Koloniko Diiŋ Ndɔɔ 23:1-21
23 O wɔsi ŋɔmmɛu wo niŋ, mi Chɛhoyada chɔm kɔl simulaa, okoŋ mbo yii kpemaa a masaa. Masaa haa yɛ, waŋnda kɛmɛ wa o kɛ kɛ o ba bɛŋgu ni. Nda cho ni: Asaluaya po Chɛloham ndo, Isimɛɛ po Chɛhohanaŋ ndo, Asaluaya po Obɛdi wo, Maasɛya po Adaya wo, a Ɛlisiafati po Sikili wo.
2 Okoŋ ma balu ba o ba fee o lɛŋnde Chuda leŋ niŋ, ma chuuŋgiaa Livaiyaa wa o chieeŋ bɛndoŋ o Chuda niŋnda kpou naapilɛ, vɛlɛ a bolii layuŋguei o Isɔluɛi ni. Mɛɛ nda hiŋ Chulusalɛm,
3 mi nda kpou yii kpemaa a masaa o chiɛi Mɛlɛka tonyaa niŋ. Okoŋ kɔɔli, mi Chɛhoyada dimul nda aa:
“La yaŋ nilaŋ! Po masaa cho wa o masaleŋ choo ni, a mɛɛ Chɛhowa chua buŋgɛi a puaa Deeve wa okɔɔ yɛ.
4 Nyɛ nya nɔ mi la tosa wo cho hoo ni: La piɔu wanaa soliaa lasalaa a Livaiyaa huŋ wallo o Paale Pɛŋgiaaleŋ choo wa kundalaŋ la yaa. Kundaa o pilɛ cho wa le diola kpakilaŋ mandaa,
5 kundaa o pilɛ cho wa chiɛi masaa mandaa, nduyɛ mi kundaa o pilɔɔ wa Dio Kpaki Chiyii Chiɛiyo mandaa. Okoŋ, mi wanaa tuaa kpou wa o luŋ chiɛi Chɛhowa wo.
6 La chɛl mi wana o wana cheleŋ luɛi o chiɛi Chɛhowa wo niŋ te, mɛɛ wanaa soliaa lasalaa a Livaiyaa cho wallo loŋ nda. Nda nɔ ni ma luɛi, kanifuule nda sɔla hɛlioo le wali diandaa tosaa ni. Nduyɛ, wana o wana nɔ mbo tosa nyɛ Chɛhowa dimul ndu wo.
7 Livaiya nɔ ma balu masaa silɔ, nduyɛ mi wana o wana bii nyɛm ndɔŋ chɔuwoŋ o ba. Wana o wana luɛi nya tɛɛŋ pɛ, o nɔ mbo sɔla piɔmndo. Ba o ba masaa kuɛ pɛ, la kɔ a ndu latulu.”
8 Nyɛ o nyɛ Chɛhoyada wana soliaa lasalaa dimul Livaiya a waŋnda Chuda kpou le tosaa, ma tosa lende kinɛi. Okoŋ mi wana o wana chua wanaa nduaa, a ndaa nɔ wallo o Paale Pɛŋgiaaleŋ choo wa, latulu a wanaa ndaa nɔ wali o Paale Pɛŋgiaaleŋ choo le wa. Kanifuule, Chɛhoyada wana soliaa lasalaa chɛl mi kunda kɛ kɛ pɛŋgi wali ndaa tosaa le.
9 Mi Chɛhoyada wana soliaa lasalaa chua baltaŋ, boola pɔmbɔla puaa chɔuwa,* a boola tiu tiula Masaa Deeve ndoo nɔ laŋ, la wa o chiɛi Mɛlɛka tonyaa niŋ ndaŋ, mbo ke masaa waa. Nduyɛ masaa haa, o kɛ kɛ waŋnda kɛmɛ wa ndu o ba bɛŋgu ni.
10 Okoŋ mbo simi waŋnda kpou o fondaŋnda ndalaŋ, nduyɛ nyɛm chɔuwoŋ wa nda o laba. Haa wa isisi o ba kɛndɔɔ choo o chiɛiyo ikɛi, mi a piliaa wa isisi o ba miallo choo. Apum wa bandu luamaa lasalaa ikɛi, mi apum wa o chiɛiyo ikɛi, ma balu masaa silɔ.
11 Okoŋ ma soli po masaa o bɛɛ, ma wou ndu mɔsil lemasaa, nduyɛ ma kɛsi ndu yau laSawaa* o lebol. Mi Chɛhoyada nda puaa nduaa pɔya ndu, ma siiŋguu ndu masaa. Okoŋ kɔɔli, ma dimi aa: “Maa masaa viou naa choo fɔ!”
