Koloniko Diiŋ Ndɔɔ 20:1-37
20 Okoŋ kɔɔli, mi Mowabaitiiya a Amɔnaitiiya, latulu a Amɔnimnda* apum kɔ chiŋalaŋ Chɛhosiafati a chɔuwo.
2 Ma dimul Chɛhosiafati aa: “Faŋga bɛndoo fula o tanda pee mɛŋma ihɛllo* Idɔm, ma hinul num le chɔuwo. Nduyɛ a cho Hasasɔŋ-tamaa, koŋ cho ni, Ɛŋ-kɛdi.”
3 Le hei, mi siooŋnde bii Chɛhosiafati, mbo kɛɛsiaa* le Chɛhowa nuuviaa. Okoŋ, mbo dimul waŋnda Chuda kpou le ma bii sumndo.
4 Mi waŋnda Chuda chuuŋgiaŋ naapilɛ le ma nyuna Chɛhowa le malaa. Nduyɛ ma fula o chieeŋ bɛndoŋ o Chuda niŋ kpou, le ma nyuna le nɛi chɔmaa Chɛhowa wo.
5 Okoŋ, mi Chɛhosiafati sim waŋnda Chuda a Chulusalɛm tɛɛŋ o chiɛi Chɛhowa wo niŋ o luŋ sɛnɛiyo lachi.
6 Mbo piɛi aa:
“Oo Chɛhowa, Mɛlɛka finyaa naa mamaa, baa o cho num te cho Mɛlɛka o choo choo niŋ te? Baa o cho num te nɔ kpaayaa masɛi o lɛŋnde niŋ kpou choo le? Num nɔ kpaayaa ni, nduyɛ wana o wana cho mbo simul num te.
7 Num cho Mɛlɛka naa ni, nduyɛ wanaa wa o lɛŋndeŋ ndeŋ niŋnda, num tou nda wanaa numnda Isɔluɛiya lachi ni, ma ke chuauwaa mamaa* Ebilaham chaaŋ num nda leŋ, le mi le wa nyɛm kɛŋ nda le fɛɛŋ a fɛɛŋ.
8 Ma kila chaltaŋ leniŋ, nduyɛ ma teŋgul num chiɛiyo loŋ le diola numndaŋ. Ma dimi aa,
9 ‘Te kpundɔɔ del naa pɛ choo, o wa chɔuwo, nyɛpalaa, naa taŋ waŋnda wo ɔɔ yima bɛnduaŋ, ŋ cho hunɔɔ miŋ sim num vɛlɛ a chiɛiyo hoo lachi (kanifuule, diola numndaŋ la cho o chiɛiyo hoo choo.) Te ŋ nyuna num pɛ le malaa le kpundɛ tol naa choo wo, maa tuei naa diom, nduyɛ ma piŋi naa fɔ.’
10 Nuawɔ niko nyɛ waŋnda Amɔŋ, Mowaabi, a haa o tanda ŋpemboo Sɛyaa cho tosaa wo. Teleŋ Isɔluɛiya fula o lɛŋnde Ichipi leŋ niŋndo, waŋnda haa ŋ dimul nda ni maa a yɔŋ nda nyɛ o nyɛ le. Mi Isɔluɛiya mal nda, nduyɛ a tɛɛmbuu nda le.
11 Kɛndɛi keŋ nda hiŋ naa nuaa miŋgullo ni, le ma soli naa o lɛŋnde ŋ ke naa le mi le wa nyɛm kɛŋ naa leŋ ni.
12 Oo Mɛlɛka naa, a tusi waŋnda haa nyɛpalaa choo le? Kanifuule, ŋ nɔ kpaaya naŋ chiŋalaŋ faŋga bɛndu hiŋ naa hoo delɔɔ choo wo le. Nduyɛ, ŋ sina nyɛ naŋ nɔ miŋ tosa wo le. Kɛ o numndo naŋ muliŋ ni le ma mala naa.”
13 A teleŋ koŋ, waŋnda o Chuda niŋ kpou wa isisi Chɛhowa lachi latulu a chuauwaa ndaa pɔmbuaa, laandaa ndaa, vɛlɛ a chuauwaa ndaa kaasoŋnda.*
14 A lo isisi kunda koŋ tɛɛŋ, mi nyina Chɛhowa wo tual Chahasiɛɛ po Sɛkalaya wo choo. Sɛkalaya yɛ, finya ndɔ wa Bɛnaya ni, Bɛnaya finya ndɔ wa Chɛyɛɛ ni, Chɛyɛɛ finya ndɔ wa Mataniya ni, po Asafi wo, Livainɔɔ.
