Koloniko Diiŋ Ndɔɔ 18:1-34
18 Chɛhosiafati ndoo nɔ sullo tau tau, nduyɛ o wa wana tɔɔ bɛndu. Kɛ mbo tosa mi lefei luɛi nda tɛɛŋ nda Ehaabi.
2 Mɛɛ wɔsioŋ ŋ tiŋ hiou okoŋ kɔɔli, mi Chɛhosiafati kua Sameeliaa naa Ehaabi chua. Nduyɛ mi Ehaabi soli saa a nauwa tau tau salaa le ndu, vɛlɛ a wanaa kuɛ a ndu latulu wa. Okoŋ, mbo dɛɛniaa ndu le ma kɔ chiŋalaŋ Luamɔti-kiliaadi a sɔŋgɔɔ.
3 Mi Ehaabi masaa le Isɔluɛi dimul Chɛhosiafati masaa le Chuda aa: “A cho lakɔ a ya latulu Luamɔti-kiliaadi?” Mbo mulul ndu aa: “Num ni, ya ni, wanaa niaa ni, a wanaa numnda, nyɛpilɔɔ kpe naŋ cho ni. Lelaŋ, ŋ cho num toolu o chɔuwo.”
4 Kɛ mi Chɛhosiafati dimul masaa le Isɔluɛi aa: “A yandii, ŋ nyuna wɔ fɛlɛŋ Chɛhowa a ndi okɔɔ.”
5 Okoŋ mi masaa le Isɔluɛi chuuŋgiaa wanaa suaa le Mɛlɛka wa, puaa ŋwaŋ 400, mbo nyuna nda aa: “Baa ŋ kɔ del Luamɔti-kiliaadi choo a sɔŋgɔɔ ɔɔ ŋ kua le?” Ma mulul ndu aa: “Kɔ, nduyɛ Mɛlɛka tonyaa cho num ndu malɔɔ o ba.”
6 Mi Chɛhosiafati dimi aa: “Baa wana cho pa nanuŋ o suaa le Chɛhowa wo? Ŋ nyunaŋ ndɔ ndu vɛlɛ a ndi okɔɔ.”
7 Okoŋ, mi masaa le Isɔluɛi dimul Chɛhosiafati aa: “Po pilɛ cho wɔ nanuŋ, o nyunal naa Chɛhowa a ndi okɔɔ wo. Kɛ I tul ndu bɔɔ leyɛ, kanifuule o dimi lɔɔlɔɔ sɔɔŋ kɛndɛ a ya okɔɔ le, kɛ ŋ wɔɔŋndoŋ kposoŋ. Ndu cho yɛ Maikaya, po Imila wo ni.” Mi Chɛhosiafati dimi aa: “Masaa nɔ mbo dimi suɛi waa nuaa le.”
8 Okoŋ, mi masaa le Isɔluɛi veelu wana bɛndoo o pilɛ o chiɛi lemasaa niŋ, mbo dimul ndu aa: “Kɔ chɔ chɔ ma kɔ veelu Maikaya, po Imila wo.”
9 A teleŋ koŋ, masaa le Isɔluɛi a Chɛhosiafati masaa le Chuda, wa ichali o kpeŋgbeila* ndala lemasalaŋ choo. Nduyɛ, nda ŋiɔɔŋ kpou wa a doviaŋ o nyɛla ndala lemasa laŋ niŋ. A wa ichali o dio kpakioo le luɛiyɔɔ Sameeliaa, mi wanaa suaa le Mɛlɛka wa kpou wa yooŋgu Mɛlɛkaa dimioo nda lachi.
10 Okoŋ, mi Sɛdikaya po Chenaana wo toosiaa leela ŋchiliŋndaŋ le ndupila, mbo dimi aa: “Nyɛ Chɛhowa dimi wo cho hoo ni, ‘A leelaŋ ndaŋ ŋ cho lo Siiliaŋnda kundɔɔ* ni haaa ma chii nda paku.’”
11 Wanaa suaa le Mɛlɛka wa a piliaa bɛɛ, yooŋgu pilɔɔ kpe nda wa dimioo ni aa: “Kɔ Luamɔti-kiliaadi, a cho batiuwaa sɔla. Chɛhowa cho num ndu malɔɔ o ba.”
