Koloniko Diiŋ Ndɔɔ 21:1-20
21 Okoŋ kɔɔli mi Chɛhosiafati wu,* ma kumbu ndu nda finyaa nduaa mamaa latulu, o Chiee Deeve finya ndɔ mama wo niŋ. Okoŋ, mi Chɛholuam po ndɔ miiŋgu o masaleŋ choo o foofo ndɔɔ.
2 Pɔmbuaa nduaa cho haa ni: Asaluaya, Chɛhayɛɛ, Sɛkalaya, Asaluaya, Maikɛɛ, a Siɛfatiaa. Nda kpou, Chɛhosiafati masaa le Isɔluɛi velu nda ni.
3 Mi finya nda ke nda nyɔɔŋ tau tau. Muŋ cho ni, kaniŋ humboŋ, kooliiyoŋ, vɛlɛ a nyɛm sɔvɛ sɔvɛŋ cheleŋ. Mbo ke nda vɛlɛ chieeŋ bɛnduŋ nda taŋgul a kpakila kala kalalaŋ o Chuda niŋndoŋ. Kɛ mbo ke Chɛholuam masaleŋ, kanifuule ndu wa po tasoo ni.
4 Mɛɛ Chɛholuam miiŋgu o masaleŋ choo o foofo finya ndɔ wo, mbo diu diu pɔmbuaa nduaa kpou a muɛi faŋnde, latulu a laŋgbaa kalla a tiŋ o Isɔluɛi niŋ le masale ndɔleŋ kindioo.
5 Chɛholuam wa wɔsilaŋ 32 mbo simnuŋ masaa, nduyɛ mbo chii wɔsilaŋ la ŋɔmaa o masaleŋ choo Chulusalɛm.
6 Mbo tual nɛila masaa keeku o Isɔluɛi niŋnda kɔɔli, mɛɛ yuŋgu Ehaabi wo tosa yɛ. Kanifuule, mbo yil chua Ehaabi wo o nɔɔ niŋ, nduyɛ mbo hiau lachi a nyɛ bɛnda Chɛhowa o hɔl te wo tosaa.
7 Kɛ Chɛhowa ndoo yeema mbo chii waŋnda o yuŋgu Deeve wo choo le, kanifuule mbo yii kpemaa a Deeve, nduyɛ mbo chuel ndu buŋgɛi maa o cho ndu a puaa nduaa lambuiyo ke le teleŋ o teleŋ.
8 O palɛi nduɛi niŋ, mi Idɔm simul Chuda nduyɛ mbo hɛli masaa a ba ndɔ.
9 Le hei, mi Chɛholuam a laŋgbaa nduaa kalla chaŋ a nyumndaŋ, ma kuel nda a nyɛla ndɔla nyaanaŋnda suaa naŋndaŋ kpou. Okoŋ, mi ndu a laŋgbaa nduaa kalaa sɔŋga o nyɛm nyaanaŋ suaa naŋndoŋ choo wa, yam Idɔmaitiiyaa wa nda a balaa wa.
10 Kɛ mi Idɔm hiau lachi a Chuda simullo haaa a paale hauleŋ ndeŋ. A teleŋ koŋ, mi Libina bɛɛ simul Chuda, kanifuule mbo mal Chɛhowa Mɛlɛka finyaa nduaa mamaa piɛiyo.
11 Mbo toosiaa vɛlɛ fondaŋnda filioŋndaŋ o pemboŋ choo o Chuda niŋ, le halikpeŋ mi waŋnda Chulusalɛm muliŋ mɛlɛkaa cheleŋnda sooluuwo.* Nduyɛ, mbo tosa mi waŋnda Chuda faŋaŋ o nɛi tonyaa choo.
12 Okoŋ, mi Ilaicha wana suaa le Mɛlɛka wo poonyial ndu yooŋgoo aa: “Nyɛ Chɛhowa, Mɛlɛka Deeve finya num mama dimi wo cho hoo ni, ‘A kɛɛ le kɔlaŋ o nɛila Chɛhosiafati finya num ndaŋ choo, a o nɛila Esa masaa le Chuda laŋ choo.
13 Kɛ masaa keeku Isɔluɛi o masaleŋ choo wa, ma muliŋ kɔlaŋ o nɛila ndalaŋ choo, nduyɛ ma tosa mi waŋnda Chuda a Chulusalɛm muliŋ mɛlɛkaa cheleŋnda sooluuwo, mɛɛ yuŋgu Ehaabi wo tosa yɛ. Ma diu diu pɛŋ pɔmbuaa numnda, a nya fula finya pilɔɔ, ma wa a sɔvɛ ma hiau num nda.
14 Le hei, Chɛhowa cho wanaa numnda, puaa numnda, a laandaa numnda nyɛpalaa bɛndoo tusi choo, mbo tɛɛmbuu nyɛ o nyɛ ŋ nɔ.
15 Naala bɔɔbɔɔ cho num delɔɔ choo mi la saaŋgiaa num. A cho naa ŋpuloo sɔla, nduyɛ naa hoo cho wa num saaŋgiaa lepaa o lepaa haaa mi puloŋ fula num.’”
16 Okoŋ, mi Chɛhowa tosa mi Filitiaŋnda vɛlɛ a Alabuiyaa wa Itoopiaŋnda ikɛiya tul Chɛholuam leyɛ.
17 Le hei, ma huŋ chiŋalaŋ Chuda, ma luɛi a kaka, okoŋ ma kuaŋnuŋ a nyɛ o nyɛ wa o chiɛi lemasaa niŋ, latulu a puaa nduaa, vɛlɛ a laandaa nduaa. Chɛhowahasi* po ndɔ lumndo kinɛi nda mel ndu ni.
18 O faŋaŋndɔ o sɔɔŋ muŋ kpou kɔɔli, mi Chɛhowa tusi ndu vɛlɛ naa ŋpulu siŋgu le wo choo.
19 Mɛɛ teleŋ tiŋ hiou, wɔsilaŋ la tiɔɔŋ okoŋ kɔɔli, mi naa wɔɔŋ koŋ tosa mi puloŋ fula ndu. Naa koŋ lo ndu saaŋgiaa haaa mbo wu. Nduyɛ wanaa nduaa lum nyɛm chuŋ kɛndɔŋ le ndu, mɛɛ nda lom nyɛm chuŋ kɛndɔŋ le finyaa nduaa mamaa yɛ le.
20 Chɛholuam wa wɔsilaŋ 32 mbo simnuŋ masaa, nduyɛ mbo chii wɔsilaŋ la ŋɔmaa o masaleŋ choo Chulusalɛm. Mɛɛ o vi, wana o wana tembu kɔl le piɔm ndɔɔ le. Okoŋ ma kumbu ndu o Chiee Deeve Wo, kɛ o cho o fondaŋnda nda kumbu masaa waa laŋ te.
Tɛɛsiaalaŋ
^ Hibuluiye, “ma yambu Chɛhosiafati nda finyaa nduaa mamaa.”
^ Ɔɔ “muliŋ kaa suundɛiyo tosaa a mɛlɛkaa cheleŋnda.”
^ Ndu nda veelu vɛlɛ ni aa Ahasaya.