15 Mbo dimi aa: “Nya waŋnda Chuda kpou, waŋnda Chulusalɛm, a num Masaa Chɛhosiafati, la yaŋ nilaŋ! Nyɛ Chɛhowa dimul nya wo cho hoo ni, ‘La yɔŋ isiooŋ ɔɔ mi la nyiiya le faŋga bɛndoo hoo le. Kanifuule o cho nya le cho sɔŋga a nda le, kɛ ya Mɛlɛka nyaa cho sɔŋga a nda ni.
16 La kɔ chiŋalaŋ nda siɔdii. A cho wa fulaa o nɛi nda veelu aa Sisi wo, nduyɛ la cho nda saalɔŋ o kpoloŋndo mɛɛlulaŋ o pollo Chɛluɛɛ lachi.
17 O cho nya le cho sɔŋga a nda le. La kɔ sim yi o fondaŋnda nyalaŋ, okoŋ mi la che mɛɛ Chɛhowa cho sɔŋga le nya mbo piŋi nya yɛ. Nya waŋnda Chuda a Chulusalɛm, la yɔŋ isiooŋ ɔɔ mi la nyiiya le. La kuel nda siɔdii, nduyɛ ya Chɛhowa cho wa latulu a nya.’”
18 O lepilɛ niŋ kpe, mi Chɛhosiafati baŋ wulaŋ, mbo fuuluu hɔlla lɛŋ. Nduyɛ mi waŋnda Chuda a waŋnda Chulusalɛm kpou baŋ wulaŋ Chɛhowa lachi le Chɛhowa piɛiyo.
19 Okoŋ mi Livaiyaa fula o pulale Kohati leŋ choo wa, a Koluaitiiya chaŋ ma saŋgala Chɛhowa Mɛlɛka Isɔluɛiya choo choo kpeleŋ.
20 Diimandɔɔ, ma pena chɔnɔŋ pum ma kua o pollo Tɛkowa. Mɛɛ nda wa kɔlaŋ, mi Chɛhosiafati sim mbo dimi aa: “Nya waŋnda Chuda a waŋnda Chulusalɛm, la yaŋ ya nilaŋ! La dɔu laalaŋndo o Chɛhowa Mɛlɛka nyaa niŋ, le halikpeŋ mi la sim yi.* La dɔu laalaŋndo o wanaa suaa le ndu wa niŋ, okoŋ la cho batiuwaa sɔla.”
21 Mɛɛ Chɛhosiafati suukaŋ a waŋnda, mbo yulu puaa iso le choŋndoŋ solioo o Chɛhowa lo. Nduyɛ, ma wa kɔlaŋ a ndu saŋgalaa puaa chɔuwa lachi o nyɛla diandaa laŋ niŋ. Ma wa dimioo aa: “La mel Chɛhowa balikaa, kanifuule kaala lo lechoo ndɔɔ cho le fɛɛŋ a fɛɛŋ.”
22 Mɛɛ nda kandu Chɛhowa saŋgalaa o chondoŋ niŋ a kɔl kɛndɛ, mbo yeŋ waŋnda Amɔŋ, Mowaabi, a haa o tanda ŋpemboo Sɛyaa, a hiŋ le waŋnda Chuda chiŋalaŋndo wa yaŋɔɔleŋ. Okoŋ ma kandu diuwaŋndo.
23 Mi Amɔnaitiiya a Mowabaitiiya mululaŋ wanaa wa o tanda ŋpemboo Sɛyaa wa, ma basu nda tɛɛ. Mɛɛ nda chii nda diu diu, mi ndapila mululaŋ veelaa velle ma diuwaŋ.
24 Mɛɛ waŋnda Chuda kuɛ o bandu mɛŋgɛlaa o pollo niŋ, ma tofa kpeŋgii faŋga bɛndoo wa ve, ma cha dialuŋ ndaŋ vilɛiyoŋ ihini lɛŋ lɛɛsiɛŋ. Waŋndo o pilɛ bɛɛ lo yoomu le.
25 Okoŋ, mi Chɛhosiafati a wanaa nduaa huŋ le ma chɔuviaa nyɛm ndaŋ. Ma saaluŋ nyɔɔŋ nda tɛɛŋ tau tau, nyɛla chuɛɛnaŋndaŋ, a nyɛm kɛndɛ kɛndɛŋ cheleŋ. Mɛɛ nda chɔuviaa muŋ tei a nɔla kɔlaŋ a muŋ kpou le. Le palɛi i yaa a wa muŋ vilioo, kanifuule nyɛm nda chɔuviaa woŋ waŋnuŋ ŋ hɔbɛi.