12 Mi wana kuɛ Maikaya veeloo wo dimul ndu aa: “Wanaa suaa le Mɛlɛka wa kpou, sɔɔŋ kɛndɔŋ kpu nda cho masaa dimullo ni. A yandii, num bɛɛ dimi sɔɔŋ kɛndɔŋ a ndu okɔɔ maa nda.”
13 Kɛ mi Maikaya dimi aa: “I mɛnaŋ po o Chɛhowa, Mɛlɛka cho yoomu wo lo maa, nyɛ o nyɛ Mɛlɛka nuu dimul la pɛ, ndu ya cho dimi ni.”
14 Okoŋ, mi Maikaya huŋ o masaa lo, mi masaa nyuna ndu aa: “Maikaya, baa I kɔ sɔŋga a waŋnda Luamɔti-kiliaadi, ɔɔ I kua le?” O lepilɛ niŋ kpe, mbo mulul ndu aa: “Kɔ, nduyɛ a cho batiuwaa sɔla. Mɛlɛka cho nda nya malɔɔ o ba.”
15 Okoŋ, mi masaa nyuna ndu aa: “Le vɛɛ kpɛ ya dimul lɛ num niŋ le ma mɛnaŋ maa, tonyaa kinɛi ŋ nɔ ni ma dimul la o diola Chɛhowa laŋ niŋ?”
16 Mi Maikaya dimi aa: “I cho chɔɔ Isɔluɛiya kpou a sɛŋiaŋ o pemboŋ choo, mɛɛ saa wa nuaa a nɔ wana mandaa le yɛ. Mi Chɛhowa dimi aa: ‘A nɔ simlachinɔ le. Lelaŋ, wana o wana miiŋgu o chiɛi ndɔɔ o kɔl nyulu niŋ.’”
17 Okoŋ, mi masaa le Isɔluɛi dimul Chɛhosiafati aa: “A che nyɛ ya dimul num ndo le, ‘O dimi sɔɔŋ kɛndɛ a ya okɔɔ le, ŋ wɔɔŋndoŋ kinɛi o dimi ni.’”
18 Mi Maikaya dimi aa: “Tueiyɔ nyɛ Chɛhowa dimi wo. I che Chɛhowa ichali o kpeŋgbei ndɔ lemasaa choo, a puaa chɔuwa* isisi o ba ndɔ kɛndɔɔ a o ba ndɔ miallo choo.
19 Okoŋ mi Chɛhowa nyuna aa, ‘O nɛɛnɛ cho yɛ lakɔ mbo kɔ hui Ehaabi masaa le Isɔluɛi, mbo kɔ del waŋnda Luamɔti-kiliaadi o ba?’ A ve nyɛ pilɛ dimi le. Te hoo dimi pɛ nuaa, o pilɔɔ dimi nyɛ cheleŋ.
20 Okoŋ mi maalikɛinɔɔ fula mbo sim Chɛhowa lachi, mbo dimi aa, ‘I cho ndu lakɔ hui.’ Mi Chɛhowa nyuna ndu aa, ‘Vɛɛnɛ ŋ cho yɛ ndi looku tosa?’
21 Mbo muli aa, ‘I cho lakɔ tosa mi wanaa nduaa suaa le Mɛlɛka wa kpou dimul ndu choolaŋ.’ Okoŋ mi Mɛlɛka dimul ndu aa, ‘A cho ndu hui, nduyɛ i hiou kpou ve, a cho batiuwaa sɔla. Kɔ ma kɔ tosa lende.’
22 Lelaŋ, Chɛhowa tosa ni mi wanaa num aa suaa haa le Mɛlɛka wa kpou dimul num choolaŋ. Nduyɛ Chɛhowa dimi maa kpundɔɔ cho num tolɔɔ choo.”
23 Mi Sɛdikaya, po Chenaana wo sɔɔŋguu Maikaya ikɛi mbo luaa ndu kpaŋnde. Mbo nyuna ndu aa: “Vɛɛ maalikɛinɔ Chɛhowa wo kei yɛ ya choo, mbo kɔ soo o numndo?”
