. A tosa bɔɔ diɔmii bɛndu o suɛi hei niŋ. Lelaŋ chɔŋ hau kɔ kɛ, waŋnda cho num wa chiŋalaŋndo a chɔuwo.”
10 Kɛ nduyɛ, mi Esa tambu kɔllo tau a wana cha wo, mbo duau ndu o chiɛi manyumndo niŋ. Kanifuule, mbo tuulu kɔl tau tau le nyɛ o dimul ndu wo. A teleŋ pilɛ koŋ, mi Esa kandu waŋnda nyɛpalaa tusioo choo.
11 Sɔɔŋ cho a Esa okɔɔ chɔŋ o kandɔŋndo haaa o mɛɛlulaŋ ndoŋ, ŋ cho ŋ poonyiaa o Yau Masaa le Chuda a le Isɔluɛi yo niŋ.
12 Wɔsi 39 Esa wa o masaleŋ choo wo, mbo sɔla naa ŋpeloo, nduyɛ mi naa kiandu kpoke. Teleŋ o wa bɛɛ a naa koŋ ndo, o muliŋ o Chɛhowa lo le. Kɛ mbo muliŋ o wanaa chiɔuwaa cheleŋ ndo.
13 Okoŋ, mi Esa wu.* O wɔsi 41 o wa o masaleŋ choo wo niŋ o vi ni.
14 Ma kumbu ndu o sɛi bɛndu o toosiaa le ndupila wo niŋ, o Chiee Deeve Wo. Ma yambu ndu o kpele waŋvilɛiya choo, ma suu ndu chuɛima baasam ndaŋ, a chuɛima teŋgeŋma nda toosiaa a nyɛm chuŋ kɛndɛŋ yɛ yɔŋ ndaŋ. Okoŋ kɔɔli, ma mɛndul yiŋnde bɛndu bɛnduleŋ ma luam nyɛm chuŋ kɛndɔŋ le ndu.
Tɛɛsiaalaŋ
^ Ɔɔ “mbo miŋgi taŋgul.”
^ Ɔɔ “mala wanaa.”
^ Hibuluiye, “ma yambu Esa nda finyaa nduaa mamaa.”