26 O paale hiɔɔlu leŋ choo, ma chuuŋgiaŋ naapilɛ o Kpoloŋndo* Bɛluaka. Nduyɛ loŋ nda saŋgala Chɛhowa ni. Le sabu koŋ nda ke fondaŋ koŋ diolaŋ ni aa Kpoloŋndo Bɛluaka* haaa a paale hauleŋ ndeŋ.
27 Okoŋ, mi waŋnda Chuda kpou a waŋnda Chulusalɛm, latulu a Chɛhosiafati o wa nda bolleŋ ndo miiŋgu Chulusalɛm a kɔl kɛndɛ. Kanifuule, mi Chɛhowa tosa ma duaunuŋ nyaale yaamɔɔwaa ndaa choo.
28 Okoŋ ma fuuluu Chulusalɛm. A wa kɔlaŋ a nyɛm chaaŋ iyooŋ lɔɔ, towalaŋ, a bululaŋ hɔŋndo. Nduyɛ ma kua o chiɛi Chɛhowa wo.
29 Mɛɛ masɛi o lɛŋnde niŋ kpou tuei mɛɛ Chɛhowa sɔŋga le yaamɔɔwaa Isɔluɛiya yɛ, mi siooŋii nduɛi bii nda.
30 Mi Mɛlɛka tosa mi Chɛhosiafati sɔla pɛŋgioo, nduyɛ wana o wana ve lɛ masale ndɔleŋ paaliaŋ te.
31 Mi Chɛhosiafati hiau lachi a waa o masaleŋ choo o Chuda niŋ. O wa wɔsilaŋ 35 mbo simnuŋ masaa. Nduyɛ, mbo chii wɔsilaŋ 25 o masaleŋ choo Chulusalɛm. Kala ndɔ ndoo nɔ diolaŋ ni aa Asuba, chua Silihi wo.
32 Mbo hiau lachi a kɔlaŋ o nɛi Esa finya ndɔ wo choo, o feŋaŋ lechoo le. Mbo tosa nyɛ cho sakpo Chɛhowa o hɔllo.
33 Kɛ nduyɛ, fondaŋnda filioŋndaŋ la feŋaŋ te, nduyɛ waŋnda ndaa bɛɛndiaa wɔ kɔlta ndalaŋ le Mɛlɛka finyaa ndaa mamaa nuuviaa le.
34 Sɔɔŋ cheleŋ cho a Chɛhosiafati okɔɔ chɔŋ o kandɔŋndo haaa o mɛɛlulaŋ ndoŋ, ŋ cho ŋ poonyiaa o yau Chehu po Hanani wo poonyiaa wo niŋ, nduyɛ miŋ wa vɛlɛ o yau nda poonyiaa konaa a masaa keeku Isɔluɛiya okɔɔ wo niŋ.
35 Okoŋ kɔɔli, mi Chɛhosiafati Masaa le Chuda tosa chɛlaŋndo a Ahasaya Masaa le Isɔluɛi, o tosa dɛnɛ wɔɔŋndo wo.
36 Mbo siiŋguu ndu wana ndɔ wallo le dɛndɛla mamɛŋnda kua Taasi laŋ toosiaa. Nduyɛ Ɛsiɔŋ-kɛbɛ ndaa toosiaa laŋ ni.
37 Kɛ mi Ɛliɛɛsa po Dodavahu wo, fulaa Maluɛsia suaa o Chɛhosiafati lo diomnda Mɛlɛka dimi a ndu okɔɔ laŋ. Mbo dimi aa: “Le mɛɛ ŋ tosa chɛlaŋndo a Ahasaya yɛ, Chɛhowa cho walta numndaŋ tɛɛmbuu.” Le hei, mi dɛndɛlaŋ la kɔɔlu, la nɔla lɛ fuuluuwo Taasi le.
Tɛɛsiaalaŋ
^ Ɔɔ “naapum Miunaitiiya.”
^ Naapum, Pee Mɛŋma Ihɛl Nyɛ Yoomaa Cho Leniŋ Te Wo.”
^ Hibuluiye, “muli hɔlla.”
^ Hibuluiye, “kulii.”
^ Hibuluiye, “puaa ndaa.”
^ Ɔɔ “mi la biunuŋ.”
^ Ɔɔ “Lɛŋnde Dɛŋgbɛleŋ .”
^ O sim, “Salaa.”
