Koloniko Diiŋ Ndɔɔ 19:1-11
19 Okoŋ, mi Chɛhosiafati masaa le Chuda miiŋgu yɛlɛkɛlɛɛ* o chiɛi ndɔɔ* Chulusalɛm.
2 Mi Chehu po Hanani wo, wana cha yilaŋndoŋ ndo kua Masaa Chɛhosiafati lachi, mbo dimul ndu aa: “Baa wana dɛnɛ wɔɔŋndo ŋ nɔ ni ma mala, nduyɛ wana Chɛhowa tul leyɛ wo ŋ nɔ ni ma kaala? Le saboo hoo, Chɛhowa tuulu kɔl a num.
3 Kɛ a koŋ kpou, Mɛlɛka che sɔɔŋ kɛndɔŋ o num niŋ. Kanifuule, ma tɛɛmbuu suŋgbuma iyɔm nda simi le sooluu wo waŋ* o lɛŋndeŋ niŋ. Nduyɛ, ma bɛɛndiaa kɔl numndo le Mɛlɛka tonyaa nuuviaa.”
4 Mi Chɛhosiafati hiau lachi a challe o Chulusalɛm niŋ, mbo kua o wanaa wa Biaa-siɛba o tanda ŋpemboo Ifiluem nda lo, mbo mala nda le ma miiŋgu o Chɛhowa lo, Mɛlɛka finyaa ndaa mamaa.
5 Mbo yulu vɛlɛ wanaa kialaa ŋyamaa iso o lɛŋnde Chuda leŋ niŋ, o chieeŋ bɛnduŋ nɔ kpakila kala kalaŋ ndoŋ niŋ kpou.
6 Okoŋ mbo dimul nda aa: “La wa yekeŋ a nyɛ nya cho wa tosaa wo. Kanifuule, o cho le wanachiee le nya cho wa yamaŋ kiolɔɔ le, kɛ le Chɛhowa. Nduyɛ o cho wa a nya latulu, te la wa pɛ yamaŋ kiolɔɔ.
7 Lelaŋ, la nɔ siooŋii Chɛhowa ve. La wa yekeŋ a nyɛ nya cho wa tosaa wo kanifuule, Chɛhowa Mɛlɛka naa, o cho Mɛlɛka lakafa le. O hɛli le, nduyɛ o bii luɛiyɔɔ niŋ te.”
8 Mi Chɛhosiafati yulu vɛlɛ Livaiya, wana soliaa lasalaa, a yuŋgula leboltaŋ lapum iso o Isɔluɛi niŋ le ma wa wanaa kialaa ŋyamaa le Chɛhowa, nduyɛ ma dimi waŋnda sɔɔŋ tɛɛŋ o Chulusalɛm niŋ.
9 Mbo dimul nda aa: “Nyɛ nya nɔ mi la tosa le siooŋii Chɛhowa ve nɔɔ nduyɛ mi la chɔm lo lechoo wo a kɔl nyaa kpou wo cho hoo ni:
10 Teleŋ o teleŋ wanayaŋ nyaŋ mal pɛ o chieeŋ nyaŋ bɛndoŋ i pilɛ niŋ ma hiŋ naa nya chua a suɛi diyɛi, ma nyuna nya a sawaa okɔɔ, ɔɔ yamaŋ kiolɔɔ, la nɔ mi la dimul nda nyɛ nda nɔ ma tosa wo, yɔŋii nda tosa hakioo a Chɛhowa. Te o cho koŋ te, o cho tambu kɔl a nya vɛlɛ a wanayaŋ nyaŋ. Nyɛ nya nɔ mi la tosa wo cho hoo ni, yɔŋii nya tosa hakioo.
11 Amaluiya masa wanaa soliaa lasalaa cho nya wa choo, le isɔɔ o isɔɔ cho a Chɛhowa okɔɔ. Nyɛ o nyɛ cho a chiɛi lemasaa okɔɔ o Chuda niŋ, Sɛbadaya po Isimɛɛ wo cho ndu wa hɔlteŋ ni. Nduyɛ Livaiya cho wa nya ikɛi le nya malaa. La nɔ kɔl simulaa, nduyɛ mi la tosa wallo. Maa Chɛhowa wa latulu a wanaa tosa sɔɔŋ kɛndɔŋ nda fɔ.”