24 Mi Maikaya muli aa: “Paale ŋ cho luɛiyɔɔ o lumuiyo niŋ di le vioŋnɔŋndo leŋ, paale leŋ ŋ cho sina ni.”
25 Okoŋ, mi masaa le Isɔluɛi dimi aa: “La bii Maikaya mi la kuɛ a ndu o Amɔŋ masa chioo lo, a o Chowaasi lo po masaa.
26 La dimul nda aa, ‘Nyɛ masaa dimi wo cho hoo ni: “La bii laŋunɔɔ hoo mi la dɔu ndu o chiɛi manyumndo niŋ, nduyɛ mi la dɔɔniaa nyɛdiaa* o dia o paaleŋ niŋndo, vɛlɛ a mɛŋma o kol laŋ haaa mi miiŋgu o kɔl nyulu niŋ.”’”
27 Kɛ mi Maikaya dimi aa: “Te a miiŋgu nanuŋ pɛ o kɔl nyulu niŋ, mɛɛ o cho Chɛhowa le soo naa ya chua le.” Mbo dimi vɛlɛ aa: “Nya waŋnda kpou, la kɛsiŋ hei o lakɔl.”
28 Okoŋ, mi masaa le Isɔluɛi a Chɛhosiafati masaa le Chuda kua Luamɔti-kiliaadi.
29 Mi masaa le Isɔluɛi dimul Chɛhosiafati aa: “I cho nyɛla cho ya lekɔɔ laŋ siŋga mi kuɛ naa sɔŋgɔɔ cho wa, kɛ mi num kuɛ a nyɛla numnda lemasa laŋ lekɔɔ.” Okoŋ, mi masaa le Isɔluɛi siŋga nyɛla wa ndu lekɔɔ laŋ mbo kua le chɔuwo.
30 Masaa le Siiliaa ndoo chii niŋ waŋ banaa le puaa sɔŋga o nyɛm nyaanaŋ suaa naŋndoŋ choo wa dimul aa: “La sɔŋga a wana o wana le, o wa wana pɔmbɔ ɔɔ wana bɛndu. A masaa le Isɔluɛi kinɛi nya sɔŋga ni.”
31 Dimioo nuaa mi waŋ banaa le puaa sɔŋga o suaa choo wa cha Chɛhosiafati, ma dimulaŋ aa: “Masaa le Isɔluɛi kpeekpei cho hoo ni.” Okoŋ, ma kua le ndu chiŋalaŋndo a sɔŋgɔɔ, nduyɛ mi Chɛhosiafati kandu chaŋndo le malaa. Mi Chɛhowa mala ndu. Nduyɛ o lepilɛ niŋ kpe, mbo tosa ma faŋaŋ ndu kɔɔli.
32 Mɛɛ waŋ banaa haa che maa o cho ndu le cho masaa le Isɔluɛi le, o lepilɛ niŋ kpe, ma faŋaŋ ndu kɔɔli.
33 Kɛ mi laŋunɔ pilɛ wuu chiŋɔle ndɔleŋ o ve kɔl te, mi le kɔ viɔ masaa le Isɔluɛi naa doma ndɔ chɔuwo bɔɔŋiaa wa. Okoŋ, mi masaa dimul wana kua a nyɛ ndɔ nyaanaŋ suaa naŋndo wo aa: “Muliŋ miŋ faŋaŋ o fondaŋ chɔuwo* hoo kanifuule, a yɔŋul la bɔɔ.”
34 Mi chɔuwo hiau lachi a tuuloo ketu ketu o paale leŋ choo. Nduyɛ ma kɛsi masaa o nyɛ nyaanaŋ suaa naŋndo niŋ. Ma muli ndu hɔlla kumbuii Siiliaŋnda, nduyɛ mbo wu a paale yɔŋgaŋndeŋ.
Tɛɛsiaalaŋ
^ Ɔɔ “kpɛŋɛla.”
^ Ɔɔ “nyindɔɔ.”
^ O sim, “puaa chɔuwa o choo choo niŋ.”
^ Hibuluiye, “beedii ɔɔ bulu.”
^ Ɔɔ “dɔɔŋgɔɔ.”