12 Mɛɛ Atalaya tuei waŋnda kiltaŋ nduyɛ ma saŋgala masaa, o lepilɛ niŋ kpe, mbo kua naa waŋnda wa o chiɛi Chɛhowa wo wa.
13 Okoŋ, mbo cha masaa isisi o suŋgbuleŋ* ikɛi o dio. Waŋ banaa a wanaa hɔŋ bululaŋ nda wa latulu a masaa, nduyɛ waŋnda o lɛŋndeŋ niŋ kpou wa nyaaloo ma hɔŋ bululaŋ. Wanaa soliaa ŋchonduaa wa nyɛm chaaŋ lɔɔ ma chua chilaŋ le nyaaloo dɔɔnɔŋndo. Okoŋ mi Atalaya sɛɛsiaŋ nyɛlaŋ lekɔɔ, mbo chaŋ choo choo aa: “A yii ya dumbu* fɔ! A yii ya dumbu fɔ!”
14 Kɛ mi Chɛhoyada wana soliaa lasalaa dimul wanaa wa puaa chɔuwa bolleŋ nda aa: “La soli ndu nya tɛɛŋ, nduyɛ wana o wana tol ndu kɔɔli pɛ, la dii ndu a muɛi faŋnde!” Wana soliaa lasalaa ndoo chii nda niŋ dimul aa: “La dii ndu o chiɛi Chɛhowa wo niŋ te.”
15 Okoŋ ma bii ndu. Mɛɛ nda fuuluu a ndu o kpaki nda luei suaa o chiɛi lemasaa niŋndo, o lepilɛ niŋ kpe, ma dii ndu loŋ.
16 Mi Chɛhoyada, masaa vɛlɛ a waŋnda kpou yii kpemaa maa a cho hiouwɔɔ lachi a waa wanaa Chɛhowa wa.
17 Okoŋ kɔɔli, mi waŋnda kpou kua o maaŋ nda sooluu Baal lo, ma pesi pesi ndu. Nduyɛ, ma pesi pesi vɛlɛ bandula ndɔla luamaa lasalalaŋ, a piɔmaa nduaa wɔ wɔ. Ma dii vɛlɛ Mataŋ, wana soliaa lasalaa le Baal o bandula luamaa lasalalaŋ hɔlndɔ.
18 Okoŋ, mi Chɛhoyada yulu wanaa soliaa lasalaa a Livaiya iso le ma wa chiɛi Chɛhowa wo chilaŋ. Nda Deeve ndoo kɛsi a kundalaŋ ni le ma wa chiɛi Chɛhowa wo hɔlteŋ nduyɛ ma soli salala luamaa laŋ o Chɛhowa lo, a mɛɛ i cho i poonyiaa o Sawala Mɛlɛka ke Muuse laŋ niŋ yɛ. Nduyɛ ndaa nɔ ma wa ndi tosaa a kɔl kɛndɛ, ma soli chondoŋ a mɛɛ Deeve ndoo yɔŋgu nɛi chɔmaa yɛ.
19 Mbo kɛsi vɛlɛ wanaa manda diola kpakilaŋ nda o diola chiɛi Chɛhowa wo, le halikpeŋ ma kuuna wana cho o diandaa le wo luɛiyɔɔ.
20 Okoŋ, mbo chua masaa wa puaa chɔuwa bolleŋ nda, a waŋnda kɛmɛ wa o ba bɛŋgu wa, laŋgbaa kalla, masaa wa waŋnda choo wa, a waŋnda kpou o lɛŋndeŋ niŋ, ma liila masaa chɔŋ o chiɛi Chɛhowa wo haaa o chiɛi lemasaa. Ma luɛi o dio kpaki wa a maluaŋ le luɛiyɔɔ o chiɛi lemasaa niŋndo, okoŋ ma kɛsi masaa o kpeŋgbei* lemasaa le waa o masaleŋ choo.
21 Okoŋ, mi waŋnda o lɛŋndeŋ niŋ kpou duaunuŋ nyaale. Nduyɛ chioo wa o kɔl nyulu niŋ, kanifuule ma dii Atalaya a muɛi faŋnde.
Tɛɛsiaalaŋ
^ Boolaŋ ndaŋ, wanaa wuu chiŋuaŋ nda soliŋ ndaŋ kpeku ni.
^ Naapum yau simbulaa sawala Mɛlɛka laŋ la cho la poonyiaa lechoo wo.
^ Hibuluiye, “suŋgbule ndɔleŋ.”
^ Ɔɔ “defoo.”
^ Ɔɔ “kpɛŋɛ.”
